ශ්‍රී ලාංකිකයන් විදියට අපිට ආඩම්බර වෙන්නට පුළුවන් කාරණා බොහෝමයි. අද ලෝකයේ දියුණු යැයි කියන රටවල් ප්‍රාථමික අවධියේ සිටිද්දි ලංකාව ඉතා දියුණු ශිෂ්ටාචාරයක් විදියට පැවතුණා. ඔවුන්ට සිතා ගන්නටවත් නොහැකි ආකාරයේ අපූරු තාක්ෂණයක් හෙළයන් සතුව තිබුණා. දේශීය වෙදකම, අපූරු නිර්මාණ තාක්ෂයන් නිසාම එදා ඉඳල ලෝකයේම අවධානය අපේ රටට යොමුවෙලා තිබුණා. ස්වාභාවික සුන්දරත්වය අතින් වගේම ස්වාභාවික සම්පත් ආදිය අතිනුත් මුළු ලෝකයම අපිව දන්නවා. ඒ විතරක් නොවෙයි ඉහළම ආගනතුක සත්කාර කරන ජාතියක් සිටින රටක් විදියටත් ලාංකීය නාමය ඉදිරියෙන්ම සිටිනවා.
ඉතින් ලාංකීය නාමය මුළු ලෝකයටම ගෙන ගියපු තවත් විශේෂ් ක්ෂේත්‍රයක් තමයි අපේ ආරක්ෂක අංශය.මොකද වසර 30 කට අධික කාලයක් තිස්සේ පැවති දරුණු යුද්ධය නිමාකළ ලාංකීය ආරක්ෂක අංශය ලෝකයේම දරුණුම ත්‍රස්තවාදී කණ්ඩායම විදියට නම් කර සිටි කොටි සංවිධානය පරාජය කරමින් ත්‍රස්තවාදී ගැටළුවක් යුධමය වශයෙන් ජයග්‍රහණය කළ මුල්ම රට බවට පත්වෙන්නෙත් ශ්‍රී ලංකාව. ඉන්පසුව ලෝකයේම බලවත් රටවල් අයි. එස්. එස්. සංවිධානය විනාශයට කටයුතු ආරම්භ කළෙත් ලංකාවේ යුද්ධය අධ්‍යයනය කිරීමෙන්.
ඉතින් ලංකාවේ ආරක්ෂක හමුදා බල ඇණිවලින් ලෝකයේම තුන්වන ස්ථානයට පත්වෙන්නට හමුදා විශේෂ බලකායේ දිගු දුර විහිදුම් ඒකකයට හැකියාව තිබුණා. ඉතින් මහසෝන් බලකාය කියන්නෙත් මේ විශේෂ බලකායේ දිගු දුර විහිදුම් ඒකකයටම තමයි. ඉතින් එවැනි සුවිශේෂී ගෞරවයක් හිමිවෙන්නට නම් මේ බලකාය ඉතාමත් සුවිශේෂී වෙන්න ඕන නේ. ඔන්න මේ කතා කරන්න යන්නේ ලෝකයම පුදුම කළ මහසෝන් බලකාය ගැන පුදුම හිතෙන දේවල් ගැන.
දිගු දුර විහිදුම් බලකාය කියන්නේ Long Range Reconnaissance Patrol (LRRP) ශ්‍රී ලාංකීය හමුදාව තුළ සිටින අති ශූර සටන්කාමී, විශේෂ බලකායන්ගෙන් සහ කොමාන්ඩෝ බළකායන්ගෙන් පමණක් තෝරාගත් දරුණු මෙහෙයුම් සිදු කරන්නට සමත් බලකායක්. මේ බලකාය දශක දෙකක් පුරා මුළු රටම වෙළාගත් බිහිසුණු යුද්ධයකට මැදිවී තිබුණු යුගයක 1996 වසරේ දී යුද්ධය නිමා කරන්නට මේ බලකාය ස්ථාපිත කරනු ලැබුවා. විශේෂ බලකායේ කර්නල් රාජ් විජේසිරි මහතා මේ දිගු දුර විහිදුම් බලකා සංකල්පය සහ මහසෝන් බලකාය විශේෂ බලකාය වෙත හඳුන්වාදීමට මූලික වුණු ප්‍රධාන පුද්ගලයා වුණා.
Militaryranks.info කියන්නේ ලෝකයේ ඉහළම පිළිගැනීමක් ඇති යුධ විශ්ලේෂක එකතුවක නිල වෙබ් අඩවිය . ඕනෑම රටක හමුදා බල ඇණිවල තත්ත්වය තීරණය කරන්නට ඔවුන් නිර්ණායක ගණනාවක් යොදාගනු ලබනවා. ඒ අනුව 2020 වසරේදී ජුනි මාසයේ නිකුත් කළ නවතම නිර්ණායකවලට අනුව ඔවුන්ගේ නවතම ශ්‍රේණිගත කිරීම්වල ශ්‍රී ලංකා විශේෂ බලකායේ දිගු දුර විහිදුම් ඒකකයට මුළු ලෝකයෙන්ම තුන්වන ස්ථානය හිමිවුණා. එහි පළමු තැන ඇමරිකාවේ නාවික සීල් බලකාය සහ දෙවනි රුසියානු හමුදා විශේෂ මෙහෙයුම් බලකාය ගනු ලබනවා.
ඉතින් සතුරු ප්‍රදේශ තුළට අභීතව ගමන් කර සතුරු මර්මස්ථාන විනාශ කර, බුද්ධි තොරතුරු රැස්කර වැදගත් ඉලක්ක සපුරා ගෙන දැවැන්ත මෙහෙයක් ඉටුකළ බලකායකි මේ මහසෝන් බලකාය. ත්‍රස්තවාදී පාලනයට නතුව තිබුණු ප්‍රදේශ වෙත ගොස් කොටි නායකයන් සොයායමින් ඔවුන් ඝාතනය කරමින් කොටි සංවිධානය දුර්වල කිරීම මේ මහසෝන් බලකායේ ප්‍රධාන අරමුණ වී තිබුණා.
ඉතින් මේ බලකාය සඳහා අයදුම් කරන සියල්ලන් යුධ හමුදාවේ විශේෂ බලකායේ සහ කොමාන්ඩෝ බලකායේ සේවය කරන සොල්දාදුවන් වන අතර මේ සඳහා අයදුම් කරන සොල්දාදුවන්ගෙන් පාඨමාලාව අවාසානයට ඉතිරි වෙන්නේ 60% ක පමණ පිරිසක්. ඒ අනුව මේ බලකායට එකතු වන්නේ ශාරීරිකව වගේම මානසිකවත් දරා ගැනීමේ ඉහළ ශක්තියක් ඇති අති විශිෂ්ඨයන්.
මහසෝන් බලකාය විශේෂ බලකාය තුළ පවා ප්‍රසිද්ධ වී සිටියේ යක්කු පුහුණු කරන අඩවියක් කියලයි. ඉතින් ඒ නිසා සති තුනක් මූලික පුහුණුව අපායට ගිහින් යක්කු වෙන්න පුහුණු වීමක් විදියටයි හැදින්වුයේ.ඉතින් අපායේ රස දරා ගන්නට පුළුවන් අයට විතරයි ඒ මහසෝන් බලකායට එකතු වෙන්න අවස්ථාව හිමිවෙන්නේ. ඉතින් මේ මහසෝන් බලකායේ සෙබළුන්ට පැය 24 දීම ජීවිත තර්ජන තිබුණත් ඔවුන්ට ඒ සියල්ල දරා ගන්නට හැකියාවක් තිබුණා .ශක්තියක් තිබුණා.
ඒ වගේම යුද්ධයේ අවසානය දක්වාම මේ බලකාය රහසක් ලෙස තබා ගත්තා. නමුත් මිලේනියම් සිටි වැටලීම නිසා මේ බලකාය ගැන වටින් ගොඩින් කොටි ත්‍රස්තයන්ටත් දැනගන්නට ලැබුණා.
2002 වසරේ සිදුවුණු මිලෙනියම් සිටි වැටලීම ගැන බොහෝ අර්ථකථන නම් තියෙනවා. කොහොමවුණත් මේ සිදුවීමට ප්‍රධානතම හේතුව වුණේ එහි රැඳී සිටින රහස් කණ්ඩායමක් රජයේ මැති ඇමතිවරුන් පිරිසක් ඝාතනයට සැලසුම් කරන බවට බුද්ධි තොරතුරක් හෙළිවීමයි. නමුත් එය සිතාමතාම කළ පාවාදීමක් ලෙසටත් සඳහන් කෙරෙනවා. හේතුව කෙසේවුවත් එහි ප්‍රතිඵලය වුණේ මහසෝන් බලකාය සැබෑවටම පවතින බව ශ්‍රී ලංකා හමුදාවන්ට පිළිගන්නට සිදුවීම. ඒ අනුව එහි ක්‍රියාකාරිත්වය ගැන යම් යම් තොරතුරු හෙළි කරන්නත් හමුදාවට සිදුවුණා. මේ නිසාම ඉතා වැදගත් රහසිහගත තොරතුරු කොටි බුද්ධි අංශ වෙතට හිමිවුණා. ඒ නිසා මහසෝන් බලකායේ ක්‍රියාකාරිත්වයට එයින් විශාල බාධාවක් එල්ල වුණා. ඉතින් ඒ නිසා මිලේනියම් සිටි වැටලීම මෙරට සිදුවුණු අපහාසාත්මකම සිදුවීමක් විදියට සැලකෙන්නේ ඒ නිසාමයි.
මිලේනියම් සිටි වැටලීම නිසා ශ්‍රී ලංකා හමුදාවන්ට විශාල ගැටළුවකට මුහුණ දෙන්නට සිදුවුණු අතර ඒ නිසාම 2002 වසරේ දී කොටි සංවිධානය සහ ශ්‍රී ලංකා රජය අතර සටන් ගිවිසුමක් ඇති කරගන්නට සාම කාලයක් ප්‍රකාශයට පත් කරන්නට යම් බලපෑමක් වුණු බව පැවසෙනවා. 1990 දී හා 2000 දශකයේ මුල් භාගයේදී ශ්‍රී ලාංකේය හමුදාවට යුධ පරාජයන් ගණනාවකටම මුහුණ දෙන්නට සිදුවුණු නිසා ඒ සාම ගිවිසුමට ඒ තත්ත්වයන් ද හේතුවුණා. නමුත් සැබෑ හේතුව එය නොවන වග පසුව දැන ගන්නට ලැබුණා.
හමුදාව වරින් ලැබූ පරාජයන් නිසා දිගු දුර විහිදුම් බලකාය තවදුරටත් සක්‍රීය කිරීමත් නිසා කොටින්ට මර බිය දැනෙන්නට වුණා. ප්‍රබල පෙලේ කොටි නායකයන් පවා මරණයට පත්වුණා. ඒ නිසාම අන්කුන්දුන් වුණු කොටි ත්‍රස්තයන්ට මහසෝන් බලකායට මුහුණ දෙන්නට නොහැකි නිසා නෝර්වේ මාර්ගයෙන් සාම ගිවිසුමක් කරා යොමු වෙන්නට ඔවුන් තීරණය කළේ මහසෝන් බලකායට මුහුණ දෙන්නට නොහැකිවීම නිසා කියලයි පැවසෙන්නේ.
කොහොමවුණත් දෙපාර්ශවයටම සංවිධානය වෙන්නට සටන් විරාමය කාලයත් සාම ගිවිසුමත් අත්සන් කරන්නට පසුබිම ඒ විදියට සැලසුණත් සාම ගිවිසුම් කාලයේදී පවා කොටි නායකයන් තමන්ගේ සංවිධානය ශුද්ධ කිරීමේ කටයුතු දිගටම කරගෙන ගියා. ඊළග වසර කිහිපයේ දී මිලේනියම් සිටි සිද්ධියේ දී තොරතුරු හෙළි දරව්වූ චරපුරුෂයන් දෙපිට සාමාජිකයන් වගේම ශ්‍රී ලංකා බුද්ධි අංශයේ නිළධාරින් පවා සොයමින් ඝාතනයට ලක් කරන්නට කොටි සංවිධානය කටයුතු කළා. ඉතින් මේ මිලේනියම් සිටි සිදුවීම කොටි සංවිධානයට හුස්ම ගන්නට සිදු කළ කූඨ සැලැස්මක් ලෙස විවේචනයට ලක්වුණේ මෙන්න මේ හේතූන් නිසාවෙන්.
2006 වසරේදි නැවත කොටි සංවිධානය යුධ මෙහෙයුම්වලට අවතීර්ණ වුණු අතර කොටි ත්‍රස්තවාදීන් තමන්ගේ සංවිධානයට ද්‍රෝහීවීමේ ප්‍රතිවිපාක 80 අධිකට පිරිසක් සාහසිකව ඝාතනය කරමින් පෙන්වා දුන්නා. ඒ වගේම ඒ වෙද්දි ඔවුන් සිතා සිටියේ ශ්‍රී ලංකා විශේෂ බලකායේ ,මහසෝන් බලකායේ චරපුරුෂයන්ගෙන් තමන්ගේ සංවිධානය සම්පූර්ණයෙන්ම ශුද්ධ කර තිබෙනවා ලෙසයි. මේ නිසා නැවත බුද්ධි තොරතුරු එකතු කිරීමේදී විශේෂ බලකායට අභියෝග රැසකට මුහුණ දෙන්නට වුණා.
නමුත් වසරක් පමණ කාලයකින් මහසෝන් බලකාය නැවත ශක්තිමත්ව 8 දෙනෙක්ගෙන් යුත් කුඩා කණ්ඩායමක් යොදාගනිමින් කොටි මර්මස්ථානවලට දැඩි ප්‍රහාර එල්ල කර රහසේම පලා යන්නට කටයුතු කළා. ඒ අනුව කොටි නැවත මහසෝන් බලකාය සක්‍රීය වී ඇති බව දැනගත්තත් ඔවුන්ට ඒ වෙද්දි කළ හැකි දෙයක් තිබුණේ නැහැ.
2009 වසරේදී මිලේච්ච යුද්ධය නිමාකර රටට සාමය උදා කරන්නට ශ්‍රී ලංකා හමුදාව සමත් වුණා. ඉන්පසුව ඔවුන් තම පුහුණුවීම් කටයුතු නිදහසේ කරමින් කොටින්ගෙන් මුදාගත් ප්‍රදේශවල ජන ජීවිතය නැවත නගා සිටුවන්නට කටයුතු කළා. නමුත් යුද්ධය අවසන් වුණත් මහසෝන් බලකායේ පුහුණුවීම් ඒ ආකාරයෙන්ම සිදුකරන්නේ රටේ නැවත පෙර මෙන් යුධ ගිනිදැල් ඇවිලෙන්නට ඉඩක් නොතබමින්. ඉතින් අදටත් මුර දේවතාවුන් ලෙස ශ්‍රී ලංකා ආරක්ෂක අංශ කටයුතු කරන අතර අප සැම ආරක්ෂා කරන ඔවුන්ට අපි සැමදා ණය ගැතියි.
උපුටා ගැනීම: The Lanka Post