හමුවී මගහැරී ගිය මාවත් (පෙම් කතා)

“අවුරුදු ගනනාවකට කලින් හමුවෙලා බොලද පෙම්වත්තු වෙන්න හිටිය අප අවුරුදු ගානක මගැහැරීම් එක්ක අත්දැකීම් එක්ක පරිනත වුණ එක වඩා හොදයි .”

ජීවිතෙ මහ ම මහ පුදුමයි. කවදාවත් වේවි කියල හීනෙන්වත් හිතන්නෙවත් නැති ගොඩක් දේවල් දැනටමත් සිදුවෙලා හමුවෙලා.

ඉතින් ඒ නිසා අසීමිත දුක උනත්,

අමාරු උනත්,යන්න බැරි උනත්,

සමහර ගමන් අපි යන්න ම ඕන..

බොහෝ වෙලාවට එහෙම අමාරු ම ගමන්වල ගමනාන්තය වෙන්නේ,හරි ම හරි

ලස්සන ම තැන් වලින්.

මට ඔහු හමුවෙන්නෙ මට අවුරුදු 21 දි. ඔහුට මාව මුණගැහෙන්නෙ අවුරුදු 26 දි විතර.ඒත් අපි නොදැනුවත්ව අපි ජීවිතෙ බොහෝ අවස්ථාවල හමුවෙලා තියෙනවා . ලගින් ගිහින් තියෙනවා . කතාකරලත් ඇති කියල හිතෙන තරම් අපිට සමීප අවස්ථා මුණගැසිම් තියෙනවා . මං පොඩිම කාලෙ ඉදන් ම. ඒ කියන්නෙ එක දෙක වසරෙ ඉදන්ම සාක්ෂි සහිතව .

අපිට අපි නොදැනුවත්ව මුණගැහුනු පාරවල්වල අද අපි දැනුවත්ව යනවා. ඒ ලස්සන තැන්වල අපි හමුවෙනවා. ඒ තැන්වල ගස් වැල් මල් වලට මතක් වෙනවා ඇති මම ඒකාලේ ඔහු ලගිම් එහා මෙහා ගිය හැටි. ඔහුත් මං ලගින් ම එහා මෙහා මගහැරීගෙන යනහැටි.අපි හමුනොවී හමුවුනහැටි.

ඔහුගෙයි මගෙයි පාසල් එක ලග. ඔහු නිතර රැදෙන තැන් මාත් නිතර එහාමෙහා ගිය තැන්. මං සහභාගි උන ගොඩක් අවස්ථා උත්සව වල ඔහුත් ඉදලා.ඒත් කවමදාවත් අපි හමුවෙලා නැ.

එහෙම බැලුවම අපි දෙන්නම ජීවිතෙ මහා වටවන්දනාවකත් ගිහින්. හමුවෙන්න ගොඩක් අවස්ථා තියෙද්දිත් හමුවීම ගොඩක් මගැරිලා.ඔහුගේ හොදම යාලුවන් මගේ අසල ගෙවල්වල ඉන්නවා.ඔහු කුඩා කල සිට එම නිවෙස්වලට බොහො විට පැමිණ ද ඇත.ගැවසිලා තියෙනවා.එහෙත් අපට අප හමුනොවුණි.

ඔහු සාමාන්‍ය පෙල කරනා වයසෙදී මම හයේ හතේ වගේය.ඉතිම් හමුනොවන්නට ඇත. සුදුසු කාලය නොවෙනැති ඒ.ඔහුගේත් මගෙත් පාසල් එක ලගය. හූවක දුරය. එකම නගරයේය. එකම මාවත් ය. එකම කඩමන්ඩි පාරවල්‍ ය. නමුත් ,හමුවූයෙ නැත.පුදුමය.

මම ඉතාම කුඩා දවස්වල සහභාගි වූ උත්සව අවස්ථා කිහිපයක ඔහුද පැමිණ ඇත. නමුත් අපි අපිව දන්නෙ නැත. ඔහු මගෙ හෝ මා ඔහුගෙ ඉරණම බව අනාගතයෙ අපි හමුවෙන බව අපි දන්නෙ නැත.

අතිශය ලගින් හදුනන විශේෂ අවස්ථා පුංචි සන්දියේ සිටම මගහැරී ඇත.

මං එම අවස්ථා මතක් කරනා විට ඔහුද එම දවස් නිවැරැදි ව මතකයට කැන්දයි. එවිට අපි කුඩා කල සිටම ලගින් නොදැනුවත්ව වුවත් සිට ඇත. හමුවී ඇත නමුත් දන්නෙ නැත. කුඩාකල මගේ පාසලෙ පැවැත්වූ අවස්ථා ගනනාවකටද ඔහු පැමිණ ඇත. එවිට මම හය හත වසරේය. මා අසලම දවස් ගනන් පහන් කරන්නට ඇත. එහෙත් හමු නොවුණි.

ඒ අතරෙ අපි නොදැනුවත්ව නමුත් එකම ස්තානයෙ හමු වී ඇති අවස්ථාවක් මෙසේය. මා කුඩා බාලදක්ෂිකාවක් වශයෙන් බේඩ්න් පවල් ස්වාමිවරයගෙ ජන්ම දිනයෙ දී ගාල්ල සමනල උද්‍යානයේ උත්සවයට සහභාගි විය. ඔහුද එයට බාලදක්ෂයෙක් වශයෙන් පැමිණ ඇත.මා උත්සවය අතරෙ උද්‍යානයේ ෆයින් ගස්වල බිම වැටී ඇති ෆයින් ගෙඩි ඇහිදිමින් සිටියා මට මතකය.( මට හරියටම ගහ මතක නෑ . පාටකරල මල් හදනවා ඒ ගහෙ ගෙඩි වලින්).ඉතිම් ඒ කාලය ගැන පුදුම වන්නට දෙයක් නැත. එතන එදා පනහකට නොඅඩු පිරිසක් සිටියා මෙන් මතකය..එහෙත් මට ඒ කාලයෙ තිබුනෙ සුරංගනා පිස්සු ය…ෆයින් ගෙඩි ඇහිදිමින් සිටින පොඩි කෙල්ල ඔහු නොදැකීම සාදාරනය. ෆයින් ගෙඩි ටික ගවුමෙ සාක්කුවෙ දාගෙන මං ගෙදර ආවෙමි. මාගෙ පාසලෙන් පැවැත්වූ ප්‍රදර්ශන ගණනාවකට ඔහු පැමිණ ඇති නමුත් එවිට ද මං හයේ නැත්නම් හතෙය.ප්‍රදර්ශනයට හැදූ විදුලි බලාගාරය මාගෙ අතින් කැඩී යාම ගැන මා දුක් වෙමින් සිට වෙන එකක් සෑදුවා මතකය. මාගෙ. සෙල්ලම් වයසය. පාසල් කාලයෙ මා ප්‍රේම සබදතා වලට අවධානයක් කිසිසේත් යොමු කරෙ නැත.

උසස් පෙලන් මා පාසලේ ඉහලම ස්ථානයක් ලබා මා නීති පීටයට යාමට තේරුනත් මා හට ආර්ථික විද්‍යාවට තිබූ කැමැත්ත නිසා කොළඹ විශ්වවිද්‍යාලය තෝරා ගතිමි.අධ්‍යාපනවෙදී උපාධියද මගේ පෞද්ගලික හේතු මත බැහැර කොට ආර්ථික විද්‍යා උපාධිය තෝරාගැනීමට මා යොමු විය. මං කැම්පස් යන බසයෙම ඔහු ද ඔහු කොතෙක් යන්නට ඇතිද ?සරසවි දෙකම එක සමීපයේය.මා නිතර ගැවසෙන ස්ථානය. මා නිතර කුඩා සංදියෙ සිට ගමන් ගත් මාවත් , පන්සල් කඩමන්ඩි ඔහුගේද නවාතැන් ය…මං පාසල් යන විට මාව කොතෙක් ඔහුට මගහැරෙන්නට ඇත්ද..

බොහෝම අවස්ථාවල ඔහුත් මාත් නොදැනුවත්ව එකට හමුවී ඇත. එහෙත් ඉරණම පුදුමය. අවුරුදු ගනනාවක් අපිට දැනඇදුනාගැනීමට නොලැබුනි.

මගහැරීගිය තැන්වලම යලි වසර ගනනාවකට පස්සෙ අප හමුවීම හරි අපූරු ය.මම උසස්පෙලින් පසු කොළඹ විශ්වවිද්‍යාලයට තේරුණි. ඔහු එවිට ඔහුගෙ උපාධිය හමාරකොට ය.

ජීවිතයෙ බොහො දුරක් ගොස් මා විසින් මනෝඋපදේශන වැඩසටහනක් ක්‍රියාත්මක කිරීමට මට සිතුනි. සරසවිය තුල හදුනාගත් මිතුරෙකු සමග ආරම්භ කල වැඩසටහනට සංගීත දෙශකයෙකු වශයෙන් මගෙ මිතුරා ඔහුට ආරාධනා කර තිබුනි. ඔහු අප සමූහයයට සම්බන්ධ වූයෙ ඉන් පසුවය.මා ඔහු දැන අදුනාගත්තෙ එසේය.

ඔහු ජීවිතයෙ බොහෝ අවස්ථාවල මගැහැරී මට හමුවූයෙ එසේය. පුදුමය. අපි අහමුවූයෙද අප මගහැරුණු නරගරයේ ය. අප ඕනෑතරම් නොදැනුවත්ව මුණගැසුණු නගර මැද්දෙය.

මාත් ඔහුත් සැබවින්ම මිත්‍රශීලීව කතාකරෙ ඔහුගෙ පාසලෙ අප පැවැත්වූ දේශනයකදීය. එදා ඔහු මා සමග පාසලෙ ආපනශාලාවට ගිය බව හොදින් මතකය. ඔහුට තමන්ගෙ ඉරණම්කාරිය ඔහුගේ මේ පාසල් ආපනශාලාව තුල පාසල් කාලයෙන් බොහෝ කලකට පසු කෙදිනක හෝ මුණගැසේයැයි ඔහු කිසි දිනක නොහිතෙන්නැති . මමද මාගෙ සහෝදර පාසලෙ එවැනි ඉරණම් හමුවීමක් එසේ කිසිදන අපේක්ෂා කළේ නැත.මා පාසල් සමයෙ යම්‍ අධ්‍යාපනික කාරණා සදහා එම පාසලට පැමිණ ඇති නමුත් එසේ හමුවීමක් සිදු නොවුනා ය.

එහෙත් එදිනවත් ඔහු මට කිසිත් විශේෂයක් නොපැවසුවේය. නමුත් කුමක් හෝ ඇතිබව මා දැනුවත්ව සිටියෙමි.ඊට පසු දවසක මා සරසවියට යනවිට කොහෙන්දෝ ඔහු බසයට කඩාපාත්වුණි.එදා කතාවෙන් කතාව බසයෙන් බහින තැන මට මගහැරී බොහෝ දුර ගොස්‍ ය..කඩිමුඩියෙ බැස ගත්තත් ගමනාන්තය පහුවී ඇත. ඔහු සමග බොහො දුර පයින් ගොස් ඔහු මාව බෝඩිමට දැම්මා මතකය. එහෙත් ඔහු ඕනෑකමින් මට පාර වරද්දවා ඇති බව මට පසුව කීවෙය. ඒ මා සමග තව වේලා ගතකිරීමය. එදින පැය ගානක් බොහෝ දුර පයින් එනවිට මං ඔහුට මට පාර වැරැද්දුවාට හොදහැටි බැන්නෙමි.

ඔය විදියට ටික දවසක් යනවිට ඔහු මට ද මා ඔහුට ද ලන් වී හමාරය.නමුදු විශේෂ දවසක් නැත. එහෙම දවසක් ඔහුවත් මාවත් දන්නෙද නැත. ඉතිම් ඇනිවසරි අපිට නැත.

නමුදු අවුරුදු ගනනාවකට කලින් හමුවෙලා බොලද පෙම්වත්තු වෙන්න හිටිය අප අවුරුදු ගානක මගැහැරීම් එක්ක අත්දැකීම් එක්ක පරිනත වුණ එක වඩා හොදයි .

මිනිස්සු පරිණත ප්‍රේමවන්තයෝ කරන්න දෛවය විසින් දීපු කටුක අවුරුදු ගානකට පුළුවන් වෙනවා.මගැහැරීම් ගනනාවකට එහෙම අත්දැකීම් දෙන්න පුලුවන් .අතීතය සැබවින්ම වර්තමානයේ පදනමයි. ඔහුගේත් මගේත් වර්තමානයේ ශක්තිමත් මනස අතීතයේ කටුකත්වය මත ගොඩනැගී ඇත. එනිසා අතීතය වෙනස් කිරීමට කැමතිද ඇසුවොත් මා දෙන පිළිතුර අතීතය වෙනස් නොවිය යුතු ය යන්නය… ඔහුටත් මටත් බොහෝ කටුක අත්දැකීම් දරාගැනීම් රැසක් ඒ අපි හමුනොවුනු කාලයේ උරුමයි. සිත් රිදීම් උරුමයි… දරාගැනීම් හුරුපුරුදු කරන්න පරිණත කරන්න පුලුවන් .කාලය, ඔව් කාලය. ඒ තමා පරිණත බවෙ සංකේතය.

ජීවිතය ගැන අවබෝධයෙන් ජීවත් වෙන ආදරෙට ගෞරවය දෙන එකෙක් කරන්න ඒ ඇවිද්දිල්ලට පුළුවන් ඇත්තට ම.

එදා පොඩි කාලෙ මගහැරුණ ඔහුව මට , මට ඔහුව ආයෙමත් හමුවෙනවා..

දෛවය මුණගස්සනවා කාලයක් එක්ක.

මගහැරුණ තැන ම ඉඳන් අපි ආයෙමත් මග නොහැරෙන විදිහට ආදරය කරනවා . කවදාවත් මගනොහැරෙන්න අපි ගමන් කරන්නවා… අපි හමුවී මගහැරී ගිය මාවත්වල හමුවී පියමන් කරනවා…

සත්‍ය සිදුවීමකි..

  උපුටා ගැනීම: කේ .බී .ජී. ඉෂාරි සෙව්වන්දි

                      -කොළඹ විශ්වවිද්‍යාලය –