” එක අතකට හැරී හරි.” අපේ නංගි කිව්වා.
” ඔව් ඉතින් ඌට හම්බවෙන ගානට කීයක් හරි තියන් එපැයි ඌත් බඩුවිකුණන්න, නැවේ ගානට ඌට විකුණන්න බෑනෙ”
අපේ ආච්චිත් කියපි.
” ආච්චි මේ මොනව කියනවද මන්ද, ඒ හැරී නෙමෙයි, හැරී කුමාරයා”
” මම හිතුවෙ මේ සිල්ලර කඩේ හැරිය කියල. ඇයි උඹල හැමදාම ටවුමෙ කඩවල ගනන් බලන් ඇවිල්ල ගේ ලග කඩේ එකාට බණිනවනෙ”
” ඇයි හැරීට මක් වෙලාද, පවුලට හතරවෙනි ලමයවත් ලැබිලද ?” අම්මත් ඇහුවා.
” කොහේද ප්‍රවෘත්තියක් බලනවද ජීවිතේකට, පත්තරේ ගත්තත් අරය ගාන එකයි මෙයා කන එකයි තමයි ගෑණු බලන්නෙ, ලමයි ඉන්නෙ විලියම්ට” තාත්තාත් කිව්වා.
” හැරී මොකෝ විලියම් මොකෝ”
” හොදට තියෙයි එහෙම හිතුවොත්, පුදුම ගෑණුනෙ මේ”
.” නෑ නෑ මම කිව්වෙ නම් දෙක මාරු වෙච්ච එක ගැන විතරයි. හැබෑට මොකෝ වෙලා තියෙන්නෙ ” අම්මා තමාව නිවැරදි කරා.
” නෑ ඉතින් හැරී කුමාරයා නිතරම මේගන් වෙනුවෙන් පෙනී හිටිනවනෙ, ඒකයි මම කිව්වෙ” නංගි කිව්වා. එයා ඉතින් අපේ ගෙදර ස්ත්‍රී විමුක්ති කාරි.
” මේගන් කිව්වෙ නඩුවක්ද?” ආච්චිටත් ඕන නැති එකක් නෑ. පොඩ්ඩක් හරි ඇහුනොත් අල ගිය මුලගිය වැල ගිය ඔක්කොම ඕනනෙ.
” නෑ නෑ ආච්චි , හැරී කුමාරයගෙ නෝනා”
” අපූරු නමක් නොවැ මේගන් , කසාද බැන්දම තමන්ගෙ ගෑනි වෙනුවෙන් පෙනී ඉන්න එක තමයි නියම පිරිමි කොම”
” ඒකට අපේ ගෙවල් වල, දිවි ගියත් අපි වෙනුවෙන් පෙනී සිටීම් නෑනෙ.” අම්මා නෝක්කාඩුවක් කිව්ව.
” ඔන්න බලහල්ලා කොහෙවත් නැති හැරියගෙ කතාව ඉවර වෙන්නෙත් ගෙදර ඉන්න මිනිහගෙන්නෙ, නිතරම අනුන් කරන එක ගැන කියනවා, අපි කරන කිසි දේක අගයක් දකිනවද නෑනෙ. ” තාත්තා කිව්වා.
” දැන් බලන්න ඔය හැරී කුමාරය ඔය මගුලක් කරගෙන තමන්ගෙ පවුලටනෙ ඇගිල්ල දික් කරන් ඉන්නෙ, මම නම් කවදාවත් බදින්නෙ නෑ හදනව හොද බල්ලෙක්, වීරයො කීයක් නම් ගෑණු හින්දා පීචන් වෙලා තියෙනවද? ” අපේ මල්ලිත් කිව්වා.
” අනේ බං උඹ දන්න තරම තමයි, ගෑණු කී දෙනෙක්නම් පිරිමි හින්ද රැජිනියො වෙන එක මග ඇරගෙන තියෙනවද?” නංගි කිසි දාක පසු බසින්නෙ නෑ.
” අපරාදෙ ඕයි තමුසෙ බැදල ඒ අවස්තාව නැති කර ගත්තෙ, අර මනුස්සයගෙ නරක වෙලාවක් පලදීල තමුසෙව කරගහ ගත්තා”
“අපේ නම් ඔය ගෙයි ගිනි පිටට දීමක් නෑනෙ, බුදු හාමුදරුවොත් දේසනා කරල තියෙන්නෙ, අනෙක වැරදි මනුස්සයෙක්ට සමහර දේවල් කිව්වම ලැබෙන උපදෙස් වලින් ප්‍රශ්නෙ වැඩි වෙන්න උනත් පුලුවන්”
නිශ්ශබ්දවම ඉන්නෙ මොකටද මමත් ලකුණු ටිකක් දාගත්තා.
” යනව හලෝ යන්න. මට ඇහිල තියෙනව අම්ම එක්ක කියල අයියට බණිනව කුටු කුටු ගගා. බලනව හැරී ජෝඩුව බැදල කිසි කරදරයක් නෑනෙ රජ පවුලෙනුත් වෙන් උනා , ඒකට තමුසෙලා බැන්දැයි කියලත් අපිට නිදහසක් කෝ, එලියට විසි කරපු ගෙම්බො වගේ ගේ දිහාම බලන් ඉන්නවා. ලමයි දාල යන්න, ලමයි බලාගන්න, අම්මට කියල බත් උයවගන්න අරව මේව හැම එකටම ආයිත් ගෙදරම රිංගනවා. දැන් මෙතන බොරු බයිල ගහනවා”
අපේ මල්ලිනම් මගේ පූරුවෙ තරහකාරයෙක් , සායම ගියානෙ මගේ. මේ ජෝඩුව හින්දා අපිටත් නිදහසේ ඉන්න නෑනෙ චික්.
( පින්තූරය අන්තර්ජාලයෙන් – මුල් හිමිකරුට ස්තූතියි )
උපුටා ගැනීම: Buddhika Abeysundara