“සාද දී සමුදීම” (වැල් වටාරම්)

පුද්ගලික සමාගමක මහනුවර ශාඛාවෙ මම ඒ කාලෙ වැඩ කරේ. ප්‍රධාන කාර්යාලය කොළඹ. සාමාන්‍යාධිකාරී ( GM ) හිටියෙත් එතන. එයා නුවර ශාකාවට දෙසරයක් වත් ආව කියල මතක නෑ. GM තරඟකාරී වෙනත් සමාගමක ප්රධාන විධායක නිලධාරී ( CEO) තනතුරක සේවයට අපෙන් ඉවත්වෙලා ගියා.

අපෙ කවුරුත් එයත් එක්ක හිතවත් කමක් වත් තරහක් වත් තිබුනෙ නෑ. එයාට හෙඩ් ඔපීස් එකෙන් පාටියක් දුන්නද දන්නෙ නෑ. හැබැයි අපෙ බොස්ට ලොකු ඕනැකමක් තිබුන, මහාපරිමාණ සමුදීමේ සාදයක් පවත්වන්න. ඒකට සාධාරණ හේතුවක් අපිට පෙනුනෙ නෑ.

” මල්ලි මේ බලපං, ලොක්ක මරු නාඩගමක් නටන්න හදනව කියල, වැඩ සටහන් සැලැස්මක් දවසක්, එතන හිටපු කෙනෙක් මට පෙන්නුව. රිය පෙරහැරකින් කැඳවාගෙන යෑම, ඇත් පැටවෙක් ලවා නෙලුම් මලක් අතට දී, ඔහු පිළිගැනීම, කුඩා නාට්‍යයක් ප්රදර්ශනය, Grandfather clock ( අර ගෙවල් ඇතුලෙ හිටවල තියෙන ඔරලෝසු කණුව) ක් තෑගි දීම…. වගේ අරුම පුදුම දේවල් ඒ කොලේ තිබුන. මමත් හොල්මං.

ලොක්ක හවස රැස්වීමක් කැඳවල වැඩසටහන පැහැදිලි කරා. GM නුවර කාර්යාලයට ගොඩක් උදවු කරල තියෙනව , ඒ නිසා ප්රධාන කාර්යාලයෙන් කරනවට වඩා උසස් සමුදීමේ සාදයක් අපි දෙන්න ඕනැ කියල යන්තමට අපෙත් අදහස් අරං, එයාට ඕනැ විදිහට සංවිධානය කරා.

කාර් කීපයක් අපෙ කීපදෙනෙකුට තිබුන. මෝටර් බයිසිකල් පහළොවක් විතර තිබුන. මටත් තිබුනෙ මෝටර් බයිසිකලයක්.

අපි මෝටර් බයිසිකල් වල ජාතික කොඩි ගහගෙන පෙර ගමන් රථ වගේ ( මෝඩ කමට ) ඇම්මෙන් ගියා, ( අර දේසපාලුවො එක්ක යන සන්නද්ධ රථවල අය ටිකක් උඩින් යන්නෙ, අන්න ඒ වගේ ) ඒකෙ පොඩි ගතියකුත් තිබුන. රථවාහන පොලිස් නිළධාරීන් පුදුමෙන් අපි දිහා බලනව. ඊට පිටුපස GM හා අපේ ලොක්ක රැගත් වාහනය. ඊටත් පිටුපසින් අනිත් කාර්ටික, රිය පෙරහැරක් වගේ හෝටලයට ගියා.

හෝටලයෙ දොර ගාව කිවුව විදිහට ම ඇත් පැටවෙක් හිටිය, GM ට නෙළුම් මලක් පිළිගන්වන්න. ඇතා ගාව හිටපු කෙනෙක් ඇතාට නෙළුමක් දුන්න. ඇතා ඒක GM ට නොදී කටේ දාගත්ත. ඊට පස්සෙ තව එකක් දුන්න. ඌ ඒකත් කෑව . ආපහු දුන්න දැන් අපිට හිනා. ඇතා ඒ නෙළුමත් කෑව. ( ඌ බඩගින්නෙ ඉන්න ඇති)

කොහොම හරි සාදය හොඳ ට තිබුන. ” මා ඉතින් යන්න යනවා ” ගීතය ඒ දවස්වල තමයි ජනප්‍රිය. ලොක්ක ඒ ගීය ගැයුව. කාල බීල, කතා පවත්වල අර ඔරලෝසු කණුව තෑගි දීල සාදය හමාර උනා.

…….

ඊට මාසෙකට විතර පස්සෙ ලොක්කත් GM ගියපු සමාගමටම ගියා.