නිට්ටෑ අඩවිය (හොල්මන් කතා)

මධ්‍යම රාත්‍රියට ආසන්න වෙද්දී අඳුරු කුඩා සෙවනැලි කිහිපයක් නලින් සහ යුවනි සිටි කූඩාරම දෙසට ඇදී ආවා. අඩ නින්දේ පසුවූ නලින්ට කූඩාරම අවටින් නැගෙන අඩි හඬවල් ඇසුනේ යන්තමින්. යුවනිද අවදි කරගත් නලින් කූඩාරමෙන් පිටතට පැමිණියේ තමන් ගැන විපරම් කරන්නේ කවුරුන්දැයි බැලීමටයි.

තම කූඩාරම වටකරගෙන සිටින බිහිසුණු සතුන් තිදෙනා ඔවුන්ගේ නෙත ගැටුණේ එවිටයි.

ඔවුන් අසා තිබුණු කතාවල හැටියට නම් ඒ තමයි නිට්ටෑවන්. මිනිසෙකුට සමාන පෙනුමක් තිබුණද අඩි තුනකට වඩා උස් නොවු මේ සතුන්ට තිබුනේ ලොමින් වැසී ගිය සිරුරක්. කුඩා මුත් අතිශය කුරිරු වූ ඒ මුහුණු වල මීළඟට සිදු වන බිහිසුණු ඛේදවාචකයක පෙර නිමිති මනාව සටහන් වී තිබුණා .

………………………………………………………………………

කැලයට ආසන්නයෙන් වැටී තිබූ මාර්ගයේ වේගයෙන් ධාවනය වූ යතුරු පැදියක්. යතුරුපැදිකරු එක්වරම එය නතර කලේ, කැලය තුළින් දිවවිත් මහා මාර්ගයට අවතීර්ණ වූ යුවතිය දැකීමෙන්. මොහොතක් ඔහු ඇය දෙස ගල් ගැසී බලා සිටියා. දුහුල් රාත්‍රී ඇඳුමකින් සැරසී සිටි ඒ සුන්දර යුවතිය බියපත් විලාසයකින් ඔහු වෙතට දිව ආවා.

“ හොල්මනක්ද? “ ඒ මොහොතේ යතුරුපැදිකරුගේ සිතට ආ එකම ප්‍රශ්නය එයයි.

“ අනේ අයියේ අපිට උදව් කරන්න “ තමන් හොල්මනකැයි සැක සිතූ යුවතිය ඊළඟ මොහොතේ යතුරුපැදිකරුට කතා කළා.

“ ඇයි මොකද වුනේ “ ඇය අවතාරයක් නොව කිසියම් කරදරයකට මුහුණ දුන් යුවතියක් බව තේරුම්ගත් යතුරුපැදිකරු ඇසුවේ කුතුහලයෙන්.

යුවනි තමන් මුහුණ දුන් සිදුවීම එකිනෙක ඔහුට පැවසුවා. නලින් මේ වන විටත් නිට්ටෑවන් සමග සටන් වැද සිටින හැටිත් ඔහු තමන්ට මහා මාර්ගයට දිවවිත් කිසිවෙකුගෙන් හෝ උදව් ඉල්ලන ලෙස කී හැටි ඇය බියෙන් සැලෙමින් විස්තර කළා.

තවත් මොහොතක් හෝ අපතේ හැරීමට යතුරුපැදිකරුවා උත්සාහ කළේ නැහැ. ඔහු වහ වහා යුවනි ද සමග කැලය තුළට දිව ගියේ නිට්ටෑවුන් සමග සටන් වැද සිටින නලීන්ට උදව් කරන අටියෙන්.

කූඩාරම පෙනෙනතෙක් මානයට එද්දී යතුරුපැදිකරු නැවතුණා.

“ නංගි ඔයා පොඩ්ඩක් ඔහොම ඉන්න.” එසේ කියමින් මදක් ඉදිරියට ගිය යතුරු පැදිකරුවා විසල් ගසකට මුවා වී සිදුවන්නේ කුමක්දැයි විපරම් කළා.

ඒ වන විටත් නිට්ටෑ ප්‍රහාරයෙන් මිය ගිය නලින්ගේ සිරුර කූඩාරම අසල වැටී තිබුණා. තමන් මරා දැමූ මිනිසාගේ සිරුරෙන් ගලායන උණු ලේ දහරවල් දෙස ඉමහත් තෘප්තියෙන් බලමින් මල සිරුර අසල රැදී සිටියේ නිට්ටෑවුන් දෙදෙනෙක්.

මේ බිහිසුණු දර්ශනය දැක භීතියෙන් වෙවුලා ගිය යතුරුපැදිකරු ගේ දෑසට ඊළඟ නිමේෂයේ තෙවන නිට්ටෑවා ද හසුවුණා. ඌ අත රැදි තිබූ ගෝලාකාර වස්තුව කුමක්දැයි හඳුනා ගැනීමට යතුරුපැදිකරුට පහසු වූයේ නෑ. එහෙත් මොහොතකින් එම නිට්ටෑවා තම අත රැඳි එම ගෝලාකාර වස්තුව ඉහලට ඔසවා තම සගයන්ට පෙන්වමින් බියකරු හඬක් නංවමින් කෑ ගැසුවා.

එය තවත් මිනිස් හිසක්. සඳ එළිය, ලෙයින් නැහැවුණු එම හිස මතට වැටෙද්දී, මෙතෙක් වෙලා තමන් සමග පැමිණි තරුණියගේ හිස එය බව හඳුනා ගැනීමට යතුරුපැදිකරුට අපහසු වූයේ නැහැ. සිදුවන්නේ කුමක්දැයි වටහා ගත නොහැකි වූ යතුරුපැදිකරුවා ආපසු හැරී තමන් පිටුපසින් සිටි යුවතිය දෙස බැලුවා.

එවිට ඔහු දුටුවේ හිස සුන් යුවතියක්. ඊළඟ මොහොතේ එම රුව අතුරුදහන් වී යද්දී යතුරුපැදිකරු මර හඬ දෙමින් මාර්ගය දෙසට දිව ගියා.

(නිමි)