මගේ පුංචි කාලේ ඉදන් යාළුවා ගෙදරට බල්ලෙක් ගෙනල්ලා. ඌ නිකන්ම බල්ලෙක් නෙමෙයි සැහෙන ගානක් දිලා ගෙනාපු ලැබ්ඩර්ඩෝ කෙනෙක්ලු. යාලුවා ගහපු තෙල හින්දා මාත් ගියා බල්ලා බලන්න. දැක්කම හරිම හුරතල් නිසා මාත් ඉතින් ළගට අරන් හුරතල් කළා.
ටික කාලයක් ඔහොම ඉන්නකොට දැන් මේ බල්ලා මගෙ හෙන යාළුවා. ඒ ගෙදරට ගියාම මෙයා බිම නිදාගෙන බඩ උඩ දාගෙන එක කෝලමයි. මමත් ඉතින් බලු සුරතල් බල බල සතුටෙන් ඉන්නවා.
බල්ලා ගැන කියනවානම් මූ හයියෙන් බුරන්නෙවත් නෑ. හරිම ලස්සන දුබුරු පාට හුරතල් බල්ලෙක්. දවසක් මම යාළුවාගේ ගෙදරට යද්දී ලයිට් බිල් ලියන මාමා කෙනෙක් ගේට්ටුව ගාව හිටගෙන ඉන්නවා. මම ඇතුලට යන්න හදනකොටම “පොඩ්ඩක් ගෙදර අයට කතා කරන්න පුළුවන් ද? බල්ලා බැදලද?, ඔය ගෙදර බලා කනවනේ ඒකයි” කියලා මට කිව්වා. ජීවිතේට බුරනවා වත් අහපු නැති බල්ලා කනවා .. මට හිනා ගියා.
“ඒ ගෙදර බල්ලා කන්නේ නෑ මාමෙ ඔයා එන්නකො” මම දැන් චන්ඩියා වගේ කිව්වා. ” අම්මෝ මට නම් බෑ, ඌ මහා සැරයි” මම ඉතින් හිතෙන් මෙයාට පිස්සු ද මන්දා කියලා හිතලා ” හරි හරි එන්නකො මාත් එක්කනෙ යන්නෙ” කියලා දැන් එක්කන් යනවා.
යන ගමන් ඉතින් බල්ලයි මායි කොච්චර හොද යාලුවෝද කියන එක ඔප්පු වෙන කතා කිය කිය ගියේ. කොච්චර බල්ලා ගැන කිව්වද කියනවා නම් ලයිට් බිල ලියන්න ආවේ යලුවාගේ ගෙදරද අපේ ගෙදරටද කියලා අපිටම පැටලෙන තරම්. ඔහොම යද්දී නිකන් එක පාරට වැස්සක් එන්න ගොරවනවා වගේ මහා ගෙරවිල්ලක් ඇහුනා. මොකා ගෙරෙව්වත් ඒනම් බල්ලා නෙමෙයි කියලා මට ශුවර්, ඒක නිසා මම දැන් ටෝක් එක නවත්තෙන්නෙම නැතුව ගේ පැත්තට යනවා. මෙන්න යකෝ හීනෙකින්වත් නපුරු බැලමක්වත් නැති බල්ලා එනවා කෙල පෙරාගෙන දත්මිටි කාගෙන දම්වැල කඩාගෙන අපේ පැත්තට. මට තේරුනා වැඩේ වරදින්නයි යන්නේ කියලා. කෝකටත් මන් එක්කන් ආපු මනුස්සයානේ කියලා පිටිපස්ස බැලුවාම ලයිට් බිල ලියන කෙනා අද නැති දියුම් කුමටද කියලා සුලගේ වේගයෙන් එහා ගෙදරට දුවලා බැලින්නම් මන් විතරයි ඉතුරු. යානතම් ඇති ඒයා නෑනේ කියලා ඉස්සරහ බලද්දි මෙන්න යකෝ මෙගේ දිහා බලාගෙන මේ බල්ලා එනවා. ගේ වටේ වට හත අටක් ගිහින්, ඔලිම්පික් මීටර් 400 කඩුලු පැනීම කරලා මාර අමරුවෙන් යාලුවාගේ කරේ නැගලා ලුනු.. ලුනු.. ගිහින් තමයි එදා මම බේරුනේ.
බැලුවාම ලයිට් බිල දෙන කෙනා දවසක් කවුරුත් නැති වෙලාවක ඇවිත්. බල්ලා එයාව හොරු ලිස්ට් එකේ දාන් ඉදලා තියෙන්නෙ. ඒකෙන් මේකෙන් අහිංසක මාවත් කොහොමහරි බලු ලිස්ට් එකට ගියා..
දැන් ඒ ගෙදරට යන්න කලින් ලයිට් බිල් මාමා වගේ මාත් ගේට්ටුව ළගට වෙලා.. “බල්ලා බැදලද?????
උපුටා ගැනීම: Sithuni Amanda