නිර්මලයි මායි බැන්ඳේ අනූ හතරෙ මැයි. බැඳල කතා වුනා ටික කාලයක් සොමියෙ ඉමු පොඩි උන් හදන් නැතුව කියලා. ඔන්න ඉතින් අපි දෙන්නගෙ වැඩේ වුනේ ට්‍රිප් යන එක.
දවසක් මෙහෙම ට්‍රිප් එකක් ගියා මගේ පොඩිම මල්ලී රස්සාව කරපු පොලොන්නරුවට. මිනිහ රිසර්ච් ඇසිස්ටන්ට් කෙනෙක් රිලව් ගැන ස්ටඩි කරන ස්මිත්සෝනියන් ඉන්ස්ටිටියුට් එකේ. වැව පිට්ටනියේ හරිම ලස්සන තැනක මිනිහ හිටියේ. මෑන්සුයි මමයි හවසට වැව් හුලන් වැදෙමින් අඩියක් ගහනවා. නිර්මලත් අපි දෙන්නගෙ අරාබි නිසොල්ලාසෙටත් වඩා රසවත් කතා අහන් ඉඳන් ඉන්නවා. එයා ඉතින් බොන් නැති හින්ඳා ඔරෙන්ජ් වගේ දෙයක් හදන් එනවා. අනික ගෑනු ඔය එලිමහනවල් වලට ගියාම ගොඩ ජාති බොන්න කැමතිත් නෑනේ ටොයිලට් ප්‍රශ්නෙ වෙයි කියලා. අපි දෙන්න හොඳ වැව් මාලුවෙක් එහෙම බැදන් සප්පායම් වෙනවා. රෑට කන්නේ අර මල්ලි හිටපු ලොජ් එකේ උයන උක්කු බන්ඩා හදන රස කෑම.
දෙවනි දවසෙ රෑ මල්ලි කිව්වා ‘මරු චයිනීස් රෙස්ටුරන්ට් එකක් තියනවා යමුද කන්න එතනට අද රෑට?’ කියලා. නිර්මලා මගෙ දිහා ‘අනේ යමුකො සුදූ’ බැල්මක් දාපු හින්ඳා මාත් හා කිව්වා. ඔන්න දෙක තුනක් ඇනගෙන පරන වෑන් කබලෙ නැගලා ගියා ඒ චයිනීස් එකට. අම්ම බොල! යකෝ චීනෙවත් නෑ බන් ඒ තරන් ඩ්‍රැගන්ලා. ඇතුල් වෙන තැනම හිටවපු ඩ්‍රැගන් කෙනෙක්. ඔලුවෙත් වැදුන උගෙ මගුල් තල්ල. එල්ලිලා තියන ලයිට් රතු පාටයි. ඒවයේ ලෑම්ප්ශේඩ් වල කලු පොඩි ඩ්‍රැගන් පැටව්. බිත්තියේ මොන තරන් ඩ්‍රැගන්ලද කිව්වොත් ඉස්සරහා එකාගේ පුක අස්සෙ පස්සෙ එකාගේ හොට. ඇයි ඉතින් ආයෙ කිහිල්ල අස්සෙ ගහගන්නයැ උගෙ හොට. සමහරක් උන් කටින් දුම් පිඹින එක පේන්නේ ඉස්සරහා එකාගේ පුකෙන් දුම් එනව වගේ. ඒ මදිවට ‘චී..න්.. චා..සී.. චූ…චා ආ..න්’ ගගා හීන් හඬින් යන චීන සන්ගීතය. අම්මප ඇතුල් වෙනකොටම ඇස් දෙක සමතලා වෙච්ච පරන චීනෙක් එයි කියල හිතුවේ ‘චව් චැන් චුක් පියූ චැන් පොන්’ ගගා. හොඳ වෙලාවට ඒ තරන් ආයෝජනයක් කරන්න හිතල නෑ උන්. කලුවරයි, අමුතුම සුවඳකුත් දාලා. නිර්මලා කිව්වා ඒ ලැවැන්ඩර් කියලා. මම හිතුවෙ ගිනි පිඹින්න තටඹනකොට ඩ්‍රැගන්ලට පුප් ගිහින් එන සුවඳ කියලා.
ඔන්න තට්ට, කොට, බඳ මහත, කලු එකෙක් රතු පාට මකරෙක් ඇඳපු කලු පාට මෙනු එකක් ගෙනාවා. මම උගෙන් ඇහුවා ‘අයියෙ ඔය චීනෙ මැස්සො වගේ මකරු ඉන්නවද?’ කියලා. නිර්මලා මගේ කකුලට එයාගෙ කකුලෙන් ගැහුවා අරූව බයිට් කරන්න එපා කියලා. අනේ ඒ අයියා අහින්සක හිනාවක් දාලා බිත්ති දිහා බලනවා චිත්‍ර ප්‍රදර්ශනේකට ආපු එකෙක් වගේ. මට ෂුවර් ඌත් එදා තමා ඔච්චර මකරු ගොඩක් දැක්කේ. ‘මොකෝ බන්, මකරු පැටව් ගහලද බිත්තියේම?’ කියල මල්ලි ඇහුවම තමා ඌ ආයෙ අපි දිහා බැලුවේ. ඕඩර් කරා චියිනීස් ෆ්‍රයිඩ් රයිස්. දන්නෙ ඉතින් චීන කෑම වලින් ඔච්චරනේ. තව එකක් දෙකකුත් ඇන ගත්තා. අජින මොටෝ වලින් රහ කෙරූ රහම රහ බත් එකක් ගෙනාවා. කෑවා ඇති වෙන්න. ඔන්න බිල ගෙවලා එන්න ආවා. ‘අඩේ මරු චයිනීස් එකක්නේ බන් පොලොන්නරුවෙ වෙලත්’ කියලා මලයට කිව්වා. ඌ කිව්වා. ‘පොලොන්නරුවෙ වුනත් කියන්නේ සුසාන් අයියා. හිතන්න එපා පොලොන්නරුව ගැන එහෙම. මෙහෙ ඉන්නවා චයිනීස් කන පොරවල්. මාර බිස්නස් ඔය තැනට’ කියලා මල්ලි හිනාවක් දැම්මා. ඒක කින්ඩියට කියපු එකක්ද නැද්ද කියලත් මට සැකයක් ආවා.
නවාතැනට ගිහින් සැපට නිදුවා. පහුවදා උදෙන්ම ඇහැරිලා වැවේ නෑවා. මාරයි බන්. මේ තමා ජීවිතේ! නිර්මලා ෂවර් එකේ නෑවා වැවේ වතුර මඩ පාටයි ටිකක් කියල. ගෑනුනන් මෙලෝ රහක් ගන්න දන්න උන් නෙවෙයි බන්. දැන් නොසෑහෙන්න බඩගිනියි. මල්ලි කිව්වා ‘වැව් මාලුත් එක්ක ඉන්ඳියප්ප කනවද?’ කියලා. මායි නිර්මලයි දෙන්නම අතුත් උස්සලා ‘ඔව්..ව්’ කිව්වා හරියට අර තුනේ පන්තියේ නම් ලකුණු කරනකොට වගේ. ‘යමල්ල’ කියල ඔන්න මලය අපිව අර හුච්චක්කුවේ දාන් ගිහින් කෑම කඩේකට ගෙනාවා. ‘පිරිසිදු තැනක්’ නිරමලා කිව්වා. ආයෙ බඩගිනි වුනාම ඕනෙ තැනක් පිරිසිදුයිනේ අපිටනන්. ඉතින් උන්ඳැත් හැපීනන් වඩා හොඳයි. ගෑනු හැපී එකේ තියාගත්තොත් ට්‍රිප් එකම හැපී. ඔන්න ඇතුලට ගියා. සුනිල් එදිරිසින්හගේ ‘අහස පොලොව වට පිටාව’ කියන ලස්සන සින්ඳුව ලාවට දාලා සෙටප් එකේ. නිර්මලා කේ ඩී කේ ෆෑන් එකක් වගේ වට පිට බලනවා. මම ඇහුවා ‘ඇයි?’ කියලා. ‘අපි මේකට ඇවිත් තියනවද මීට කලින්?’ කියලා මාලින්ගගේ ප්‍රශ්නෙකට සමාන ප්‍රශ්නයක් ඇහුවා. මල්ලියට ‘බකස්’ ගාලා හිනා ගියා කියහන්කෝ!! මට තාම මීටර් වුන් නෑ.. නිර්මලත් හිනා වෙනවා. උන් දෙන්නම හිනා වෙනවා. අන්න අර කොට තඩියා ආවා ‘සර් ඉන්ඳියප්පද?’ කියාන!! යකෝ ඩ්‍රැගන්ල ටික ගලවලා මූ උදේට ඉඳියප්ප කඩයක් දානවා. ආයෙ රෑට ඩ්‍රැගන්ලා බිත්තියේ වහනවා. සුනිල් එදිරිසින්හ එලවලා චීන් චෑන් එනවා…
ඔන්න බිස්නස්..
උපුටා ගැනීම: Susantha Pethiyagoda