එළවළු සහ මා අතර ඇත්තේ සාංසාරික බැඳීමකි. එය පසු ගිය සති කිහිපය තුලමා වටහාගත් පරම සත්‍යයි. නිවසේ තිබූ දඹල භීෂනය අහවර කිරීමට අනෙකුත් එළවළු වර්ග කිලෝ ගනනින් නිවසට රැහෙන ආ දිනයේ සිට නිවැසියන්ට මා පෙනෙන්නේ එළුවකු ලෙස යැයි මට විටෙක සිතේ. පසුගිය දිනක හිමිදිරි උදෑසන දහයට මා අවදිවන විට කාමරයේ මේසය මත සහ ඇඳ මත දඹල ගෙනවිත් තබා කෝචොක් කිරීමට නිවසියන් පෙලඹී තිබුනේ මා උපයාගත් ගෞරවය මාගේ දෙපාමුල පොඩි පට්ටම් කරමිනි.
පඩිය බැංකුවට ලැබුන බවට කෙටි පණිවිඩය ලැබුන සැනින් මා පස්වනක් ප්‍රීතියෙන් පිනාගිය අතර සෑම මසකම පඩිය වැටුන සැනින් ගිණුමේ ඇති මුදල් හිරු දුටු පිණිබිඳු සේ චුතව යන්නේ සියල්ලෙහි ඇති අනියත බව මනාවට වටහා දෙමිනි.
ගියවර කඩේ ගොස් නා හොඳම එකෙන් මට්ටුවී සතියක් තිස්සේ විව්ධාකරයෙන් එළවළු වර්ග අනුභව කර හාවෙකු සේ සුසුදු සුදු මෘදු වී සිටන මා මෙවර කඩේ යෑම වගකීම අම්මාට පැවරූයේ මා කඩේ ගියහොත් මෙවරත් කතන්දරය අමල්බිසෝ වන බව හොඳින්ම දන්නා නිසාය.
දුන්නෙන් මිදුන හීයක් සේ වහා ඒටීඑම් යන්ත්‍රය වෙත ගිය මා ඉන් මුදල් රැගෙන අම්මා අත තබා මිහිකත නලවා මග මල් ගන්වා පාසල වෙතයන පිටිසර හෙලගුරු ළඳක් මෙන් තාලයට අඩි තබමින් නිවසට පැමිනියේ හිසේ වූ විශාල බරක් අම්මාගේ හිස මත පටවාය.
මාගේ ණුවනක්කාරකම නිසා සතියක්ම නිවැසියන් එළුවන් මෙන් එළවළු කෑ නිසා මෙවර අම්මා කිසිඳු එළවලුවක් නොගෙනෙතයි තරයේ විශ්වාසකර සිටි මාගේ සිහින ලොව සුනුවිසුනු කරමින් අම්මා තුන් රියසකක් පුරවා මහා පත වට්ටක්කා ගෙඩියක් ,ඇත් දල දෙක මෙන් දිගු පතොල කරල් දෙකක්, කොහොඹ තිත්ත පරදනා තිත්තෙන් යුත් කරවිල කරල් හත අටක් ආදී එළවළු මල්ලක්ම රැගෙන පැමින තිබූ අතර නිවසට මෑකරල් වසන්තය උදාකරමින් තාත්තා කොටුවෙන් මෑ කරල් කිලෝ හත අටක්ද රැගෙනවිත් තිබුනි. දැන් පිට පිට වේල් කිහිපයක් වට්ටක්කා මාළුව, මෑකරල් ව්‍යාංජනය සහ කරවිල කරිය සමඟ ආහාර වැළඳූ මා අද දින පතෝල ව්‍යාංජනයක රස බැලීමට නොඉවසිල්ලෙන් බලා සිටිම්.
මා බුකියට ලියන හැම ඉස්පිල්ලක් පාපිල්ලක්ම ඒ ආකාරයෙන්ම මතක තබාගෙන අම්මාට කියන අම්මාගේ බුද්ධි අංශ හිතවතියනි. දැන් ඔබ කලයුත්තේ මා ගැන ඇයට කේලම් කීම නොව රසමුසු පතෝල කරියක්, වට්ටක්කා බැදුමක්, මෑකරල් මැල්ලුමක් වැනි විවිදාකාර කෑම සාදාගන්නා අකාරය පිළිබඳ ඇයට උපදෙස් දීමය. පබිලිස් සිල්වාගේ සිට රංගනද සිල්වා දක්වා වූ සූපවේදින්ගේ රස රහස් ඇයට කියා දීමය . නැතහොත් සති තුනකට පසුව හෙට අනිද්දා ඔෆීසියට යන මා සුද්දෙකුයැයි වරදවා වටහාගෙන ඔෆීසියේ උන් දින 14ක් මා නිරෝධායනයට යොමු කිරීමට ඉඩ ඇත.
උපුටා ගැනීම: සමීර මධුසංක.