ඕනම සමාජයක පවුලක ආයතනයක ඉන්නවනෙ පොඩ්ඩක් ඇත්නම් අනිත් එවුන්ව පාවලා දෙන ජාතියෙ එකෙක්. ඉස්කෝලවල පංතිවලත් එහෙම එවුන් ඉන්නව. එකට ගිහින් අනිත් එවුන්ව පාවල දීල තමන් හොඳ මිනිහ වෙනව.
ඒ වගේ එකෙක් ගැන කතාවක් මේ.
ළමයි කට්ටියක් ඉස්කෝලේ ඇරිල ගෙදර යනගමන් වත්තකට පැනල කුරුම්බා කඩනව වත්තෙ අයිතිකාරයට අහුවුණා .
පොඩි කොල්ලො ටිකක් නිසාත් පොලීසි ගානේ ගොස් රස්තියාදු වීමට අකැමැති නිසාත් වත්තෙ අයිතිකාරය කල්පනා කලා මුන් ටික අල්ලන් ගිහින් ප්‍රින්සිපල්ට බාරදෙන්න.
‘ මන් දැන් තොපි ඔක්කොම අල්ලන් ගිහින් ලොකු මහත්තයට බාර දෙනව! හිටපියව් තොපිට මන් හොඳ පාඩමක් උගන්නන්නම්! ‘
‘ දැන් කොහෙද ප්‍රින්සිපල් ? ‘ කොල්ලෙක් කිව්ව.
‘ එහෙනම් මන් තොපි හෙට උදේ වෙනකම් අල්ලල බැඳල තියනව පොල්ගස්වලම! තොපේ මහ එවුන් හරි එයිනේ! ‘
මේ අතරෙ එකෙක් අනිත් එවුන්ට මෙහෙම කියනව.
‘ මන් තොපිට කිව්වනෙ එපා කියල ! මට බෑ කියද්දි තොපි මාවත් ඇදන් ආව ‘
මේක ටිකක් දුරදිග ගිහින් දැන් එකෙක් එක පැත්තක අනිත් එවුන් ඔක්කොම අනිත් පැත්තෙ . ඉඩම අයිතිකාරය කල්පනා කලා මේකෙන් වාසියක් ගන්න.
‘ හරි ඔය ළමය හෙට මේ අය ප්‍රින්සිපල්ට පෙන්නනව නන් ඔය ළමයට යන්න දෙනව.’
‘ පෙන්නන්න විතරක් නෙවෙයි මන් මුන්ගෙ නම් ටිකත් ලියල දෙන්නන් . මට යන්න දෙනවනම්.’
‘ අඩෝ තෝ අහුවෙයන්කෝ අපිව විතරක් අල්ලල දීල! ‘
‘ ඇයි උඹල මට මොනව කරන්නද? ‘
‘ හරි දැන් මුන්ගෙ නම් ටික මට ලියල දෙන්න! ‘
‘ මම ලිව්වොත් මාමට කියවන්න බැරිවෙයි! මාම ලියාගන්න! මන් කියන්නම්! ‘
නම් ටික කිව්වම පාවාදුන්න එකාට යන්න ලැබුණ. වත්තෙ අයිතිකාරය කල්පනා කලා දැන් මුන්ගෙ නම් දන්න එකේ මුන්ව තියාගෙන වැඩක් නෑනෙ, ඒක හින්ද මුන්ට යන්න දීල උදේ ගිහින් ප්‍රින්සිපල් හම්බවෙනව කියල .
උදෙන්ම මිනිහ ගියා ඉස්කෝලේට. හම්බවුණා ප්‍රින්සිපල් . නම් ලිස්ට් එක ලියාගත්ත කිව්වම ප්‍රින්සිපල් කියවන්න කිව්ව එතන හිටිය ගුරුවරුන්ටත් ඇහෙන්න.
ජී කුලරත්න නොහොත් ගඩ්ඩා
ඒ බී ප්‍රනාන්දු නොහොත් සූත්තර පුංචා
කේ ඩී පෙරේරා නොහොත් කුකුලා
ආර් ගුණවර්ධන නොහොත් දඩෝරියා
නම් ටික කියවනකොට ගුරුවරියො කට අතින් වහන් හිනාව නවත්තගෙන එලියට පැන්නා. ගුරුවරුන්ගේ මූණු රතුවුණා. ප්‍රින්සිපල්ට දාඩිය දැම්මා. කාර්‍යාල සේවිකාව කට ඇරන් බලන් හිටිය!
අර නම් ටික ඔක්කොම ප්‍රින්සිපල්ගෙන් පටන් අරන් අනිත් ගුරුවරුන්ගේ නම් , ඒවට කොල්ලො එකතුකරපු කෑලිත් එක්ක!
( අහපු එකක )
උපුටා ගැනීම: Channa Witha