”මම කියන්නෙ කාලෙ කන්න එපා, එයා ෆෝන් එක ගන්නෙ නැත්තම් ඔයා ඕක කනේ ගහගෙන ඉදල වැඩක් නෑනෙ”
මදාරා මේනුගෙ අතින් ජංගමය උදුරල අරගෙන නිහඩ කරල දැම්මෙ තරහින්, මේනුගෙ මූනෙ වේදනාවක් පිරුනා, එයා මදාරා දිහා බැලුවෙ හාරි දුකින්.
”තව එක සැරයක් අරන් බලන්නද? ”
”එපා”‘
මදාරාගෙන් බුරුලක් ලැබුනෙ නෑ, දුමින්ද රන්දිමා කියල ගෑණු ළමයෙක් එක්ක සම්බන්දකමක් තියනව කියල දැනගත්ත දවසෙ අපි ආනන්ද බෝදිය ලග බැම්ම උඩ වාඩිවෙලා කතාකරන්න ගත්ත වෙලාවෙ තමා මේනු දුමින්දට කෝල් කරන්න උත්සහ කලේ,ඒත් හැම වෙලේම එහා පැත්තෙන් ආවෙ ග්‍රාහකයා ආවරණ කලාපයෙන් බැහැරවුනා කියන පණිවිඩය,
”සිය සැරයක්, දහ සැරයක් , කීප සැරයක් ” කියන වචන අපි අතරෙ හරි සරල සාමාන්‍ය වචන, ඒත් මේ හැම සැරයකටම වඩා ” එක සැරයක්’කියන එක සදානන්දනීය වචනයක්.
”දහ සැරයක් හරි ලියල විභාගෙ පාස් කරගන්නයි ඕන”
එක සැරයක්වත් පාඩම් කරන්න උනන්දු නොවෙන සමහර දරුවො දහ සැරයක් විභාග ලියන්න කැමතියි, එක සැරයක් වත් දරුවන්ට අවවාද නොකරන දෙමව්පියො සිය සැරයක් දරුවන්ට දඩුවම් කරන්න කැමතියි, මේ කිසි කෙනෙක් ” එක සැරයක්” නිවි සැනසිල්ලේ හිතන්න මැලිවුන අයයි.
” කී සැරයක් නම් තාත්ත මා එක්ක මෙතන ඉදගෙන තේ බොන්න ඇද්ද ඒත් තව එක සැරයක් එයා එක්ක කතා කර කර තේ එකක් බොන්න තිබ්බ නම් කොච්චර හොදද”
අම්ම හැමදාම හවස තේ එකක් බොනකොට තාත්තගෙ පුරුදු පුටුව දිහා බලාගෙන එහෙම කියන්නෙ කඳුලු පුරවගෙන. ගෙවපු ” කී සරයකට” වඩා එන්නෙ නැති ” එක සැරයක් ” කොච්චර අමිලද.
1969 ඉංදියාවෙ තිරගතවුන ”තුම්සෙ අච්චා කෝව්න් හේ” කියන චිත්‍රපටයට මොහ්මඩ් රෆී අපූරු ගීතයක් ගායනා කලා.
”ජනම් ජනම් කා සාත් හේ”
”අපිට එක්ව වසන්නට තව බොහෝ කලක් තිබේ
දැනටමත් මම ඔබ වෙනුවෙන් සිය සැරයක් ඉපිද ඇත්තෙමි”
ආදරයක් වෙනුවෙන් සිය සැරයක් ඉපදෙන්නෙ එක සැරයක් වත් මනසාපූර්ණව ලගින් ඉන්න බැරිව මිය යන ආදරවන්තයින්ද. මට එහෙමත් හිතෙනවා,
”මම ඔයා දිහාව දහ සැරයක් විතර බැලුව,මට ඕන උනේ බායි කියන්න,ඒත් අඩුම ඔයා එක සැරයක්වත් මා දිහාව බැලුවෙ නෑ, ඒක මට දුකක් ”
බැලේ ක්ලාස් එකේදි මා එක්ක හැමවෙලේම නටන්න එකතු වුන,නිතරම මා එක්ක හිනාවුනු, කතාකරපු දමිළ හිතවතා සුදීරන් කැඩිච්ච සිංහලෙන් එහෙම කිව්වෙ එයා අපෙන් සමු අරන් ආපහු චෙන්නයි වලට යන්න කටුනායක ගුවන් තොටුපලට ගිහින් එතන ඉදලයි, ”එක සැරයක්” හැරිල නොබලපු එක වරදක් කියල මට හිතුනෙ ඒ වෙලාවෙදි, ඒක මට හිත රිදවන පසුතැවිල්ලක් උනා,
” ඔයා තව එක සැරයක් ලංකාවට එන්න,”
මම එහෙම ඊමේල් එකක් යවලා හිත හදාගත්තා,
මේ ලෝකෙ මිනිස්සු වැඩි දෙනෙක් ඉන්නෙ සමහර දේවල් ඉටු කරගන්නට ,ලබාගන්නට නොහැකි වීම ගැන විශාල කනස්සල්ලකින්. අතලොස්සක් හැරෙන්නට ගොඩක් අය “අත හැරීම” කියන සැනසිල්ලට කැමති නෑ, ඒක ඒ අයගෙ වරදක් නොවෙයි, මේ සටහන තියන මමත් අත හරින්න ලෝබයි, ඉතින් ”තව එක සැරයක්” කියන ආශිර්වාද ලත් වචනයට මිනිස්සු ඇලුම් කරන්නෙ ඒකයි.
ජීවිතේ ගැන සියයට පනහ පනහ බලාපොරොත්තු තියාගන්න කියල වෛදවරු කියල තිබුන නිසා චාන්දනීගෙ ලොකුමාමා බලන්න නෑදෑයො හැමෝම එන්න ගත්තා,අවිවාහකයෙක් නිසා ඒ මාමට දරුවො හිටියෙ නෑ, ඒත් සහෝදරයින්ගෙ දරුවොන්ගෙන් අයි සී යූ එකේ දොරටුව නිතරම ඇහිරිලා තිබුනා.අපි චාන්දනීගෙ මාම බලන්න ගිහින් කොරිඩෝවෙ වාඩිවෙලා ඉන්නකොට වීදුරු කවුලුවෙන් රෝගියා දිහා බලන් හිටපු මැදිවිය පහුකරපු සුන්දර කාන්තාවක් චාන්දනී ලගට ආවා,
”මට එක සැරයක් ඇද ලගට ගිහින් පාලිතව බලන්න බැරිවෙයිද දුව?”
ඒ අවස්තාව ඇයට ලැබුනෙ නෑ,ඉතින් ඒ කාන්තාව අදුරු මුහුණින් යන්න ගියා,
”ඒ තමා ආංටි ඈන්, ලොකුමාම කැම්පස් ඉන්න කාලෙ ආංටි ඈන් එක්ක තමා යාලුවෙලා ඉදල තියෙන්නෙ, අපේ ලොකු සීයලා අකමැති වෙලා ආංටිලා කතෝලික නිසා ඉතින් මාමා ඒකයි බැදලම නැත්තෙ ආංටි ඈන් නම් ගෙදරින් කතා කරපු කෙනෙක් බැදල එයාට දරුවො දෙන්නෙක් ඉන්නව පව්”
ඉතින් ඒ ආදරවන්තියට ” එක සැරයක්” අවස්ථාව ලැබුනෙ නෑ. දැනගත්තු විදියට ජීවිතේ එයාට අවස්ථාවක් දීලම නෑ,
සමහර වෙලාවට අපි උවමනාවෙන්ම ජීවිතේ සමහර තැන් මගහැරගන්නව,සමහර තැන් මගහැරෙන්නෙ අපි නොදැනම, ඊටත් පස්සෙ අපිට ඒ ආශිර්වාදාත්මක වචනය උවමනා වෙනව සහ මතක් වෙනව,
” තව එක සැරයක්..”
”තව දවසක් හමුවී ඉමු මේ භවේ
එක සැරයක් දුටුවොත් ඇති දෑස් ඔබේ”
කීර්ති පැස්කුවෙල් ගයන මේ ගීතයේ පෙම්වතා ”එක සැරයක් ” ඉල්ලන්නෙ හඩපු හැටි කියන්න. ඒ එක සැරය සදාකාලික කරගන්න යටි හිතේ කැමැත්තකුත් ඇති
”තව එක සැරයක් මට ඉපදෙන්න ලැබුනොත් මනුස්ස අත්මෙක
i swear,මම ඔයාව කාටවත් දෙන්නෑ,,”
චාන්දනීගෙ මාම නැතිවෙලා අපි සෙමෙට්‍රියෙ ඉන්නකොට ආංටි ඈන් එයාගෙ දිනපොතක් ඇතුලෙන් ගත්ත පිතූරයක් පිටුපස්සෙ ලියල තිබ්බ මේ වචන ටික පෙන්නුව,එයා ඇඩුවෙ නම් නෑ ඇස්වලින්,ඒත් හදවතින් එයත් මාමා එක්කම ගිය බවක් මට දැනුනා, ආංටි ඈන් පෙන්නපු පිංතූරෙ හිටියෙ පේරාදෙණිය කැම්පස් එකේ ඒ දෙන්නයි යාලුවො ගොඩකුයි, හන්තානෙ නගින්න ගිය වෙලාවක ගත්තු එකක්.
ඔබ මේ සටහන දහ සැරයක් කියවන්න හිතුනොත් කියවන්න, ඒත් තව එක සැරයක් හරි මග හැරුන තැනක් තියනවාදැයි බලන්න, ඉක්මනින් ඒ වරද හදාගන්න, අමතක කරන්නම එපා ”තව එක සැරයක්” සමහරවිට අපිට ලැබෙන එකක්ම නෑ
සදාකල්හිම ආදරෙන්
උපුටා ගැනීම: Tharangani Dilrukshi Jayasena