ලෝකයේ ඇතැම් රටවල් තම රටේ ස්වභාවධර්මය, සෞඛ්‍ය සම්පන්න බව ,ආචාර ධර්මයන් හෝ සිරිත් විරිත් ආරක්ෂා කර ගැනීමට ඇතැම් අවස්ථාවල තරමක් අසාමාන්‍ය නීති පනවා තිබෙනවා.
මේ ලිපිය එවැනි නීති දහයක් ගැනයි.
1. ඉතාලියේ මිලානෝ නගරයේ තුලදී ප්‍රසිද්ධියේ හඬා වැලපීම නීතිවිරෝධී බව ඔබ දැන සිටියාද? අවමංගල්‍ය උත්සවයකට හෝ රෝහලේ සිටින සමීපතමයන් බැලීමට යන අවස්ථාවකදී මේ නීතිය අදාළ වන්නේ නැහැ. ඒ හැර වෙනත් අවස්ථාවන්වලදී නගරය තුල ඔබ සිනාමුසුව සිටීම අත්‍යවශ්‍යයි.
2. ලංකාවේ නම් මහා මාර්ගවල, විශේෂයෙන්ම අමතර පන්ති ආසන්න ප්‍රදේශවල බිම නිතරම දකින්නට ලැබෙන දෙයක් තමයි චුවින්ගම්. සිංගප්පූරුව තුල චුවින්ගම් භාවිතා කිරීමත් විකිණීමත් සපුරා තහනම් වන්නේ ඒවායින් පරිසරයට සිදුවන හානිය සැලකිල්ලට ගනිමිනුයි.
3. ජර්මනියේ අටෝබන් (Autobahn) නගරයේ රියැදුරන්ට වේගයට අමතරව තවත් දැඩි සැලකිල්ලෙන් පසුවන්නට සිදුවන කාරණයක් තමයි වාහනය තුල ඇති ඉන්ධන ප්‍රමාණය. කිසියම් හේතුවක් නිසා ඉන්ධන අවසන් වී මහා මාර්ගයේ ඔබේ වාහනය නැවතුනොත් ඉන්ධන සපයන්නට දරණ පිරිවැයට අමතරව, දඩයකුත් ගෙවීමට සිදුවෙනවා. “උදාර” ජර්මානු පුරවැසියෙකු සෑම විටම තමාගේ ගමන සැලසුම් කරගෙන සිටිය යුතු බවයි නීති සම්පාදකයින්ගේ අදහස.
4.ස්විට්සර්ලන්තයේ ඇතැම් මහල් නිවාස වල රාත්‍රි දහයෙන් පසුව වැසිකිලිය flush කිරීම නීති විරෝධියි. රාත්‍රියේ නින්දේ පසුවන අයට සිදුවෙන බාධාවන් වැළැක්වීමටයි මෙවැනි නීතියක් ක්‍රියාත්මක වන්නේ.
5.ජෝර්ජියාව තුල කුකුල් මස් සැලකෙන්නේ ශුද්ධ වූ ආහාරයක් ලෙසයි. (උදාහරණයක් ලෙස, ජෝර්ජියානු අවන්හලක් තුලදී fried chicken කෑමට ඔබ පිහියක් හෝ ගෑරුප්පුවක් ලැබෙන්නේ නැහැ.) කොහොම නමුත් කුකුළන් සම්බන්ධව ජෝර්ජියාවේ ක්විට්මන් නගරයේ ක්‍රියාත්මක අමුතුම නීතිය නම්, කුකුලන් පාර හරහා පැනීම නීති විරෝධී වීමයි. මහා මාර්ගයේ සිදුවන අනතුරු, දේපල හානි සහ සුනඛයින් වැනි වෙනත් සතුන්ගෙන් කුකුලන්ට සිදුවන අනතුරු වළක්වා ගැනීම මෙහි අරමුණයි.
6. රුසියාවේ ප්‍රසිද්ධ මාවත්වල දුහුවිලි වැකුණු අපිරිසිදු වාහනයක් ධාවනය කරමින් සිටියදී පොලිසියට හසු උනොතින් රූබල් 500 ක දඩයක් ගෙවීමට රථයේ හිමිකරුට සිදු වනවා. (ලංකාවේ මුදලින් රු. 1200 ක් පමණ)
7. මහ මග ගමන් ගන්නා වෙලාවක ඔබට අසල ගමන් කරන කෙනෙකුගේ රබර් පාවහන් යුගලයක් නිකුත් කරන ශබ්දය කවදා හෝ බාධාවක් ලෙස ඇසී තිබෙනවා ද? ලංකාවේ අපට මහමග ඝෝෂාව සාමාන්‍ය දෙයක් වුණත් සාමය සහ නිශ්ශබ්දතාවය දැඩි ලෙස ප්‍රිය කරන ඉතාලියේ කාප්‍රි (Capri) නගරය තුල ඔබ කොතරම් කැමති උනත් රබර් පාවහන් යුගලයක් ලාගෙන ගමන් කිරීම තහනම් කර ඇත්තේ ඒවා නිකුත් කරන ශබ්දය පීඩාකාරී බව සලකමින්.
8.ඇමරිකාවේ බැල්ටිමෝර් හාස්‍යජනක වගේම අමුතු ආකාරයේ නීති වලට සුප්‍රකට නගරයක්. ඒ අනුව බැල්ටිමෝර් හි සිනමා ශාලා තුලට සිංහයින් රැගෙන යාමත්, විවාහක කාන්තාවන්ට නින්දේ පසුවන සිය ස්වාමි පුරුෂයන්ගේ පසුම්බිය අතපත ගෑමත්, ගොඩනැඟිලිවලින් පිටත දුරකථන සවි කර තැබීමත් තහනම් වනවා.
9.ඔබ කිසියම් දිනක ඕස්ට්‍රේලියාවේ වික්ටෝරියා, දකුණු වේල්සය හෝ ක්වීන්ස්ලන්ඩ් යන ප්‍රාන්තයන්හි සංචාරය කිරීමට බලාපොරොත්තු වෙනවා නම් මේ නීතිය දැන සිටීම වැදගත් වේවි. ඉරිදා දිනවල දහවල් 12න් පසු රෝස පැහැති කලිසම් හැඳ ප්‍රසිද්ධ ස්ථානවල ගමන් කිරීම ඕස්ට්‍රේලියානු රුපියල් 100 (ලංකාවේ මුදලින් රුපියල් 18,500 කට නඩු දඩයක් ගෙවීමට හේතු වෙනවා.
10. කැනඩාවේ ටොරොන්ටෝ නගරයේ දී නීතිමය අවසරයකින් තොරව ගසකට නැගීම ඩොලර් 300 කට අධික (ලංකාවේ මුදලින් රුපියල් 55000 ක් පමණ) දඩයකට යටත් වීමට හේතුවක් වනවා. ගස් වලට හානි සිදුවීම වලක්වා ගැනීමේ අරමුණින් මෙවැනි නීතියක් සම්මත කරගෙන තිබෙනවා.
ඇසූ පමණින් හාස්‍යජනක නීති ලෙස පෙනුනත් මේ ඇතැම් නීති පසුපස අර්ථයක් ඇති බව පිළිගන්නට වෙනවා.
මේ වගේ ඔබ දන්න නම් තවත් අමුතු නීති තියෙනවා නම් comment කරන්න අමතක කරන්න එපා.
මූලාශ්‍ර :
https://www.cbc.ca
https://www.insider.com/
https://www.enlawyers.com/
https://brightside.me/
http://skritch.blogspot.com/
https://www.thestar.com/
Harshanika Ranasinghe