නිවාඩු දවසක් දෑ හැන්දෑවක කම්මැලිකමෙන් ඉන්නකොට මට හිතුනා බියර් එකක් ගහන්න..මම වැඩිය බියර් බොන පුද්ගලයෙක් නොවුනත් එදා ඊට වඩා යමක් කරන්න තරම් මගේ අතේ වත්කමක් තිබුනෙ නෑ..
ඉතින් කඩේට ගිහින් බියර් දෙකක් ගෙනත් පුටුවකට වෙලා වාඩිවෙලා පාර දිහා බලාගෙන බියර් එක බොනකොට අනිත් කොල්ලන්ට වගේ මටත් සාම්ප්‍රදායික ගොන් ප්‍රශ්න වලින් එකක් ඔලුවට ආවා…
නෑ නෑ..අර මුලින් ආවෙ කිකිලිද බිත්තරේද කියන එක තරමට නෙවෙයි..ඊට වඩා උඩ ලෙවල් එකේ ගොන් ප්‍රශ්ණයක්..
ඉස්කෝලේ කාලෙ ලව් කරපු කෙල්ල දැන් මොනව කරනව ඇද්ද?
ඇත්තටම එයා මොනව කලත් අපිට වැඩක් නැති වුනත් ඉත්තෑවා ඒක අහන්නෙ නෑ…ඉතින් හිතුනා ඒ ගැන ටිකක් හොයල බලන්න…
ඒත් ඕක කාගෙන්ද අහන්නෙ…මුගෙන් ඇහුවට වඩා හොඳයි ෆේස්බුක් එකේ දැම්මනම් කියන උන්ව අයින් කරලා කල්පනා කරලා බැලුවා…
ගමේ යාලුවො හතරදෙනාගෙන් අහල වැඩක් නෑ..මොකද උන්ට කියල මලාට වැඩක් කරගන්න බෑ..
මචන් මම මැරෙන්න යන්නෙ කියල නෙවෙයි ,මචන් මට කෝටි පහක ටික්ට් එකක් ඇදුනා මට එකවුන්ට් නම්බර් ටික දාපන් සල්ලි ටිකක් දාන්න කියල මැසේජ් කලත් ඕකුන් ඒකට රිප්ලයි කරන්නෙ මාස තුනහමාරකට විතර පස්සේ.
එකෙක් ඉන්නවා ෆුඩ් කැබින් එකේ කරටි කැඩෙන්න ගහලා ෆේස්බුක් එකේ සෙල්ෆි දාන ගමන් මට මැසේජ් කරනවා මචන් ඔෆිස් එකේ ලොකු මීටින් එකක ඉන්නෙ වෙන වෙලාවක ගන්නම් කියල…
තව එකෙක් ඉන්නවා අනූවෙන් පස්සෙ ඌ පරිනාමය වෙන එක නැවතිලා…ඌ තවම අහන්නෙ අනූවෙ සිංදු විතරයි..පාවිච්චි කරන්නේ අනූ ගනන්වල ආපු gsm පෝන් එකක්..ඌ හිතන්නෙ ස්මාට් පෝන් පාවිච්චි කරන්න හොඳ නෑ ඒවගෙන් එන තරංග වලින් ඌට ගැබ්ගෙල පිලිකාවක් හැදෙයි කියල…ඉතින් ඌට ගන්නවනම් සල්ලි කපාගෙන පෝන් කෝල් එකක්ම ගන්න ඕනි..
එහෙම කෝල් කලත් ආන්සර් කරන සම්භාවිතාව සීයයට දශම ගානක්…
අනිත් උන් දෙන්නගෙත් වැඩි වෙනසක් නෑ….
ඉතින් උන්ට කතා කරල වැඩක්ම නැහැ…
එතකොටම මට මතත් උනා මේ 2021 නෙ, මේ දවස්වල මිනිස්සු ලේස්යෙන් ෆේස්බුක් එකෙන් හොයා ගන්න පුලුවන්නෙ කියල.. ඉතින් මම මුලින්ම නම ටයිප් කරලා හොයල බැලුවා, නමෙන් බාගයක් ටයිප් කරලා හෙව්වා, අන්තිමට ගෙදරට කියන නම පවා ටයිප් කරල හෙව්වත් හොයා ගන්න බැරිවුණා..
බොහෝ විට එයා ෆේස්බුක් නැතුව ඇති කියල මම හිතුවත් එකපාරටම මට මීටර් උනා එයාගෙ පන්තියේ හිටපු යාලුවො තවමත් මගේ ලිස්ට් එකේ ඉන්නවනෙ කියන එක…
එතකොටම මගේ ඔලුවට ආවෙ කොට මොඩල් එක…
හොඳ බොක්කක්….ක්ෂණිකවම මැසෙන්ජර් එක ඕපන් කලාට පස්සෙ මගේ වාසනාවකටද මන්දා කොට මොඩල් එක ඔන්ලයින් ඉන්නවා…
මම හිතන්නෙ උවමනාවක් වෙලා මනුස්සයෙක්ව ඔන්ලයින් ඉන්නවද කියල බලනකොට ඒ මනුස්සයා ඔන්ලයින් හිටයමද කොහෙද…
ඉතින් කොට මොඩල් එකට දැම්මා මැසේජ් එකක්..
“නංගි..අහවලාව දැන් මොකද කරන්නේ ?”
එතකොට කොට මොඩල් එක අහනවා
“ඒ පාර උඹට හැදුන පිස්සුව ඒකි ගැන හොයන්න?”
“නෑ ඉතින් මතක් උනා..නිකමට කුතුහලයක් ආවා ආගිය තොරතුරු දැනගන්න..ඒකයි ඇහුවෙ”
“අනේ නිකන් හිටපන් බන් අයියෙ.. ඇයි උඹට ආයෙත් මොනවහරි හිතුනද ඒකි ගැන?”
“නෑ බන්…මම නිකන් ඇහුවෙ..ෆේස්බුක් එකේ බැලුවා සෙට් උනේ නෑ..එයා ෆේස්බුක් ඉන්නවද?”
“ෆේස්බුක් එකේ නම් නෑ අයියෙ…මමත් කාලෙකින් දැක්කෙ නෑ…අහවල් බැංකුවේ වැඩ මම දන්න විදිහට. මගේ යාලුවෙකුත් ඉන්නවා ඒකෙ වැඩ කරන…මේ ලඟදි ඌ දාපු පොටෝ සෙට් එකේ ගෘප් පොටෝ වගයක හිටියා..හිටපන් මම ඒ පොටෝ ටික දාන්නම්”
ටික වෙලාවකින් කොට මොඩල් එක මට පොටෝ ටිකක් එව්වා.හම්මේ ඉතින්..ඔය ඉන්නෙ…එදාට වඩා වෙනස්..ලොකුවට නෙවෙයි..වැඩිපුර කාලද කොහෙද ඉස්කෝලේ යන කාලෙට වඩා ටිකක් මහත්වෙලා..ඒ කියන්නෙ සාමාන්‍ය ප්‍රමාණයේ ඇඟක්.මොකද ඉස්කෝලේ යන කාලෙ ටිකක් කෙට්ටුයි..
හරි ඉතින් පොටෝ එකක් හරි දැක්කනෙ ඒ ඇතිනෙ කියල මම හිතුවත් ඉත්තෑවට ඒ ටික මදිවුනා..ඉත්තෑවට එයාට කෝල් කරලා කටහඬත් එදා වගේමද කියල චෙක් කරන්න ඕනි උනා පොටෝ දැක්කට පස්සේ ….
ආයෙත් කොට මොඩල් එකට චැට් කලා….
“නංගි..අහනවකො..මට අරයගෙ නම්බර් එක හොයල දෙනවකො”
“ඒ මොකටද කියපන්”
“යකෝ ඉතින් නම්බර් එක ඉල්ලන්නෙ කතා කරන්නනෙ බන්.කසාද බඳින්න නෙවෙයි”
“උඹ ෂුවර් නෑ ඒකත්… මම කොහොමද කියපන්කො නම්බර් එක හොයන්නෙ? අර යාලුවගෙන් ඉල්ලන්නෙ මොකක් කියලද? අනික මම නම්බර් එක ඉල්ලුවට පස්සේ උඹ ඒකිට කතා කලොත් නම්බර් එක මම දුන්නෙ කියල අහුවෙනවා..ඕවා ගස් යන වැඩ”
“හරි බන්..මම කියන්නෙ නෑ උඹ දුන්න කතාවක්…අනික උන්ගෙ ගෙදර නම්බර් එකත් මගේ ලඟ තියෙනවා”
“ඉතින් බන් ඒකට කතා කරල බලපන්කො”
“මොංගල්ද බන්..ඒකට කතා කරලා මම කවුද ගියල ඇහුවොත් මොකක් කියන්නද?”
“එයාගෙ යාලුවෙක් කියපන්”
කොට මොඩල් එකට කොට මොඩල් කියන්නෙ ඕකි කොට නිසා.. ඒත් මම හිතුවෙ නෑ ඕකිගෙ මොලෙත් කොට ඇති කියල ඔය වගේ ගොන් අයිඩියා එකක් දෙන්න තරම්…නැත්නම් ඉතින් ඒ දවස්වල පෝන් බොක්ස් වලින් ඩයල් කරලා කෝල් කරලම තවමත් කටපාඩම් එයාගෙ ගෙදර නම්බර් එක තියෙන මට ඕකි කියන්න ඕනිද කතා කරල යාලුවෙක් කියල කියන්න…
පලවෙනි බියර් එක ඉවර උනාම දෙවෙනි එක කඩනකොට හිතුනා ඇත්තටම කොඩ මොඩල් එක කියපු විදියට ගෙදර නම්බර් එකට කෝල් එකක් ගත්තනම් හරි කියල… මොකද මගේ හිතට උවමනාවක් නැති උනත් ඉත්තෑවා මාර උනන්දුයි වැඩේට..
ඒත් ඉතින් යාලුවෙක් කතා කරනවා කියල කිව්වට ඒක ටිකක් යල්පැනපු මෙතඩ් එකක්..අනික ගෙදර මිනිස්සු ලඟ ඉන්නකොට මාත් එක්ක කොහොමත් කතා කරන එකක් නෑනෙ..ඉතින් මට හිතුනා සම්ප්‍රදායෙන් පිට ක්‍රමයක් අත්හදා බලන්න..බියර් එකේ පිහිටෙන් හොඳ අයිඩියා එකක් ආවා..
හොඳ හුස්මක් අරගෙන ඩයල් කලා නම්බර් එක..
එහා පැත්තෙන් පුරුදු කටහඬක්…
නෑ නෑ…එයා නෙවෙයි..එයාගෙ අම්මා…
වෙනස්වෙන ලෝකෙ වෙනස් නොවෙන එකම දේ වෙනස්වීම කිව්වට ඒ රෞද්‍ර කටහඩේ නම් කිසිම වෙනසක් වෙලා තිබුනෙ නෑ මේ අවුරුදු ගානටම…
“හලෝ”
“හලෝ..කවුද?”
“මම කතාකරන්නෙ සමන්ත කියල කෙනෙක් (කොයිකටත් මැද නම කිව්වෙ මුල නම කිව්වොත් ක්ෂණිකව කෝල් එක කට් වෙන නිසා…) මට පොඩ්ඩක් අහවල් මිස්ට කතා කරන්න පුලුවන්ද?”
“මොකක්ද උවමනාව?”
“මේකයි..මම ඉන්නෙ අහවල් රටේ..ඉතින් මට අහවල් මිස් වැඩ කරන බැංකුවේ ක්ලෝස් කරපු එකවුන්ට් එකක් ගැන විස්තර ටිකක් කියන්න ඕනි..මම බැංකුවට කතා කලා..ඒත් එයාලා කිව්වා මේ සම්බන්ධව දැන ගන්න පුලුවන් අහවල් මිස්ට කතා කලොත් විතරයි කියල, ඒත් මම ඒ මිස්ව කන්ටැක්ට් කරගන්න හැදුවත්..”
කියනකොටම
“හරි හරි..පොඩ්ඩක් ඉන්න..”
කියපු අම්මා
“සුදු නෝනා ඔයාට කෝල් එකක්”
කියනවා මට ලාවට ඇහුණා….
තත්පර කිහිපයකින් එයා පැත්තෙන් සුපුරුදු කටහඬ ඇහුනා…
“හලෝ”
“හලෝ..මේ අහවල් මිස් නේද? මට මිස්ගෙ බැංකුවේ මගේ ක්ලෝස් කරපු එකවුන්ට් එකක් ගැන දැනගන්න තමයි මිස්ට කතා කරන්න ඕනි වෙලා තිබුනෙ”
“හරි..ඒත් මේ වෙලාවෙ මම ඉන්නෙ බැංකුවෙනම් නෙවෙයි..ඒ නිසා ඔයා මට හෙට උදේට බෑන්ක් එකට කතා කරල කන්ටැක්ට් කරගන්න මම විස්තර ටික බලන්නම්”
“හරි මිස් මට තේරෙනවා..ඒත් මට එක විනාඩියක් දෙන්න..මොකද මිස් මම වැඩ කරන්නෙ ලංකාවේ නෙවෙයි..ලංකාවෙ වැඩ කරන වෙලාවට මම ඉන්නෙ කෝල් එකක් ගන්න පුලුවන් තැනක නෙවෙයි..අනික මිස්ගෙ බැංකුවට මම කිහිප වතාවක්ම මෙහෙන් කෝල් ගත්තත් මට සෑහෙන්න වෙලා ලයින් එකේ එල්ලිලා ඉන්න උනා..ඉතින් මිස්ට තේරෙනවා ඇති මගේ ජොබ් එකත් එක්ක එච්චර වෙලා කෝල් එකේ ඉන්න අමාරුයි..මම ඉතින් මගේ දන්න කෙනෙක් හරහා මිස්ගෙ ගෙදර නම්බර් එක හොයාගත්තෙ මේ වැඩේ අපි දෙන්නටම ලේසි වෙන්න..අනිත් එක තමයි මිස් මට තව විනාඩි දෙකක් වගේ තමයි කතා කරන්න පුලුවන්..ඉතින් මිස් පුලුවන්නම් තරහ නැතුව මෙන්න මේ එකවුන්ට් නම්බර් එක ලියාගන්න පුලුවන්ද?..මොකද මේ කෝල් එක කට් උනොත් මිස්ට පුලුවන් හෙට උදේට මේ එකවුන්ට් නම්බර් එක චෙක් කරලා මම කියන විස්තර ටික ගැන ටිකක් බලන්න…එතකොට මට පුලුවන් හෙට උදේට මිස්ට විනාඩි දෙකක කෝල් එකක් අරගෙන විස්තර දැනගන්න..මිස්ගෙන් මෙහෙම පුද්ගලිකව උදව්වක් ඉල්ලන්නෙ මම ඉන්නෙ ලංකාවෙන් පිට නිසා…මේ කොරෝනා නිසා ලංකාවට යන්න විදිහක්වත් නෑ..නැත්නම් මට තිබුනා වැකේෂන් ආපු වෙලාවක හරි බැංකුවට ඇවිත් මේවා සෙටල් කරන්න…
ඒ නිසා මිස් තරහ නැතුව මේ එකවුන්ට් නම්බර් එක ලියාගන්න පුලුවන්ද?”
“හරි..මට විනාඩියක් දෙන්න…”
විනාඩියක් යන්න කලින් ආපහු එයා රිසීවර් එක අතට ගත්තා..
“හරි..මට කියන්නකො ඔයාගෙ එකවුන්ට් නම්බර් එකයි නමයි ඔයාට දැන ගන්න ඕනි මොනවදයි කියල..මම මේක චෙක් කරල බලන්නම් හෙට හැබැයි ඔයා මට අයඩෙන්ටි කාඩ් නම්බර් එකත් කියන්න ඕනි..මම හෙට බලලා කරන්න පුලුවන් මොනවද කියල බලන්නම්..අනික ආයෙත් ගෙදර නම්බර් එකට කතා කරන්න එපා උවමනාවක් තියෙනවනම් බැංකුවට කතා කරන්න..මේක මෙහෙම කරන අන්තිම පාර වෙන්න ඕනි”
ඒ වැඩෙත් හරි..දැන් කතා කරනවනෙ..ඒත් ඉතින් සම්පූර්ණ විස්තර දුන්නොත් වැඩේ අල වෙනවනෙ..අනික හෙට කෝල් කරන්න පුලුවන් කියලවත්,ඒ කෝල් එක මේ තරම් සාමකාමී වෙයිද කියලත් හිතන්න අමාරුයි..ඒ නිසා වන්ෂොට් නොකවුට් වෙන්න මේක කරන්න ඕනි….
“මිස්..මගේ කාඩ් එක ඉවර වෙන්න යන්නෙ..මිස් ඉක්මනට මේ එකවුන්ට් නම්බර් එක ලියාගන්න කෝල් එක කට් වෙන්න කලින්…
0035796****** “
“හරි…ලියාගත්තා..ඒත් මේ නම්බර් එක අපේ බැංකුවේ එකවුන්ට් නම්බර් එකක් නෙවෙයිනෙ..”
“ඔව් මිස්..මම දන්නවා..ඕක කිසිම බැංකුවක එකවුන්ට් නම්බර් එකක් නෙවෙයි..ඕක මගේ පෝන් නම්බර් එක…මම වට්සැප් ඉන්නවා..වයිබර් ඉන්නවා..මගේ නම දීපාල්…ඉතින් මට හිතුනා පෙරදිනයක මා පෙම් කල යුවතිය සිය පුතු නලවනවද නැත්නම් හොඳින් ඉන්නවද කියල බලන්න..ඉතින් හැකියාවක් කැමැත්තක් තියෙනවනම් ඔය නම්බර් එකට වට්සැප් කෝල් එකක් ගන්න..මම එනිටයිම් ඔන්ලයින…”
එහෙම කියපු මම කෝල් එක කට් කලා…
දෙවෙනි බියර් එකත් ඉවර උනා..දවස් තුන හතරකුත් ගියා..තවම නම් කෝල් එකක් ආවෙ නෑ.. එහෙම කෝල් එකක් එන්න තියෙන ප්‍රතිශතය සීයට 2ක් වගේ..ඉතින් ඒ කෝල් එක ආවොත් ආයෙත් පෝස්ට් එකක් දාන්නම්…
නිවසේදී අත්හදා බැලීමෙන් වලකින්න..
ජය වේවා….
උපුටා ගැනීම: -Deepal samantha-