ස්වීඩනය පුරාමත් , ඩලානා පළාත පුරාත් දැකිය හැක්කේ රතු පාට ගෙවල්ය .විසි තිස් වාරයක් පමණ ස්වීඩනයට පැමිණ ඇතත් මෙසේ ගෙවල් රතු පාට වීමේ රහස දැනගත හැකි වූයේ මෙවරය . එලෙස බොහෝ නිවාස රතු පාට වීමට හේතුව ඉතා රසවත්ය .
මා දැන් සිටින ඩලානා පළාතේ FALUN නමැති ප්‍රදේශය තඹ නිධි සඳහා ප්‍රසිද්ධය . තඹ සමග ගොඩ දමන පස් වල තද රතු පැහැයක් තිබේ . ඒවායින් ලබා ගන්නා රතු වර්ණ තීන්ත මුල් කාලයේ සිටම මෙහි ලෑලි ගෙවල් වල ආලේප කර තිබේ . ඉක්මනින් දැව වලට උරාගෙන , තෙතමනය වාෂ්ප වීමත් , එහි ඇති ඛනිජ ද්‍රව්‍ය නිසා දැව බොහෝ කල් නොදිරා ආරක්ෂා වීමත් නිසා දිගින් දිගටම මේ රතු පැහැය භාවිත විය . FALU ROCO නමින් එය හැඳින් විය .
ස්වීඩනයේ සම්ප්‍රදායික අගයන් ආරක්ෂා කිරීම් වස් දැන් සෑදෙන නිවාස සඳහාද එම පැහැය භාවිත කරන අතර කොළ පැහැති තණ බිම් වල හෝ නිල් පැහැති විල් තලා පසුබිම් මත මේ රතු පැහැ ගෙවල් වල දර්ශණය නිමා කරන්නේ සුන්දර අවකාශයකි .
එමෙන්ම මෙහි කිසිවෙකුට තමන් කැමැති වර්ණ පෞද්ගලික නිවාස වලට යොදාගත නොහැකිය . නිවාස වල සැලසුම් සහ වර්ණ රජය අනුමත ඒවා විය යුතුය !
නාරද විජයසූරිය