යෝගට් (වැල් වටාරම්)

මම අමාරුවෙන් කියනව.

“යෝගට් කන්න. යෝගට් කියන්නෙ universal. ඕන කෙනෙකුට දිරවනව. වෙන ඒව කන්න පුළුවන් වෙනකල් යෝගට් කන්න”

ඩොක්ටර් මං දිහා බලාගෙන උපේක්ෂා සහගත සිනාවකින් යුතුව කියනව.

ඇත්තටම යෝගට් කියන්නෙ universal තමයි. මොකද අපේ ගෙදර කන්න හොර කරන හොරගෙඩියො දෙන්නම යෝගට් දුන්නම වැඩි හාවක් හූවක් නැතුව කාල දානව. මනුලෝනම් තවත් එකක් ඉල්ලනව.

අද ලංකාවෙ ඕනම තැනක ඕනම කඩේක යෝගට් තියනව. ඒවත් වර්ග විසිගාණක් විතර තියනව. ඒ එකින් එකට රස, පැහැය, ඇසුරුම වගේ දේවල් පවා වෙනස් වෙනව.

ඒත් ඉස්සර, ගොඩක් ඈත නෙමේ 1994දි වගේ හැම තැනම යෝගට් තිබුණෙ නෑ. මොකද හැම කඩේකටම විදුලිය සහ සුඛෝපභෝගී භාණ්ඩයක් වෙච්ච ශීතකරණයක් නොතිබුණ හින්ද. ඉතින් ගොඩක් කඩවල යෝගට් ගබඩා කරල තිබුණෙ රිජිෆෝම් පෙට්ටියක. ශීතකරණයෙන් එලියට ගන්න යෝගට් වල සීතල පුළුවන් තරම් වෙලාවක් රැකගන්න වෙන ක්‍රමයක් තිබුණෙ නෑ.

මම 1 වසරෙ ඉදන් 5 වසර වෙනකල් ගියපු පොල්ගහවෙල ශාන්ත බර්නාදෙත් ආදර්ශ මහා විද්‍යාලයේ අපිට ඉස ඉස්සෙල්ලම ⁣පන්තියෙ කීවෙනියද කියල පංති වාර්තාවෙ ලියල දුන්නෙ අපි 4 වසරෙ ඉද්දි. ඒ පාර මම පංතියෙ දෙවනිය. පළවෙනිය වුණේ පසිදු. දැන් කොහෙ ඉන්නවද දන්නෑ. තුන්වෙනිය වුණ මහේන්ද්‍ර විදේශගත වෙලා කියල ආරංචියි.

ඉතින් ඔය මම දෙවනිය වීම අපේ ගෙදර පොඩියට සැමරුව මතකයි. ඒ මම දෙවෙනිය වීමයි, අපේ චූටි නැන්දම්මගෙ දුව, ඒ කියන්නෙ චූටි අක්කා අටවෙනියා වීමයි කියන නිමිති දෙකටම අදාළව. සමරන්න ගෙනාවෙ යෝගට්.

කලින් කීව වගේ දැන් හැමතැනම යෝගට් තිබුණට ඉස්සර තිබුණෙ එහෙමත් තැනක. ඒ තැන අතරින් කුරුණෑගල නුවර පාරෙ පිලැස්සට ටිකක් මෙහා 4කණුවෙ තිබුණ යෝගට් කඩේ විශේෂයි. අදනම් 4 කණුව ගොඩක් ජනාකීර්ණ පුංචි නගරයක්. සුපිරි වෙළදසැලක්, ෆාමසියක් පවා එතන තියනව. ඒත් ඉස්සර තිබුණෙ එක යායට පේන තෙක්මානෙට විහිදුණු ලස්සන පොල් වත්තක්.

පොල් වත්තෙ තැනින් තැන එළහරක් මීහරක් බැඳල ඉන්නව. පාරෙන් මීටර් පන්සීයක් විතර එහායින් පුංචි කදුගැටයක් උඩ වත්තෙ බංගලාව පේනව. වත්ත පුරා හරියට කොළපාට කාපට් එකක් එළල වගේ. වල්පැල මොකවත්ම වැවෙන්න නොදී හොදට නඩත්තු කරල. තණකොල යන්තමට ඉස්සීගෙන එනකොට හරක් කාල. හරිම ලස්සනයි.

ඔය වත්තෙ මෙහා කෙළවරේ පාර අයිනට වෙන්න තමයි ඒ අරුම පුදුම කඩේ තිබුණෙ. ඒක යෝගට් කඩයක්. වෙන මොකවත්ම නෑ.

වත්තෙ මට්ටමට වඩා පාරෙ මට්ටම අඩි 20ක් විතර උසයි. ඉතින් වත්තෙ හිටවපු කණු උඩ ගහපු අට්ටාලයක් වගේ වේදිකාවක් උඩ තමයි ඒ පොල්අතු වහපු පුංචි කඩේ තිබුණෙ. අට්ටාලෙ ලෑලි අස්සෙන් අඩි 20ක විතර ප්‍රපාතෙ පේනව. ඒ කාලෙ ඇබිත්තං මට අඩි 20 පෙනුණෙ මහා පාතාලයක් ගානට.

අපි අත්තයි කිරිඅම්මයි බලන්න පිලැස්සෙ යනකොට අනිවාර්යයෙන්ම ඔය කඩේ නතර කරල යෝගට් එකක් කාල යන එක සිරිතක්. කඩේ මුදලාලි වැඩේ කරපු ඇන්ටි රිජිෆෝම් පෙට්ටියෙන් ⁣යෝගට් එකක් අරන් ළග තියන පොල්පැණි බෝතලෙන් පැණි ඇබින්දකුත් වක්කරල හැන්දකුත් එක්ක මට දෙනව. ගෙදර හදපු යෝගට් එක්ක ගෙදර හදපු පොල්පැණි. දෙක එකතුවෙලා කට ඇතුලට යනකොට පිස්සු හැදෙන රහකින් මුළු ඇඟම පිනා යනව.

මමත් කර කර ගාන අට්ටාල කඩේ ලෑලි අතරින් පේන පාතාලෙ දිහා බල බල පැණිදාපු යෝගට් කනව. අම්මයි අප්පච්චියි කන්නෙ පැණි නොදා. නංගි ඒ දවස්වල යෝගට් කන්න පොඩි වැඩි.

මම යෝගට් එක කාල හැන්ද අට්ටාල මැස්සෙ ලෑලි අතරින් පාතාලෙට දානව. යෝගට් හැන්ද කැරකි කැරකි හුළග කපාගෙන බිමට වැටෙන එක බලා ඉදීමෙත් අමුතු සතුටක් තියනව.

කට්ටියම යෝගට් කාල බයිසිකලේට නගිනව. මම නගින්නෙ ආපහු යන දවසෙත් එතන නවත්තන පොරොන්දුව පිට. ඒත් අත්තලාගෙ කිරිඅම්මලාගෙ ගෙදරින් පිටත් වෙනකොට ඇතිවෙන දුක හින්ද මට ඒක යෝජනා කරන්නත් අමතක වෙනව.

අද මට ඕන තැනකින් ඇතිතරම් යෝගට් කන්න පුළුවන්. සමහරවිට එදාට වඩා ගොඩක් රස යෝගට්. ඒත් ඒ චිරි චිරි ගාන අට්ටාල කඩේ ලෑලි අස්සෙන් පාතාලෙ බල බලා පොල්පැණිත් එක්ක කාපු යෝගට් එක තරම් හිතට රසයක් නෑමයි.

ඒ කාලෙ හැමතැනම තිබුණෙ කහපාට යෝගට්. මං ආස හින්ද කිරිඅම්මලාගෙ ගෙදරදි චූටි පුංචිඅම්ම හදල දීපු යෝගට් එක සුදුපාටයි. මට වට්ටෝරුව මතක නෑ. ඒත් යෝගට් හදනකොට ඒකට කලින් හදපු යෝගට් ටිකකුත් දැම්ම බවනම් මතකයි.

ඉතිං පොඩිත්තතෙක් වෙච්චි මම පුංචිකමට අහනව මේම,

“යෝගට් හදද්දී හදපු යෝගට් ටිකක් දාන්නම ඕනිද?”

“ඔව්”

“ඉතිං ඒ හදපු යෝගට් ටික හදද්දි, ඒකටත් ඊටත් කලින් හදපු යෝගට් දාලද තියෙන්නෙ?”

“හ්ම්…”

“එතකොට ලෝකෙ ඉස්ඉස්සෙල්ලම යෝගට් හදපු මිනිහට, එයා යෝගට් හදද්දී දාන්න හදපු යෝගට් ටිකක් කොහෙන්ද?”

ඒ ප්‍රශ්නෙට හම්බ වෙච්චි උත්තරයක් මට මතක නෑ. එකකො කට්ටියම “මූනං යකෝ” කියල හිනාවෙලා නිකම් ඉන්න ඇති. නැත්නම් දීපු උත්තරේ බරපතල බව හින්දා මට මතක නොහිටින්න ඇති.

කොහොම වුණත් ඒ දවස්වල මං අහපු ඔයවගේ කෙළවරක් නැති සමහර ප්‍රශ්න වලට ලැබුණ උත්තරේ “මුල්ම එක මහාබ්රහ්මයා මැව්වා” කියන එක.

ඒ හින්දා පුංචි මම යෝගට් ගැනත් හිතාගත්තා එහෙම.

“මුලින්ම යෝගට් හදනකොට මහාබ්රහ්මයා යෝගට් ටිකක් හදලා ඒ මිනිහාට දෙන්න ඇති”

“ඔච්චර දේවල් මැව්වානම් මහා බ්රහ්මයාට ඇයි බැරි යෝගට් ටිකක් මවන්න?”