පතොක් මලක තියන විශේෂත්වය දන්නවද? පතොක් මලකට පුලුවන් ඕනම තැනක සර්වයිව් වෙන්න. පතොක් මලක් දන්නවා වැස්සක් හීතලක් පේන තෙක් මානෙකවත් තිබ්බෙ නැතත් නොමැරී ඉන්න. පතොක් මලක් දන්නවා කර්කෂම පොළොවක උනත් කෙලින් සිටගෙන ඉන්න. මම මේක පටන් ගත්තෙම ඒ වගේ කෙල්ලන් ට ආදරෙන්.
මම ආසයි කෙල්ලෙක් ඔලුව කෙලින් තියාගෙන මිනිස්සු මැද්දෙන් ඇවිදිනවා දකින්න. අතේ සත පහක් නැති වෙලාවක උනත් තමන් ගෙ අභිමානය වෙනුවෙන් පෙනී ඉන්නවා දකින්න. ජීවිතය කුණාටු පිට කුණාටු එවන හැම වෙලාවකම ආපහු හැරිලා ඒ කුණාටුව බවට පත් වෙන කෙල්ලෙක්ට පුලුවන් තමන් ගෙ හීන වෙනුවෙන් ලෝකෙ එහා කොණට උනත් තනියෙන් යන්න. ඒම කෙල්ලෙක් ගෙ ඔලුවෙ හැම වෙලාවෙම තියෙන්න ඕන I am not afraid to walk alone in this world කියනෙක.
ලෝකෙ හැමදාම ඔයාට සතුට විතරක් දෙන්නෙ නෑ. මිනිස්සු ඔයාට පාවඩ එලලා පිළිගන්නෙත් නෑ. කිසිම කෙනෙක් ඔයාගෙ පාර ඔයාට හදලා දෙන්නෙ නෑ. යන පාර එලිපෙහෙලි කරලා හදාගන්න වෙන්නෙ ඔයාටමයි. එතකොට ඔයාට සිද්දවෙනවා නැගිට ගන්න බැරි වෙන්න කුඩු වෙන්න වැටිලා හිටියත් අතපය ගසා දාලා නැගිටින්න. කවුරු වෙනුවෙන් ද? කවුරු වෙනුවෙන්වත් නෙවෙයි . ඔයා ම වෙනුවෙන්.
මම මීට අවුරුදු පහකට කලින් හරිම ලාමක කෙල්ලෙක්. ජීවිතය ගැන මට තිබ්බ අවබෝධය හරිම නිල්. මම හැමදාම හිතුවා ඇයි මට ඒම වෙන්නෙ කියලා. මගෙ වටේ හිටපු මිනිස්සු මාව උස්සලා පොළේ ගැහුවා. කුඩුපට්ටම් වෙන්නම. මම නැගිටිනවද නැද්ද කියලා බලාගෙන හිටියා. මම නැගිට්ටා කෝමද? හිටියට වඩා දෙතුන් ගුණයක් හයියට.
තමන් වෙනුවෙන් කිසිම කෙනෙක් පෙනී ඉදියි කියලා විශ්වාස කරන්න එපා. ඒම විශ්වාස කරනකන් ඔයාට තමන් ගෙ ගමන කවදාවත් යන්න වෙන්නෙ නෑ. ඔයා කවුරුහරි ඔයාව බේරගන්න එනකන් බලාගෙන ඉන්නව නන් කවදාවත් ඔයා ඉගන ගන්නෙ නෑ තමන් කොච්චර හයියද කියනෙක.
මේ කොළඹ ඕන ම පාරක මම යනවා. මම ජීවිතේ ට නොගිය පාරවල් තියනවා. ඒත් මම යනවා. තනියම ඕන පිච් එකක ප්ලේ කරනවා. මම දුකින් නන් මම ම මගෙ හිත හදනවා. වැටිල නන් මම ම මට බැකප් කරනවා. මොකද මට මේ ලෝකෙ විශ්වාස ම අත තියන්නෙ මන් ගාව . මම දන්නවා ඒ අත කිසිම දාක මාව අතාරින්නෙ නෑ කියලා. මට විශ්වාසවන්තම ගමන් සගයා මමම යි. මොකද මම කිසිම ගමනක් අතරමග මාව දාලා යන්නෙ නෑ. මගාරින්නෙ නෑ. තනිකරන්නෙ නෑ. ඉතින් මට මම ඉන්නවා. ඔයාලට ඊට වඩා හයියක් ඕනද?
කෙල්ලෙක් ස්වාධීනව ඉන්නවා කියන්නෙ ෆිසිකල් කාරණයක් ම නෙවෙයි . සිගරට් එකක් ජොයින්ට් එකක් කටේ ගහ ගත්තම ගෑනු ස්වාදීන වෙන්නෙ නෑ. ගෑණු ස්වාධීන වෙන්නෝන තින්කින්ග් වලින්. ඒම බැලුවම සිගරට් එක කටේ ගහගෙන සමතැන ඉල්ලන, මම පට්ට ඉන්ඩිපෙන්ඩන්ට් කෙල්ලෙක් කියලා පෙන්නන්න හදන කෙල්ලෙක්ට වඩා ගාමන්ට් එකක මැෂින් පාගන කෙල්ල මට ස්වාධීනයි.
කෙල්ලෙක් ට පුලුවන් වෙන්නෝන සහරාවට ගෙනත් ඇතෑරියත් සර්වයිව් වෙන්න. ගෑණුන්ට සහජෙන් එන සර්වයිව් වීමේ හැකියාව සමහර කෙල්ලො යූස් නොකරන්නෙ ඇයි කියනෙක මට ප්‍රශ්නයක්. හෙට මාව මහපාරට වැටුණත් එකේ ඉදන් පටන් ගන්න පුලුවන් විදියෙ ගට් එකක් මට අද තියනවා. ඒක හැදුනෙ ම දවස ගානෙ මුහුණ දුන්න දේවල් එක්ක. කවදාහරි මගෙ සහකාරයා එයාගෙ ජීවිතේ ඇතුලෙ තුන් මුනින්දාලා ඇදන් වැටුණත් ඒකව එක උරහිසක තියාගෙන මේ ගේම් එක ප්ලේ කරන්න මට පුලුවන් . මම ස්වාදීනයි කියන්නෙ අන්න ඒකට. මම මගෙ ජීවිතේ ඇතුළෙ ෆිෆ්ටි ෆිෆ්ටි නෙවෙයි .100 % වගකීමකින් මම ජීවත් වෙනවා.
මේ පතොක් මල් කන්සෙප්ට් එක ඔයාලගෙ ජීවිතේට ඇප්ලයි කර ගන්න කියලා මතක් කරනවා. ඒම පතොක් මල් කෙල්ලන්ව මන් දන්නවා. ඒ හැමෝම මේ ගමන යන හැටි ,වැටෙන හැටි, අඩන හැටි, ආය නැගිටින හැටි ආදරෙන් බලන් ඉන්නවා. අඩන්න ඕන නන් උරහිස දෙනවා. හදවතින් ම වැළදගන්නවා.
සර්ව සාධාරණ ජීවිත නොලබපු ඕනම කෙල්ලෙක්ට පතොක් මලක් වගේ ජීවත් වෙන්න වෙනවා. ඒම ඔලුව උස්සන් ඉන්න පුලුවන් තාක් කල් ඔයා මේ ජීවිතේ දිනයි. සමරයි. විදියි.
පර්සෝනා කතාවෙ එන එක දෙයක් මම උදේ හවා මට මතක් කරවනවා. කණ්ණාඩිය ඉස්සරහ හිටගන්න ඕන ම වෙලාවක මම මගෙ ඔලුවෙ තියන ක්‍රවුන් එකක් දකිනවා. ඒ වෙලාවට ඇගිල්ලෙන් ඇනලා මම මට කියනවා,
මගෙ ඔටුන්න හෙලවෙන්න පුලුවන් . හැබැයි ඒක කවදාවත් ගැලවෙන්න මම ඉඩ තියන්නෙ නෑ –
-Sami Romana Banneheka