මිත්‍යාව තුළින් විද්‍යාවට (වැල් වටාරම්)

මෙහෙම එකක් පැරැන්නො කියනවා ඔබ අහලා ඇති.ගෙයක් හදන කොට ඉස්සරහින් බැලුවාම පිටිපස්ස පේන්න දොරවල් 3 ක් එක එල්ලේ (ඇතුල්වන,මැද හා පිටවන දොර) දාන්න එපා කියන එක.මේක කෙනෙක් හිතයි ජ්‍යෝතිෂ කාරයෝ සල්ලි හොයන්න කියපු කතාවක් කියලා.නෑ මේක වාස්තු විද්‍යාත්මක කාරණයක්.

විද්‍යාත්මක පසුබිම

නිවසක් හදද්දි පැරණි වාස්තු විද්‍යාව වගේම නවීන ගෘහ නිර්මාණ ශිල්පය අනුවත් හැමතැනම දොරවල් ජනෙල් දාන්නෙ නෑ.බිත්තියක දොරක් හෝ ජනේලයක් දාන්නෙ කොතනටද කියලා බලලයි දාන්නෙ.

මේ කියන කාරණයට ප්‍රධාන හේතුව ජීව විද්‍යාව, වායුගතික විද්‍යාව හා තාපගතික විද්‍යාවට සම්බන්ධ කාරණයක්.එක කෙලින් දොරවල් 3 ක් තියෙනකොට ඉදිරි පස දොරෙන් ඇතුළු වන වායු ධාරාවකට කෙටි කාලයකින් නිවසේ පිටවන දොරෙන් යන්න පුළුවන්.එතකොට විශේෂයෙන් දිවා කාලයේදී නිවස තුළ උෂ්ණත්වය ඉහළ යනවා.එතකොට අර දොරට ප්‍රතිවිරුද්ධ පැත්තෙ උෂ්ණත්වය එකම තැන තියෙන්නෙ.මොකද වාතය සංසරණය වීම දුර්වල නිසා.ඒ වගේම විවිධ බැක්ටීරියා, පුස්, විෂබීජ හා වෛරස් පවා නිවසින් පිට වෙන්නෙ නෑ.එතකොට වෙන්නෙ අර දොරවල් 3 සමීපයේ තියෙන වාතය පමණයි නිරන්තර වෙනසකට භාජනය වෙන්නෙ.

සරල උදාහරණයකට ඔබ ගෙදරක කාමරයක් දවසක් හෝ 2 ක් සම්පූර්ණයෙන් දොරවල් ජනෙල් වහලා තිබ්බොත් කොච්චර දුර්ගන්ධයක් හමයිද?අන්න ඒක වගේ.මේ ඡායාරූපයේ වගේ තියෙන්නේ නැතිව දොරවල් 3න් මැද දොර අනික් පැත්තෙ බිත්තිය ගාවට ගියාම මුළු පද්ධතියෙම වාතය මිශ්‍ර වෙලා අහිතකර තත්ත්වයන් හා විෂබීජ නිවසින් ඉතාම ඉක්මනින් ඉවත් වෙනවා.

ඉස්සර ගෙවල් වල AC තිබුණේ නෑ.ස්වභාවික වාත සංසරණ ක්‍රමයක් තමා පාවිච්චි කලේ.මේකට කියන්නෙ natural ventilation ක්‍රමයක් කියලා.ඒ වගේම විවිධ හැඩ වලට ගෙවල් හදලා විශේෂයෙන් නවීන ගොඩනැගිලි වල විවෘත කලාප ගොඩක් තියෙනවා.එතකොට මේ කාරණයේ එහෙම බලපෑමක් නෑ.

මේක කොහේවත් අමුතුවෙන් ඔප්පු කරන්න ඕනෙ නෑ.ගෙදරදීම මේ මම කිව්ව එක සරලව ඇටවුමක් හදලා පොඩි පරීක්ෂණයකින් උනත් බලා ගන්න පුළුවන්.

අපලය

මෙහෙම උනාම නිවැසියන්ට අපලයි, ධන හානි, රෝග පීඩා කිව්වෙ මොකක්ද?

අපල කිව්වෙ පල නොදෙන කාලය.නැතුව මැජික් වගේ අමුතු දේවල් ගැන නෙමේ.අපේ අයට ඕනෙ මැජික් හැබැයි.අර විදිහට නිවසේ ඇතුළත උෂ්ණත්වය නිතරම වැඩි නම් ඒ නිවසේ ඉන්නා අයට උෂ්ණත්වය ආශ්‍රිත රෝග ඇති වීමේ හැකියාවක් තියෙනවා.එසේම වාත සංසරණය දුර්වල නම් විවිධ අහිතකර බැක්ටීරියා හා වෛරස් නිසා ආහාර, ඇඳුම්, පුටු, මේස හා භාවිතා කරන ද්‍රව්‍ය හරහා ශරීර ගත වෙනවා.ඒවායෙන් විවිධ ශ්වසන හා වෙනත් රෝග ඇති වෙනවා.එතකොට මේවට ප්‍රතිකාර වලට මුදල් යනවා.සමහර විට මුදල් හොයන්න බැරි වෙන්නම අසනීප වෙන්නත් පුළුවන්.

ඉතින් ඒක අපලයක්ම නෙමේද?