පුරාණ ඊජිප්තුව 18 වැනි පාරාවෝ රජ පෙළපතට නතුව තිබුණු කාලයට කියන්නේ “නව රාජධානි සමය” නැතිනම් New Kingdom කියලා. ඉතින් ටුටන්කාමන් කියන්නේ “නව රාජධානි සමයේ” ඊජිප්තුව පාලනය කරපු ළාබාලම පරාවෝ රජු.
ටුටන්කාමන් රජු මුලින්ම මිසර කිරීටය හිස දරණ විට එයා අවුරුදු 9 ක කුඩා දරුවෙක්. එයින් හරියටම අවුරුදු 10 කට පස්සේ, ඒ කියන්නේ ටුටන්කාමන් රජුට අවුරුදු 19 දී ඔහු අභිරහස් ලෙස මියයනවා.
ටුටන්කාමන් ළමා රජු පුරාණ ඊජිප්තුවේ පැවැති චාරිත්‍රවලට අනුගතව එයාගෙම ඥාති සහෝදරියක හා විවාහ වෙලා හිටියා. රජ කෙනෙක් වුණත් කුඩා දරුවෙක් නිසා ටුටන්කාමන්ව හැඳින්වුණේ “ළමා රජු” එහෙමත් නැතිනම් Boy King කියලා. King Tut කියන්නෙත් ටුටන්කාමන්ට රජුටම තමා.
ඉංග්‍රීසි ජාතික පුරාවිද්‍යාඥයෙකු මෙන්ම ඊජිප්තුව ගැන විශේෂඥයෙකුද වන හොවාර්ඩ් කාටර් විසින් ටුටන්කාමන් රජුගේ සොහොන් ගැබ හොයා ගන්නේ 1922 අවුරුද්දේ.
ටුටන්කාමන් රජුගේ සොහොන් ගැබ අනාවරණය කරගැනීම අදටත් සැළකෙන්නේ ඊජිප්තු ඉතිහාස කතාවේ ඉතාමත් වැදගත් සංධිස්ථානයක් විදිහට. ඒකට හේතුව තමයි මේ සොහොන් ගෙය සොයාගැනීමත් සමගම පුරාණ මිසර රජුන්ගේ ජීවන ක්‍රමය, ඔවුන්ගේ චාරිත්‍ර වාරිත්‍ර, පරාවෝ රජ පෙළපතට අයත් රාජකීය සාමාජිකයන් මියගිය පසුව ඔවුන්ගේ ආගමික වතාවක් සිදුකරන ආකාරය ගැන වගේම මරණින් මතු ආත්මය ගැන ඔවුන් තුළ පැවැති විශ්වාසයන් ගැන බොහෝ කරුණු ටුටන්කාමන් රජුගේ සොහොන් ගැබ සොයාගැනීමත් සමගම නූතන ලෝකයට අනාවරණය වුණු නිසා.
ටුටන්කාමන්ගේ සොහොන් ගැබ හොයා ගැනීම සඳහා හොවාර්ඩ් කාටර් සිදුකළ ගවේෂණ කටයුතුවලට සල්ලි වියදම් කළේ කානවන් සාමිවරයා. කොහොම වුණත්, ටුටන්කාමන් රජුගේ සොහොන් ගැබගවේශණය කරපු කණ්ඩායමේ සියලුම දෙනා සොහොන සොයා ගැනීමෙන් වසර කිහිපයක් ඇතුළත අභිරහස් ලෙස මියගියා. හොවාර්ඩ් කාටර් මියගියේ 1939 දී. මරණයට හේතුව පිළිකාවක්. ගවේෂණයට සල්ලි දීපු කානවන් සාමිවරයා 1923 දී මියගියා. මරණයට හේතුව කෘමියෙක් සපා කෑ ස්ථානයක්, රැවුල බාද්දි තුවාල වෙලා සිද්ධ වෙච්චි ආසාධනයක්. සමහරු නම් කියන්නේ මිසර ළමා රජුගේ අවසන් නින්දට බාධා කිරීමේ ශාපය නිසා ඔවුන්ට එහෙම වුණා කියලා.
මේ තියෙන ඡායාරූප හැම එකක්ම 1922 අවුරුද්දේ ටුටන්කාමන් රජුගේ සොහොන් ගෙය සොයාගැනීමෙන් පසුව අරගත්තු ඒවා. මේ ඡායාරූප හැම එකක්ම ගත්තේ බි්‍රතාන්‍ය ජාතික ඡායාරූප ශිල්පියෙකු වන හැරී බර්ටන් විසින්. කළු සුදු ඡායාරූප විදිහට ගත්තු මේවා පස්සේ කාලේදී වර්ණ ඡායාරූප බවට පරිවර්ථන කළා.
– අනිල් කරුණාරත්න –