ඊයෙ දෙසැම්බර් 09.මට සුවිශේෂී දිනයක්.
ඊයේ අපි දෙන්නගෙ විවාහ සංවත්සර දිනය.
සාමාන්‍යයෙන් මම අපේ ගෙදර විශේෂ දවස් වලට උදේම කිරි ආහාර පූජා කරන්න පුරුදු වෙලා ඉන්නවා .අපි දෙන්නගෙ උපන් දින ,දරුවන් ගේ උපන් දින ඒ වගෙම තවත් අපේ පවුලේ විශේෂ දින වල මම අනිවාර්යයෙන්ම එය ඉෂ්ට කරනවා.
ඊයෙත් උදේම කිරි ආහාර පූජා කරල එතෙක් මෙතෙක් ජීවිතේ ගමන් මගට අංශුමාත්‍රයකින් හෝ අත්වැලක් වුන සියලු දෙනාටම සෙත් ප්‍රාර්ථනා කළා.දෙමව්පියන්ට ඒ අතරින් විශේෂයි.
ඒ හතර දෙනාගෙන් දැනට ජීවතුන් අතර ඉන්නේ මහත්තයා ගේ අම්මා විතරයි.
ජීවිතේ පුරාම අපට සෑම අතකින්ම උදව් පදව් කරපු අය සිහිපත් කිරීම හා මනසින් ස්තුතියි කීම මගේ දෛනික පුරුද්දක් වුනාට
විශේෂ දවසක නම් ටිකක් වෙලා ගත කරනවා අතීතය මතක් කරමින් .ඒ ඒ කාල වල දුක සැප සොයා බලා අපිට වචනයකින් හෝ උදව්වක් කළ අය ආදරණීයව සිහිපත් කරන්න .ස්තුතියි කියන්න .පින් දෙන්න.
මේ දවස් වල නම් ටික වෙලාවක් භාවනා කරන්නත් පුරුදු වෙලා ඉන්නවා .ඒ රසයත් ජීවිතයට ළං කර ගනිමින් ඉන්නවා .ඇත්තටම ඒක රසයක් පුරුදු වුනාම.හිතට කියන්න බැරි තරම් සැනසුමක් ගේනවා.
මේකද කතාව
ඇත්තටම නෑ. මේ කිව්වෙ පූර්විකාව .
ඊයේ උදේ දහයට විතර ගේට්ටුවේ බෙල් එක වඳිනවා ඇහුනා..මේ දවස් වල ඇත්තටම ගේට්ටුවට ඉබි යතුරු දාල තියෙන්නේ .
උවමනාවක් වුනොත් තමයි ගේට්ටුව අරින්නේ.ලොකු කමකට නෙමෙයි.විශේෂයෙන් ලොකු දුව ආරක්ෂා කර ගැනීම මුල් කර ගෙන(ලොකු දියණිය මොලයේ ඔපරේෂන් එකක් කරලා ඉන්නේ දැනට වසර කීපයකට පෙර,) අප සියලු දෙනාගේම සෞඛ්‍ය ආරක්ෂාව සඳහා.
ඉතින් බෙල් සද්දෙට මම එළියට ගිහින් බලනකොට නාඳුනන තරුණයෙක් ගේට්ටුව ළග ඉන්නවා .
ඇයි පුතා මොකද්ද.. උවමනාවක් ද ?
මම ඉන්න තැන ඉදන්ම ඇහුවේ ඉස්සර වගේ
මනුෂ්‍යයෙක් ළගට යන්නත් මේ කාලේ බැරි හින්දා .
මැඩම් පොඩ්ඩක් එනවද .? තරුණයා මට අඬගහනවා.
“මැඩම්” කියන්නේ අපිව දන්න අයනේ.
තරුණයාගේ අතේ ඇක්සයිස් පොතකුත් පේනවා.අනිවාර්යයෙන්ම ක්ලාස් එකක් පිළිබඳව අහන්න වෙන්න ඇති කියල මම ළගට ගියා.
ඇයි පුතා ? ක්ලාස් නම් තවම පටන් ගත්තේ නෑ.මේ දවස් ටික පහුවෙලා තමයි .
මම ඉතින් පණ්ඩිත කමට කියාගෙන ගියා ආව කාරණේ ඒ ළමයා කියන්න කළින්ම.
නෑ මැඩම් …මේ මම ආවෙ පරණ ණයක් ගෙවලා යන්න .
පරණ ණයක්.? මම පුදුමයෙන් ඇහුවේ .
ඔව් මැඩම්
පුතා මෙහෙ ක්ලාස් ආව කෙනෙක් ද මට හුරුවක් නෑනේ ඔයාව.
නෑ මැඩම් මම නෙමෙයි මගෙ නංගි ක්ලාස් ආවෙ.
නංගි කවුද ? මම ප්‍රශ්න කළේ ඇත්තටම කිසිවක් තවමත් මට තේරුම් ගන්න බැරි නිසා.
නංගී පාතිමා මැඩම් ,
තරුණයා මුස්ලිම් තරුණයෙක් බව මට මුලදිම තේරුණත් ඒ පිළිබඳව මම අහන්න ගියේ නෑ.
පාතිමා ? කොයි අවුරුද්දේ ද නංගි මෙහෙ ක්ලාස් ආවෙ පුතා ..මම ඇහුවේ ඇත්තටම අපේ ක්ලාස් එකට නිතරම මුස්ලිම් දරුවන් ද පැමිනෙන නිසාත් අනිවාර්යයෙන්ම මතක තියෙන නම් අතර පාතිමා නමක් නැති නිසා.
2012 හේ මැඩම්
2012 හේ..මම ආයෙත් ඇහුවේ වැරදිලා වෙන්න ඇති කියලා
ඔව් මැඩම් 2012
නංගි ඒ ක්ලාස් එන දවස් වල අපිට හරිම අමාරුයි .කරදර ගොඩාක් තිබුන .සර්රුයි මැඩම් අපේ නංගිට කියල දිගටම එන්න සල්ලි ගැන හිතන්න එපා කියලා .
මැඩම් නංගී ඊයේ බැඳලා ගෙදරින් ගියා.
මට කියල ගියා මේ සල්ලි ටික සර්ට යි මැඩම් ටයි ගිහින් දෙන්න කියලා
ඇක්සයිස් පොත අස්සේ දාහෙ කොළ කීපයක් පෙන්වන ගමන් මේ තරුණයා මට කියනවා.
මම තාමත් මොකද්ද වෙන්නෙ මේ කියල නිනව්වක් නැතුව ඉන්නවා .
මැඩම් මේක ගන්න
දැන් අපිට එච්චර කරදර නෑ
අපේ ආගමේ හැටියට එක සත පහක් ණයක් වෙලා තියෙන්නෙ බෑ..
ණය වෙලා මැරෙන්න කවුරුත් කැමති නෑ.
අල්ලා දෙයියො අප කියල තියෙන්නේ ණය වෙන්න එපා කියල
නංගී වෙනුවෙන් මේක ගන්න මැඩම් .එයා ගොඩාක් සතුටු වෙයි.
එයා හරිම ආදරෙයි ඔයාල දෙන්නට.ඇත්තටම එන්න හිටියේ බලන්න .ඒත් එයා කිව්ව කවදහරි බැදල යන දවසට මේ සල්ලි දෙනවා කියලා .එයා අවෙ නෑ මැඩම් එයාට දුකයි ලැජ්ජයි. බයයි.
මම තවම ගල් ගැහිලා.
කොහේද ඉදන් මහත්තයා එතෙන්ට ආවෙ එතකොටම
මොකද්ද ප්‍රශ්නේ ..මහත්තයා අහනවා.
ප්‍රශ්නයක් නෑ .මොකවත්
එහෙනම් ?
සුසුමක් හෙළන ගමන් මම විස්තරේ එයාට කිව්ව.
එයා තවමත් තරුණයා දිහා බලාගෙන .
අපේ මහත්තයා ගෙ තියෙනවා කිසියම් වෙනස් අත්දැකීමක් ඇහුවම එක්කො දැක්කම ඇස් පියාගෙන ඔලුව වනන සිරිතක් .මම දැන් බලාගෙන ඉන්නවා එයාගෙ ඒ ඉරියව්ව .
කෝ අද ඒක අමතක වෙලා
බෑ පුතා , කිසිසේත්ම බෑ.එයා දුකෙන් කියනවා.
සර් නංගි වෙනුවෙන් ගන්න .එයා අවුරුදු ගාණක් මේක දෙන්න බලාගෙන හිටියා .
තරුණයාගෙ ඇස්වල කඳුළු පිරිලා.
අපි තුන්දෙනාගෙම ඇස් කඳුළෙන් පිරුණා.
මොහොතක නිහඬතාවයක්.
මම දන්නවා මහත්තයා එතැනින් එහාට ආයෙත් කතා කරන්නෙ නෑ කියල .
කඳුළු අතරින් මම හඬ අවදි කළ යුතුව තිබුනා
පුතා කවදාවත් මේ සල්ලි අපි ගන්නෙ නෑ.එදා අපිත් කළේ පින් කමක් .නැත්නම් ණය බේරීමක්.
අපිත් ගොඩක් ණයයි ඇත්තටම මේ ලෝකෙට.කවදාවත් ගෙවල නිම කරන්න බැරි ණය තව ගොඩාක් ඇති අපිටත්.අපිට ඇත්තටම තව පින් ගොඩාක් කරන්න උවමනාව තියෙනවා .මම කියන්නම් අපි මෙහෙම කරමු.
හොඳ පුතා වගේ ගිහින් ඔය මුදලින් ගෙදරකට අවශ්‍ය බඩු මල්ලක් ගන්න .අරගෙන බොහොම අමාරුවෙන් ජීවත් වෙන පවුලක් හොයලා අදම ඒක දෙන්න .කවුරු වුනත් කමක් නෑ..මේ දවස් වල මිනිස්සු ඉන්නේ හරිම අමාරුවෙන්. යන්න පුතා ගිහින් බලන්න .එහෙම පවුලක් හොයලා අනිවාර්යයෙන්ම ඒක කරන්න .
නංගිට කියන්න අපි දෙන්න එයාගෙ අලුත් ජීවිතයට සුබ පැතුවා කියල .
මේ කාලේ පහුවෙලා මහත්තයා ත් එක්ක ඇවිත් යන්න එන්න කියල කිව්වා කියන්න .
යන්න පුතා ,මම කිව්ව දේ කරන්න .
තරුණයා කඳුළු පුරවාගත් දෑසින් තවමත් ඉන්න නිසා මම එහෙම කිව්ව .
හොඳයි මැඩම් බොහොම පින්.කවදාවත් ඔයාලව අමතක වෙන්නෙ නෑ.
ඔව් පුතා අපිටත් ඔයාලව අමතක වෙන්නෙ නෑ.
හොඳයි එහෙනම් ගිහින් එන්න.
යන්නම් මැඩම් .යන්නම් සර්
පස්ස හැරි හැරී බලමින් යන තරුණයා දිහා අපි දෙන්න බලන් හිටියෙ ඇත්තටම කිසිම කතාවක් නැතුව .
මේ කතාව මම පටන් ගන්න කොට මාතෘකා දෙකක් ලිව්වා
දෙකම කැපුවා
( 1)පාතිමාගෙන් පාඩමක්
(2) පාතිමා ණය ගෙව්වාය.
ඒ දෙකම මම කැපුවෙ ඇයි.ඇත්තටම සමහර මිනිස්සු පාතිමා කියල දැක්ක ගමන් මේ කතාව අඩුම තරමේ කියවන්නෙවත් නෑ.
අපි කොතනද ඉන්නේ .අපිට ඇත්තටම කොච්චර ණය ගෙවන්න ඇද්ද ? අපිට තව මේ ලෝකෙන් ඉගෙනගන්න පාඩම් මොන තරම් ඇද්ද .
අදත් උදේ මම කිරි ආහාර පූජා කළා.
ඒ පාතිමා ගේ අලුත් ජීවිතය වෙනුවෙන් .
පාතිමා ,ආදරණීය දියණිය ,සැබවින්ම අපිට ඔබේ මුහුණවත් කොයි වගේද කියා මතකයේ නෑ.ඒත් ඔබ අපේ දියණියක් බව අප දන්නවා
ලෝකෙ කොහෙ හිටියත් ඔබ මේ ලෝකෙට හොඳක් කරන බව දන්නවා .
ඔබේ නව ජීවිතය ඉතාමත් වාසනාවන්ත වේවා නීරෝගිමත් දූ දරුවන් ලැබ ජීවිතය තව තවත් වාසනාවන්ත වේවා .
ඊයේ අප දුටු ඔබේ සහෝදරයා මුළු ජීවිතය පුරාම එවන් සහෝදර බැම්මෙන් සිටීවා
ඔබේ ස්වාමියා සමඟ සුන්දර යහපත් ජීවිතයක් ගත කරන්න ඔබ වාසනාව උදාවේවා !
හදවතින්ම ප්‍රාර්ථනා කරනවා ආදරණීය දියණිය .
ඔබ උතුම්
ඔබේ සහෝදරයා උතුම්
අනිවාර්යයෙන්ම ඔබේ දෙමව්පියන් උතුම්
උපුටා ගැනීම : Priyangani Kumari Wijayarathna