අපේ අක්කා යනු මහා අමුතුම ජීවියෙකු බව නොකියාම බැරිය. ඉතා අලි ඔලුවක් ඇති ඇයව මහ පොලොව කෙසේ දරා සිටිනවාදැයි මම කල්පනා කරමි. හා පැටවුන් මෙන් අහිංසක අප දෙදෙනාව තඹ සතේකට ගණන් නොගන්නා ඇය සත්තුන්ට මහා කරුණාවක් දක්වයි. හොටු හූරමින් අවර් ප්ලැනට් බලන අක්කාගේ දර්ශනය අපේ ගෙදරට අමුත්තක් නෙවේය.
ඈ කාලෙන් කාලෙට ඇඳුම් මාරු කරන්නා සේ ක්‍රෂ් මාරු කරයි. කෙසේ නමුත් අප දෙදෙනාට පින් සිදු වන්නට අපේ මුලු හතර වරිගෙම එය දනී.
කල්ප කාලාන්තරයකට පමණ පෙර ඇයගේ මුල්ම ක්‍රෂ් එක වූයේ “රොක්” ය. රොක් කීවාට ඔහු ගලක් නෙවේය. සෑබෑ නම ඩ්වේන් ජොන්සන් ය. ඔහු හොලිවුඩයේ ජනප්‍රිය නලු බට්ටෙකි. අපේ අක්කා ඔහුට වහ වැටුණේ ෆිල්ම් එකක් බලලා ය. ඇත්තෙන්ම මට නම් ඔහුව පේන්න බැරිය. බැලුම් බෝල වගේ පුම්බපු ඇඟත් තට්ට හිසත් ඇති ඔහුට ඈ වහවැටී සිටියේ ඇයිදැයි මා වැනි පෘථග්ජන ජීවියෙකුට කිසිසේත්ම නොතේරේ.
මේනියාවක් මෙන් ඈ ඔහුගේම ෆිල්ම් බැලූ යුගයක් ද තිබුණි.
මෙයින් අසරණ වූයේද අපිය. මන්ද යත් ගෙයින් පිටතට අඩියක් නොතබන ඇය අප හට අණකර තිබුණේ පහල සීඩී කඩයට ගොස් සීඩී රැගෙන එන ලෙසය. අලි මදිවට හරක් කීවාක් මෙන් ඒවා නිකන්ම ෆිල්ම් නොව රොක්ගේම ෆිල්ම් විය යුතු බව ඈ අවධාරණය කළාය.මහා උත්තමාවියගේ අණ පිළිපැදිය යුතු බවත්, නැතිනම් අපට හොඳ බැනුමක් ලැබෙන බව මා හට දිවැසින් මෙන් පෙනුණි.
පහුවදා උදේ මම සීඩී කඩේට ගොස් මුලින්ම කලේ රොක් ඉන්නවද කියා බැලීමයි.එය අරක් ගෙන සිටි බඩ තඩි මාමා මට සීඩී තෝරන්නට දී පැත්තකට වී ගේම් එකක් ගහන්නට විය. මම ද සීඩී තෝරන අතර තුර මඳක් ගේම් එකට ද ඇහැ දැමුවෙමි. ෆිල්ම් එක ගත් මා එයින් එලියට පැමිණියේ රටක් රාජ්‍යයක් දිනුවා වගේය.මේ ක්‍රියාවලිය නොකඩවාම සිදුවුණි. මේ නිසා බඩතඩි මාමා දිනපතාම මගේ පැමිණීම බලාපොරොත්තුවෙන් සිටියේය. මගේ රාජකාරිය වූයේ රොක්ගේ රූපයක් හෝ පිටකවරයේ තිබේද එය මිලට ගැනීමයි. කෙසේ නමුත් ටික කාලයකින් ඒ ක්‍රෂ් එක වැට පැන්නේය. ඒ කියන්නේ අපේ අක්කා ඒ ක්‍රෂ් එකට බූට් එක තිබ්බේය. පව් ය. මෙනිසා මුල්ම ක්‍රෂ් එකට හිමිවූයේ ශෝකජනක ඉරණමකි.
මේ අතර තවත් මතක් කළ යුතු ක්‍රෂ් එකක් වන්නේ ඇගේ පාසල් ක්‍රෂ් එකය. ඈත් මාත් එකම පාසලකට යන බැවින් මට ඒ ක්‍රෂ් එක ගැන සෑහෙන අවබෝධයක් තිබේ. අපේ පාසලේ ගුරුවරයෙකු වූ ඔහු ක්‍රෂ් එකක් ලෙස තෝරාගත්තේ ඇයිදැයි එකළ මට නොතේරුණි. නමුත් අපේ පාසලේ එකම පිරිමි පරාණය නිසා ඔහු තෝරාගත්තේ යැයි මට සිතේ. ක්‍රෂ් එක නිසා අක්කා කීවේ ඔහු හොඳින් උගන්වනවා කියලා ය. නමුත් පීරියඩ් එකෙන් බාගයක් කැන්ටිමේ ගත කරන ඔහු ගැන මට නම් කැමැත්තක් නොවීය. මුළු අංශයේම ළමුන් ඔහු ඇයගේ ක්‍රෂ් එක බව දැන සිටියේය. නමුත් ඇය විභාගය අවසන් කළ පසුව ඒ ක්‍රෂ් එකටත් හිමිවූයේ පරණ ඉරණම ය. අක්කාම පසුව පැවසූ පරිදි ඔහු ඇගේ විනෝදයට තබාගත් ක්‍රෂ් එකකි.
මීට අමතරව ඉයන් සොමහෝල්ඩර්, ජස්ටින් බීබර්, හැරී ස්ටයිල්ස්, හේමාල්, රොනාල්ඩෝ, ගොන්ග් යූ, ෂෝන් මෙන්ඩස් සහ නම නොදන්නා කොලු ගැටයන් බොහොමයකි. මේ ලිපිය කියවා අක්කා මාව නොමැරුවොත් අනෙක් ක්‍රෂ් ගැනත් ඔබට පැවසීමට පොරොන්දු වෙමි.
කෙසේ නමුත් මේ අතරින් තවමත් වැට නො පැන සිටින්නේ ෂෝන් මෙන්ඩස් පමණි. ඔහු දීර්ඝ කාලයක් තිස්සේ එම තනතුරේ රැඳී සිටි අතර තවත් දීර්ඝ කාලයක් සිටිනා බව මගේ අදහසයි. ඔහු සින්දු කියනා කොලුවෙකි, සිංහලෙන් කියතොත් ගායකයෙකි. ඇත්තෙන්ම කිව්වොත් මට ඔහු ගැන අකමැත්තක් නැත.
ඔහු හාද වී සිටින්නේ තවත් ගායිකාවක සමගය. ඇගේ හුරුබුහුටි කම නිසා මගේ අක්කාට ඇය ගැන අකමැත්තක් නැත. වෙන කෙනෙකු නම් මගේ අක්කා ඇයව මරාගෙන මැරෙනා බව මට සහතික ය. නමුත් ප්‍රසිද්ධ ගායක ගායිකාවන්ගේ ආදර සබඳතා වැඩි කල් නොපවතින නිසා ෂෝන් මෙන්ඩස් ගැන තමාට බලාපොරොත්තු තබා ගත හැකි බව අක්කා පවසයි. කොතෙක් කිව්වත් යථාර්ථය පිළි නොගන්නා ඇයට මනෝ පාරක් ගහන්න ඉඩදී මම කරබාගෙන සිටිමි.
ඔහුට ගිටාර් 56ක් ඇති බවත්, තක්කාලි කෑමට අකමැති බවත්, ආලියා කියා නංගි කෙනෙක් සිටිනා බවත් අක්කා පවසයි. තක්කාලි නොකෑවයින් අපිට මොකද කියා ඇසූ විට අක්කා කියන්නේ එය ඔවුන්ගේ අනාගත විවාහ දිවියට වැදගත් වනු ඇති බවයි. ෂෝන් මෙන්ඩස් මගුල් කියන්නට අපේ ගෙදර එන දවස බලාගන්නට වටිනා දර්ශනයක් වනු නොඅනුමානය. කෙසේ නමුත් මට නම් රට කෙල්ලන් අල්ලන්නේ නැත. ඒ නිසා ආලියා කියන කෙල්ල සමග එදාට කතා නොකර සිටින්නට මම ඉටාගත්තෙමි.
උපුටා ගැනීම: Arya Liyanage