මම බැන්දේ යෝජිත විවාහයක්. ඒ උනාට මම කවුරු බැන්දත් මට එයාට කිවයුතු දෙයක් මම කලින්ම ප්ලෑන් කරලා තිබුනා.
ඒ දවස් වල අපේ ගෙදර ලොකු කාලගෝට්ටියක්. මනාලයෙක් බලන්න එනවා කිව්වම දන්නවනෙ. මමත් නිවාඩු දාලා එයත් නිවාඩු දාලා ඔන්න ඉතිං එයාලගෙ ගෙදර අයයි, නෑදෑයන් එක්ක එයා අපේ ගෙදර ආවා කෙනා කවුද කියලා කියද්දි මමනම් එයාව කලින් දැනගෙන හිටියා මොකද එයා අපේ ඉස්කෝලෙත් ඉගෙනගත්ත අයියා කෙනෙක් නිසා.
බුලත් හෙප්පුවත් අරන් ගියා එයා ලගට දුන්නා බුලත් හෙප්පුවම, මරුවෙලා ටක්ගාලා ආවා. අපේ ගෙදර අයයි එයාලගෙ ගෙදර අයයි එක පොරේට කතාව. මොකද එයාගෙ තාත්තයි අපේ තාත්තයි එක පන්තියෙ යාලුවො. මම හිමින්සැරේ බැලුවා එයා දිහා. එයා මං දිහා බලන් ඉන්න විදියනම් ටිකක් අමුතුයි වගේ හරියට හදට රොකට් එකක් යවන්න ප්ලෑන් කරනවා වගේ.
කවුරුවත් අපි ගැන කතා කරන පාටක් නෑ.
“තේ ටිකක් බීලම ඉමු” කියලා අපේ අම්මා කිව්වා කතාව වෙනස් කරන්නමද මන්දා. දැන්නම් අපි ගැනකතා කරයි කියලා විශ්වාසයි. ඒ දවස්වල අපේ වත්තෙ පතල් තිබුනා. ඒ පතල් කරපු මුදලාලිටත් තේ බොන්න කතා කලා. මුදලාලිත් ගෙට අඩිය තියනකොටම කිව්වා
“උබලා මොකද මෙහෙ කියලා”
බැලින්නම් එයාගෙ අම්මගෙ මල්ලිතමා මුදලාලි.
කතාව ආපහු වෙන අතකට පෙරලුනා කට්ටිය තේ බීලත් ඉවරයි. එයා පැත්තක මම පැත්තක. පැයකට දෙකකට විතර පස්සෙ ඔන්න කිව්වා කතා කරනවනම් දෙන්නත් එක්ක කතා කරන්න කියලා. හරියට මේ ගෙවල් වල අය හමුවෙන්න දාගත්ත හමුවක අතුරු කතාවක් වගේ.
කොහොම හරි කතා කරන්න චාන්ස් එකක් ලැබිලා. ඒත් ඔය ඔක්කෝමලා ඉස්සරහා කතා කරන්නත් බෑනෙ, මොකද ආගිය තොරතුරු කතා කරන්නයැ.
එයත් ඒක දැනගෙනමද මන්දා කෑම කාමරේට ආවා මමත් ගියා. එයා ඉන්නවා පැත්තකට වෙලා පුටුවකින් වාඩිවෙලා. මමත් ඉන්නවා පැත්‍තකින් වාඩිවෙලා. මට කියන්න ඕනෙ දේ කියන්න එකපාරටම බෑනෙ අහවල් ඉස්කෝලෙද මම දැකලා තියෙනවා කියලා මම කිව්වා. ඒ උනාට එයාට මාව මතක නෑ. මොනවාහරි කියන්න ඕනෙ නිසාදෝ එයා කියපි
“මම දැනගෙන හිටියෙ නෑනෙ මෙහෙ කෙල්ලෙක් ඉන්නවා කියලා”
කොහොම කොහොම හරි කතාවෙන් කතාව මම මගේ ටාගට් එකට ලගා වෙන්න පොටක් පෑදෙනකම් කතාව ඇදගෙන ගියා. කොහොම හරි මේක කියන්නත් ඕනනෙ. කතාවෙන් කතාව එයා ඇහුවා.
“ඔයාට මට කියන්න මොකවත් තියෙනවද?”
කියලා. හරි වැඩේ ඔන්න චාන්ස් එක. මම කිව්වා.
” ඔයා සිගරට් බොනවද මම ඒකට කැමති නෑ ඔයා ඒකට කැමතිද?”
කියලා. මෙයා පොඩ්ඩක් හිතලා කිව්වා.
“මම සිගරට් බොනවට කැමති නෑ. මම සිගරට් බිව්වොත් බොන්නෙ අවශ්ථා තුනකදි විතරමයි කියලා. එයා ඒකට හේතුවත් පැහැදිලි කලා.
1. ඩ්‍රයිවින් කරද්දි නිදිමතක් වගේ ආවොත් අනෙක් අය ගැන හිතලා නිදිමත නැතිකරගන්න පහසු ක්‍රමයක් නිසා.
2. පාටියකට වගේ ගියොත් ඩ්‍රින්ක් එකක් ගත්තොත් විතරමයි කියලා.
3. මම නිදහස උපරිම විදින්නෙ ගෙදර ඉන්න වෙලාවට, මට ඒ නිදහස දෙන්න කියලා.
මට එවලෙ හිතුනා ඒ ඉල්ලීම් සාදාරන ඉල්ලීම් කියලා. මම ගොඩක් සතුටු හිතුනා. මමත් සාදාරණයක් කරන්න ඕනෙනෙ ඉතිං මමත් ඇහුවා
“ඔයාට මොනවද කියන්න තියෙන්නෙ” කියලා.එයා මට කිව්වා.කරුණු තුනක්
1. අඹ ගහට පොල් ගහ කිව්වොත් ඒක ආයෙත් අඹගහ වෙන්නෙ නෑ.ඒක එයාලගෙ ගෙදර නීතියක්.
2. කිසිම දේකට එකට එක කථා කරන්න එපා. ඒකෙන් ප්‍රශ්න දුරදිග යනවා.
3. කියනදේ අහන්න.
පැහැදිලි තේරුමක් නැතත් සාදාරන කියලා හිතෙන්න පැහැදිලි කරපු නිසාත් මම කිව්ව දේට එයා කැමති උන නිසාත් මට ඒකට විරුද්ධ වෙන්න තරම් හේතුවක් නැති නිසාත් මමත් හා කිව්වා.
පස්සෙ අපි කසාද බැන්දා. තාමත් අපි කිරි පැණි වගේ තමයි. ඒත් එයා කියපු දේ මට පස්සෙ පැහැදිලි උනා. එයා සිගරට් බොනවා මට පේන්න පුලුවන් අවශ්ථා,
1.එයත් එක්ක ගමනක් යද්දි
2. එයත් එක්ක පාටියකට ගියාම
3. ගෙදරදි
අඹගහ කතාවෙ තේරුම
* කලින් කියලා තියෙන දේවල් වෙනස් වෙන්නෙ නෑ.
එකට එක කතා කරන්න එපා කියන එකේ තේරුම
* ඉහත කියපු දේ ගැන වාද කරන්න තහනම.
කියන දේ අහන්න කියන්නෙ
*කීකරුබව
ඔන්න ඔහොමයි උනේ.
උපුටා ගැනීම: නිශානි මධුමේලා