රොහලේ කොරිඩෝව දිගේ පැමිණි තරුණයෙකු, අසල සිටි සේවිකවකගෙන්
” අංක 14 කාමරය කොහෙද කියන්න පුළුන්ද “
” ඔතනින් ගිහින් දකුණට හැරුණහ ම මුල්ම කාමරය ” සේවිකාව පිළිතුරු දුන්නාය
” ස්තූතියි “
” ඩොක්ටර් මනමේන්ද්‍රව හම්බවෙන්න ” ඔහු අංක 14 කාමරය ඉදිරිපිට සිටි හෙදියට පැවසීය
” මහත්තයගේ නම. චැනල් කරපු කොලේ දෙනවද “
” රනිදු ජයමහ. මෙන්න කොලේ “
” ඇතුලින් ඉන්න. ඩොක්ටර් එයි “
” වාඩිවෙන්න “
” තැන්ක් යූ ඩොක්ටර් “
” පුතාගේ නමයි වයසයි කියනවද “
” රනිදු ජයමහ. අවුරුදු 32 “
” මොකක්ද ගැටළුව පුතා “
” ඩොක්ටර් මන් තනියෙන් කතා කරනවා කියලා මට කට්ටිය කියනවා “
” කට්ටිය කියනවා කිව්වේ. කවු ද “
” ඔෆිස් එකේ යාලුවො කියනවා. අම්මත් කියනවා.”
” ඔයා එහෙම තනියෙම කතා කරනවා කියලා ඔයාට දැනිලා තියෙනව ද. ඒ වගේ දැනෙන්න මොකක් හරි සිද්ධියක් මතක ද “
” නෑ ඩොක්ටර්. මන් එහෙම තනියෙන් කතා කරන්නේ නෑ. “
” ඔයාට හොදට ම විශ්වාස ද. මතක් කරලා කියන්න. මුකුත් ම සිද්ධියක් ඒ සම්බන්ධව මතක නැද්ද. “
” දවසක් මන් බයික් එකේ යද්දී පොලිසීයෙන් මාව නැවැත්තුවා ෆෝන් එක කනේ ගහන් කියව කියව යනවා කියලා. පස්සේ මන් මගේ සාක්කුවේ තිබ්බ ෆෝන් එක පෙන්නුවා. ඒත් දඩකොලයක් ලිව්වා. කාටහරි දඩයක් ගහන්න ඕනේ වෙලා ඇති. ඒ සිද්ධිය මේකට සම්බන්ධ ද කියලා දන්නේ නෑ. දැන් දවස් දෙකකට කලින් උනේ ඔෆිස් යද්දී. “
” ඒ කියන්නේ ඔයා තනියෙන් කතා කර කර ආවේ “
” නෑ ඩොක්ටර්. මන් තනියෙන් කතා කර කර ආවේ නෑ. “
” එහෙනම් පොලීසියෙන් කිව්වේ කතා කර කර ආවේ කියලා. ෆෝන් එකත් සාක්කුවේ තිබ්බේ කියල පුතා කිව්වේ “
” කාගෙන්හරි කීයක් හරා කඩා ගන්න ඕනේ උනහම පොලීසිය ඔහොම කරනවනේ ඩොක්ටර්.කාන්චිත් ඒකමයි කිව්වේ. අනික එයා කැමති නෑ මන් බයික් එකේ යද්දී ෆෝන් එකෙන් කතා කරනවට. මන් එයා එක්ක කතා කර කර ආවේ. “
” කාන්චි කවුද ඒ.එයා එක්ක කතා කර කර ආවේ කියල පොලීසිය කිව්වේ නැත්තේ ඇයි “
” කාන්චි මන් එක්ක විතරයි කතා කරන්නේ. “
” ඇයි එයා ඔයා එක්ක විතරක් කතා කරන්නේ. “
” එයා මාව විතරයි විශ්වාස කරන්නේ. ඒක හින්දා එයා මන් එක්කමයි ඉන්නේ. “
” ම්හ්. එයා දැනුත් ඔයා එක්ක ඉන්නව ද “
” නෑ. දැන් මං එක්ක තරහ වෙලා ඉන්නේ “
” ඇයි ඒ “
” මං කිව්වා මන් ඩොක්ටර් ලගට යනවා කියලා. එයා එපා කිව්වා. එයා කියන හැමදේම මන් කරනවා. මේක කලේ නෑනේ. ඒකට කේන්ති ගිහින් “
” පුතාට ඇයි හිතුනේ මගෙ ලගට එන්න ඕනේ කියලා “
” මන් කලිනුත් කිව්වේ ඩොක්ටර්, ඔෆිස් එකෙ අය කිව්වා මන් තනියෙම කියවනවා කියලා. අම්මත් කිවිවා. ඊට පස්සේ මන් ඉන්ටර්නෙට් එකෙත් සර්ච් කලා. එතකොට තමයි ඩොක්ටර්ගෙ නම දැක්කේ. ඒකයි ආවේ.”
” පුතා මොකද කරන්නේ. ගෙදර කව්ද ඉන්නේ “
” මන් ප්‍රයිවට් ෆර්ම් එකක ඇසිස්ටන් මැනේජර් කෙනෙක්. ගෙදර අම්මයි, තාත්තයි, අයියයි, එයාගේ නෝනයි බබයි ඉන්නේ “
” ඔෆිස් එකේ යාලුවො ඉන්නව ද “
” නෑ”
” කාත් එක්කවත් කතා කරන්නේ නැද්ද “
” හැමෝමත් එක්කම හිනාවෙලා කතා කරනවා. කැගහනවා. විහිලු කරනවා. බැන ගන්නවා. ඒත් කවුරුවත් යාලුවො නෙවී. “
” ඇයි ඒ “
” යාලුවෙක් කියන්නේ විශේෂ හැගීමක්. එහෙම කතා කලා කියලා හැමෝටම යාලුවො වෙන්න බෑනේ. එහෙම හිතන දැනෙන කෙනෙක් ඔෆිස් එකේ නෑ. ඔෆිස් වල ඉන්නේම ගේමක් අදින්න බලාගෙන ම ඉන්න අය. මන් හිතන්නේ හොද යාලුවෙක් කියන්නේ ආලෝකයට. අදුර අයින් කරන ආලෝකයට. හැමෝටම ආලෝකයක් වෙන්න බෑ. හරියට හුස්ම වගේ.ආයාසයකින් තොරව නිකන්ම වෙන සන්සිද්ධියක්. ඒක නිසා ද කොහෙද හුස්ම ගන්න අමාරුවෙනකන් ගොඩක් අයට දැනෙන්නේ නෑ. මට හොදම යාලුවෙක් නෑ. “
” මට තේරෙනවා. එතකොට ගර්ල් ෆ්‍රෙන්ඩ් කෙනෙක් “
” දෙක තුනක් තිබ්බා දැන් නෑ. දැනට ඉන්නේ කාන්චි විතරයි “
“පුතා ගෙදර අය එක්ක කතා කරනවාද “
” කතා කරනවා”
” කිසි ම යාලුවෙක් නැද්ද “
” දැන් නෑ “
” ඒ කියන්නේ හිටියා. මොකද වුනේ “
” ඉස්කෝලෙ කාලේ ඉදලා එක්කෙනෙක් හිටියා. හැමදේටම හිටියා. ඒත් දැන් නෑ. එයාට ගැහැණු ළමයෙක් හම්බ වුණා. එයා දැන් ගොඩක් බිසී. ඉදලා හිටලා කතා කරනවා. ඒත් ඉස්සර වගේ නෑ. මන් කතා කරන්නෙත් නෑ. කරදර කරන්න ඕනේ නැති නිසා. තමන්ගේ නිදහසට හැමෝම ආදරෙයි නේ. ඉස්සර වගේ ඉන්න ගියහම නිදහස ඉල්ලනවා. ඉතින් මන් නිදහස දුන්නා. කොල්ලෙක් හරි කෙල්ලෙක් හරි ලැබුණු ගමන් කාගේ කාගෙත් යාලුකම් ඉවරයි කියලා මන් තේරුම් ගත්තා. මාත් හිතුවා ඉක්මනට කෙල්ලක් හොයාගන්නවා කියලා “
” දැන් කොච්චර කල් ද යාලුව මග ඇරිලා “
” මාස හය හතක් විතර වෙනවා “
” ම්හ් මට කියන්න ඔය දෙන්නගේ සම්බන්ධය කොහොම එකක් ද “
” හපෝ ඩොක්ටර් මම සමලින්ගිකයෙක් නෙමෙයි “
” නෑ නෑ මන් ඇහුවෙ ඒක නෙමෙයි. ඔය දෙන්න අතර බැදීම කොහොම ද “
” අවුරුදු 15ක් තිස්සේ වගේ අපි ගොඩාක් හොද යාලුවො.ගොඩක් අය අපි දිහා බලලා කිව්වේ උඹලා වගේ යාලුවෝ අපිට නැ කියලා. මගේ හැමදේක ම ඌ හිටියා. උගේ හැමදේකම මන් හිටියා. මගේ හැම ප්‍රශ්නයක්ම කරදරයක්ම බැරිකමක් ම කිව්වේ උට. මගේ එෆෙයාර් කැඩිලා දුකින් ඉදිද්දීත් ඌ තමයි මට හයියක් උනේ. හැම දෙයක් ම විශ්වාසෙන් කිව්වේ උට. දවසට පැය 02ක් විතර අපි ෆෝන් එකෙන් කතා කරනවා. පුළුවන් හැම වෙලාවෙම මුණ ගැහෙනවා. එක එක තැන්වලින් කනවා. පස්සේ දේවල් වෙනස් වුනා. ඉස්සර තිබ්බ විදිහට හදන්න උත්සාහ කරද්දි වුනේ තව තව අව්ල වෙන එක විතරයි. හැම දේකම වැරැද්දක් පෙනුනා. අපේ බැදී‍මෙ ආයුෂ මෙතනින් ඉවරයි කියලා හිතුවා. එච්චරයි. “
“එතකොට දැන් ඔයා ප්‍රශ්න උනොත් කියන්නේ කාට ද. ඔයාට එයා නැති පාලුව දැනෙනව ද “
” මුල් කාලේ නම් ටිකක් අමාරු උනා. ඒත් දැන් මට ගානක් නෑ. මට පාලුවක් නෑ.මටත් කෙල්ලෙක් හම්බවුණා. මට දැන් කාන්චි ඉන්නවනේ. එයා කිව්වා එයා මාව දාල යන්නේ නෑ කියලා කවදාවත්. මන් එක්කම ඉන්නවා කියලා. ඕනෙ දෙයක් එයාට කියන්න කියලා. ඉතින් දැන් මන් හැමදේම එයාට කියනවා එයා අහනවා. “
” ඔයා එක්ක එයා හැම තැනටම එනවා ද “
” ඔව්. මාත් එක්ක බයික් එකේ යනවා. එයා ආසයි හයියෙන් යනවාට. ඉතින් මන් හයියෙන් යනවා එයා එක්ක. “
” එයා තව මොනව ද ඔයාට කරන්න කියන්නේ “
එක සැරේටම කාමරේ දොර ඇරිණි. එලියේ සිටි හෙදිය රනිදු දෙස මද වේලාවක් බලා සිටි නැවත දොර වැසුවාය.
” කියන්නකො. එයා ඔයාට මොනව ද කරන්න කියන්නේ “
” විශේෂයෙන් මුකුත් කරන්න කියන්නේ නෑ. එයා එක්ක රෑ වෙනකන් කතා කර කර ඉන්න කියනවා. බයික් එකේ යනගමන් සින්දු කියන්න කියනවා. කේන්ති ගන්නකොට ලගට ඇවිත් කියනව කේන්ති ගන්න එපා කියලා කියනවා. මන් කැමති ඕනෙම දෙයක් කරන්න කියනවා. එයා කැමති මන් සතුටින් ඉන්නවට”
” කොච්චර රෑ වෙනකන් දෙන්නා කතා කර කර ඉන්නවා ද “
” පාන්දර තුන හතර වෙනකන් .එයා එක්ක කතා කර කර ඉද්දී වෙලාව යනවා තේරෙන්නේ නෑ. හිතට පුදුම සැනසීමක් දැනෙනවා එහෙම කතා කරද්දී. හැමදේම කියනවා. හරියට හුලගේ පාවෙන පිහාටුවක් වගේ. සැහැල්ලුයි. ඒ සැහැල්ලුවට මන් හරි කැමතී.”
” නිදාගන්නේ කොයි වෙලාවට ද “
” එහෙම දන්නේ නෑ. උදේ හතට නැගිටලා අපි වැඩට යනවා “
” ඔය දෙන්නා අදුරගෙන කොච්චර කල් වෙනව ද “
” මාස පහක් විතර .හරියට මතක නෑ. “
” ඔයා වෙන මුකුත් බාහිර දේවල්වලට සම්බන්ධ වෙන්නේ නැද්ද. ට්‍රිප්, පාර්ටීස් වගේ දේවල් “
” මන් කොහෙවත් යන්න කැමති නෑ. ඔෆිස් එකේ හිටියත් වැඩ හින්දා අපිට ගොඩක් කතා කරන්න ලැබෙන්නේ නෑ. හැම එකාම මගේ දිහා බලන් ඉන්නේ. ඉතින් ගෙදර ආවහම තමයි කතා කරන්න වෙන්නේ. ඒක නිසා මන් කොහෙවත් යන්නේ නෑ. ගෙදර ඇවිත් එයා එක්ක කතා කර කර ඉන්නවා. එච්චරයි. “
” ඩොක්ටර් ඇත්තට ම මට මොකක් හරි ලෙඩක් තියෙනව ද. මන් ඇත්තටම තනියෙන් කියනව ද”
” නෑ පුතා. ඔයාට කිසි ලෙඩක් නෑ. ඕක සාමාන්‍යයි. “
” එතකොට මන් බෙහෙත් ගන්න ඕනේ නැද්ද “
” නෑ පුතා. අසනීපයක් නැතිව ඇයි ඔයා බෙහෙත් ගන්නේ. අනික එහෙම අසනීපයක් නැතිව මං ඔයාට බෙහෙත් දෙන්නේ නෑ “
“ඒ කියන්නේ මට අසනීපයක් නෑ.එහෙනම් මන් යන්න ද ඩොක්ටර්. මන් ආයත් එන්න ඕනෙ ද “
” පුතා මන් බෙහෙත් කරන්නේ ලෙඩ්ඩුන්ට විතරයි. ඔයාට ලෙඩක් නෑ. ඔයා ආයි එන්න ඕනෙත් නෑ. ඔයා හොද සනීපෙන්. හිනා වෙලා ඉන්න. එහෙනම් දැන් යන්න “
සැනසුම් සුසුමක් පා රනිදු සිය අසුනින් නැගිටින්න සැරසෙද්දී ම ඔහුගේ උරහිසට යම් පුද්ගලයෙකු අත තබා නැවත අසුනට බර කෙරීය.
” කොහෙද මේ යන්න හදන්නෙ. මං පොඩ්ඩක් පරක්කු උනා. සොරි. අපි පටන් ගමු ” පිටුපසින් ආ පුද්ගලයා සිනාමුසු මුහුනින් රනිදු දෙස බලා පැවසීය.
” මට වොෂ් රූම් එකට පොඩ්ඩක් යන්න ඕනේ. ” යැයි පැවසූ රනිදු කාමරයෙන් එලියෙට පියමැන්නේ ය.
” බය වෙන්න දෙයක් නෑ කාන්චි. මට කිසිම ලෙඩක් නෑ කියලා ඩොක්ටර් කිව්වා. දැන් ඔක්කොම හරි. බයවෙන්න එපා. ” රනිදු මිමිණුවේ ය.
උපුටා ගැනීම: Vasuda Jayawarna