අදටත් අභිරහසක් වූ මුහුදු කොල්ලකාර කපිතන් කිඩ්ගේ වස්තුව සැගවූ ඕක් දූපතේ අභිරහස.. (වැල්වටාරම්)

ඉතින් ඔවුන් එක් දූපතකට ගොඩ බැස්සේ අනෙක් දූපත්වලට වඩා වෙනස් ආකාරයෙන් විශාල ඕක් ගස් කීපයක් තිබූ නිසායි.එය ඕක් දූපත ලෙස ප්‍රසිද්ධ වී තිබුනා.

දූපතට ගොඩබට සැණින් ම තරුණයින් ඔවුන් පුදුමයට පත් කළ දෙයක් වුනේ එක් ඕක් ගසක කඳේ අකුරක් කැටයම් කර තිබුනු දැකීමයි. එයට ඉහළින්, එක් විශාල අත්තක් ප්‍රධාන කඳේ සිට අඩි කිහිපයක් දුරින් හරියට ම කපා දමා තිබුණා.

ඔවුන්ට තවත් නිරීක්ෂණ දෙකක් හසුවුණා . කපා දැමූ අත්තේ පොත්තේ තැනක එක්තරා අවස්ථාවක කඹයක හෝ දම්වැලක බරට ඇති වූ ගැඹුරු සලකුණු දක්නට තිබුණා. ඊට පහළින්, පොළොව හාරා ඇති බවක් පෙනෙන්නට තිබුණා. එනම් වළක් හාරා නිසි ලෙස පුරවා තිබුණේ නැහැ වගේ තත්වයක් තමා ඔවුන්ට තෙරුම් ගියේ.

වෙනත් කිසිදු ගසකට කිසිදු ආකාරයකින් හානි සිදු වී නොතිබූ හෙයින්, මෙය මුහුදු කොල්ලකරුවන්ගේ ක්‍රියාවක් වන්නට ඇති බවත්, අධික බර ඇති වස්තුවක් කොල්ලකා වළලා තිබෙන්නට හැකි බවත් තරුණයන් තිදෙනා තීරණය කළා.

ඉන්පසු ඔවුන් කැණීම පටන් ගත්තා. වළ අඩි 12 ක් පමණ වර්ගඵලයකින් යුතු බව වැඩි වේලා නොගොස් පැහැදිලි වුණා. නිසැකව ම එය ඉතා විශාල නිධානයක් සැඟවීමේ අදහසින් සකස් කර ඇති බවට ඔවුන්ට වැටහුනා. වළෙහිි අඩි 10 ක් පමණ ගැඹුරට ළඟා වූ විට ඔවුන්ට හමු වුණා පැත්තකට විහිදෙන අයුරින් තිබූ ඕක් ලී කොට ඇතිරූ තට්ටුවක්.

එම ලී ඉවත් කල විට තවත් පොළොව හාරා ඇති බව ඔවුනට පෙනුණා. ඒ නිසා තවත් අඩි 10 ක් පමණ පහළට කැණීම් සිදු කළා. එවිට තවත් ඕක් ලී කොට තට්ටුවක් හමු උනා. තව තවත් කණිනු ලැබුවා – තව තවත් ලී කොට තට්ටු හමු වුණා. මේවා අඩි 40 ක් පමණ ගැඹුරකට යන තෙක් ම වළේ දෙපැත්ත කඩා වැටීම වළක්වන්නට යොදා තිබුණා. තුන්වන වේදිකාවෙන් එහාට තවත් පතළය හෑරීම හැර වෙනත් අපේක්ෂාවක් නොවූ තැන, කඩාවැටුණු හැඟීමෙන් යුතු ව තරුණයින් ඉන් ඉවත්ව ගියා.

ඒ සියල්ල සිදු වුණේ1795 දී. එතැන් පටන්, මෙම පතළේ අභිරහස විසඳීම සඳහා පවුම් 500,000 කට වඩා වියදම් කර ගවේෂණ සිදු කෙරුණා.

එහෙත්, නව කැණීම්වලින් වළ ගැඹුරට යන්නට යන්නට, අභිරහස ද එසේ ම ගැඹුරට ගියා.

එක් ගවේෂණයක දී හදිසියේ ම බිත්ති දෙපසින් පුපුරා ජලය වේගයෙන් මතුපිට දෙසට නැගීමට පටන් ගන්නා විට ඔවුන් අඩි 100 කට ආසන්න ප්‍රමාණයක් පහළට බැස තිබුණා. කැණීම්කරුවන් කිහිප දෙනෙක් දියේ නොගිලී බේරුණේ අනූනවයෙන්.

නමුත් මෙම ගවේෂණයේ යෙදී සිටි අය පළමු තරුණයන් තිදෙනාට වඩා ධෛර්යවන්ත වූ අතර , වතුර හිස් කිරීමේ අදහසින් ඔවුන් එම වළ අසල දෙවන වළක් හෑරීමට පටන් ගත්තා. කෙසේ වෙතත්, එය අඩි 50ක් ගැඹුරකට යද්දී ඔවුනට වැටහුණා ජලය ලුණු රස බව. එනම් ඔවුන් මුහුදු මට්ටමට හාරා ඇති බව. එවිට ම ඔවුනට අවබෝධ වුණා මේ වතුර ගලා ඒම අහම්බයක් නොවන බව . ප්‍රධාන පතල මුහුුදු ජලයෙන් යටවන ආකාරයට සැලසුම් සහගත ලෙස මෙය හාරන්නට ඇත්තේ කවුරුන් විසින් ද? කුමන හේතුවක් මතද ?

ඔවුන් තැන් තැන් වලින් නැවත හෑරීමේදී මුහුදු පතුළේ සිට කෙළින් ම වළට යන උමං මාර්ග කිහිපයක් ඔවුන් සොයා ගත්තා. එවිට ඔවුන්ට වැටහී ගියා එය කපටි ජල උගුලක් ( water trap) හැර වෙනත් දෙයක් නොවන බව.නමුත් කුමන හේතුවක් නිසා නිසා එලෙස කරන්න ඇත්ද..?

තව දුරටත් කැණීම් සිදු කරන විට නිධානය පිළිබඳ බලාපොරොත්තු අලුත් වුණා. ඒ විදුමක් මගින් මතුපිටට ගෙන එන ලද මැටි බඳුනක කාසි කිහිපයක් තිබී හමු වීමෙන්. නමුත් එම කාසි වළෙන් මෙතෙක් සොයාගත් එකම නිධානය බවට පත්වුණා.

තවත් දේ එහි තිබිය යුතුයි. සෑම උදම් රළක දී ම මුහුදු ජලයෙන් පිරවෙන පරිදි දක්ෂ ලෙස , සැලසුම් සහගත ආකාරයෙන් උමං මාර්ග සහිතව කවරෙකු හෝ විසින් මෙතරම් විශාල පතලක් හාරා ඇත්තේ ඇයි? මුලින්ම මෙම වළ හාරා ඇත්තේ කවුරුන් විසින් ද? කිසිවෙකු එය දන්නේ නැහැ. දේශීය පුරාවෘත්තවල මුහුදු කොල්ලකාර කැප්ටන් කිඩ් ගැන කියැවෙනවා. එහෙත් ඔහු කිසි විටෙකත් විශාල නිධානයක් ඇති නැවක් අල්ලාගෙන ඇති බවක් කවුරුවත් දැන සිට්යේ නෑ.

කරන ලද අනුමානවලින් වඩාත් ම විය හැකි අදහස වූයේ රත්රන් වළලනු ලැබුවේ ප්‍රංශ ජාතිකයන් විසින් බවයි. නෝවා ස්කොටියා නගරයට නුදුරින් පිහිටි ලුයිස්බර්ග්හි ( එකල බ්‍රිතානයයන්ට යටත් ව තිබූ) ආරක්ෂාව වෙනුවෙන් මුදල් ගෙවීම සඳහා රජය විසින් පවුම් මිලියන ගණනක් වටිනා රත්තරන් තොගයක් යවා ඇති බව වාර්තා පෙන්වා දෙනවා.

නමුත් රත්තරන් එහි ළඟා වීම ප්‍රමාද වුණා. ලුයිස්බර්ග් බිඳ වැටුණා. එබැවින් සමහර ප්‍රංශ ජාතිකයන් රජයේ මුදල් සමග කඩිමුඩියේ පිටව ගියා. ඔවුන් පලා ගිය ස්ථානය කවදාවත් සොයාගත හැකි වුණේ නැහැ. එ් ඕක් දූපතේ ඇති අද්භූත වළට වන්නට ඇති බවට සමහරු තර්ක කරනවා.

පසු කාලීනව මේ ඇසුරෙන් කලා නිර්මාණ ද බිහි වී තිබුණා. කැනඩා ජාතික ජෝන් ක්ලාර්ක් විසින් රචිත The Hand of Robin Squires එවැනි නව කතාවක්. The Curse of Oak Island තවත් රෑපවාහිනි කතා මාලාවක්. කොතරම් තාක්ෂණය දියුණූ වුවත් අදටත් ලොව නොවිසඳුණු අභිරහස් ගොන්නට මේ සිදුවීම එකතු වී තිබෙනවා.