මේ ලෝකය හරි පුදුම තැනක්. අපි අසන දකින දේට වඩා අසාමාන්‍ය දේවල් වගේම භයානක දේවල් මේ ලෝකයේ සිද්ධ වෙනවා. ඒත් ඉතින් ඒ සෑම අසාමාන්‍ය දේකටම හේතු සොයා ගන්නට තවමත් නොහැකි වුණු අරුම පුදුම සිදුවීම් ඕනෑ තරම් තියෙනවා. ඉඳ ගත්තත් මැරෙන පුටුව කියන්නෙත් ඒ වගේ තවත් අසාමාන්‍ය සිදුවීම් රැසකට පාදක වුණු දැනට තර්ස්ක්හි කෞතුකාගාරයේ ඇති අමුතු පුටුවක්. මෙහි කතාව සැබැවින්ම අද්භූතයි.වසර ගණනාවකින් කිසිවෙක් ඉඳගෙන නැති ඉඳගන්න හිතන්නෙවත් නැති භයානයක පුටුවක් ගැනයි මේ කියන්නට යන්නේ. ඉතින් මේ භයානක පුටුවේ ඉඳ ගන්නා අය කුමන හේතුවක් නිසා හරි අකාලයේ මිය යන බව තමයි සඳහන් වෙන්නේ. ඉතින් මේ පුටුව විසින් 60 කට අධික ජීවීත ප්‍රමාණයක් බිලිගත් බවයි වාර්තා වෙන්නේ .
1600 ගණන්වල අග භාගයේ දී උතුරු යෝක්ෂයර්හි තෝමස් බස්බි කියන මතට ඇබ්බැහි වුණු දරුණු මැරයෙක් සිටියා. ඉතින් තෝමස් තමන්ගේ මැර කටයුතු සිදු කරගෙන ගියේ ඩැනියෙල් කියන මිනීමරු අපරාදකාරයෙක් සමඟ. මේ ඩැනියෙල්ට හරිම ලස්සන දුවෙකුත් සිටියා. ඇයගේ නම එලිසබෙත්.ඉතින් ඩැනියෙල් මොන වගේ පුද්ගලයෙක් වුණත් ඔහු තමන්ගේ දුවට බොහෝසෙයින් ආදරය කළා. ඇය මලක් වගේ හරිම ආදරයෙන් බලා ගත්තා.
ඉතින් කාලය ක්‍රමයෙන් ගෙවී යද්දි මේ ඩැනියෙල්ගේ රූමත් දුව තමන්ගේ තාත්තාගේ සහායකයා වුණු තෝමස් සමඟ ආදර සම්බන්ධයක් පටන් ගන්නවා. නමුත් මේ ප්‍රේම සම්බන්ධයට ඩැනියෙල් කොහොමටවත් කැමති වුණේ නැහැ. තමන්ගේ රූමත් දුවව ඊට වඩා හොඳ කෙනෙක්ට විවාහ කරදෙන්නට තමයි ඩැනියෙල් අදහස් කරගෙන සිටියේ.
නමුත් ඉතින් ආදරය නිසාම එලිසබෙත් තමන්ගේ තාත්තාගේ කීමට ඇහුන්කම් දුන්නේ නැහැ. ඒ නිසා ඩැනියෙල් කොතරම් විරුද්ධ වුණත් එයින් ඵලක් වුණේ නැහැ. මොකද එලිසබෙත් සහ තෝමස් බස්බි ඩැනියෙල්ගේ විරුද්ධතාවය හමුවේ විවාහ වෙනවා. තෝමස් තමන් සතු අති විශාල තානායමක එලිසබෙත් සමඟ ජීවත් වුණත් ඩැනියෙල්ට එය ප්‍රමාණවත් වුණේ නැහැ. සිය දියණියට තෝමස් සලකන ආකාරය ප්‍රමාණවත් මදි යන මතයේ සිටි ඩැනියෙල් තෝමස් සමඟ මේ නිසාම විවිධ ආරවුල් ඇති කර ගත්තා.ඉතින් මේ විවාහයත් සමඟ ඩැනියෙල් සහ තෝමස් අතර පැවති වාසිදායක සම්බන්ධතාවය දෙදරා යනවා. ඔවුන් දෙදෙනා අතර විවිධ ගැටුම්කාරී තත්ත්වයන් ඇතිවුණා.
ඉතින් කල් ගතවෙද්දි දවසක් ඩැනියෙල් තෝමස්ගේ නිවසට ගිහින් තෝමස් එනකල් බලාගෙන සිටියා. ඉතින් තෝමස් පැමිණි පසුව ඩැනියෙල් “මං මගේ දුවව ගෙනයනවා” කියලා තෝමස්ට පැවසුවා. ඒ වෙද්දී එලිසබෙත්ගේ පියා වුණු ඩැනියෙල් වාඩී වී සිටියෙත් තෝමස්ගේ ප්‍රියතම පුටුවේ. ඉතින් තෝමස් මේ පුටුවට කොතරම් කැමතියි ද කියලා කිව්වොත් ඔහු මේ පුටුවේ වෙන කිසිවෙක් වාඩිවෙනවට කැමති වුණේ නැහැ. ඒ නිසා ඩැනියෙල් කෙරෙහි වූ කෝපය දෙගුණ වුණා. ඔහුගේ විවාහ ජීවිතයට වරින් වර බලපෑම් කරමින් එලිසබෙත්ව ගෙන යන්නට උත්සාහ කිරීමත් තමන්ගේ ප්‍රියතම පුටුවේ ඉඳ ගැනීමත් ඔහුට ඉසුලුම් නොදෙන කාරණා වුණා.
ඉතින් ඩැනියෙල්ගේ යෝජනාවත් සමඟ ඇති වුණු රණ්ඩුවෙන් පසුව ඩැනියෙල් තානායමින් යන්නට ගියත් බීමතින් සිටි තෝමස් නැවත ඩැනියෙල්ගේ නිවසට පිටත්ව ගියේ දැඩි කෝපයෙන්. ඉතින් එහිදී ඇතිවුණු දරුණු ආරවුලෙන් තෝමස් විසින් ඩැනියෙල්ව මිටියකින් පහර දී මරණයට පත් කරනු ලබනවා. ඉන්පසුව ඩැනියෙල්ගේ ලේ වැකුණු දේහය කැලයකට අරගෙන ගිහින් කාටවත් හොයා ගන්නට බැරි විදියට හැංගුවා. නමුත් අතුරුදන් වූ ඩැනියෙල් සොයද්දී ලේ තැවරුණු ඩැනියෙල්ගේ දේහය කැලයෙන් සොයාගනු ලබනවා. ඉතින් කොහොමහරි මේ ඝාතනයට වැරදිකරුවා තෝමස් ලෙස තහවුරු වුණු නිසා ඔහුව ප්‍රසිද්ධියේම එල්ලා මරන්නට තීරණය වුණා.
ඒ අනුව 1702 දී වානේ පටිවලින් ඔතා තෝමස්ව එල්ලා මැරීම සිදු කළා. නමුත් මේ දඬුවමට පෙර තෝමස්ගේ එක් ඉල්ලීමක් වුණේ තමන් ආසම පුටුවේ ඉඳගෙන ඔහු ආසම මත්පැන් වර්ගය පානය කිරීම. ඉතින් අවසාන වතාවට එහි වාඩිවී මත්පැන් පානය කරද්දි තෝමස් ශාපයක් කළා . ඒ තමයි “මගේ පුටුවේ හිඳ ගැනීමට ධෛර්යය ඇති ඕනෑම කෙනෙකුට හදිසි මරණය සිදුවේවා ” යන්නයි. ඉතින් මේ භයානක ශාපය නිසාම මේ පුටුවේ ඉඳ ගත් බොහෝ පිරිසක් අකාලයේ මරණයට පත්වුණු බව සඳහන් වෙනවා.
තෝමස්ගේ තානායම පසු කාලයක බස්බි ස්ටූප් නමින් හෝටලයක් බවට පත්වුණු අතර ඉන් පසුව තමයි මේ පුටුවේ බොහෝ අය ඉඳ ගන්නට පටන් අරගෙන තිබුණේ. ඒ අනුව 1894 වසරේ දී මිතුරෙක් සමඟ මේ පුටුවේ ඉඳගෙන මත්පැන් පානය කළ පුද්ගලයෙක් පසුදා උදෑසන සියදිවි නසාගෙන තිබුණා.
දෙවන ලෝක යුධ සමයේ දී මේ ශාපය විශ්වාස නොකර එහි වාඩිවුණු සෙබලුන් කිහිපදෙනෙක්ම ඉතා අවාසනාවන්ත විදියට මරණයට පත්වුණා.1967 රාජකීය ගුවන් හමුදා නියමුවන් දෙදෙනෙක් එහි වාඩි වී සිටියා. නමුත් ඔවුන් දෙදෙනා ගමන් කළ මෝටර් රථය ඉතාම අවාසනාවන්ත විදියට ගසක ගැටීම නිසා ඔවුන් මරණයට පත්වුණා.
තවත් දිනෙක මත්පැන් පානය කරමින් සිටි ඉදිකිරීම්කරුවන් කණ්ඩායමක් තම කණ්ඩායමේ බාලයා ඒ පුටුවේ වාඩි කරවූ අතර පසුව ඔවුන්ට දකින්නට ලැබුණේ සේවය කරමින් සිටි අතරේ දී වහලය කඩා වැටීමෙන් ඔහු මිය ගොස් ඇති බවයි. තවත් අවස්ථාවක මෙහි සේවය කළ කාන්තාවක් පිරිසිදු කිරීම් කටයුත්තකදී ඒ පුටුවට නැගි නිසාවෙන් ඇය හදිසියේ අසනීප වී මරණයට පත්වුණා.
ඉතින් මේ පුටුවේ ඉඳගත් පුද්ගලයන් මරණයට පත්වෙන්නට පෙර අධික කැසීම, මානසික ආතතිය ඇතුළු හොල්මන් අත්දැකීම් ලද බවත් පැවසෙනවා.
කොහොමවුණත් 1978 වසරේ දී මේ හෝටලය භාරව සිටි අර්න්ෂෝ කියන පුද්ගලයා මේ පුටුව අනාරක්ෂිත නිසා තර්ස්කි කෞතුකාගාරයට පරිත්‍යාග කරනු ලබනවා.නමුත් ඒ එක් පොරොන්දුවක් මත. ඒ මේ පුටුව කිසිවෙක්ට වාඩි විය නොහැකි ආකාරයේ අඩි පහක් උසින් එල්ලා තැබීමේ පොරොන්දුව පිට. ඉතින් කෞතුකාගාරයේ ඒ පුටුවේ කාටවත් හිඳගැනීමට නොහැකි නිසා එහි ඝාතන කාලය අවසන්ව ඇති බව පෙනෙන්නට තිබෙනවා.
ඉතින් අදටත් අගක් මුලක් සොයා ගන්නට නොහැකි තවත් එක් සිදුවීමක් විදියටයි මේ පුදුම පුටුව ඉතිහාසගත වෙන්නේ.
උපුටා ගැනීම: VOICE Official Lanka Post Blog