තරුණ ස්වාමියාත් බිරිඳත් බැලූ බැල්මට පෙනුනේ ආගන්තුකයින් දෙදෙනෙකු සේ ය.එක නිවසක පදිංචිව සිටියත් ඔවුන් , ආගන්තුකයෙකුට නම් කොහෙත්ම දෙදෙනා අඹු සැමියන් බව ස්වකීය මනසින් තහවුරු කර ගැනීමට අපහසුය .
අසල්වාසී හූද නිරතුරුව මේ යුවළගේ විස්මයජනක හැසිරීම ගැන කතිකා කළෝය .නීතියෙන් විවාහ වී සිටියත් ,ඔවුන් එක් වීමෙන් දරුවෙකු ජනිතව සිටියත් ,එක් නිවසක දශකයකටත් වඩා කාලයක් එකට විසූවත් ,බාහිරෙන් පෙනෙන බැඳීමක් හෝ සම්බන්ධතාවයක් ඔවුන් අතර නොවීය.
කිසිවිටෙක අසල්වාසීන් ඉදිරියෙහි මෙන්ම ඔවුන්ගේ නෑයන් ඉදිරියේද ,දෙදෙනා කතා කළේ නැත.දෙදෙනා සතුටින් සිටිනවා කියන්නට තරමේ කිසිදු සහ සම්බන්ධතාවයක් බාහිරින් ඔවුන් අතර නොවුණි .එහෙත් ඒ කිසි දිනක යුවළ රණ්ඩු කර ගන්නා බවක් ද නොපෙනුණි.මෙලෙස ගුප්ත භාවයකින් ජීවත් වුණු ජීවත් වුණු අඹුසැමි යුවළ පිළිබඳ සොයන්නට විමසන්නට කල්යත්ම අසල්වාසී කාන්තාවන් තුළ මහත් උවමනාවක් පිළිසිඳ ගත්තාය.
කොට කෙට්ටු සිරුරක් ඇති,තද කළු පැහැයක් සහිත සැමියා පාලිත නම් විය.ඔහු නගරයේ වෙළඳසැල හිමියකු වූවේය.පාලිත දැඩි අවිහිංසාවාදීයෙකු විය.සත්ව හිංසනය නිර්දය ලෙස විවේචනය කළේය .ගම්මානයේ අගහිඟකම්වලින් පීඩිත නිවෙස්වල දරුවන් සමග ඉක්මනින් මිතුරු වුනු ඔහු තමන් දැන සිටි දෑතෙහි ශක්තියෙන් කළ හැකි වෘත්තීන් කිහිපයක්ම ඒ අතර වූ පිරිමි දරුවන්ට ඉගැන්විය .එලෙස තමාගෙන් වෘත්තීය පුහුණුව ලබා ගන්නට එන දරුවන්ගේ හදවත් තුළ තමා කෙරෙහි ඇල්මක් පුබුදුවාලු ඔහු එම දරුවන්ගේ කුසගිනි ද අඩු ලුහුඬුකම් ද හැකි පරිදි මගහැරී ය.
සිහින් සිරුරක් ඇති පැහැපත් කාන්තාවක් වූ බිරිඳ සන්ධ්‍යා නම් විය.ඇය චාම් සරල නිහඬ ජීවිතයක් ගත කළාය.
එම යුවළගේ ගුප්ත පවුල් ජිවිතය පිළිබඳ අසල්වාසීන්ගේ කතිකාවත කෙසේ වුවත් පාලිතගේ ධාර්මිෂ්ඨ ක්‍රියාකලාපයන් ඔවුන් අගය කළෝය .අසල්වාසියකු පාලිතගේ පවුල් ජීවිතය පිළිබඳ තමන් තුළ පවතින ප්‍රශ්නවලට පිළිතුරු සෙවීම උදෙසා පාලිතගේ විවාහය සිදුවූ ආකාරය ගැන විමසුවහොත් පාලිත නොපැකිලිව සෘජුව පිළිතුරු ලබා දෙයි .
“සන්ධ්‍යාව , ගෙදරින් හොයල දුන්නා නෙවෙයි…
සන්ධ්‍යා යි මමයි අවුරුදු පහළොවක් විතර යාළුවෙලා ඉඳල තමයි කසාද බැන්දේ .සන්ධ්‍යා අපේ ගෙවල් ළඟමයි.පොඩි කාලෙදිමයි අපි යාළුවුනේ… එයාට 13දී මට 17යි … එයා ලොකු ලමයෙක් වෙලත් නෑ අපි යාළු වෙනකොට…”
පාලිත අව්‍යාජව ප්‍රීතියෙන් යුතුව එවැනි ප්‍රශ්නවලට පිළිතුරු දුන්නේය.ඔහු මේ පිළිතුරු ඔවුන්ගේ විවාහය ගැන අසන ඕනම කෙනෙකුට සපයන්නේය.ඔහුගෙන් ” ඇයි සන්ධ්‍යාට කැමති උනේ ?”ඇසුවහොත් ඔහු දෙන පිළිතුර ද එලෙසමය .
“දහ හතේදිනම් වයසෙ හැටිනේ … මං කැමති නෑ හයියෙන් කතා කරන හිනාවෙන ගෑණුන්ට …මං කියන විදිහට කසාද බදින කෙනා ඉන්න ඕනේ … එහෙමයි හිතුවේ.සංධ්‍යා ඉතින් ගෙවල් ළඟම නේ … කාලය යද්දිත් සංධ්‍යා ඒ වගේ …මට යටත්… ඒ හින්දා අවුරුදු ගාණක් නතර වුණේ නෑ …බිස්නස් දියුණු කරන් සංධ්‍යාව ම බැංදා.”
ඇත්තෙන්ම සන්ධ්‍යා පාලිතට යටත්ව ජීවත් වන බව සැමට පෙනෙන්නට තිබුණු කාරණයකි .බිරිඳ ස්වාමියාට පවතින ආදරය,සෙනෙහස ,පති භක්තිය හේතුවෙන් ඔහුට අවනත වීම ආසියාතික සංස්කෘතියේ පවතින ප්‍රබල අංගයකි. එහෙත් ස්වාමියාට යටත් වීම එලෙස සාධාරණය කළ නොහැකිය .
සන්ධ්‍යාට කිසිදිනක තනියම ටෙලිවිෂනය නැරඹීමට අවසර නොලැබුණාය.පාලිත නිවසේ සිටින විට හෝ ඔහු ටෙලිවිෂනය නරඹන විට පමණක් ඇයට ටෙලිවිෂනය නැරඹීමේ නිදහස හිමිවිය .එයට හේතු ලෙස ඔහු දැක්වූයේ,
“ටීවී බැලුවා ම ගෑනු නරක් වෙනවා … ඒකේ යන ටෙලිනාට්‍ය ටික බැලුවොත් මුන් අපේ කරෙත් නගී .. තව ටීවී බලන්න ඕනේ රෑට .දවල්ට ටීවී බැලුවම කාලේ නාස්ති වෙනවා විතරයි”
ඔහු වෙනස් විදිහකට නැතහොත් සාම්ප්‍රදායික අදහස් වල ම මුල් බැසගත් මිනිසකු විය .ඔහු සිතුවේ විවාහය යනු අත්‍යවශ්‍ය කරුණක් බවත්, එය ඉපදීම මරණය මෙන්ම ජීවිතයේදී කෙසේ හෝ සිදුවිය යුතු බවත්ය .ඊට එහාගිය විවාහ ජීවිතයේ පවතින තෘප්තියක් පිළිබඳ ඔහු කතා නොකළේය .ගෙදර කෙතරම් වාහන තිබුණත් සංධ්‍යාව මෝටර් රථයේ හෝ යතුරු පැදියේ නංවා ගත්තේ දුර ගමනක් යාමට පමණි.ඇය නගරයේ වෙළෙඳපොළට වෛද්‍ය මධ්‍යස්ථානයට ගියේ පැමිණියේ පයින්මය.
සන්ධ්‍යාට දරුවා පිලිසිද ගෙන තිබුණේ විවාහ වී අවුරුදු දෙකකින් පමණ පසුය .පාලිත ඇය මාගේ දරුවා කුසෙහි දරා සිටිනවා යැයි ආකල්පයකින් කිසිවිටෙක එකල විශේෂත්වයක් නොදැක්වූ බව වැඩිහිටි ඥාති කාන්තාවෝ නිරතුරුව ඔහුට දොස් නැගුවේය .දරුවා ඉපදෙන්නටත් මත්තෙන් ඔහු ව්‍යාපාර කටයුතු උදෙසා විදේශ ගත වී තිබුණි .නැවත පැමිණියේ ඒ දරුවා පාසල් ඇතුලත් කලාට ද පසුවය .
දියණිය ඉපදෙන්නටත් කලින් විදේශ ගත වූවා යැයි පාලිතට දොස් නැගුවහොත්
” කෙල්ලගෙ අනාගතය හදන්නයි ඒ හැමදේම කළේ ” ඔහු පිළිතුරු දෙයි .
දියණිය ලැබී අවුරැදු හතක් අටක් ගත වුවත් ඔවුන්ගේ පවුලට තව දරුවෙකු නොපැමිණියේය .දිනක් ඔවුන්ගේ දියණිය පාසල් බස් රථයෙන් වැටී තුවාල ලබා අසාධ්‍ය විය.සති ගණනක් රෝහල් ගත වී ප්‍රතිකාර ගත්තාය. සන්ධ්‍යා දරුවා සමග රෝහලේ සිටි අතර , පාලිත කිහිප වතාවක් ඔවුන් දෙදෙනා බැලීමට රෝහලට ගියේ ය .ඒ දින කීපයේ ද දරුවාට කොතෙක් අසාධ්‍ය වූවත් පාලිත ප්‍රීතියෙන් වෙනදා මෙන්ම කාලය ගත කළේය.
ඔහු බිරිඳට ද දරුවාට ද ආදරය නොකරනවා යැයි සැක කළ අසල්වාසීන්ට පාලිතගේ මෙම ක්‍රියාකලාපයන් තම මතය තීව්‍ර කරන්නට සාධකයක් විය.
එහෙත් පාලිතගෙන් දියණිය පිළිබඳ අසන කෙනෙකුට ලැබෙන පිළිතුර නිසා ඒ සැකකිරීම් වැරදි බව ඒත්තු ගැන්වේ.
“දුවට මම ආදරෙයි… ඒත් කෙල්ලන්ට වැඩිය ආදරේ පෙන්නන්න හොඳ නෑ … එතකොට අකීකරු වෙනවා … බය අඩු වෙනවා … කියන දේ අහන් නැතුව යනවා … කෙල්ලෝ හුරතල් කළාම බය නැති නිසා හිතුවක්කාරකමට ලොකු උනාම ආදරේ ට තෑගිත් දීලා යාවී…”
“සංධ්‍යාට උඹ ආදරේ නැහැ පාලිත”
කියමින් ඥාතියකු දොස් නැගුවහොත් පාලිත එයටද ජයග්‍රාහී පිළිතුරක් සපයයි.
“මං සංධ්‍යාට අඩුවක් කරන් නෑ… ඉල්ලන හැමදේම දෙනවා… මං ආදරේ නෑ බලන් නෑ කියන්නේ කෝමද???”
අසල්වාසීන්ට ගැටලු සේ පෙනුණු කරැණු සංධ්‍යාටනම් කිසිදා ප්‍රශ්න නොවීය. ඇය පාලිතට තම ජීවිතය තරමට ආදරය කළාය. පාලිතට එරෙහිව අසල්වාසී ගැහැණුන් හෝ දැරිවියන් සම්බන්ධ කොට , ගෙවුණු කාලය තුළ සෑදුණු කටකතා නැතුවාම නොවේ. ඒ අවස්ථාවලදී පාලිත බුද්ධියෙන් ඉවසීමෙන් නිහඬව ඒ කටකතා බැහැර කර සිටියත් සංධ්‍යා සෘජුව ප්‍රසිද්ධියේ ඒ කට කතා විවේචනය කළාය. ඇයගේ සැමියා ගැන විශ්වාසයෙන් ආචාරශීලීව ඇය සැමියාගේ නිර්දෝශීබාවය වෙනුවෙන් පෙනී සිටියාය. ගැටලුව දුරදිග යාමට ඉඩකඩක් ඇති බව පෙනුනහොත් ඇය උපක්‍රම ශීලී වූවාය. නිරතුරැව සැමියාගේ ප්‍රතිරූපය ඇය ආරක්ෂා කරගත්තාය.
මිනිසුන් බහුතරය සමඟ අමනාප නොවී නිහඬ චරිතවත් ගැහැණියක් ලෙස ගම්මුන් තුළ ඇය කෙරෙහි පැවැති ප්‍රසාදය පළුදු වීමට ඉඩක් නොදී ඇය තම පවුල ආරක්ෂා කරගත්තාය. අසල්වාසීන්ගේ ඕපාදූප මිත්‍රශීලීව බැහැර කළාය.
සංධ්‍යා ජීවතවුණු විදියට ඇය තෘප්තිමත් පතිවෘත්තා ධර්මය සැමියා කෙරෙහි පවතින අසීමිත ලෙන්ගතු කමින් රකින බිරිඳක් සේ දිස් වූවත්,
පාලිත සංධ්‍යා යුවළ මූණට මූණ බැලූ අවස්ථාවක් දුටු අසල්වාසියෙකු නොවීය.
අසල්වාසියෙකු උදයේම පාලිතගේ නිවසට ගොස් ඔහු ඇහැරැවහොත් සන්ධ්‍යා පැමිණ දොර හරින්නීය.පාලිත සාලයේ ඔහුටද නිදන්නට ඉඩ මදි පැදුරු කඩමල්ලක් උඩ සැපට නිදිය.
“මොකද්ද මුන්ගේ කසාද ජීවීතේ” එවිට අසල්වාසියාට ආයාසයෙන්ම කියවේ.
“කෙල්ලත් එක්ක දැන් කෝමද ඒවා”
තවකෙකු සිනාසේ…
මොවුන් කොස්බැද්දට පැමිණ වසර ගණනාවක් ගතවුණත් ඔවුන් දෙදෙනාට කොතරම් ළඟින් ඇසුරැ කළත් කෙදිනකවත් ගම්වැසියන්ට මේ විශ්මයජනක පුදුම සහගත පවුල් ජීවිතයක් ගතකරනා යුවළගේ ගුප්ත ස්වභාවයක් ගන්නා සම්බන්ධතාවය ගැන කිසිඳු නිරවද්‍ය තොරතුරක් ලබා ගැනීමට නොහැකි වුණි.
අසල්වාසී තරැණ ස්වාමියාගේද, බිරින්ඳෑගේද ගුප්ත භාවය අමතක කරලමින් වේගයෙන් දින සති ගෙවෙමින් කාලය ගතවුනි.කාලය කෙළෙස ගෙවුණද තරැණ යුවළගේ සම්බන්ධතාවය පෙරසේම පැවතුණි.පාලිත ප්‍රදේශවාසී ළමුන්ට පෙර පරිදිම වෘත්තීය පුහුණුව ලබාදුණි.අහිංසක ළමයෙකුගේ කුසගිනි නිවා ළමයා වැඩෙත්ම දෑතේ ශක්තියෙන් කළහැකි රැකියාවක් පිළිබඳ මනා පුහුණුවක්ද ලබා දුණි.පාලිත එක් ළමයෙකු සිරැරෙන් වැඩී තරැණයෙකු බවට පත්වෙද්දී ඔහු සමාජගතකොට තවත් ළමයෙකු තමාගේ නිවසට කැඳවාගෙන ඔහු වෙනුවෙන් ද පෙනී සිටියේය. අසල්වාසීන් නිරතුරැව තම හෘදයාංගම ගරැත්වය හා සහයෝ්ගය ඒ උදෙසා පාලිතට ලබාදුණි.
දිනක් රාත්‍රියෙහි මෙම ගුප්ත බැඳීමකින් යුතු මැදිවියැති යුවළගේ නිවසින් ඝෝෂාකාරී විලාපයක් කෂ්ණිකවම අසල්වාසීන්ගේ දෙසවන්වලට ඇසෙන්නට වුණි.
පාලිතගේ දියණියගේ හඬ පූර්වයෙන් ඇසුණාය. ඇය කෑමොර දෙමින් පියාට කෝපයෙන් යුතුව බැණවැදුනාය.
සන්ධ්‍යා විලාප නගමින් හඬා වැටුණාය.පාලිත වරදකාරී හැඟීමෙන් සමාව අයදින්නට වුවේය.සිදුවන කෝළාහලය ගැන විපරම් කරන්නට නිවෙස්වලින් මාර්ගයට පැමිණි අසල්වාසීන් වෙත නිරැවතින් ඉකිබිඳිමින් සිටි යොවුන් වියැති ළමයෙකු විලාප තබමින් දිව ආවේය.
ඒ රාත්‍රීයෙන් පසු ගුප්ත පවුල් ජීවතයක් ගතකළ තරැණ ස්වාමියාගේ්ත් බිරිඳගේත් විශ්මය ජනක සම්බන්ධය ගැන සෙවීමට අසල්වාසී තුළ පැවැති නොසිදෙනා ආශාව පහව ගියේය.
පාලිත එදිනම ළමා අපචාර සිද්ධියට සම්බන්ධ චූදිතයෙකු ලෙස පොළිස් අත්අඩංගුවට පත් වූවේය.සන්ධ්‍යාත් ඇගේ දියණියත් සිදුවූ ලැජ්ජාව නිසා අසල්වාසීන්ට මුහුණ නොදීම නිවස අතහැර ගියාය.
නිමි.
උපුටා ගැනීම: කේ. ශානුක උදාර.