වොෂින් මැෂින් සන්නිය….. (වැල් වටාරම්)

වෙනම ගෙදරක පදිංචි උනාට ගෙදරට ඕන බඩු අපි ගත්තේ අපිට පුළුවන් විදියට. වොෂින් මැෂින් එකක් ගත්තේ ලොකු පුතත් හම්බ උනාට පස්සේ. ඒකත් ‘ අදී…. වොෂින් මැෂින් එකක් ගමුද?’ කියලා කෙලින්ම ඇහුවේ නෑ. කර්ට්න් හෝදන්න බෑ, බෙඩ් ශීට් වල කුණු යවන්න බෑ වගේ වදන්න කියන කොට අහන් ඉන්න බැරිම තැන වෙන්න ඕන, අදී වොෂින් මැෂින් එකක් ගෙනත් දුන්නා.

අපි ඉතින් ලිඳෙන් වතුර ඇදලා, ගල උඩ තියන් සබන් ගාලා, අතින් රෙදි හෝදපු මිනිස්සු. වොෂින් මැෂින් එක දැක්කාම මට රෙදි හෝදන්නමයි හිතෙන්නේ. හේදුව හේදිල්ලක් ආයෙත් අමතක නොවෙන්න….

සන්නිය 1 :

පලවෙනි දවසෙ ඇඳුම් වල කුණු තිබුණද නැද්ද මොකුත් බැලුවෙ නෑ හෝදන්න තියෙන ඔක්කොම රෙදි දෙවියනේ කියලා මේ යන්තරේට දැම්මා. අන්තිම මොහොතේ කවිච්චියේ තියලා තිබුණු පුටු කොට්ට දෙක දැක්කා. කාලෙකින් හෝදලා නෑ…. මේ කුෂන් කවර දෙක අපි ගත්තේ ප්‍රදර්ශනයක් බලන්න ගිහින්. හරිම ලස්සනට ගෝනි නූල් වලින් කරපු අලියෙක් කුෂන් කවරෙ හිටියේ පෙරහරේ ගමන් කරනවා වගේ ගාම්භීර ලීලාවෙන්. අලියා හොඳටම කැත වෙලා. හේදුවා ම ලස්සනට තියේවි.ඔන්න ඒකත් ගලවලා හෝදන්න දැම්මා. රෙදි හේදිලා ඉවර උනාම වදින සංඥාව ඇහෙනකොටම ගියා රෙදි අව්වේ දාන්න. ( දැන්නම් රෙදි හේදිලා දවසකට පස්සෙ මතක් වෙලත් අව්වට දානවා ) මැෂින් එකේ පියන අරිනකොටම මට තේරුණා මොකක් උනත් විනාසයක් වෙලා කියලා. ඇඳුම් වල පුංචි පුංචි ගෝනි නූල් කෑලි හැමතැනම…. අම්මෝ කුෂන් කවර !!!

නැට්ට පිටින් අලි මැරෙනවා කිව්වට හරියටම දැක්කේ එදා තමයි. කුෂන් කවරෙ ලස්සනට හිටිය අලියගෙ නැට්ට විතරමයි ඉතුරු….. බලනකොට අලි නැට්ට කතිර වගේ මැස්මකින් තිබිලා තියෙන්නේ. ඒකයි නැට්ට ඉතිරි. අලි දෙන්නම වොෂින් මැෂින් එක ඇතුලෙ එදා මළා…..

සන්නිය 2 :

අලි සීන් එකෙන් පස්සෙ මම ටිකක් පරිස්සම් උනා. කාටද ඕව හැමදාම මතක තියෙන්නේ….

ලොකු ඉස්කෝලෙක තොප්පියක් තිබුනා රවුමට සුදුපාටට. මැච් එකක අම්පයාර්ට ඉන්න කියලා ඕකත් දාගෙන ගියාට ආයෙ ගෙනැල්ලා එහෙ මෙහෙ දාල දූවිලි වැදිලා තිබුනේ. දැක්කාම දුකේ බෑ…. හෝදලා අරන් තියන්න ඕන කියලා හිතලා ඒකත් දැම්ම වොෂින් මැෂින් එකට. අනිත් රෙදිත් එකක් ගානට ඇඹරිලා අම්පයාර් ගෙ තොප්පිය පපඩමක් වෙලා… ඒක දැක්කාම මට දාඩිය දාලා කලන්තේ වගේ වුණා. දැන් මොකද කරන්නේ…. ෂේප් එකේ මේක කියන්නත් ඕන. කෝකටත් තොප්පිය අවුවට දැම්මා. ‘ඔන්න මං ඔයාගේ තොප්පිය හේදුවාආආආ……. ….. ‘ මොකුත් වුණේ නැති ගානට අදී ට කිව්වා. තොප්පිය අතට ගත්තු මනුස්සයාට හිකිස් ගෑවුනා….

‘හැම ලබ්….ම වොෂින් මැෂින් එකේ…..දානවට …… ‘කියලා පටන් ගත්තා……. ඉන්පසු කතාව හිතාගන්න පුළුවන් නේ…

එදා උගත් පාඩම් අනුව ඔහුගේ කිසිම ලබ්…..ක් නැවත වොෂින් මැෂින් නොදැමීමට තරයේ අධිෂ්ඨාන කර ගත්තා.

සන්නිය 3 :

එදා අම්මලගෙ ගෙදරින් පන්සලට දවල් දානෙ. සෙනසුරාද දවසක් නිසා උදේම සාලෙ කර්ට්න් ටික ගලවලා වොෂින් මැෂින් එකට දාලා ලොකු පුතා අරන් අම්මට උදව් වෙන්න හිතන් ඒ පැත්තට ගියා. පන්සලට දානෙ ගෙනිහින් සැදැහැ සිතින් ගෙදර පැත්තට ආවෙ උදේ හේදෙන්න දාලා ගිය කර්ට්න් ටික අව්වට දාන්න හිතාගෙන. බාත් රූම් එකේ දොර අරිනකොට දැකපු දෙයින් වෙලා තියෙන දේ මට හිතාගන්න බැරි වුනා. වොෂින් මැෂින් එකට සම්බන්ධ කරපු ටැප් එකයි වතුර බටෙයි කැඩිලා…. දොර ගාවටම වොෂින් මැෂින් එක ඇවිදගෙන ඇවිත් ද?? හොරෙක් වත් ඇවිල්ලද ? කෝකටත් හෙමින් අඩිය තියලා ගේ ඇතුලට ආවා… නිදන කාමරයට එබුනා. අල්මාරියත් තිබුන විදියටම තියෙනවා. ගේ ඇතුලට හොරෙක් ආව බවක් නම් පේන්න නෑ. කෝකටත් අදීට එන්න කිව්වා. අදී ඇවිල්ල බාත්රූම් එකට එබිලා වොෂින් මැෂින් එකේ පියන ඇරලා බලනවා විතරයි මං දැක්කේ. ඒ ඇස් දෙක කාටුන් වල වගේ එලියට පැන්නා. ත්‍රාසය, භීතිය, කුතුහලය මිශ්‍ර හැඟීමක හිටිය මට එදා නම් සුද්ද සිංහලෙන්ම අහගන්න ලැබුණා ….

බලනකොට ඒකෙ උපරිම කිලෝ හතයි ලු හෝදන්න පුළුවන්. රෙදි හෝදන්න කලින් කිරල බලලා දාන්නෙ කවුද අනේ ??? රෙදි බර වැඩි වෙලා වොෂින් මැෂින් එක vibrate වෙලා ටැප් කඩාගෙන බාත් රූම් එකේ දොර ගාවටම ඇවිදගෙන ඇවිල්ලා කියහන්කො . මං හිතුවෙම වොෂින් මැෂින් එක ගෙනියන්න හොරෙක් ඇවිලමයි කියලා …

ප. ලි.

දැන් අපි ගානට program කරලා නියමෙට රෙදි හෝදනවා. චූටි බබාගේ නැපි පවා හේදුවෙ වොෂින් මැෂින් එකේ තමයි. ඒ හේදුව හේදිල්ලටද කොහේද චූටි පුතා නියම ඇඹරිල්ලක් අඹරනවා …..

 උපුටා ගැනීම: දිලංකා කොත්තිගොඩ