ජනතාව වෙනුවෙන් අසු පිට නැගී, නිරුවතින් නගරයක් පුරා සැරිසැරූ- ගොඩිවා ආර්යාව ( චරිත )

මෙම ලියෝෆ්‍ර්කි සාමිවරයා සිය යටත් ජනතාව ගැන නොසැලකූ රුදුරු මිනිසෙකු හා දැඩි මසුරෙකු ලෙස පතළ ව තිබිණ. එකල එංගලන්තය පුරා ම පැවතියේ, නැහීගෙන වැඩ කරන දුප්පතාගේ රුහිරු මාංශය දක්වා ම උරා බොමින්, ධනවත් කුලීනයන් සුර සැප විඳි වැඩවසම් යුගයයි. කොවෙන්ට්‍රිහි දුගී පුරවැසියෝ ලියොෆ්රික් විසින් අයකරනු ලැබූ නිම් හිම් නැති බදුබරට යට වී පීඩිතව, දුක්ඛිතව සිය ප්‍රාණය පමණක් යම්තමින් ගැටගසාගැනීමට සමත්වූහ.

එහෙත් ගොඩීවා ආර්යාවට ගම්වාසීන් දැඩි ව ආදරය මෙන් ම ගෞරව ද කළහ. අවසානයේ ඔවුහු කිහිපදෙනෙක් ඈ හමු වී මේ අවනඩුව කියා පෑවෝය. කුසට අහරක් නොමැතිව බඩ පිටපොත්තට ම ඇලීගත් ගෘහණියන්ගේ ද දැඩි වෙහෙසින් වැහැරුණු සිරුරුවලින් ‍යුතු ගොවියන්ගේ ද වැරැහැලි ඇඳගත් දූ දැරියන්ගේ ද දර්ශනයෙන් ඈ සසල ව කම්පිත ව ගියා ය.

වහා සිය සැමියා වෙත ගිය ඈ ගම්වාසීන් කෙරේ අනුකම්පා උපදවා ඔවුන්ගේ බදු බර අඩකින් අඩු කරන ලෙස ඉල්ලුවා ය.ඒ වන විට රසමසවුළෙන් සැදි ප්‍රණීත දිවා භෝජනයක නිරතවෙමින්, වයින් මතින් මත් වී සිටි සාමිවරයා, ඇය නැවත නැවතත් ඔහුගෙන් එසේ ඉල්ලා සිටිත් ම දැඩි කෝපයට පත්විය.

” හොඳයි උඹට ඔවුන් ගැන ඔච්චරම කැක්කුමක් තියෙනවා නම් මම බදු බර බාගෙකින් අඩු කරන්නම්. හැබැයි උඹ මේ ගම වටේ ම අශ්වයෙක් පිටේ ගිහින් නිරුවතින් ඇවිදලා ආවොත් විතරයි” එසේ කියූ ඔහු ගොඩිවා ආර්‍යාව ගැන මඳකුදු නොතකා නික්ම ගියේ සිය අත් පිස්නාව වේගයෙන් මේසට මතට දමා ගසමිනි.

මහජනයාට උපකාර කිරීමට අධිෂ්ඨාන කරගෙන සිටි ගොඩීවා ආර්යාව ඇගේ ඇඳුම් එකිනෙක ගලවා දැමුවා ය. නිරුවත්ව, ඇගේ ප්‍රියතම අශ්වයා පිට නැඟ ගත් ඈ ගම්වාසීන් වෙනුවෙන් ඒ දුෂ්කර කාර්යය ඉටුකරලීමට තීරණය කළා ය.ආර්යාව අශ්වයා පිට නැඟී වෙළඳපොළ චතුරශ්‍රය හරහා ගමන් කළේ ඇගේ දිගු මනරම් කේශ කලාපය මගින් ඇගේ නිරුවත් සිරුර ආවරණය කරගනිමිනි. ගොඩීවා ආර්යාවගේ චාරිකාව ගැන ඇසූ ගම්වැසියෝ සලිත වූහ. කම්පිත වූහ. කදුළු සැළූහ.

ඔවුහු සියලු දෙනා ම මේ ශ්‍රේෂ්ඨ කාන්තාවට අගෞරවයක් නොවන පරිද්දෙන් ඈ තමන් හට නොපෙනෙන්නට සිය නිවෙස් තුළට වැදුණාහ. මග දෙපස වැඩ කරමින් සිටි ජනයා ඉවත බලාගෙන, බිම බලාගෙන ඈට ගෞරව දැක්වූහ .

එහෙත් ටොම් නම් වූ එක්තරා කාමාශක්ත වූ මිනිසෙකු පමණක් ආශාවෙන් මඩනා ලදුව සිය නිවසේ උඩුමහලේ කවුළුවකින් ඈ දෙස එබී බැලීමට උත්සාහ කළේ ය.එක් ක්ෂණයෙන් කවුළුව විවර කිරීමට යත්න දැරීමේ දී ඔහුගේ ඇස් අන්ධ වූ බැව් කියනු ලැබේ. Peeping Tom හෙවත් එබී බලන ටොම් යන පදය භාවිතයට ආවේ එතැන් සිට ය. අද මෙය ඉංග්‍රිසි භාෂාවට එකතු වී ඇත්තේ රහසින් කවුළුවලින් එබිකම් කරමින්, අනෙක් මිනිසුන් දෙස බලමින් සිය කාමාතුර හැඟුම් පුබුදුවාගන්නන්ට භාවිත කරන පදයක් ලෙස ය.

ඇගේ නිරුවත් චාරිකාව අවසන් කිරීමෙන් පසු ගොඩීවා තම ස්වාමිපුරුෂයාට මුහුණ දී තමා පොරොන්දුව ඉටු කළ හෙයින් බදු බර අඩු කරන ලෙස ඉල්ලා සිටියා ය.වෙන කළ හැකි දෙයක් නොවුණු තැන ඔහුගේ වචනයට එකඟව ලියොෆ්රික් ජනතාවගේ බදු බර අඩු කළේ ය.

ශ්‍රේෂ්ඨ වූ ගොඩිවා කාන්තාවගේ උත්සාහය නිසා දුගී ජනයා එතෙක් පටන් යන්තම් සැනසුම් සුසුමක් හෙළූහ.

ලේඩි ගොඩීවා හෙවත් ගොඩීවා ආර්යාව ඉතිහාසයේ සත්‍ය වශයෙන් ම ජීවත් වූ කාන්තාවක බවට මේ බවට සාධක හමු වී ඇත.කෙසේ වුවත් මෙම අසකු අරා ගිය ගමන ගැන පළමුවෙන් ම ලියැවී ඇත්තේ ඊට වසර සියයකට පසු වූ ග්‍රන්ථයක ය. පසුකාලීනව ඇල්ෆ්‍රඩ් ටෙනිසන් නම් මහා කවියා විසින් 1840 දී ලියනු ලැබූ ගොඩීවා නම් පද්‍යය නිසා ද ඇගේ කතාව ඉමහත් ප්‍රසිද්ධියකට පැමිණියේ ය. (http://www.online-literature.com/tennyson/4076/)

මේ ඇසුරින් චිත්‍රපටයක් ද Lady Godiva Of Coventry නමින් 1955 වසරේ දී තිරගත විය. චයාරූපයේ සිටින්නේ ඇය වෙනුවෙන් නිරූපිත නිරූපන ශිල්පිනියක් බව සලකන්න.

උපුටාගැනීම අන්තර්ජාලයනි  

උපුටා ගැනීම: රාම් වණා