මේ සිදුවීම වුනේ මම හිටිය නර්සස් ක්වාටස් එකේ. ටික කාලෙකට කළින්.ඉතින් හොස්පිටල් එකේ කෙළවර මුල්ලකට වෙන්න තමා අපේ ක්වාටස් එක තිබුනෙ. හරියටම කිව්වොත් ගැහැනු හා පිරිමි මානසික රෝගීන් සදහා ප්‍රතිකාර කරන වාට්ටු දෙක ලග. ක්වාටස් එකෙ ඉදල මීටර සීයක් විතර දුරින් ගැහැණු වාට්ටුවත් ඒ අතර පඩිපෙළක් නැග්ගහම පිරිමි වාට්ටුවත් පිහිටා තිබුනා. ඊට අමතරව වෛද්‍ය වාට්ටු දෙකක්, රුධිර රෝග සදහා වූ වාට්ටුව ක් එහෙමත් තිබුනා. ඔය කොයි වාට්ටුව ටත් ලෙඩ්ඩු බලන්න යන අය අපෙ ක්වාටස් එක ඉස්සරහ තියෙන කොරිඩෝ එකෙනුත් යනවා.
දවසක් අපෙ මිස්ලා දෙන්නෙක් නාලා කොන්ඩෙ එහෙමත් කඩලා ඉස්සරහට වෙලා චැට් එකක් දාගෙන ඉද්දී, ලෙඩ්ඩු බලන්න ආව ගෑණු අය දෙන්නෙක් මේ දෙන්නා දිහා බල බල යනවලු. ඒ දෙන්නව පාස් කරගෙන ඒ වෙලාවෙ ඩියුටි ඕෆ් වෙලා ආව මිස් කෙනෙක් අතින් කටත් වහගෙන දෙකට නැවි නැවි හිනා වෙවී එනවලු.බලද්දි අර දෙන්නා කිය කිය යනවලු, “පිස්සෝ උනත් නාලා කරලා පිලිවෙලට ඉන්නවනෙ ඉතින් නේද” කියලා.
ක්වාටස් එකේ මේ පිහිටීම නිසාම උන අකරතැබ්බයක් තමා මේ. අපේ ක්වාටස් එකෙ හවසට සාමාන්‍යයෙන් යාළුවෝ යාළුවෝ එක රූම් එකකට එකතු වෙලා තමයි තේ බොන්නෙ. බිස්කට්, කේක් වගෙ දෙයක් තිබුනොත් ඒවත් අරන් එක රූම් එකකට සෙට් වෙලා හිනා වෙවී, චැටක් දාගෙන සින්දුවක් එහෙම අහගෙන ඉන්න වෙලාව ඒ. නයිට් කරල ඇවිත් නිදාගෙන ඉන්න අයට සද්දෙන් බාදාවෙන නිසා ගොඩක් වෙලාවට ඇතුලෙන් ලොක් කරගෙන තමා ඉන්නේ. රූම්ස් වල ඇදන් දෙක බිත්ති වලට යා කරලා මැදින් ඉඩ තියෙන විදියට තමා තියෙන්නේ. ඉතින් අපේ මිස්ලා හතර දෙනෙක් ඔය කියන රූම් එකට වෙලා රස කතා කිය කිය හිනා වෙවී තේ බිබී ඉද්දි එක පාරටම වහලෙන් සද්දයක් ඇවිත්. මෙයාලා හිතුවලු සතෙක් වෙන්න ඇති කියලා. ඒ සද්දෙ ලග ලගම ඇව්ත් එක පාරටම වහලෙත් කඩාගෙන තඩි කොල්ලෙක් පත බෑව්නාලු කාමරේ මැදට. දැන් මිස්ලා ටික ඇදන් උඩට නැගලා යට් ගිරියෙන් කෑ ගහනවලු. අරුත් මොකාද වගේ කාමරේ පුරා දුවලා යන්තම් අගුලත් ඇරගෙන එලියට පැන ගත්තලු. මෙයාලා හතර දෙනා තවත් ටික වෙලාවක් කෑ ගහ ගහ ඉදලා එක පාරටම පියවි සිහියට අවාලු. ඊට පස්සෙලු මතක් උනේ මේ කොල්ලා කොහාට පැන ගත්තද කියලා. ඊටත් පස්සේ නර්සින් මෝඩ් එක ඔන් වෙලා මතක් උනාලු උගේ කකුලෙ දම් වැලුත් තිබුනා ඒ කියන්නේ පේශන්ට් කෙනෙක් නේද කියලා දඩ බඩ ගාලා හතර දෙනාම එලියට පැනලා.
සාමාන්‍යයෙන් දම් වැල් දාන්නෙ බන්ධනාගාරයේ ඉදලා ගේන පෙශන්ට්ලාට. ඒත් එක්ක බන්ධනාගාර නිළධාරියෙකුත් ඉන්නවා. ඒ වෙලාවෙම වොඩ් එකේ ස්‍ටාෆ් එකයි, බන්ධනාගාර සේවකයනුයි හැමෝම ක්වාටස් දොර ලග.ඒ පැනලා ඇවිත් තියෙන්නේ මාන්සික රෝගි පිරිමි වාට්ටුවේ ලෙඩෙක්.දම් වැලුත් කඩාගෙන දුවගෙන ඇවිත් පැනලා තියෙන්නෙ අපේ ක්වාටස් එකේ වහලෙට. අපේ ක්වාටසුත් ඉතින් ශ්‍රී වික්‍රම රාජසිංහ කාලේ හැදුව පෞරාණික ගොඩනැගිලි නිසා වහලෙ කඩන් වැටන එකත් අහන්න දෙයක් නෑ ඉතින්.
දැන් හැමෝම එකතු වෙලා කොල්ලව හොයනවා. එක පාරට බාත්රූම්ස් පැත්තෙන් යටි ගිරියෙන් කෑ ගහන සද්දයක් ඇවිත්. තවත් මිස් කෙනෙක් බාත් රූම් එකෙන් එළියට එද්දී අරයා හිටගෙන ඉන්නවලු. පස්සේ හැමෝම ඒ පැත්තට දුවද්දී පේශන්ට් එතන තිනුන බාත් රූම් එකකට පැනලා ලොක් කරගෙන. දොරත් කඩලා තමා එයාව එලියට අරන් තියෙන්නෙ.
මේ සිදිධියට මූන දුන්න මිස්ලා ටික ඒ වෙලාවෙ ඇගේ ලේ නැතිව බය බිරාන්ත වෙලා හිටියත් පස්සේ හැමෝටම ඉළ කැඩෙන කම් හිනා. පස්සේ හැමෝටම රස කර කර කියනවා වීරයෝ ටික වගේ.
උපුටා ගැනීම: Chamila Perera