මේ කතාවත් ගම්පහ පිරිමි පාසලේ සගයන් වෙනුවෙන්මයි.
6 වසරෙදි ගණන් පීරියඩ් එකේදි දවල් හීනයක් දැකපු පන්ති නායක කල්හාරයා එක පාරටම නැගිටලා වටයක් කැරකිලා ජී.දිසානායක සර්ට කිව්වා ” දෙන්න ප්‍රියේ දෑතට ඔය දෑත ” කියලා. ඒත් දෑත වෙනුවට වේවැල් පාර කාපු මූ සිංහල උගන්නන සර්ට කිව්වේ ” කැන්ද නරියා ” කියලා. ෂර්ලොක් හෝම්ස් පොත් ඔක්කොම කියවලා තියෙන කණිෂ්කයා නිකං ඉන්න ගමන් ” අලි පැටියෝ ඔයයි මමයි ” කියලා තාලෙට කිව්වාම ඒකට තද වෙච්ච මහත අනූෂ්, චමෝද් හෙවත් ජිමා ත් එක්ක එකතු වෙලා අරූට අමානුෂික ලෙස පහර දුන්නා.
අපේ ගෙවල් තිබ්බෙ කඳානෙ. බස් එකේ එද්දි මගින් නගිනවා කොළ පාට ටයි එකක් දා ගත්ත සුදු ලස්සන අක්කා කෙනෙක්. එයා එතකොට 13 වසරෙ. හැමදාම බස් එකෙන් බැස්සට පස්සෙ මගෙ අතින් අල්ලගෙන යනවා. කහ පාලම බැස්සට පස්සෙ මාව අනිත් බස් එකට නග්ගලා එයා වෙන බස් එකක නැගලා යනවා. ඒ කාලෙ වැස්ස දවස් වලට මම හිතලම කුඩයක් ගේන්නෙ නෑ. ඒ අක්කා රෝස පාට මල් කුඩේ යටින් මාව තුරුළු කරගෙන යනවා. ඒ අක්කගෙ අත් වල තිබ්බ සීතලටත්, සිරුරේ තිබූ උණුසුමටත් මම ආසා කළා. ඉංග්‍රීසි පන්තිය ඉවර වෙනකම්ම මම කකුළ පාගගෙන හිටියත් මුකුත් නොකියපු සුභානිටත්, ගණන් පන්තියෙ සර් නැති වෙලේට මගෙ අතින් අල්ලන් කතා කර කර හිටපු තිළිණිටත්, ට්‍රිප් එකක් ගිහින් එද්දි මගෙ ඔඩොක්කුවෙ ඔළුව තියාගෙන නිදාගෙන ඉද්දි එක පාරටම ඇහැරිලා මාව බදාගෙන කම්මුල සිප ගත් විජේසිංහ අංකල්ගෙ දුවටත් වඩා මම මේ අක්කාට ආදරේ කළා. හත වසරේ මැද භාගයේදී ඇය මාව අඳුරු ගම්පහ නගරයේ තනි කරලා යන්න ගියා. සරසවි වරම් ලද ඈ දැන් අධ්‍යාපන දෙපාර්තමේන්තුවේ වැඩ කරනවා.
ඒ අක්කා ගැන හිත හිත වැස්ස දවසක බස් එකේ යද්දි ඉස්කෝලෙ ළං වුණාම දකුණු අතට බෑග් එක අරගෙන බස් එකේ උඩ පොල්ල අල්ලන්න ඉංග්‍රීසි ජේ අකුරේ හැඩේට මිටක් සහිත කුඩේ තිබ්බ වම් අත උඩට ඉස්සුවා. කුඩේ මිටත් එක්ක ළග හිටපු රතු පාට ටයි එකක් දා ගත්ත අක්කා කෙනෙක්ගෙ ගවුමත් උඩට ආවා. කලබල වෙච්ච පාර මම කුඩේ උඩටම ඇදලා ගත්තා. ඒ අක්කා යටි ගිරියෙන් කෑ ගහලා මගෙ කණට ගැහුවා. තව දවසක් ඉස්කෝලෙ ඇරිලා සෙනග පිරිච්ච බස් එකක යද්දි ඩ්‍රයිවර් බ්‍රේක් එක උඩ හිට ගත්තා. කොළ පාට ටයි එකක් දා ගත්ත අක්කා කෙනෙක් පූසියෙක් වගේ රූටගෙන ආවා. අක්කගෙ ඩියොඩ්‍රන්ට් ගාන තැන මගෙ මූණ සිප ගත්තා. උදේ බස් වලදි කරන පුරුද්දට මම තදින් හුස්ම ඉහළට ඇද්දා. මට ඇඬුණෙ දුකට.
චෙස් උගන්නපු මොරායස් සර්ගෙ අක්කා ඉගෙනගෙන තියන්නෙ අපේ ඉස්කෝලෙ ළගම තියෙන බාලිකා පාසලේ. එයා කිව්වා අපේ ඉස්කෝලෙයි ඒ බාලිකා පාසලයි අතර උමගක් තිබිලා තියෙනවා කියලා. මේක ගැන හොයද්දි මම දැක්කා පිට්ටනිය කෙළවරේ තරමක් ලොකු වලක් තියනවා. උමගෙ කට කියලා හිතලා ඕකට පනින්න ගිහින් මගෙ කකුළත් උළුක් වුණා. කෑ ගහන සද්දෙ ඇහිලා මාව ගොඩට ගත්තෙ ශිෂ්‍ය නායකයො දෙන්නෙක්. එයාලා කිව්වා ඒක පරණ කුණු වලක් කියලා.
ටීචර් කෙනෙක් දොර දෙකේ ලේලන්ඩ් බස් වල යන්න කැමති උදානයත් එක්ක කතා කර කර හිටපු අකිලයාව නැගිට්ටවලා ප්‍රශ්නයක් ඇහුවාම සුභසිංහයා කෑ ගැහුවා අන්න පොකිල කියලා. ටීචර් මූට ගහන්න යද්දි ” නෑ මිස් ඌ අන්න කිකිළි කියලයි කිව්වේ ” කියලා ඌව බේර ගත්තෙ වීදාගමයා. නැටුම් කාමරේදි ටීචර් නැති වෙලේට අනිත් උන් නටන්න පුරුදු වෙද්දි පොළොව ඇද නිසා මම කළේ බෙර වලට ඇනලා බෙර පළපු එක. තාක්ෂණික කුසලතා වලට මම ගෙදරින් බඩු ගේන්නෙ නෑ. ඉස්කෝලෙ තියෙන පරණ මේස පුටුවලින් ලී ගලවගෙන යන්නේ.
8 වසරෙදි ගාල්ලෙ ට්‍රිප් එක ගියාම සුදර්ශනයා සුපිරි වෙළඳසැලකට ගිහින් චොක්ලට් කාලා කොළේ සාක්කුවෙ දාගෙන ටොපි දෙක තුනක් අරන් ඒවට විතරක් සල්ලි ගෙවලා ආවා. ආපහු එද්දි මම ජනේලෙන් ඔළුව දාලා බීපු මනුස්සයෙක්ට පිස්සෝ කියලා කෑ ගහලා පොර බස් එක පස්සෙන් දුවගෙන ආවා.
9 වසරෙ ඉද්දි සමස්ථ ලංකා චෙස් තරඟයකින් අපේ ඉස්කෝලෙ චෙස් කණ්ඩායම දෙවෙනි තැන ගත්තාම ඊට දවස් තුනකට පස්සෙ ” උඹලගෙ සතුට තමයි මගෙත් සතුට ” කියපු චෙස් භාර රොහාන් සර් අපිට පීසා ගෙනත් දුන්න වෙලේ මම ළහිරු අයියට කිව්වා ” අපි වෙනුවෙන් මෙච්චර ආදරයක් ” කියලා. ළහිරුවා මට ටොක්කක් ඇනලා කිව්වා ” රොහාන් සර්ට 9 වසර අංශ ප්‍රධානී ලෙස උසස්වීමක් ලැබිලා ” කියලා. ඊට පස්සෙ රොහාන් සර් 9 වසරෙ හැම පන්තියකටම මොනිටර් පොත ගානෙ බෙදුවා. ළමයෙක් වැරැද්දක් කළාම ඒ පොතේ ලියන්න ඕනෙ. දවස ගානෙ මෙච්චර කල් අතේ තියාගෙන හිටපු චූටි ෆෝන් එක ලොකු ඇසුරුමක දාලා ඉනේ බැඳගෙන අළුතෙන් ගත්ත වේවැලත් වන වන එන රොහාන් සර් පොත බලලා අපිට නෙළනවා. වනසිංහ සර් අලිබබා සහ හොරු හතළිහේ නායක හොරා වගේ පොතේ ලියලා වෙන අයට කියලා ගස්සවන්නෙ නැතුව තමන්ම වැඩේට බහිනවා. අපේ පන්තියෙ ඉන්න රොහාන් සර්ගෙ පුතා අයේෂයා කුණුහර්ප කියද්දි සුදර්ශනයා ඒවා වෙනම පොතක ලියා ගන්නවා.
හාමුදුරුවො එක දවසක් හොට් ඩෝග් එකක් බෙදා ගන්න බැරුව කැන්ටිම ළග මරාගත්ත දෙන්නෙක්ට ගැහුවේ කැන්ටිමේ තියෙන ඔක්කොම හොට් ඩෝග්ස් ටික ගෙනල්ලා මේ ඔක්කොම කාපිය කිව්වාම ඒවා කාගන්න බැරුව අඬපු වෙලේ.
ළඟදි බැන්ද නිමන්තයාගෙ නෝනා දන්නෙ නැති වුණාට මිනිහා ඒ කාලෙ කොල්ලන්ගෙ පපු ප්‍රදේශය සහ දේහ උෂ්ණත්වයට වඩා අඩු උෂ්ණත්වයක තබා ගැනීම සඳහා ශරීරයේ බාහිරව පිහිටා ඇති අවයවය ඉතා තදින් මිරිකනවා. සචින්තනයාට නොකඩවා බරපතල අපයෝජන කිරීම පිළිබඳව චෝදනා ලැබූ නිමන්තයා වෙරළු මල් එක්ක ප්‍රබලව ගනුදෙනු කරන මගේ ශරීරයට අත තැබීමට පැකිළුණා. 11 වසරෙ ට්‍රිප් එක ගිහින් බිම පෙරළිලා කළු වෙච්ච සුදු කලිසමේ කුණු යවන්න කොකා කෝලා පුරවපු භාජනයක දවසක් තිස්සෙ ඔබලා තියලා හෝදලා ඇදගෙන එද්දි ඒක ඉරිලා කියල මුලින්ම දැක්කෙ නිමන්තයා. එදා පටිය උපරිම දික් කරපු බෑග් එකත් දාගෙන භූගෝල විද්‍යා කාමරේට යද්දි මම ඉස්කෝලෙන් පනින්න යනවා කියලා හිතපු නන්දනී මිස් බෑග් එක උස්සලා බැලුවා මේක ඇත්තක්ද කියලා.
අපි දැකලා තියෙන්නෙ සුදු හංසයො වුණාට මම වගේම ඉංග්‍රීසි හෝඩියෙ බී අකුරට දෙපාරකුත්, ඩබ්ලියු අකුරට එක පාරකුත් ආදරේ කරන උපේක්ෂයාගෙ එහා ගෙදර අක්කට හිටියේ කළු හංසයො ජෝඩුවක්.
හදන්න බැරි හින්දා ආච්චිලගෙ ගෙදර නවත්තලා හිටපු රන්දිල් අනාචාරයේ ගිහින් ගෙදර එන්න පරක්කු වුණාම ආච්චි කෝල් කරන්නෙ අචින්තයාට.
ඉස්කෝලෙ තිබ්බ ප්‍රදර්ශනයකට අපේ පන්තියෙ උං හැදුවෙ ගොවි ගෙදරක්. මුං මේක කණු උඩ හදන්න හදද්දි ඉස්කෝලෙ ප්‍රින්සිපල් හාමුදුරුවො කියලා මිනිමරන්නෙ නැතුව බිම හදපිය කියලා. හාමුදුරුවො අචින්තයාගෙ නැන්දා කෙනෙක් එක්ක කැම්පස් එකේ ඉගෙනගෙන තියෙන්නේ. අචින්තයා මේක දැනගෙන පිංසෙණ්ඩු වෙලා නැන්දා ලවා හාමුදුරුවන්ට මූ ගැන හොඳ කියවලා. අචින්තයාගෙ නැන්දගෙ දැන හැඳුනුම් කමට හාමුදුරුවො ගොවි ගෙදර හද හද ඉද්දි එක දවසක ඇවිල්ලා අපේ උංට හොඳට කන්න බොන්න දීලා තිබ්බා. එදා අචින්තයා එතන ඉඳලා නෑ.
දොස්තර කෙනෙක්ගෙ පුතෙක් වුණත් අචින්තයා ඒ කාලෙ අන්තිමයාට ටිකක් මෙහායින් හිටියේ. මුගෙ නෑදෑ මල්ලි කෙනෙක් පන්තියෙ මුල් 10 දෙනා අතර ඉන්න නිසා මූ ගත්තා අලුත් රෙකෝඩ් පොතක්. ඊට පස්සෙ මූ කොස් ඇට බාගන්න බළලුන් දෙන්නා වන පිනිඳුවාටයි ඉසුරු සුභාෂණයාටයි වැඩේ භාර දීලා සල්ලිත් දුන්නා. පිනිඳුවා හැදුවා ප්‍රින්සිපල්ගෙ හොර සීල් එකක්. පන්ති භාර වනසිංහ සර්ගෙ අත්සනත් හොරට ගැහුවා. ඔරිජිනල් රෙකෝඩ් පොත ඉස්කෝලෙට ඉදිරිපත් කරලා හොර එක ගෙදරට පෙන්නනවා. අචින්තයා මේ වැඩේ බිස්නස් එකක් විදියට කරන්න ඉඳලා තියෙන්නේ. ඒත් රිපෝට් එකේ ඉලක්කමක් වෙනස් කරපු රොෂාන් හෙවත් රොටියා අම්ම එක්ක සුරනිමල මහත්තයා හම්බෙන්න ඇවිල්ලා ඉන්නවා දැක්කම අචී බබා හොඳටම බය වුණා. ඊට පස්සෙ හොරට හදපු එක ළඟ තියාගෙන ඔරිජිනල් එක සසලංකයාට දුන්නා. ඒක සසලංකයා ගාව තාම තියෙනවාලු.
අචින්තයාගෙ වැඩෙන් පන්නරය ලබපු පිනිඳුවායි ප්‍රෙස්ලියයි එක දවසක් මට රෙකෝඩ් පොතක් පෙන්නලා කිව්වා බලපන් මේකෙ මොකක් හරි අවුලක් තියෙනවාද කියලා. බැලූ බැල්මට නොපෙනුණත් සියුම්ව නිරීක්ෂණය කළ මට පෙනුණා අන්තිමටම ලකුණු දාලා තිබ්බ පිටුවේ මැද හරිය අනිත් තැන් වලට සාපේක්ෂව ඝනකමින් වැඩියි කියලා. මුං රොකට් නිර්මාණයේදී එක කොළය කොළ දෙකක් කරන විදියට මැද ලකුණු දාලා තියෙන කොටුව තියුණු තුඩකින් කපලා වෙන් කරලා ඒකට අලුත් කොළයක් අලවලා. තව දවසක් වාර විභාගයකට කලාපෙන් දුන්න ඉතිහාස පේපරේ අපිට කලින් වෙන ඉස්කෝලෙකට දීලා. ඉතිහාසය දවසේ උදේ පාන්දරම ඒ පේපර් එකක් උස්සං ආපු ප්‍රෙස්ලියා අච්චු පොත පෙරළ පෙරළා උත්තර හොයලා චූටි දිග කොළ කෑල්ලක ලියා ගත්තා. උඹට ෂුවර්ද මේක තමයි පේපර් එක කියලා තීක්ෂණයා ඇහුවම ප්‍රෙස්ලියා ඌට කිව්වා මෛථූනය කරන්නෙ නැතුව ඕන නම් ලියාගනින් කියලා. පොප් ශබ්දයක් ඇහෙන්නෙ හයිඩ්‍රජන් වායුව දහනයේදි විතරයි නේද කියලා ලැබ් එකේදි ප්‍රෙස්ලියා ඇහුවාම රංජිත් සර් හෙවත් දෙයියා කිව්වා නෑ සමහර වෙලේට පස්ස පැත්තෙනුත් ඇහෙනවා කියලා.
හේනේගමයා කියන විදියට සචිත් හෙවත් ලොම්බා සුදර්ශනයාගෙ ගෙවල් පැත්තෙ තියෙන හැපි බ්‍රයිට් තානායමේ කාමරයක් කුලියට අරන් තිබ්බෙ රුපියල් අටසීයකට. එක දවසක් මාත් ඕකෙන් ගිහින් ඇහුවම එතන උං කිව්වා අපි දැන් සමාජ සේවය කරන්නෙ නෑ මල්ලි කියලා.
අලුතෙන් ඉස්කෝලෙට ආපු එකෙක් කේක් ගෙනාවෙ නෑ කියලා ඌට සද්දයක් දාලා හාමුදුරුවන්ගෙන් බැනුම් අහපු ටෙරා ” අලියෙක් ස්ටේජ් එකට ගෙනාවොත් මම අලියටත් ගහනවා දරුවො ” කියන උස බිල්ඩින් එකක ඉන්න ටියුෂන් සර් කෙනෙක් ගෙනුත් ගුටි කාලා තියෙනවා. මත්පැන් පානය තදින්ම පිළිකුල් කරන ඒ සර් සමහර වෙලේට අපේ ගෙදර ඇවිල්ලා තාත්තත් එක්ක සෝඩා කලවම් කරපු සිසිල් බීම බොනවා කියලා මට කිව්ව ටියුෂන් සර් කෙනෙක්ගෙම පුතෙක් වෙච්ච හේවගේට ඉස්කෝලෙ සර් කෙනෙක් ඌ පණ වගේ ආදරේ කරපු කණ්ණාඩි දෙක විසිවෙන්න ගැහුවාම මූ දුවලා ගිහින් කණ්ණාඩි දෙක අහුලගෙන ඒක පිහදාලා ඊට පස්සෙ කම්මුල අත ගෑවා.
මම සයන්ස් එකට ගිය මුල්ම දවසේ ස්ප්‍රයිට් ඇඩ් එකේ හිටපු තැනටම යන්න කියන වර්ග දෙකක අන්තරයේ සාධක වැරදියට ලියපු සර්ට හාත්පසින්ම වෙනස් ලේනෙක් වගේ ලස්සන බස්නායක සර් පීරියඩ් දෙකක්ම මාව එළියෙ හිටවලා තියද්දි ” උඹ බය වෙන්න එපා කොල්ලො ” කියලා පිටට තට්ටුවක් දාගෙන මගෙ ළඟින් ගිය කුමාරි මිස්ට නරක ළමයි කිව්වෙ කැලෑ කුමාරි කියලා. ඊට පස්සෙ දවසක ගෙදර වැඩ කරපු නැති මගෙ කම්මුල තදින් අතගාපු බර්ටි සර් ලැබ් එකේ තිබ්බ ගෑස් සිලින්ඩරේ රෙගියුලේටරය සවි කරන තැනට පෑනකින් ඇන්න එකෙක්ගෙ සරුවාංගෙම තදින් අත ගෑවා.
මට වඩා අවුරුද්දක් බාල ශිෂ්‍ය නායක ඩිලක්ෂන් මට කිව්වා පොඩ්ඩක් හිටපන් අපිත් සයන්ස් එකට එනකම් උඹලව හදලා ගන්න කියලා. පස්සෙ කාලෙක හාමුදුරුවො විදුහල්පති ධූරයෙන් ඉවත් වුණාම ඩිලක්ෂන් ඇතුළු ශිෂ්‍ය නායකයො සෙට් එකක් සයන්ස් එකට කඩා වැදිලා අතේ පයේ හිරි ඇරගන්න හාමුදුරුවො අයින් වෙනකම් බලාගෙන හිටපු අපේ උන්ට සද්දයක් දාලා. සයන්ස් බිල්ඩින් එක උඩ තට්ටුවට නගින්න දෙපැත්තෙන් පඩි පෙළවල් දෙකක් තිබ්බ ඉංග්‍රීසි සී අකුරේ හැඩේට හදපු එකක්. අපේ උං ශිෂ්‍ය නායකයින්ට ගහලා තිබ්බේ එළියට යන්න බැරි වෙන්න පඩිපෙළවල් වල දොරවල් දෙක වහලා.
තීක්ෂණයයි කෝසලයයි ඒ කාලෙ හොඳටම බීලා බදාගෙන ඉන්න ෆොටෝ එකක් ශෙයාර් කරපු දිලීෂයා මේ ළඟදි නළුවෙක්ගෙ ෆොටෝ එකකට කමෙන්ට් එකක් දාලා තිබ්බා උඹව දැක්කාම අපිත් සමලිංගිකයො වෙනවා කියලා.
ශිෂ්‍ය නායකයෙක් වෙච්ච රාහුලත් එක්ක තියෙන පෞද්ගලික හිතවත්කමකට 12 වසරෙ පන්ති නායකයා කරපු පහ වසරෙ ඉඳලම වංචා දූෂණ චෝදනා තියෙන කෞෂල්‍යයා මේස රෙද්දක් ගන්න පන්තියෙ උංගෙන් සල්ලි එකතු කරලා ඊට පස්සෙ අලුතෙන් ඉස්කෝලෙ ආපු එකෙක්ට කියලා මේස රෙද්දක් ගෙන්නගෙන එකතු කරපු සල්ලි වලින් රයිස් කාලා ඌට බඩ ගිහින් තියෙනවා. ඔය කතාව මට කිව්ව ෆේස්බුක් එකෙන් රට හදන අමුණුගමයා එක දවසක් සුබෝධයගෙ ගෙදර බීලා වැටිලා ඉද්දි ඒ ගෙදර උන් එකතු වෙලා දෙහි ගාලා තිබ්බා.
උපුටා ගැනීම: Para CF