සෙබස්තියාවෝ සල්ගාඩෝ කියන්නේ බ්‍රසීලයේ ඉන්න ජනප්‍රිය ඡායාරූප ශිල්පියෙක්. එයාගේ බිරිඳ තමයි ලෙලියා වැනික්. මේ දෙන්නට තියෙනවා හෙක්ටයාර 600 ක් පමණ විශාල ඉඩමක්. බ්‍රසීලයේ අයිමොරේස් කියන පළාතේ තිබුණු මෙම ඉඩම තනිකරම කාන්තාරයක් වගේ. කිසිම ගහක් කොළක් නැහැ.
ඉතිං 2000 අවුරුද්දේ සල්ගාඩෝටයි එයාගේ ආදරණීය බිරිඳටයි හරිම අපූරු අදහසක් පහළ වෙනවා. ඒ තමයි එයාලගේ ඉඩමේ ගස් හිටවලා වනාන්තරයක් හදන එක. ඒ දෙන්නා හිමි හිමිහට තමන්ගේ අදහස ක්‍රියාත්මක කළා.
මේ වැඩේට ඉඩමේ වැඩට හිටපු සේවකයෝ වගේම ගහට කොළට සතා සීපාවට ආදරය කරන මිනිස්සු ස්වේච්ඡාවෙන්ම තමන්ගේ ශ්‍රමය ලබාදුන්නා. කොහොම හරි අවුරුදු 18 ක කාලයක් ඇතුළත පැළ ලක්ෂ 20 ක් කාන්තාර ඉඩමේ හිටවන්ඩ හැකියාවක් ලැබුණා.
ඒකේ ප්‍රතිඵලය අති විශිෂ්ඨ එකක්. සල්ගාඩෝ-ලෙලියා දෙන්නා එකතු වෙලා බ්‍රසීලයට අලුතින් වනාන්තරයක් තෑගි කළා. කලින් කාන්තාරයක් වගේ තිබුණු ඉඩම දැන් විවිධ ප්‍රබේධ 293 කට අයත් ගස්, පක්ෂී විශේෂ 172 ක් සහ විවිධ සතුන් වර්ග 33 ක් ජීවත් වෙන වනාන්තරයක්. මේ වනාන්තරයේ තියෙන විශේෂත්වය තමයි එහි ජීවත් වෙන සතුන්ගෙන් බහුතරයක් වඳවී යාමේ තර්ජනයට මුහුණ පාලා ඉන්න සතුන් වීම.
ලෝකය වෙනස් කරන්න අවශ්‍ය වෙන්නේ පුංචි සිතුවිල්ලක් සහ වුවමනාවක් විතරයි…
– අනිල් කරුණාරත්න –