ලංකාවේ රෝහල් වල සිකුරුටි මහත්තුරු ඇටෙන්ඩඩ්ලා ඉතාම කරුණාවන්ත අයය.
ඔවුන් කිසිදාක කිසිම හිත රිදෙන වචනයක් පවසා කිසිවෙක්ට බනින්නේ නැත.
ඇත්තටම ලංකාවේ රෝහලකින් බෙහෙත් ගන්නට යන ඕනෑම අයෙක් ඔවුන්ගේ කරුණාවන්ත කම ගැන දනී.
එමනිසා බොහෝ දුරට ඔවුන්ගේ සේවාව ගැන පැහැදී රුපියල් පනහේ කොලයක් සීයේ කොලයක් සාක්කුවේ දැමීමට තරම් රෝහලට යන එන රෝගීන් සාමාන්‍ය මිනිසුන් දෙවරක් නොසිතයි.
තමන් යා යුතු මොන පෝලිමද නොදැන රෝහලේ කොතන හෝ මහලු ආච්චි අම්මෙක් සීයෙක් සිටියොත් සිකුරුටි මහතා හෝ නෝනා එතනට පැමිනේ.
අනේ අම්මෙ කොතනටද යන්න ඕනි ඉන්න මම කියා දෙන්නම් කියා ටිකට් එක පරීක්ෂා කරයි.
අනතුරුව තමන්ගේ මව රැගෙන යනවා මෙන් දෑතින්ම අල්ලාගෙන නියමිත පෝලිමට රැගෙන ගොස් වාඩිවෙන්නට පුටුවක් පවා ලබාදෙයි.
ඒ තරමට සිකුරුටි නෝනලා මහත්තුරු හිත හොඳ මිනිසුන් ය.
ඔවුන් කිසිදාක වැරදි පෝලිමේ හිටියා කියා අර අම්මාට හෝ තාත්තාට බනින්නේ නැත.
අඩුම තරමේ බනින්නට හිතන්නේ වත් නැත.
ඔබ රෝගියෙක් රැගෙන වාහනයකින් රෝහලට ඇතුල්වී වාහනය රෝහල තුල නැවැත්තුවොත් ඔවුන් කිසිදා ඔබට බනින්නේ නැත.
ඔවුන් පවසන්නේ වාහනේ ඔහොම තියෙන්න ඇරල ලෙඩා ගැන බලන්න කියායි.
නැතුව ලෙඩා මැරෙන්න පැත්තකට දාල හරි කමක් නෑ වාහනේ එලියෙන් දාල එන්න කියා ඔවුන් ඔබට නොබනිනු ඇත.
ඒ තරමටම මානව දයාව පිරුනු සුලු සේවක පිරිසක් අපේ රෝහල් පද්ධතිය පුරා සිටිති.
එමනිසා රජයේ රෝහලකට රෝගියෙක් රැගෙන යාමට කිසිම රියදුරෙක් දෙවරක් නොසිතයි.
රෝගියා රැගෙන ඒම ගැන සුලු සේවකයින් රියදුරුට ස්තූති කර නැවතත් මෙවන් ක්‍රියා කිරීමට දිරි ගන්වයි.
රියදුරු රෝහලෙන් එලියට එන්නේ සිකුරුටිට මල් පහන් තියා වඳින තරම් පැහැදීමකිනි.
කෙසේ හෝ රෝහල්වල දොස්තරලාට වඩා මිනිස්සු මේ සිකුරුටුට ඇටෙන්ඩඩ්ට ආදරය කරති.
දොස්තර වරු ඉන්නේ මේ ගැන දැඩි ඉරිසියාවෙනි.
ඒ තරමටම අපේ සුලු සේවකයෝ මිනිසුන්ට සලකති.
මීට අමතරව ඔවුන් රෝහල තුල විනය කඩන රියදුරන්ට අපූරු දඩුවම් ලබාදේ.
මේ නෝනා කර ඇත්තේ රෝගියෙක් රැගෙන ආ වාහනයක් වැරදි තැනක නවත්වා තිබෙනු දැක එම වාහනයේ හුලං ඇරීමයි.
යලි කිසිදා අර රියදුරා වැරදි තැනක වාහනය නවත්තන එකක් නැත.
නියම පාඩමක් ඔහු ඉගෙන ගෙන ඇත.
දෙවියෙක් බදු අර සිකුරුටි නෝනා නිසා රෝගියෙක් ගෙනා අවිනීත රියදුරා යස පාඩමක් ඉගෙන ගෙන ඇත.
වැරදි කලොත් දෙවියන්ට යම රජ්ජුරුවො වෙන්නත් පුලුවන් කියා කියන්නේ ඕකටයි.
වැරැද්ද රෝගියා රැගෙන ඒමයි.
එසේ නම් රෝගීන් රැගෙන ඒම වැනි වැරදි කිසිදා ඔහු යලි නොකරනු ඇත.
රාගම රෝහලේ සිකුරුටි නෝනා..
ඔබට ජාතියේ උත්තමාචාරය..!!
-මැන්ඩි-
උපුටාගැනීමකි
මූලාශ්‍රය: Senuri Ahinsa