අපි මේ ගමට ආපු අලුත මෙහෙ හිටියා හෙන රැඩිකල් ආච්චියෙක්… හෙන ඇක්ටිව්…!
ඒ ආච්චි අපි පන්සල් යද්දි හිනාවෙනවා.
උඩහ ගෙදර උන් පල්ලි යද්දි හිනාවෙනවා.
පහල ගෙදර උන් කෝවිල් යද්ද හිනාවෙනවා.
හැබැයි එහා ගෙදර උන් මුස්ලිම් පල්ලියට යද්දි නම් ආච්චි ගෙදරින් එළියට එන්නෙ නෑ. මොකද දවසක් සුබායිර් මහත්තයා පල්ලි යන්ඩ එළියට බහිද්දි ආච්චි කෝචෝක් කරලා තිබ්බා.. සුබායිර් අයියා ආපහුත් ගේ ඇතුලට ගිහින් මන්නෙ අරන් ඇවිත් , වෙන මොකටවත් නෙමේ කුරුම්බා ගෙඩියක් කපාගන්න.. ඒත් ආච්චි ඒකට භය වෙලා..
හැබැයි ආච්චි කියන්නෙ ආච්චි යකෙක්ටවත් භය නැහැ කියලයි…ඒත් අපි සේරොම ආච්චිගෙ මේ විකාර ගණන් ගත්තෙ නෑ. වයසක මනුස්සයා නොවැ…
අාච්චිට අනුව අපි සේරම හෙන මෝඩයෝ.. ගොන් හරක්, ගොඩයෝ.. වසු පැටව්..ආච්චිට ආච්චිගෙ ඩික්සනරියෙ තියෙන වචනත් මදි අපට අමතන්න..!
” යකෝ..බොලව් ආගම කියන්නෙ අබිං ලොහ් ලොහ් ලොහ්.. තොපිලට පිස්සු.. ආගමකින් ඇති පලක් නෑ.. මම වගේ වෙයල්ලා.. නිරාගමික වෙයන්.. බලාන් චීනෙත් ඉන්නෙ නිරාගමික උදවිය… කෝමද උන්දැලගෙ දියුණුව හිට.. ලොහ් ලොහ් ලොහ්.. තොපි නම් තුහ් ඉතරක්.. ක්‍රෑහ් තුහ්..!
ඒ වෙලාවට සුබායිර් අයියා ” අල්ලාහ් ” කියලා අත් ඔසවලා උඩ බලාලා බිම බලාගෙන යනවා යන්න..
උඩහ ගෙදර ෆර්නෑන්ඩු ” දෙවියනෙ ඇයට කමා කරනු මැන කියලා ” එතනින් යනවා..
පහල ගෙදර සෙල්වම් ” අයියෝ ආඬවනෙ, පුල්ලයාරේ ” කියලා එතනින් යනවා….
අපි ඉතින් ” මේ මනුස්සයට ප්‍රඥාව පහළවේවා ” කියලා එතනින් යනවා යන්ඩ…
ඒවට ආච්චිට තවත් හිනා.. ආච්චි ඉතින් වීරයා වගෙ තව තව හිනාවෙනවා.. අපි සේරටම අපහාස කරනවා..!! වෙලාවකට වත්තෙන් මලක් වත් කඩන්න දෙන්නෙ නෑ ආගමික ස්ථානටකට යනවා කීවොත්..!
“ඔව්වා තියෙන්නෙ සතුන්ට පැණි බොන්ට ගොන් යකුනෙ.. අත තියන්ට එපා මයෙ මල් ගස් ටිකට..”
ඕන් ඕම කියලා අපිව පන්න ගන්නවා..ඉතින් දැන් ඔහොම යද්දි එක දවසක් මෙන්න ආච්චි සුදෝ සුදු වතින් සැරසිලා ගමනක් යන්ඩ ගියා.. එක අතක මල් බෑග් දෙකයි, අනිත් අතේ තව මල්ලක්…!
ඊට පෝඩ්ඩ වෙලාවකට පස්සෙ සුබායිර් අයියා අපේ දිහාවෙ භය වෙලා වගේ දුවගෙන ආවා… සෙල්වම්, ෆර්නෑන්ඩු එහෙමත් ආවා..
” ඒ යේක මාර වෙඩේනෙ… ආන් ආච්චි පන්සලේ.. “
” පන්සලේ නම් බැරියා, අන්න මම දැක්කා පල්ලියටත් යනවා… “
ටික වෙලාවකින් පණිවිඩයක් ආවා ආච්චි කෝවිලටත් ගිය බව..
මළ කරුමයයි… මොකක්ද යකෝ මේ වෙන්නෙ…? මෙන්න ආච්චි හැන්දෑවේ පල්ලි වල දේවාල වල ගිහින් ඇවිත් සොංකට් කොල්ලා ලව්වා ගේ ඉස්සරහ ලයිට් කණුවෙ අලි ස්පීකරයක් ගැට ගස්ස ගත්තා කියාංකො..!
අඩේ මේන් හවස හය වැදුණා විතරයි ආච්චි ගමටම ඇහෙන්ඩ පිරිත් දාපි, රෑ නවයට යනවා යාඥාවක්, දහයට දේව තෝත්තර , ඉවර වුනෙ… අල්ලාහ් .. කියලා…
ගමම කලබල වුණා.. හිතාගන්න බැරි වුණා..! ෆුල් අන්දුස්.
යකෝ දැන් අපිට පාරක යන්න නෑ ආච්ච් ධර්මය දේසනා කරනවා..!!
” මොකක්ද බං මේ උන්දැට වුනෙ? “
ඕන් අපි හොයා බැලුවා…
වැඩිය මොකුත් වෙලා නෑ, දවසක් ආච්චි ගෙදර තනියම ඉන්න වෙලාවක මොකක්දෝ ඉන්සුවරන්ස් එකකින් පොඩි නෝනා කෙනෙක් ඇවිත් ගියාලු..!
” ආච්චි, සමහරවිට ආච්චි ලිස්සලා වැටෙන්න ඉඩ තියෙනවා, පාර මාරු වෙන්න යද්දි හැප්පෙන්න ඉඩ තියෙනවා, හාර්ට්, කොලොස්ටරෝල් , ප්‍රෙශර්, දියවැඩියාව හැදෙන සම්භාවිතාව වැඩියි, අස්ථි බිඳි යාමකට ලක්වෙන්න පුළුවන්, කන කෑමක් හිරවෙන්න පුළුවන්, ටොයිලට් ගිහින් ඉද්දි භාගෙට එලියට එන කක්කි බෙට්ටක් හිරවෙන්න පුළුවන්, සමහරවිට ගෙදර ගහක අත්තක් කඩාගෙන වැටෙන්න ඉඩ තියෙනවා, ළිඳෙන් වතුර ගන්න යද්දි ලිස්සලා ළිඳ ඇතුළට වැටිලා අනතුරක් වෙන්න පුළුවන්, අකුණු වදින්න ඉඩ තියෙනවා, විදුලි උපකරණ භාවිතයේදි ඒවායෙ හදිසියේ හටගන්නා දෝෂයක් නිසා කරන්ට් වදින්න ඉඩ තියෙනවා, ගෑස් ලීක් වෙලා ගිනි ගන්න ඉඩ තියෙනවා, බල්ලෙක්, බළලෙක් හපා කන්න ඉඩ තියෙනවා, මංකොල්ල කෑමකට අසුවෙන්න ඉඩ තියෙනවා, ඒ අතර මංකොල්ලකරුවන් සමඟ පොර බදද්දි ආච්චි වයස නිසා ගුටි ප්‍රහාර වලට ලක්වෙලා අනතුරු වෙන්න ඉඩ තියෙනවා, වැටිලා දත් කැඩෙන්න ඉඩ තියෙනවා, ඒ වගෙ වෙලාවකට අධික රුධිර වහනය නිසා ලොකු අනතුරක් වෙන්න පුළුවන්…..” කිය කිය ආච්චිට මැරෙන්න තියෙන ක්‍රම සීයක් විතර උගන්වලා ගිහින් තිබුණා විතරලු.. තව කීවලු ස්වාභාවික විපත් වලට ඉන්සුවරන්ස් නෑ කියලත්..
ආන් ඒකට හොඳම ඉන්ෂුවරන්ස් එක තමා ආච්චි අර හොයාගෙන තිබ්බෙ.. කෝම හරි දැන් ආච්චි නිසා ගමේ අනික් උන් ටික නිරාගමික වෙන ලයින්ස් එකක් තමා තියෙන්නෙ..
පූචාගෙ පරණම පච කතා.
උපුටා ගැනීම: පූර්ණිමා චාරුණී බණ්ඩාර
පූ.චා.බ