නිර්මලයි මායි හැමදාම උදේට වීඩියෝ දාලා කතා කරනවනේ. ඉතින් ඔය කතා කරනකොට අපි දෙන්නා බොහොම සුහදව, හිනාවෙන් තමා කතාව යන්නේ. ඒත් අද උදේ ගෑනි නිකන් කැත්තට පොල්ල වගේ උත්තර දුන්නා. බැඳල අවුරුදු විසි හතක් හින්ඳා මම ඉතින් ටෝන් එකෙන් කියන්න දන්නවා මොකක් හරි හුට පටයක් ගෑනිගේ හිතේ යන්ව කියලා. කල්පනා කරල බැලුවා මොකක්ද වුනු හුප්පේ මා අතින් කියලා. ම්හ්. හිතා ගන්න බෑ.
අනික මම එහෙම අහු වෙන්න වැරදි කරන එකෙකුත් නෙවෙයි ආයුබෝවන්. පන්සිල් වුනත් එලිපිට රකින්න දන්න එකෙක් මම. මට ඉතින් වටින් ගොඩින් වැඩ අල්ලන් නැති හින්ඳා ඇහුවා ‘මොකද නිකන් අප්සෙට් එකෙන් වගේ?’ කියලා. එතකොට ‘ඔයාටත් ඉතින් සුමිත්ට වගේ වෙන කෙනෙක් හිටියනන් හොඳයි නේ? මම ඉතින් දැන් වයසයිනේ’ කියල ඕන් ගෑනු ඇනුම් පදයකින් දමල ගැහුවා.
සුමිත් කියන්නේ අපෙ යාලුවෙක්. මිනිහගෙ වයිෆ් ඇක්සිඩන්ට් එකකින් මැරිලා අවුරුදු දෙකකට විතර පස්සෙ මිනිහ කසාදයක් බැන්ඳා. ඉතින් ඕකට මෙහෙ ඉන්න ගෑනු ඔක්කොම වගේ ඔරොප්පු.
ඒ සැරේ මම කල්පනා කරා මොකක්ද යකෝ මේ හරුපෙ කියලා. ‘ඔව් වෙන ගෑනියෙක් හිටියනන් හොඳා තමා ඒත් මොකෝ මේ හදිස්සියේම ඒක මතක් වුනේ?’ කියලා පොඩි කින්ඩියක් එක්ක ඇහුවා. මාත් ඉතින් ඉල්ලන් කනකන් නින්ඳ යන් නැති එකෙක්නේ. ‘ඇයි ඔයා අර ෆේස්බුක් එකේ දාල තියෙන්නේ අයි වෝන්ට් ටු බ්‍රේක් ෆ්‍රී කියලා’ කියපි ගෑනි!! යකෝ මම අර ඉන්ග්‍රීසි සින්ඳුවක කෑල්ලක් දැම්මේ මගේ වෝල් එකේ. ඒකට මොකෝ මෙයාට අප්සෙට් වෙලා තියෙන්නෙ? ‘අම්ම ඒ සින්ඳුවක කෑල්ලක්නේ’ කියල කිව්වා. ‘හරි හරි මම දන්නවා සින්ඳුවක කෑල්ලක් කියලා ඒත් ඉතින් අර හාට්ස් එක්ක එහෙමනේ ඒක දාල තියන්නේ’ කියපි ගෑනි. මොන හාට්ස් ද යකෝ!? මේ ගෑනිට දෙයියන්ගෙ හාල් කැවිලද?? මම දාපු හාට් එකක් නෑ. මම කිව්වා ‘කොහෙ තියන හාට්ස් ද ගෑනියේ?’ කියලා. ‘ඇයි අනේ ඔයා ඒක ලියල තියෙන්නේ හාට්ස් තියන බැක්ග්‍රවුන්ඩ් එකකනේ. ඒව හිතල කරන වැඩ’ කියනවා මේන් යකෝ ගෑනි!!
දෙයියන්පා මම දන්නෙත් නෑ ඒ කලු පාට බැක් ග්‍රවුන්ඩ් එකේ හාට්ස් තිබ්බ කියලා!! උඹලත් බලපල්ලකෝ ඔය යටින් තියෙන්නේ.. අනේ අම්මප මේ තරන් වයසට ගිහිල්ලත් ගෑනුන්ට පිරිමි ගැන තියන සැක නේ?
උපුටා ගැනීම: Susantha Pethiyagoda