කොල පාට ලමයි කිව්වාම අපිට එක පාරටම මතක් වෙන්නෙ පිටසක්වල ජීවීන්ව. හැබැයි මේ ලමයි දෙන්නා නම් කිසිම විදියකින් පිටසක්වල ජීවීන්ට සම්බන්ධ නැහැ. ඒත් මේ ලමයි දෙන්නා ආවෙ කොහෙන්ද? එයාලා කොල පාට වුනේ කියන එක නම් අදටත් අභිරහසක්.
එංගලන්තයේ සෆෝක් ( Suffolk) ප්‍රාන්තයට අයිති වූල්පිට් ( Woolpit) කියන ගම්මානයෙන් තමයි ගෑනු ලමයෙකුත් පිරිමි ලමයෙකුත් මේ විදියට මතු වෙලා තියෙන්නෙ. අද ඊයෙක නම් නෙමෙයි. දොලොස්වන ශතවර්ෂයෙ තමයි මේක සිද්ධ වෙලා තියෙන්නෙ. ගම්වැසියො අස්වනු කපමින් ඉන්න අතරෙදි එක පාරටම මතු වුනු මේ ලමයි දෙන්නා ආවෙ කොහෙන්ද කියන එක කාටවත් හිතා ගන්න බැරි වෙලා තියෙනව. අමුතුම ඇඳුම් ඇඳගෙන, කාටවත් තේරුම් ගන්න බැරි බාසාවක් කතා කරපු මේ ලමයි දෙන්නා ඉඩම් හිමියා උනු සර් රිචඩ් වෙත බාර දෙන්න ඔවුන් කටයුතු කරලා තියෙනව.
දවස් ගානක් යන තුරුම අඬමින්, නොකා නොබී අපහසුවෙන් හිටපු ලමයි දෙන්නා කාලයත් එක්ක පරිසරයට හුරුවුනු බව කියනවා. හැබැයි පිරිමි ලමයා ලෙඩ රෝග නිසා කෙටි කාලයකින්ම මිය ගිහින්. සාමාන්‍ය ජීවිතයක් ගත කරමින් ඉංග්‍රීසි භාශාව පවා ඉගෙන ගත්ත ගැහැනු ලමයා පස්සෙ කාලෙක ගමේම කෙනෙක් එක්ක විවාහ වෙලා තියෙනවා. ගම් වැසියන්ට පුංචි කාලෙදි මෙයාලා හමු වෙන්න කලින් ජීවිතය ගැන ඇහුවාම ගැහැනු ලමයා කියල තියෙන්නෙ මෙන්න මෙහෙම.
“අපි ජීවත් වුනු ලෝකෙ ඉර නැහැ. යන්තම් පුංචි එලියක් විතරයි තියෙන්නෙ. අපේ ලෝකෙ ජීවත් වුනු හැමෝම අපි වගේම කොල පාටයි. මරනයේ ගංගාවෙන් එහා පැත්තෙ තියෙන දිලිසෙන ලෝකයක් ගැන අපි කතන්දර අහලා තිබුනා. ඒත් මරනයේ ගංගාව පහු කරන්න තරම් කවුරුවත් නිර්භීත වුනේ නැහැ. අපි ආවෙ අපේ තාත්තා හොයාගෙන. අපි එද්දි එක පාරටම ඔක්කොම අඳුරු වුනා.කිසිම දෙයක් පෙනුනේ නැහැ. අපි අතපත ගාමින් ඔහේ ඇවිද්දා. කොච්චර කල් ගියාද කියන්න දන්නෙ නැහැ. එහෙම ඇවිදිනකොට තමයි අපි එක පාරටම මේ දිලිසෙන ලෝකෙට ආවෙ.”
මේ සිද්ධිය සිදු වුනු කාලේ විද්‍යාව ඒ තරම් දියුනු නැති නිසා විදිමත් විද්‍යාත්මක පරීක්ශනයක් කරන්න කවුරුවත් උනන්දු වෙලා නැහැ. ඒ නිසාම මේ සිදුවීම වාර්තා අතරට එක් වුනු තවත් අභිරහසක් බවට පත් වෙලා තියෙනවා.
උපුටා ගැනීම: අනන්තවු විශ්වය- The Universe