3 වැනි ලෝක යුද්ධය අාවොත් : ඔබට අනතුරු ඇඟවීමට වත් කාලයක් ඉතුරු නොවේවි ….
මේ යුගයේදී යුද්ධයක් ඇවිල ගියහොත් එය නිසැකවම මනුෂ්‍ය වර්ගයා නැවත ගල් යුගය කරා ඇද දමන මහා විනාශකාරී යුද්ධයක් බවට පත්විය හැකිය.
තුන්වැනි ලෝක යුද්ධය නිසැකවම මිහිමත දක්නට ලැබෙන ප්‍රථම සහ අවසාන මහා න්‍යෂ්ටික යුද්ධය වනු ඇත. සයිබර් අවකාශය මෙන්ම අභ්‍යවකාශයද දෙදරවමින් ඇවිල යන මේ මහා යුද්ධය ගැන කලින් අනතුරු ඇඟැවීමක් හෝ හුදී ජනයාට නොලැබෙනු ඇත. මෙහි අවසානය වන්නේ ලෝකය සහ මානව වර්ගයා නැවතත් සිය පරිනාමයේ මුල් අවධියට තල්ලු කර දැමීමය. ඒ යුද්ධය ඒ තරම්ම බිහිසුණු වන්නට නියමිතය.
තුන්වැනි ලෝක යුද්ධයක් ඇරැඹුණහොත් ඒ ගැන සිතන්නටත් පෙර ලෝකයෙන් බහුතරයක් අළු දූලි බවට පත්වන්නට හැකි බව දැන් විවිධ රටවල විද්වත්හු කරුණු දක්වා සිටිති. ලෝකාවසානය ළඟාවූවාක් මෙන් බටහිර චිත්‍රපටවල දක්නට ලැබෙන මහා විනාශකාරී අවසානයක් කරා මානවයා ඇද දමන මේ යුද්ධයට මුලින්ම අතපොවන්නේ කවුරුන් විය හැකිද? ඒ ගැන පළව ඇති නවතම වාර්තාවට අනුව තුන්වැනි ලෝක යුද්ධයට මුලපුරන්නට හැකි රටවල් දහයක ලැයිස්තුවක් ඉදිරිපත්ව තිබේ. එය මෙතෙක් ලෝකයේ බහුතරය සිතා උන්නාට වඩා වෙනස් ලැයිස්තුවකි.
මේ ලැයිස්තුවේ මුලින්ම සිටින්නේ ඊශ්‍රායලයයි. එම රාජ්ජය ලෝකයේ කිසිදු රටක් මායිම් නොකරන අන්තගාමී අාධානග්‍රාහී තමන්ගේම වූ පිළිවෙතක් දරන රටක් වන අතර ඉරානය සහ සිරියාව වෙත ඔවුන් හිටිහැටියේ ප්‍රහාර එල්ලකරනු ඇති බවට වූ අනාවැකියද දැන් සනාථ කර හමාරය. ඊශ්‍රායලයේ මේ අතපෙවීම මුස්ලිම් රටවල් එක පෙරමුණකට සන්ධාන ගත කිරීමකට හේතුවන අතරම ලෝකයේ බලවත් රාජ්ජ ඊශ්‍රායල හිතැති හෝ ඊශ්‍රායල විරෝධී ලෙස දෙපසට බෙදෙනු ඇත.
ඊළඟට වඩාත් සැකසහිත රාජ්ජය ඉරානයයි. දැනටමත් අභ්‍යන්තර ගැටලු රැසකට මැදිව සිටින ඉරානය හිතුවක්කාර න්‍යෂ්ටික වැඩපිළිවෙළකට අත ගසා සිටියි. එරට පාලකයාද අමෙරිකාව ඇතුළු බලවත් රටවල්වල දැඩි විවේචනයට ලක්ව සිටින අතරම මුස්ලිම් රටවල සහයෝගය එරටට පක්ෂව ලැබී තිබේ. හදිසි කුපිත කිරීමක් මත ඉරානය වෙත එල්ලවෙන ප්‍රහාරයක් හේතුවෙන්ද ලෝකයේ රාජ්‍යන් දෙපිල බෙදී කරන විනාශකාරී යුද්ධයකට ඇද දමනු ඇත.
සිරියාවේ විටින් විට ඇවිල පවතින යුද්ධය ලෝකයේ අවසන් මහා යුද්ධය කරා දිග්ගැස්සීමට ඇති ඉඩකඩ බොහෝය. දැනටමත් රුසියාව සහ අමෙරිකාව සිරියානු භූමිය අත්පත් කරගන ඇති අතර එරට සටන තමන්ගේ සටනක් බවට පත්කරගන හමාරය. ඒ මදිවාට සිරියාව සතුව න්‍යෂ්ටික අවි පවතින අතර ඒවා කොයි මොහොතේ හෝ පත්තුවිය හැකි අවදානම මතුව තිබේ.
සිරියාවට පසුව ලෝකය අවදානමේ හෙළිය හැකි රටවල් ලෙස පිළිවෙළින් රුසියාව, අමෙරිකාව, චීනය, පාකිස්තානය, උතුරු කොරියාව, තුර්කිය සහ ඊජිප්තුව නම්කර තිබේ. මේ කියන රටවල් තුළ ඇති දේශපාලන ආර්ථික සහ ආරක්ෂක වියවුල් සහගත බවත්, ලෝක බලවතුන් වීම සඳහා දරන අරගලයත්, ඒවා පාලනය සඳහා පත්ව ඇති කඩි කුලප්පුකාර නායකයන්ගේ අත්තනෝමතික හැසිරීමත් නිසා කිසියම් මොහොතක හදිසියේම න්‍යෂ්ටික අවි පරිහරණයට අතපෙවිය හැකි අතරම තුන්වැනි ලෝක යුද්ධයට එයින් මගපෑදිය හැකිය. එවන් යුද්ධයක් හටගතහොත් කෙබඳු ප්‍රතිඵලයක් අත්වේවිද?
අමෙරිකානු විද්‍යාඥයින්ගේ ෆෙඩරේෂනයේ නවතම වාර්තාවන්ට අනුව ලෝකයේ ක්‍රියාකාරී න්‍යෂ්ටික පිපිරුම් ශීර්ෂ 14,900ක් පවතී. න්‍යෂ්ඨික පිපිරුම් ශීර්ෂ ලෙස හැඳින්වෙන්නේ න්‍යෂ්ඨික ද්‍රව්‍ය අඩංගු සහ පිපිරැම් යාන්ත්‍රණය සහිත කොටසය. අපට තේරෙන බාසාවෙන් කිවහොත් බෝම්බය සහිත කොටසය. මේවා මිසයිලවලට සවිකිරීම මගින් ලෝකයේ විවිධ ඉලක්ක කරා යැවීමට හැකිය. බොහෝ දුරට මේ ඉලක්ක ලෙස ගැනෙන්නේ න්‍යෂ්ටික යුද අවි සතු පසමිතුරු රටවල්වල ප්‍රධාන නගර සහ න්‍යෂ්ටික ප්‍රහාරක යුද අවි සඟවා ඇති මධ්‍යස්ථාන, නෞකා, සබ්මැරීන බඳු එල්ලයන්ය.
මේ වාර්තාවට අනුව ලෝකයේ වැඩිම න්‍යෂ්ටික පිපිරුම් ශීර්ෂ හෙවත් සමූලඝාතක අවි නැතිනම් බෝම්බ සතුව ඇති රට රුසියාවයි. එය සතුව එබඳු අවි 7000කි. ඊළඟට ලෝකයම න්‍යෂ්ටික අනතුරකට පත්කළ හැකි තරම් වූ අවි තොගායක් සහිත රට අමෙරිකාවයි. එය සතුව න්‍යෂ්ටික අවි ශීර්ෂ 6800ක් පවතියි. මීට අවුරුදු කිහිපයකට කලින් 39 හැවිරිදි ලෝකයේ තරුණම රාජ්‍ය නායකයා තමන්ගේ ජනාධිපතිවරයා බවට පත්කරගත් ප්‍රංශය ලෝකයේ තුන්වැනි න්‍යෂ්ටික අවි බලවතා හැටියට පෙරට විත් තිබේ. ඔවුන් සතු පිපිරුම් ශීර්ෂ ප්‍රමාණය 300කි.
ඇස් සිහින් කහ පැහැති පුංචි මිනිසුන් කණ්ඩායමක් ලෝකය පාලනය කරනු ඇති බවට අනාගත ශතවර්ෂ ගැන අනාවැකි කියූ නොස්ත්‍රදාමුස්ගේ කතාව සනාථ කරන්නට මෙන් චීනය සතු න්‍යෂ්ටික අවි ශීර්ෂ සංඛ්‍යාව 270කි. ඒ හා සමාන ශරීර ලක්ෂණ සහිත නමුත් වඩාත් භයානක තීන්දුවකට කිසිදු පැකිලීමකින් තොරව එන්නට සමත් උතුරු කොරියාව සතුව ඇතැයි වාර්තා වී ඇත්තේ මෙබඳු පිපුරුම් ශීර්ෂ 10ක් පමණි.
චීනයට පසු ලෝකයේ වැඩිම න්‍යෂ්ටික පිපුරුම් බලය ඇත්තේ මහා බ්‍රිතාන්‍යයටය. එය 215කි. ලෝකයේ අවසානය තීන්දු කළ හැකි හයවැනි බලවතා පාකිස්තානයයි. එරට සතුව න්‍යෂ්ටික බෝම්බ 130කි. ඊළඟට ඇත්තේ අපේ අසල්වැසියා වන ඉන්දියාවයි. එය සතු බෝම්බ ප්‍රමාණය 120ක් ලෙස වාර්තා වෙයි. ලෝකය වනසා දැමීමේ බලය සහිත සහ නාහෙට නාහන රාජ්ජයක් ලෙස ප්‍රසිද්ධව ඇති අනෙක් රට ඊශ්‍රායලයයි. එරට සතුව ක්‍රියාකාරී මට්ටමේ බෝම්බ 80ක් ඇති බව කියයි.
මතක තබාගත යුතු කාරණාව වන්නේ මේ සියල්ල මේ රටවල් විසින් ස්වේච්ඡාවෙන් ඉදිරිපත් කළ වාර්තාවන්ගේ සඳහන් ප්‍රමාණය පමණක් බවය. විශේෂයෙන්ම රහසිගත න්‍යෂ්ටික බලය පරිහරණය කරන චීනය, උතුරු කොරියාව, ඊශ්‍රායලය, ඉරානය බඳු රටවල් සතුව ඇති නිශ්චිත න්‍යෂ්ටික බෝම්බ ප්‍රමාණය පිළිබඳ නිවැරුදි සහතිකයක් ඇත්තේ නැත.
ඒ තත්ත්වය අමෙරිකාව, රුසියාව, ප්‍රංශය බඳු ලෝක බලවතුන්ගේ වාර්තාවන් පිළිබඳව සැලකිල්ලට ගැනීමේදීද සාධාරණය. අපට සැක සංකා සහිතව බලාපොරොත්තු විය හැක්කේ ලෝකයේ න්‍යෂ්ටික පිපිරුම් බලය මේ කියනවාට වඩා ඉහළ මට්ටමක පවතින බවටය. එසේම අමෙරිකාව ඇතුළු මහා බලවතුන් සැකකරන අන්දමට උතුරු කොරියාව සතුව ඇති න්‍යෂ්ටික බෝම්බ ඉතා ප්‍රාථමික මට්ටමේ ඒවාය. නමුත් එය එසේ බවට කිසිවෙකුටවත් ස්ථිරසාර සහතික කිරීමට එළැඹීමට නොහැක්කේ එරට අනෙකුත් ලෝකයාගෙන් වැසුණු රාජ්ජයක් ලෙස, තහනම් දේශයක් ලෙස පවතින නිසාය.
කෙසේ වුවද මේ කියන බෝම්බ ශීර්ෂ 14900ම පිපිරුම පසෙක තිබියදී ඉන් එක් බෝම්බයක් පිපිරී ගියහොත් සිදුවිය හැකි හානිය කොතරම් වේවිද? ලෝකයේ වඩාත් ප්‍රබලම, ඉතාමත් හානිදායී සහ මහා විනාශයක් ගෙන දිය හැකි බෝම්බය අමෙරිකාව සතුව ඇති බව වාර්තාගතය. එය නම්කර ඇත්තේ B-83 ලෙසටය. ඉතින් එරට ජනාධිපතිගේ රතු කට්ට පැන මේ කියන B-83 බෝම්බයක් යම් නගරයකට එල්ල කළහොත් එතැන සිදුවිය හැකි අලකලංචිය කෙබඳු වේවිද? මේ බෝම්බය සතු විනාශකාරී බලය ගණන් බලා ඇති අන්දමට ජපානයේ හිරෝෂිමා වෙත පතිත කළ පුංචි කොලුවා ලෙස නම් ලද බෝම්බය මෙන් 79 ගුණයකි!!
ජපානයේදී පුංචි කොලුවා සිදුකළ විනාශය කෙතරම්දැයි යන්න ඔබ මෙහිදී මතකයට නංවා ගත යුතුය. බෝම්බය වැටුණු සැණින් නගරයේ සියයට 90ක්ම සුන්නද්ධූලි බවට පත්විය. අසූදහසක් ඒ මොහොතේ මියගිය අතර පසුව ආ න්‍යෂ්ටික විකිරණ බලපෑමට හසුව දස දහස් ගණනක් වසර ගණනාවක් යනතුරුම වේදනා විඳ මියගියහ. දැන් මේ කියන B-83 එබඳු 79 ගුණයක විනාශකාරයෙකි.
යම් හෙයකින් මොස්කව් වෙත මෙම බෝම්බයක් අතහැරියහොත්, එය පතිත වන ස්ථානයේ අඩි 300ක් ගැඹුරැති සහ අඩි 1,378ක් විශාලැති මහා ආවාටයක් හෑරී යනු ඇත. එය පුපුරා ගිය සැණින්ම එතැන සිට වර්ග සැතපුම් දෙකහමාරක් දුරක් දක්වා පැතිරුණු යෝධ ගිනි බෝලයක් ප්‍රතිඵලය වන්නට නියමිතය. එහි ඌෂ්ණත්වය සෙල්සියස් අංශක මිලියන 83.3ක් බඳු ඉහළ අගයකට පත්වීමට නියමිතය. (ෆැරන්හයිට් වලින් අංශක මිලියන 150ක් පමණය)
මේ කියන්නේ ඉර හතක් පායනවා යැයි අපේ පැරැණි පොත්වල සඳහන් කතාවටත් එහා ගිය තත්ත්වයකි. මෙකී B-83 බෝම්බය පුපුරා යාමෙන් ජනිත පීඩනය මගින් ඇතිකරන කම්පන තරංගය හේතුකොට වර්ග සැතපුම් 13ක වපසරියක සෑම දිසාවකම ඇති සියලු ගොඩනැගිලි ගහකොළ සමතලා වී යනු ඇත. එවන් විටක මිනිසුන්ට සහ සතුන්ට සිදුවන සන්තෑසිය අලුතෙන්ම කිවයුතුද?
පිපිරුම නිසා නිකුත්වන සමස්ත බලයෙන් සියයට 35ක් පමණක් ආධාරකර ගනිමින් ජනිතවන සියල්ල අළුකර දමන තාප විකිරණ ශක්තිය වර්ග සැතැපුම් 162ක් වූ වට ප්‍රමාණයක පැතිර යන්නට නියමිතය. කෙසේ හෝ මේ අනතුරුදායක සීමාව තුළ සිටින අයට තමන් පිළිස්සෙන බව දැනෙනු ඇත්තේ තත්ත්පරයකින් සුළු කොටසක කාලයකදී පමණි. ඒ වනවිට ඔවුන්ගේ ස්නායු අග්‍රයන්ද දැවී අළු වී යන හෙයිනි.
ඉන්පසු මහා විකිරණ ප්‍රහාරය ඇරැඹෙන අතර සුළඟ නැති මොහොතක වුවද වර්ග සැතැපුම් 8ක වටාපිටාවක ජීවත්වන සියලු දෙනා තදින්ම විකිරණ ගොදුරු බවට පත්වන්නට නියමිතය. ඒ ප්‍රදේශය තුළ ජීවත්වූ සියයට 90ක්ම විකිරණ බලපෑමෙන් මරණයට පත්වන්නට නියමිතය.
ඉතින් මේ එක B-83 බෝම්බයක් නිසා සිදුවන හානියේ ප්‍රමාණයයි. රුසියාව සහ අමෙරිකාව සතුව ඇති සියලු න්‍යෂ්ටික බෝම්බ මේ කියන B-83 බෝම්බ යැයි සැලකුවහොත් මේ රටවල් දෙක සතුව පමණක් ඇති තාප න්‍යෂ්ටික බෝම්බ ප්‍රමාණය 13800කි. ඉතින් මේ බෝම්බ ප්‍රමාණය සතුව ඇති හානිදායී ශක්තිය මුළු අමෙරිකාව වසරක් පුරා භාවිතා කරන ශක්තියට සමානය.
මේ කියන බෝම්බ 13800ම සමාන දුර ඇතිව ලෝකයේ මහා නගරවලට සහ ඉතිරිය ගම්මාන කිහිපයකට පතිත වනසේ පුපුරවා හැරියහොත් කුමක් සිදුවේවිද? එක්වරම සිදුවන්නේ කිලෝමීටර 9ක වටප්‍රමාණයක වූ සජීවී සියල්ල සියුම් දූලි අංශු බවට පත්ව වැනැසී යාමයි. වර්ග සැතපුම් 90000ක් තුළ ඇති සියලු ගොඩනැගිලි යටිතල පහසුකම් පුපුරා සුන්නද් ධූලි බවට පත්ව යනු ඇත.
ඒ අනුව නිව් යෝර්කය තරම් විශාල වූ ලෝකයේ මහා නගර 295ක් දූවිලි කාන්තාර බවට මොහොතකින් පත්වනු ඇත. ඊළඟට වර්ග සැතැපුම් 31000ක් වූ යෝධ ගිනි බෝලයක් හටගන්නා අතර ඒ ගිනි ජාලාවන්ට හසුවන සියල්ල මොහොතකින් දැවී අළු වී යන්නට නියමිතය. මේ හේතුවෙන් ලන්ඩනය තරම් වූ නගර 3700ක් අළු වී නවදැලි හේන් ලෙස දිස්වනු ඇත. අයනිකෘත විකිරණ වලාවන් ලෝකයේ සතර දිග්භාගයේ වර්ග සැතපුම් එක් ලක්ෂ දස දහසක් වසා පැතිර යන්නට ඇරැඹෙනු ඇත්තේ එතැනින් පසුවය.
මේ මහා විකිරණ ප්‍රහාරයට ලක්වන බිලියන ගණනක් ලෝකවාසීහු පළමු පැය තුළදී මියයන්නට නියමිතය. ඊළඟට එළැඹෙනුයේ වඩාත් භයානකම තත්ත්වයයි. ඉහත කී සියල්ලෙන්ම දිවි රැකගන්නට කවුරුන් හෝ සමත් වුවහොත් තමන් මියගියා නම් වඩාත් හොඳ යැයි සිතෙන තත්ත්වයක් උදාවන අපාගත කාලයයි.
මිනිසා අතින් නිර්මිත කිසිදු දෙයක් නැති කන්නට බොන්නට කිසිදු දෙයක් නැති ලොව පුරා න්‍යෂ්ටික අළු දූවිලි වලින් හාත්පස වැසී අඳුර පැතිරී ගිය එහෙයින්ම සූර්යාලෝකය බිඳකුදු නොලැබෙන වසර 2000ක් පුරා පැතිර පවතින මහා ශීත යුගය ලෝකය වසාගනු ඇත. ඉන්පසු මිනිසා ගල් යුගයේ සිට නැවත ගමන අරඹනු ඇත
උපුටා ගැනීම අන්තර්ජාලයෙනි
මූලාශ්‍රය: ගුප්ත ලෝකය