නිහතමානී බණ (වැල් වටාරම්)

බස් රථයේ රියදුරු නලා හඬ නිකුත් කරනවාත් සමඟම ධාවකයා රථයෙන් පිටතට හිස දමා බස් රථයේ රියදුරු දෙස බැලීමට උත්සුක උනා. වෙනත් රියදුරකු තම වාහනයට නලාව නාද කිරීමෙන් තමන් අවමානයට ලක් වූවා යැයි හැඟෙන පෙනුමක් ඔහුගේ මුහුණේ දිස් වුනා. පසුව ඉදිරිය⁣⁣ට ඇදුනු ධාවකයාගේ රථය මඳ දුරක් ගොස් නැවත එකවර තිරිංග යෙදුවා. ඊට සමානව බස් රථයේ රියදුරුද යෙදූ තිරිංග පහරට මගීන්ගේ හුන් තැන්ද වෙනස් වූනා. ඉදිරිපස විශාල හිස් ඉඩක් ඉතිරිව තිබියදී ඊට සමාන වේගයකින් තම වාහනය ධාවනය නොකල ධාවකයා බස් රථයට ඉදිරියට යාමට ඇති ඉඩද අහුරමින් ඉබි ගමනින් ඉදිරියට ඇදුනා. සංඥා පුවරුවේ කොළ එළිය නිවීමට ආසන්න වන තෙක් එලෙස ගමන් කල ධාවකයා රතු එළිය දැල්වෙනවාත් සමඟම තම රථය ඉදිරියට ගෙන බස් රථය සංඥා පුවරුවේ රතු එළියට හිර කලා.

මද දුරක් ඉදිරියට ගිය ධාවකයා තම රථය පාර මැදම නවතා රථයෙන් බැස, රතු සංඥා පහන දැල්වී තිබූ නිසා නවතා තිබූ බස් රථයේ රියදුරුට අත දිගු කරමින් තර්ජනයක ස්වරූපයෙන් යමක ප්‍රකාශ කලා. එතනට පැමිණි පොලිස් නිලධාරියාටද ඔහු බස් රථයේ රියදුරු පෙන්වමින්, දෑත් සලමින් දිගු විස්තරයක් ප්‍රකාශ කර පසුව නැවතත් බස් රථයේ රියදුරු දෙසට ඇඟිල්ල දිගු කර බනිමින් ඔහුගේ රථයට නැඟී යන්නට ගියා. පොලිස් නිලධාරියාද උදාසීන ගමනින් පැමින සිනා සී රියදුරුට යමක් ප්‍රකාශ කලා. කීවේ කුමක්දැයි නෑසුන මුත් පොලිස් නිලධාරියාද ධාවකයා පැවසූ දෙය ගණනකට නොගත් බවක් පෙනෙන්නට තිබුනා. බස් රථය සංඥා පහන් දැල්වුනු පසු දකුණට දමා පිටකොටුව බලා පිටත් වුනා.

බස් රථ වලින් නිකුත් කරන නලා හඬ සැබවින්ම ඇතැම් අවස්ථා වල කරදරයක් වන නමුත් එම අවස්ථාවේ එවැනි දෙයක් සිදු වූයේ නැහැ. තමා වැනි වේගයේ උපරිමයට ධාවනය කරන අයකුට බස් රථ රියදුරකු වැනි අයකු නලාව නාද කිරීම මදිකමක් ලෙස ඔහුට හැඟී ගිය බව එම සිද්ධිය ඇසින් දුටු ඕනෑම අයකුට පහසුවෙන් වටහාගත හැකියි. නේක විධ වදන් කියමින් රූපවාහිණියේ පෙනී සිටිමින් නිහතමානීකම ගැන බණ කියන “ඇතැම් තරු” වලද නිහතමානීත්වය ගැන දෙවරක් සිතිය යුතු බව කල්පනා කරමින් මම ලේක් හවුසිය ළඟින් බැහැගත්තා.

 උපුටා ගැනීම:  -හෝම්ස්-