විවාහ වීමට නියමිතව සිටි තරුණ යුවළක්, විවාහයේ පූර්ව රූගත කිරීමක් කරන අතරතුරේදී සේර ඇල්ලට ඇද වැටීමෙන් 27 හැවිරිදි තරුණයා ජීවිතක්‍ෂයට පත්වුනා.
ප්‍රදේශයේ තරුණ පිරිසක් තරුණිය බේරාගත්තා.
ඇත්තෙන්ම හද කම්පනය කරවන පුවතක්!
මාස කීපයකට ඉස්සර සිදුවූ මේ සිදුවීම කාටත් මතක ඇති.
දැන් ඉස්සරහට එන්නෙ මගුල් මාස! ඒ නිසා කාලෙකට ඉස්සරලා ලියවුණ මේ ලිපිය ඉස්සරහට ගන්න හිතුණා.
පූර්ව ඡායාරූපගත කිරීම අද බොහෝ රටවල බොහෝ දෙනාගේ අවශ්‍යතාවයක් බවට පත්වෙලා.
විවාහ මංගල්‍යයට මාස කීපයකට පෙර සාමාන්‍යයෙන් සිදුවන මේ ඡායාරූප රූගත කිරීම නොමැතිව විවාහ මංගල්‍යය අසම්පූර්ණයි කියලයි සමහරු සිතන්නේ.
පූර්ව ඡායාරූපගත කිරීම අද ශ්‍රී ලංකාවේත් බෙහෙවින් ප්‍රචලිත වී ඇති බවක් පේනවා.
කාලයක් තිස්සේ නගරයට පමණක් සීමාවී තිබූ “ප්‍රී ෂූට්” අද ගමටත් සේන්දු වෙච්ච පාටයි! පූර්ව ඡායාරූපගත කිරීම හා වීඩියෝගත කිරීම් දැන් ලංකාවේ සෑම ප්‍රදේශයකම සුලබව දකින්න පුලුවන්.
විවාහයට පෙර රූගත කිරීම් කල යුතුද නැද්ද යන්න පිළිබඳව විවිධ මතිමතාන්තර තියනවා. මා නම් එය දකින්නේ ප්‍රයෝජනයක් නැති මුදල් නාස්තියක් ලෙසට.
මේ මගේ අදහස. බටහිර රටක ජීවත් වුවද මම මහා අමු ගොඩයෙක් කියලා මට හිතෙන්නේ මෙන්න මේ වෙලාවට. කූඩැල්ලා මෙට්ටය උඩින් තියන්නට බෑ නොවැ. ඔබේ අදහස ඊට වඩා වෙනස් වෙන්න පුලුවන්. මම එයට ගෞරව කරනවා.
විවාහ උත්සවයක් ගැනීම ලේසි පාසු කටයුත්තක් නෙමේ.
කෙතරම් සරලව, අන් අයගේ උදව් පදව්ද ඇතිව සිදු කලත්, ඒක මිල අධික වැඩක්.
නමුත් තමන්ගේ දියණියගේ පුතාගේ ජීවිතයේ සුන්දරම දිනයේ සතුට ඔවුනට ලබාදීමටත්, එය අන් අය හා බෙදා හදා ගැනීමටත් කවුද අකැමති? ඒ හින්දාම ණය වෙලා හරි විවාහ උත්සවයක් ගැනීමට කවුරුත් උත්සාහ කරනවා. සල්ලි වගේද තමන්ගේ දරුවාගේ සතුට!
නමුත් පූර්ව විවාහ රූගත කිරීමක්?
පූර්ව විවාහ රූගත කිරීමක සාමාන්‍ය වියදම රු. 25,000 කට එහා මිස මෙහා නම් නෙවේ.
රූගත කරන ස්ථානය, කාලය, තේමාව, භාවිතා කරන උපකරණ වැනි විවිධ සාධක මත පදනම්ව ගාස්තුව ඉහල පහල යනවා.
පූර්ව විවාහ රූගත කිරීම සදාකාලික මතකයන් නිර්මාණය කිරීමට හොඳම ක්‍රමයක් බවත්, ඒ මගින් විවාහ දිනයට වඩා හොඳින් කාචය මගින් හැඟීම් ග්‍රහණය කරගත හැකි බවක් සමහරු කියනවා. එසේම පූර්ව විවාහ රූගත කිරීම විවාහ උත්සවයට පෙර තමා ගේ ඡායාරූප ශිල්පියා සමඟ හොඳ සම්බන්ධතාවයක් ගොඩනඟා ගැනීමට උපකාරී වන බවත් ඔවන් කියනවා. මට මේ පිළිබඳව කිසිඳු අදහසක් නැති හින් දා ඒ ගැන කතා කරන්නට බලාපොරොත්තු වන්නේ නෑ.
අනෙක එය තමාගේ ආසාව නම්, ඒ සඳහා තමා අතේ මුදල්ද ඇත්නම්, එයට වියදම් කරන්නේද ඔවුන්නම් එය කෙසේවත් අපේ ප්‍රශ්නයක්ද නොවේ.
නූතන රැල්ළට අනුව ජීවත් වීමට අපේ තරුණ ලමයින් කැමතියි. එහි කිසිම වරදක්ද මම දකින්නේ නෑ.
මගේ ප්‍රශ්නය ඇත්තේ මේ අපේ දරුවන් පූර්ව විවාහ රූගත කිරීම සඳහා තෝරා ගන්නා ස්ථාන හා තේමාවන් පිලිබඳව පමණයි.
තමාගේ ජීවිතයට කිසිසේත්ම සම්භන්ධ නැති තේමාවන් මේ සඳහා යොදාගන්නේ ඇයි කියලා මට නම් තේරෙන්නේ නෑ.
සමහරු මේ “ප්‍රී ෂූට්” සඳහා ත්‍රාසය මුසු තේමාවන් තෝරා ගන්නවා. අවදානම් සහිත ස්ථාන තෝරා ගන්නවා.
සමහර සුන්දර තැන් බෙහෙවින් අවදානම්. තමා නොදන්නා දියඇළි, ගංගා, ලිස්සන සුලු ගල් කුලු සුන්දර වුවත් සෙල්ලමට සුදුසු තැන් නෙමේ.
සමහරවිට ඔවුන්ට ඡායාරූප හරහා කීමට කතාවක් තිබුණා වෙන්නට පුලුවන්. නමුත් ජීවිතයට වඩා වටිනාකමක් ඡායාරූපයකට ලැබෙන්නේ කොහොමද?
අප සතුව ඇති සමහර ඡායාරූප අපේ ජීවිතයේ ආපසු හැරී හැරී බැලීමට තරම් සුන්දර මතකයන් බවට කතා දෙකක් නෑ.පරණ ඡායාරූප බලමින් තමාගේ සුන්දර මතකයන් අලුත් කර ගන්න කවුද කැමති නැත්තෙ?
ඒත් ඡායාරූප වෙනුවෙන් මිනිසුන් තම ජීවිත අවදානමට ලක් කරන්නේ ඇයි?
එය තරඟකාරී සමාජ සංසන්දනයද නැතහොත් තමාගේ ජීවිත වඩාත් සිත්ගන්නාසුලු බව සිතීමට ඇති කැමැත්තද?
නමුත් මේ කිසිවක් ජීවිතය හා සමකරන්න නම් බෑ.
සමහර ඡායාරූප ශිල්පීන්ද තම හැකියාවන් මවා පෙන්වීමටත් මෙවැනි අන්තරාදායක ක්‍රියාකරකම් යොදාගන්නවා. තරඟකාරී ලෝකයේ තම ව‍්‍යාපාරය රැක ගැනිමට ඔවුන්ද අවදානම් දරනවා.
අපට කාටත් අවශ්‍ය වන්නේ අළුත් දෙයක්, අන් අයගේ අවධානයට ලක්වන දෙයක් නිර්මාණය කිරීමට.මම ඒක නෑ කියන්නේ නෑ.
සමහර විට මෙය ඉටු කරගත හැක්කේ අවදානමක් ගැනීමෙන් පමණක් වෙන්න පුලුවන්.
නමුත් එහි අවසානය ඛේදවාචකයක් නම්?
දරුවනි, ඔබට ඔබේ සහකරු/සහකාරිය සමඟ ඔබේ විවාහ ගමනේ සෑම පියවරක්ම සතුටින් භුක්ති විඳීමේ අයිතිය තියනවා.
නමුත් ඔබ “ප්‍රී ෂූට්” මගින් ත්‍රාසය සොයා යා යුතු නෑ.
විවාහය ඇත්තටම ත්‍රාසජනක අත්දැකීමක්. සතුට, සුන්දරත්වය මෙන්ම, කඳුල, වේදනාව, ත්‍රාසය යන සියල්ල විවාහයට ඇතුලත්‍. ඔබට ඇත්තේ සාර්ථක ලෙස එයට මුහුණ දීමට උත්සාහ කිරීම පමණයි.
ජීවිතයේ එක් සොඳුරු මොහොතක් වෙනුවෙන් තම ජීවිතය අවදානමට ලක් කිරීම ඔබේ ජීවිතයට තරම් නොවේ.
ඒ වගේම ඔය චරිත රඟපාන්න කලබල වෙන්න දෙයක් නෑ!
හැම එකම නොවුනත් ඔය චරිත වලින් බොහෝමයක් ජීවිතේ කොයියම්ම වෙලාවක හරි රඟපාන්න ලැබෙනවා.
මම මේ අත්දැකීමෙන් කියන්නේ.
හිම කුමාරි, අලු දැරිය, ටිකිරි මැණිකෙ, මලී නඟා, පුංචි දිය කිඳුරිය…..ඔය කොයි චරිතෙත්!
අනේ මම නම් ඉඳලා හිටලා ඔය ‘witch’ ගේ චරිතෙත් රඟපානවා!
දන්නවා නේද අර බටකොල ආච්චිගේ චරිතේ?
ආන්න ඒක!
පින්තූර අන්තර්ජාලයෙනි.
උපුටා ගැනීම: ශ්‍රීපාලී කොටුවැල්ල