වීර් සහ සාරා අත්‍යන්ත ප්‍රේමයෙන් වෙදුන ආදරවන්තයින් යුවලකි. ඔවුන් මුලු ලෝකයටම හොරෙන් හදවත් වලින් පමණක් ආදරෙන් බැදෙනවා. ඒත් එක්තරා අවස්ථාවක ඔවුන් දෙදෙනා වෙන් වෙනවා නැවත හමු නොවන්නට. සාරා හිතන්නේ වීර් එයාගේ රටට ගිහින් සතුටින් ජීවත් වෙන්න ඇති කියලා. වීර් හිතන්නේ සාරා එයා ගේ සැමියා එක්ක සතුටින් විවාහ ජීවිතය ගත කරනවා ඇති කියා. ඒත් සිදු වෙන්නේ ඊට හාත්පසින්ම වෙනස් දෙයක්. වීර් ත්‍රස්තවාදියෙකු ලෙස ජීවිතාන්තය තෙක් සිරගත කරනු ලබනවා අවසර නැතුව සැක කටයුතු ලෙස වෙනත් රටකට ඇතුල් වූ වරදට. සාරා සැමියා නොමැතිව තනියම ජීවත් වෙනවා. දෙව්යන් දුන් මේ දඩුවමත් එක්ක එකිනෙකා හමු නොවන මේ ආදර වන්තයින් අවුරුදු ගණනාවක් ඔවුනොවුන් වයසට යන තෙක්ම එකිනෙකා පත්ව ඇති තත්වය නොදැනම තනියම ජීවත් වෙනවා. ඒත් අවසානයේදී එක්තරා නීතීඥවරිකගේ කාරුණික මැදිහත් වීමෙන් ඔවුන් දෙදෙනා නැවත එක් වෙනවා.
මායා සහ දේව් ප්‍රීතිමත් විවාහ ජීවිත ගත කරන පවුල් දෙකක බිරිදක් සහ සැමියෙක්. ඒත් ඔවුන් දෙදෙනා අසම්මත ප්‍රේමයක වෙලෙනවා. අතිශය චමත්කාරජනක ආදර කතාවක ඔවුන් දෙදෙනා ලෝකයටම රහසින් ජීවත් වෙනවා. ඒත් මේ ආදර කතාව ඔවුන් ගේ පවුල්වල අයට දැන ගන්න ලැබෙනවා. මායා ගේ සැමියාත් දේව් ගේ බිරිඳත් ඔවුන් ගෙන් දික්කසාද වෙනවා. ඒත් මායා වත් දේව් වත් එකිනෙකාට මේ බව හෙළි කරන්නේ නෑ. ඔවුන් දෙදෙනාම හිතන්නේ අනෙකා තමාගේ පවුල සමඟ හොදින් ජීවත් වෙනවා ඇති කියා. අවුරුදු ගණනාවක් මේ අනවබෝධය එක්ක එකිනෙකා ගෙවන සැබෑ ජීවිතයේ තතු නොදැන හදවත් වලින් හඩමින් ඔවුන් තනියම ජීවත් වෙනවා. ඒත් අවසානයේදී දෙවියන් දුන් පඩුරක් ලෙසින් ඔවුන් දෙදෙනා නැවත එක් වෙනවා.
ජිනාදරී සහ සේනක පෙම්වතුන් යුවලක්. ඔවුන් ආදරේ නාමයෙන් ඔවුන් ගෙම ලෝකයේ ප්‍රේමයෙන් වෙලෙන්නේ තම පවුලේ වැඩිහිටියන් ගැන හෝ තමන්ගේ රැකියාවන් ගැන නොසිතා. ඔවුන් දුර දිග නොබලා ගන්න තීරණ නිසා ජිනාදරී ගැබ් ගන්නවා. මේ හේතුවෙන් රැකියාව සහ ගෙදර තත්ත්වයට මුහුණ දී ගත නොහැකිව ජිනාදරී කුසේ සිටින දරුවා නැති කිරීමට ඖෂධ ලබා ගන්නවා.නමුත් ඔවුන් විවාහ වෙනවා. ඔවුන්ට ලස්සන පුතෙක් ලැබෙනවා. ඒත් ඒ දරුවා අවුරුද්දක් පමණයි ජීවත් වෙන්නේ. ගර්භනී වීම වලක්වා ගන්න ජිනාදරී ලබා ගත් ඖෂධ නිසා දරුවා මිය යනවා. මෙය දැන ගන්න සේනක ජිනාදරී අත්හැර යනවා. ඔවුන් දෙදෙනා අවුරුදු ගණනාවක් එකිනෙකා ගෙන් වෙන් වෙලා දරා ගත නොහැකි මානසික වේදනාවන් විදිමින් ජීවත් වෙනවා. අවසානයේ දෛවයේ හාස්කමකින් හෝ දෙවියන් විසින් හෝ මේ දෙදෙනා නැවත මුණ ගස්සනවා.
මේ කතා තුනම චිත්‍රපටි තුනක්. ඒත් සැබෑ ජීවිතයේ මෙවැනි අනවබෝධයන් නිසා එකිනෙකා පිළිබඳව සැබෑ තතු නොදැන
වෙන් වෙලා සිටින ආදරවන්තයන් කොතෙකුත් සිටිනවා. චිත්‍රපට වල මෙන් අවසන් මොහොතේ හෝ දේව දූතයෙකු පැමිණ ඔවුන් එකතු කරන්නේ නැති නිසා සමහර විට ඔවුන් මුලු ජීවිත කාලයම සිත් වල ඇති අනවබෝධය නිසා මනසින් දැවෙමින් තැවෙමින් හිද මිය යනවා. බොහෝ විට මෙය සිදු වන්නේ අනුන්ගේ කේලම් බස් නිසා හෝ තමාම සිතෙන් මවා ගත් වැරදි වැටහීම් නිසා හෝ ඔවුනොවුන් හා ඍජුව කතා නොකර අනුන් සමග ප්‍රශ්න කතා කිරීමට යාම නිසා ඇති වන පටලැවිලි සහිත සිතුවිලි සමූදායක මිනිසුන් අතරමං වීම නිසා.
ඒ වැරදි වැටහීම් සහ ඇත්ත ඇති සැටියෙන් නොදැන සිටීම හේතුවෙන් ඇතිවූ සිත් රිදීම් සහ අමනාපකම් හේතුවෙන් මියයන තුරුම වෙන් වී ජීවත් වෙන පෙම්වතුන් මේ ලෝකයේ කොතෙකුත් සිටිනවා. චිත්‍රපටයේ නම් මෙසේ වෙන් වෙන ආදරවන්තියන් යුවලක් නැවත එක් වෙනවා දකින්නට දේව දූතයෙකු පැමිණෙන තෙක් ප්‍රේක්ෂකයින් පුල පුලා බලා සිටිනවා. ඒත් සැබෑ ලෝකයේ එවැනි හාස්කම් සිදු වන්නේ කලාතුරකින්. කවුරු වත් එසේ කිරීමට ඉදිරිපත් වන්නේ නෑ. බොහෝ අය සිතන්නේ ” අනේ අපි මොකටද අහක යන කුණු ගොඩවල් වලට කර ගහන්නේ…. ඒ ගොල්ලන්ගේ ප්‍රශ්න ඒ ගොල්ලොම විසද ගත්ත දෙන්… ඕවට අත දාන්න ගිහින් අපි නරක මිනිස්සු වෙනවා ” කියා යි. චිත්‍රපටයක ප්‍රීතිමත් අවසානයක් දකින්නට ආශා කලද සැබෑ ජීවිතයේ එවැනි පින් කම් කිරීමට බොහෝ මිනිසුන් ඉදිරිපත් වන්නේ නැත.
එබැවින් වීර් සාරා දේව් මායා හෝ ජිනාදරී සේනක ලා කොතෙක් මග බලා සිටියද සැබෑ ලොවේ නම් එසේ දේව දූතයන් පැමිණ ඔවුන් ගේ බලාපොරොත්තු සඵල කරමින් ඔවුන් එක් කරන්නේ නැත.
උපුටා ගැනීම: Deepthi Roshini Siriwaradana