–මේකත් ඇත්තම කතාවක්. මගේ යහලුවෙකු ගැන. කතාවේ හරයට වෙනසක් නොවෙන්න යම් යම් කරුණු සහ නම් වෙනස් කරලා තියනවා අනන්‍යතාවය සගවන්න–
අපේ ඉස්කෝලේ හිටිය අපිත් එක්ක එක එක ජාතියේ ළමුන්. එක එක අයගේ එක එක ගතිගුණ. සමහරු දුප්පත් පවුල් වලින් එන්නේ තවත් සමහරු පොහොසත් පවුල් වලින් එන්නේ. ඒ කොහොම උනත් එක එක අයගේ හැසිරීම එක එක වගේ. සමහරු ඉන්නේ බිල් ගේට්ස් ගේ පුතා වගේ, එත් එහෙම නැහැ, සමහරු ඉන්නේ දවල්ට කන්න සල්ලි නැහැ වගේ, එත් ඉන්නේ මාලිගාවක වෙන්න පුළුවන්.
අපිත් එක්ක යාලුවෙක් හිටිය ඉතාම පොහොසත්, එයාගේ පවුලේ අයට ලංකාවේ ප්‍රසිද්ද සමාගමක් අයිතියි (අපි එයාට බිනර කියමු.). ගෙදර නිකන් මාලිගාවක් වගේ, වාහන එහෙම ලොකු ප්‍රමාණයක් තියනව (බෙන්ස්, බී එම් ඩබ්ලිව් වගේ). සේවකයෝ සිය ගණනක් වැඩ කරනවා ඔවුන් යටතේ ඔවුන්ගේ සමාගම් වල. නමුත් බිනර ඉතාම සරල චාම් ළමයෙක්. අපිත් ගොඩක් කාලයක් යනකන් ඔහුගේ පවුල හෝ, ඔහුගේ ධනවත් කම් ගැන දැනුවත් නැහැ. යන්නේ එන්නේ එක්කෝ පයින් නැත්නම් තුන් රෝද රථයේ ගොඩක් වෙලාවට. අපි ගොඩක් පස්සේ තමයි දැනගත්තේ මෙයා කාගේ කවුද, කියල. අපි ඇහුවම ඇයි එහෙම වාහන වල එන්නේ නැත්තේ, කියල “මොකෙන් ගියත් අන්තිමේදී යන්න්දේ එකම තැනටනේ, ලැජ්ජාවේ බෑ ඕවගේ යන්න” වගේ කියන්නේ.
සරලව කිවොත් මෙයාව දැක්ක කෙනෙක් හිතන්නේ නැහැ මෙයාගේ තත්වේ මෙහෙමයි කියල. ගති ගුණ එහෙමත් හොදයි, කරුණාවන්තයි, විනීතයි. විනෝදෙන් ඉන්න කෙනෙක්. අහිංසක කෙනෙක් ඉස්කෝලේ කාලේ ඉදල. පෙනුම ඉතින් ලොකු කඩවසම් බවක් නැහැ, නමුත් සාමාන්යෙන් හොද පෙනුමක් තියනව. සාමාන්යෙන් ඉගන ගන්නත් දක්ෂයි. කොහොම හරි මොකෙක් උනත් මෙයත් කොල්ලෙක් නේ. ඉතින් කෙල්ලෙක් ගැන හිත ගියා (එයාට නිශාදි කියමු). ඇත්තටම කිවොත් ලග හිටිය ඉස්කෝලෙක අපේ වයසේම ගැහැණු ළමයෙක්. ගොඩක් ලස්සනයි. අපේ වයසේ අපිත් එක්ක ටියුෂන් පන්ති ආපු ලස්සනම ළමයි කිහිප දෙනාගෙන් එක්කෙනෙක් කිවොත් වැරදි නැහැ. මෙයා ඉතින් වැඩියෙන්ම ඉගන ගන්න දක්ෂ නැහැ, නමුත් මෙයාගේ සහෝදරිය (අපිට අවුරුදු කීපයක් වැඩිමල්) ඉතාම දක්ෂයි, ඒක හන්ද මෙයත් ඉතින් ටියුෂන් ගුරුවරුන්ගේ ඔලුවේ “දක්ෂ” ළමයෙක් කියල ලියාපදිංචි වෙලා තිබ්බ.
ඉතින් ඔන්න බිනර මෙයා දිහා බල බල ඉන්නවා. හැබැයි ඉතින් බිනර විතරක් නෙවෙයි, ගොඩක් අය බලන හන්ද මම හිතන්නේ නිශාදි ට මේක ගැන ගානක් නැහැ. සමහර දවස් වල වෙන පන්තියකට නිශාදි යද්දී කොහොම හරි බිනර කතා කරලා තිබ්බ නිශාදිට (යාලුවෝ විදියට). බිනර මොනවා උනත් විනීතව කතා කරන, දැක්කම අහිංසක පෙනුමක් තියෙන්නේ. ඔන්න ඉතින් නිෂදිගේ දුරකථන අංකයත් අරගන. හැබැයි පොඩි අවුලක් තියනවා, මේ වෙද්දී නිශාදි ට කොල්ලෙක් ඉන්නවා කියල බිනර හොයාගන්නවා. අපේ ඉස්කෝලෙම අපිට වැඩිය අවුරුද්දක් වැඩිමල් කෙනෙක්. නිකන් නළුවා වගේ පොරක්. සරලව කිවොත් අපේ ඉස්කෝලේ තියන නගරයේ තිබ්බ අවුරුදු උත්සවේක අවුරුදු කුමාරයා තරගෙන් දිනපු කෙනෙක්. ඉතින් අපේ බිනර ඕක දැනගත්තම “ඔව් ඉතින් ඒ අය්ය හොදයිනේ. නිශාදි සතුටෙන් නම් කමක් නෑනේ” කියල උත්සහ කරන එක අත්හැරිය. හැබැයි නිශාදි එක්ක යාලුවෝ වගේ හිටිය.
පස්සේ ආරංචි උනා අර දෙන්නගේ සම්බන්දෙ නැවතුනා කියල. ඉතින් අපේ බිනර ඕක දැනගත්තත් එකපාර අහන්න ගියේ නැහැ. පස්සේ බලද්දී, නිශාදිට යෝජනාවක් ඇවිල්ල, ප්‍රසිද්ද දේශපාලඥයෙක්ගේ සහෝදරියකගේ දරුවෙක්. කොහොම හරි ඒකත් උනේ නැහැ. මේ වෙද්දී ඉස්කෝලෙන් අයින් වෙලා ඒ ලෙවෙල් ඉවර වෙලා. දවසක් අපේ යාළුවා නිශාදිට එක්ක එස් එම් එස් කර කර ඉඳල (ඒ කාලේ මුණු පොත වැඩිය ප්‍රසිද්ද නැහැනේ). කොහොමින් කොහොම හරි බිනර අහල නිශාදිගෙන් කැමැත්ත (අහල තියෙන්නේ කෝල් කරලා, කියල තමයි කිවේ). නිශාදි ටිකක් වෙලා ඉඳල කියල, කැමති නැහැ කියල. බිනර ඉතින් විනීත මනුස්සයනේ. හා කමක් නැහැ, කියල. යාලුවෙක් විදියට ඉමු කියල.
පස්සේ ඔය අතරේ අපේ තව යාලුවෙක් හිටිය (එයාට කියමු ජනක කියල), එයා යාලු උනා නිශාදි ගේ යාලුවෙක් එක්ක (එයාට කියමු චමලි කියල). ජනක එක්ක චමලි සම්බදේ නැගලම ගියා (දෙන්න පස්සේ කාලෙක වෙන් උනා, නමුත් මේ කාලේ මේ දෙන්න තමයි හොදම ජෝඩුව). ජනකට චමලි කියල නිශාදි බිනරට අකමැති උන හේතුව. නිශාදි හිතල තියෙන්නේ බිනර කියන්නෙත් අපි වගේ “එදා වේල” කෙනෙක් කියල. මොකද නිෂදිට කලින් යෝජනා එහෙම ඇවිල්ල තියෙන්නෙත් ඉතින් හොද සල්ලි තියන පවුල් වලින්නේ. ඉතින් එයා මොකටද මේ කොහෙවත් ඉන්න කෙනෙක්ට කැමති වෙන්නේ කියල හිතන්න ඇති. කොහොමත් ඉතින් ඔය කාලෙට ගොඩක් ගැහැණු ළමයි කැමති නේ හොදට සැප දෙන්න පුළුවන් ස්ථිර හොද අනාගතයක් තියන කෙනෙක් හොයාගන්න.
අපේ කීප දෙනා කතා උනේ බිනර මේ ගෑනිට මුගේ වාහනේක පින්තුරයක්වත් යවල නැද්ද කියල. බිනරගේ මුණු පොතට දැන් උනත් ගිහිලා බැලුවොත් තියෙන්නේ බිනරයාගේ මුණයි, ඌ ගිය ගමන් වල පින්තුර වගේකුයි තමයි. අනිත් එවුන්ගේ ඉතින් තියන සබ්බ සකලමනාවම පෙන්න දානවනේ මුණු පොතේ, මුගේ එහෙම නෑ. හිතන්නකෝ මෙහෙම, අර වාහනේ එලවනවා පොටෝ ගන්න ට්‍රෙන්ඩ් එකක් මේ දැන් අවුරුදු කීපයකට කලින් ආවේ, මූ වාහනේ එලවනවා ෆොටෝ එකක් ගත්තොත් මුණු පොතට දාන්නේ මූ එලවනවා විතරයි, අර ඉස්සාහ තියන සුක්කානමේ තියන බෙන්ස් හරි බී එම් ඩබ්ලිව් හරි ලෝගෝ එක කපල දානවා.
ඉතින් ඕක ඔහොම උනා. බිනර විශ්ව විද්‍යාලේ ගියා. පලවෙනි උපාධිය ඉවර වෙලා දැන් දෙවැනි උපාධියකුත් ඉවරයි. පස්සේ වෙන ගැහැණු ළමයෙක්ව බැන්ද. හැබැයි අපේ මිතුරු කැලේ පොදු අදහස, බිනර බැන්ද ළමය අර නිෂදිට වඩා 100 ගුණයක් හොදයි කියන එක. හොද වෙලාවට නිශාදි කැමති නැති උනේ කියන එක තමයි මගේ පුද්ගලික අදහස (බිනරට මුනටම කියනවා ඒක). දැන් බිනර රස්සාවක් කරනවා. රස්සාවක් කියලා තමයි බිනර කියන්නේ, එත් ඉතින් වැඩ කරන්නේ එයාගෙම පවුලේ සමාගමක (තාත්තල බාප්පල ගේ), ඊලග අයිතිකාරයා (එහෙම නැත්නම් කලමනාකර අධ්‍යක්ෂක) වෙන්නේ අපේ බිනර තමයි ඉතින්. හැබැයි, තවමත් අර ඉස්සර හිටිය වගේම සරලයි, පොලවට බැහැල ඉන්නේ. මගේ නෑදෑ වෙන මල්ලි කෙනෙක් වැඩ කරනවා එයාලගේ සමාගමක එයා කිව විදියට වැඩ කරන අය එක්කත් එහෙමයි, හිත හොදින් ඉන්නේ, බොස් කියල උඩින් යන්නේ නැහැ. වැඩකරන අයත් කැමති.
නිශාදිත් බැන්ද ඉතින්. සාමාන්යෙන් ධනවත් කෙනෙක්. හැබැයි ලගදීම ලැබුන අරන්චියේ හැටියට, එයාගේ විවාහ ජීවිතය ටිකක් කොට උඩ.
බිනර ඉතින් තාමත් නිෂදිගේ මුණු පොත බලනවා, කාලෙකට සැරයක් කතා එහෙම කරනවාලු (යාලුවෝ වගේ). හැබැයි තවම අර දැන් අවුරුදු ගානකට කලින් බිනරගේ හිතේ නිශාදි ගැන තිබ්බ කැමැත්ත නැති වෙලා නැහැලු. (එත් ඉතින් ඇල් වතුරත් නිවල බොන විදියේ කෙනෙක් හන්ද මම හිතන්නේ නැහැ බිනර නිශාදි ඇවිල්ල ඇහුවත් එයාගේ බිරිදට හිත රිදෙන වැඩක් කරයි කියල). බිනර කියන විදියට “නිශාදි ගේ අලුතෙන් පින්තුරයක් මුණු පොතේ දැම්මම ඒක දැක්කත් හිතට හොදයි”. ඔන්න ඔහොම තමයි, තමන් පොඩි කාලේ කෙනෙක්ට කැමැත්තක් ඇති උනොත් ඒක අමතක කරන්න බැහැ කොච්චර කල් ගියත්.
සමහරු ඉන්නවා ගොඩක් නිහතමානී, පොලවේ පය ගහල යන, නමුත් සමහරු එහෙම අයට වැඩිය කැමති නැහැ. මොකක් උනත් අන්තිමේදී හැමදේම හොදට වෙන්නේ කියල හිත හදාගන්න තමයි වෙන්නේ.
දැන් සමහරු කියයි සල්ලි වලට කැමති වෙන ගැහැණු අය නරකයි, හෝ එයාල හොද නැහැ කියල. නමුත් මම හිතන්නේ නැහැ ඒක එහෙම්මමයි කියල. සල්ලි නිසා පමණක් කැමති වෙනවනම් එක වෙනත් කතාවක්.
මගේ අදහස මේකයි, ඕනේ කෙනෙක් කැමති සැප විදින්න, අපි හිතමු බොහෝ විට කෙනෙක් තවත් කෙනෙක්ට කැමති වෙන්නේ ලස්සනට / කඩවසම් බවට, එහෙම නැත්නම් හැසිරෙන විදියට, නැත්නම් ගතිගුණ වලට නැත්නම් වෙන මොකක් හරි දෙකට, ඉතින් අපිට කියන්න බැහැ කෙනෙක්ගේ හිතෙන කැමැත්ත ඇති වෙන හේතුව වැරදි කියල. ඒවා සාමාන්‍ය දේවල්.
තව දෙයක්, කවදාවත් පොතක් කවරෙන් මනින්න එපා, මිනිස්සු හොදට හෝ නරකට එලියට පෙන්නවට වඩා ගොඩක් වෙනස්.
උපුටා ගැනීම: Tilina Herath