ඇඩ්ඩිං බෝඩිමට එන විට ඉවුම් පිහුම් සම්බන්ධව යාන්තමට හෝ දැන සිටියේ පොල් ගෑමත් බිත්තර තැම්බීමත් පමණි. පසු කාලීනව ඇඩ්ඩිං මහා සූපවේදියෙකු බවට පත් වූවා පමණක් නොව අවසානයේ මගෙන් ඉගෙනගත් පාඩම් මටම කියාදෙන්නට පටන්ගෙන තිබුණි.
“හැරි, පරිප්පු වලට මිටි කිරි එක්ක ලුණු දාපන්. මුලින්ම දාන්න එපා තැම්බෙන්න වෙලා යනවා. ඉතිරි පොල් බෑයෙ ලුනු ටිකක් ගාලම තියපන්”
– ” ඈ බොල ඇඩ්ඩියෝ, කවුද උබට ඕවා කියලා දුන්නෙ”
“අඩෝ ඒකත් උබ නේද කියල දුන්නෙ, සොරි බං අමතක උනා “
සෑම දිනකම ඇඩ්ඩිංගේ දැනමුතුකම් නතර වනුයේ මේ ලෙසිනි.ඇඩ්ඩිංට පොල් ගෙඩිය බිඳින ආකාරය කියා දුන්නේ මා විසිනි. මන්න පිහියක් බෝඩිමේ නොතිබූ නිසා කොන්ක්‍රීට් බැම්මක මුල්ලක් පොල් බිඳීමට උපකාරී කරගෙන තිබුණි. දිනක් ඇඩ්ඩිං ට පොල් ගෙඩිය දෙතුන් වරක් ම බැම්මේ ඇන බිඳ ගැනීමට නොහැකි වූ නිසා ඉරි තුනෙන් එකක් මතට පහර වැදිය යුතු බව මා ඔහුට කියාදුනි.
“අනේ ඉඳපන්. උබ තමා ඔක්කොම දන්නෙ. ඉඳපන් බිඳලා දෙනකන්” කී ඇඩ්ඩිං වෙර යොදා පොල් ගෙඩියේ මැද්දෙන් තැනක් බැම්මේ ඇනීමෙන් පසු පොල් ගෙඩිය කැබලි හතරකට පමණ බිඳී යන ලදී. සිනහව නතර කරගැනීමට නොහැකි වූ කල හූවකුත් කියා එය සැමරීමට මා සැරසුනත් එවිටම සිය බූරුවා නිදි කරවා නිදාසිටි කුලු හරකා කුලප්පු කරගත් ඇඩ්ඩිං මේස පිහියක් මා වෙත දිගු කරමින් මරණීය තර්ජනයක් කරන්නට විය.ඒ ලැජ්ජාව දරාගත නොහැකි වීම නිසාය.ඩේවිඩ් අප දෙදෙනා මැද්දට පැන්නේ නැතිනම් මේ කතාව ලියන්නට මා ජීවතුන් අතර නොමැති වන්නට ඉඩ තිබුණි. ඒ හිත් අමනාපය මාසයකට වඩා කල් පැවතිනි.
ඇඩ්ඩිං සිය පුද්ගලික ධනයෙන් ඉදි කරනලද රෙදි වැලක් සහ ඔහුට අයත් පුදගලික බේසමක් බෝඩිමේ විය. එම බේසම ඇඩ්ඩිංගේ රෙදි පල් කිරීම සඳහා භාවිතා කරයි. ඇඩ්ඩිං විසින් සබන් කුඩු දියකරගත් ජලයේ බහා පල් කරන ලද ඇඳුම් සෝදනු ලබන්නේ ඉන් වහනය වන දුගන්ධය කාමරයටම දැනෙනා තෙක් වැඩිවූ පසුවය.
පොල් සිද්ධියෙන් දින කිහිපයකට පසු රාත්‍රියක ඇඩ්ඩිංගේ බේසමේ තිබූ ඇඳුම බිමට දමා කවුරුන් හෝ අයෙක් බේසම තම භාවිතයට ගෙන ඇත. පසු දින උදෑසන ඇඳුම බිම තිබෙනු දුටු ඇඩ්ඩිං උඩුබිරුම් මංගල්‍ය ඇරඹීය. දින දෙකකට වරක් වත් ඇඩ්ඩිංගේ මෙම බිරුම් මංගල්‍ය පැවැත්වෙන නිසා සියල්ලන්ම කම්මලේ බල්ලා න්‍යාය අනුගමනය කරන්න පුරුදු වී තිබුණි.
“මේ වැඩේ නම් කරලා තියෙන්නෙ පූසෙක් ට කියලා &%& පු එකෙක්” ඇඩ්ඩිං ඒ කියන්නේ මා ගැනය.ඒ දින වල බෝඩිමට නිතර ආ ගිය බලලුන් කිහිප දෙනෙක්ට කෑම දීමට මා පුරුදු වී සිටි අතර ඇඩ්ඩිං බලලුන් කෙරෙහි දැඩි අප්‍රියතාවක් පෙන්නුම් කරයි. එම රෙදි බේසම් නඩුව අදටත් නොවිසදුනු අභිරහසක් වන අතර එහි සැකය පසුව ලිලිපුට් වෙත යොමු විය. ලිලිපුට් විසින් ඇඩ්ඩිංගේ ජනන යන්ත්‍රයට හානි කිරීම නිසා ඇතිවූ අමනාපය පෙර කතාංගයක ලියා ඇත.
පසු කලෙක ඇඩ්ඩිං නැවත මා හා මිතුරු වූ පසුව එම සියලු සිද්ධීන් පිලිබඳව සමාව බජනය කරමින් ඔහු ඒ පිලිබඳ කනගාටු වන බවත් ප්‍රකාශ කලේය. ඔහුට පොල් ගෙඩි සිද්ධියෙන් පසු දිනම මා හා මිතුරු වීමට සිතී ඇති නමුත් මා ඔහුට බැන වදී යැයි සිතා කතා නොකරම සිට ඇත.ඇඩ්ඩිංගේ උපන්දිනයක් දා පුද්ගලික රෙදි වැල ලිහා එම රැහැනින් ම ඇඩ්ඩිංව ගස් බඳින ලදී.
මෑතකදී මා ඇඩ්ඩිංගේ නිවසට යන විට ඇඩ්ඩිං බලල් පැටවකු තම හිස මත තබාගෙන සිටිනු දැකීමෙන් මා විශ්මයට පත් විය.පූසාටද ඇඩ්ඩිං සමග කෝලම් කිරීමට වඩා රාජකාරිය නැතිය. 100% ක් කලු පැහැ වූ මේ එවරඩි කලුසෝනා ගේ නම “කලූ ” ය. ඇඩ්ඩිං පවසන පරිදි කලූගේ පන හතෙන් පහක් ම ඒ වනවිට අවසන් වී ඇත. වරක් කලුවරේ පෑගීම, පුටුව මත සිටිනු නොදැක පුසා මත අසුන්ගැනීම ආදී ලෙස පන පහක් ම හානී වී ඇත. ඉතා හුරතල් බලලෙකු වූ කලූ විසින් ඇඩ්ඩිං නැමති බයිසන් ගවයා ව හීලෑ කරගෙන තිබුණි. සත්ව ලෝකය හරි අපූරු තැනකි
උපුටා ගැනීම: සුපුන් උදාර