අදත් සාස්තර කතාවක්. මේක ගිය අවුරුද්දෙ ලියපු එකක් අද මෙමරීස් වලට ආවා. ඉතින් ඔයාලා එක්ක ෂෙයා කරගන්න හිතුනා.
මම දුවත් එක්ක ලංකාවට ආපු වෙලාවක මුහුදෙ නාන්න ගල්කිස්සට ගියේ ලංකාවට ගොඩ බැස්ස දවසෙ ඉඳලම දුවගෙන් බේරිල්ලක් තිබුනෙ නැති හින්දමයි. අපි එතන තිබුනා කබානා එකකට ගියේ එතන හොඳට කූල් කරපු බියර් විකුනපු නිසාත් එතනින් කැම ගන්නත් පුලුවන් නිසාත්, ඇඳුම් මාරු කරගන්නත් පුලුවන් නිසා.
අපේ දුව එයාගෙ අම්ම වගේ ගොඩක් ම. ඉතින් මගේ දුව කියලා බලපු ගමන්ම කියන්න බැහැ. දුව දිගටම වතුරෙ හිටියට, මම සැරින් සැරේට අතනට ගිහිල්ලා බියර් එකක් බීලා, ඉස්සෙක් දෙකෙක් බයිට් එකට කාලා ඇවිල්ලා වතුරට පනිනවා. මම නැති අතරෙ කොල්ලො ඇවිල්ලා එතන බල්ටි ගහනවා, වැඩ කිඩ පෙන්නනවා. කාට පේන්නද කියලා කියන්න අවශ්‍ය නැහැ නේ. මම ගියා කියලා මුන්ට තේරුනේ නැහැ මම තාත්තා කියලා. කිසිම රෙස්පෙක්ට් එකක් නැහැ.
මම දුවට කිව්වා
‘බබා, යමු ලන්ච් ගන්න’
දැන් කෙල්ල කියනවා
‘ඩැඩී ගිහිල්ල කන්න, මට තවම බඩ ගිනි හැහැ’
මම ඉතින් ඔය වයස පහු කරලනේ.
‘හරි තව විනාඩි පහලොවකින් එන්න. කාලා ගෙදර යමු. මගේ යාලුවෙක් එනවා කිව්වා තුනට විතර’
‘හරි හරි, මම එන්නම්’
මම ඉතින් ගිහිල්ලා දුව එනතුරු තව බියර් එකක් බිව්වා. ඉතින් කෙල්ල කිව්ව වගේම විනාඩි පහලොවකින් ආවම මම ඇහුවා
‘බායි කියලද ආවේ?’
‘කාට ද?’
‘අර ඔයා අත වනපු කොල්ලට?’
කෙල්ල ලැජ්ජාවෙන් හිනා වෙලා
‘ඩැඩී, ඔයා දැක්ක ද?’
මමත් හිනාවෙලා ඔලුව වැනුවා.
ඉතින් ටික වෙලාවකට පස්සෙ සාස්තර කියන ගෑනියෙක් ඇවිල්ලා කබානා එකේ වැට ලඟට වෙලා ‘සාස්තර සාස්තර’ කියල කෑ ගහනවා.
මගෙන් දුව අහනවා මොනව කියලද එයා කෑ ගහන්නෙ කියලා. මම කිව්වා එයා ‘fortune teller’ කෙනෙක්.
‘Very interesting. Ask her to come’ (මරු නේ, එන්න කියන එකයි අදහස් කලේ).
ඉතින් ගේට්ටුව ලඟ හිටපු මනුස්සයට එයාට එන්න දෙන්න කිව්ව්ම, එයාට ඇතුලට එන්න දුන්නා.
කලින්ම රුපියල් දෙසීයක් මගෙන් ඉල්ලගෙන, ඉතින් ඒ ගෑනු කෙනා මගෙ අත බලාගෙන සාස්තරෙ කියන්න ගත්තා.
‘මේ මහත්තයා පුදුම වාසනාවන්තයි. අතක් පයක් හොල්ලන්නෙ නැතිව සල්ලි ලැබෙනවා’ (මගෙ අල්ලෙ සිනිඳු කම නිසයි, මගෙ අව්වට නොපිච්චුන ගතියයි, මෙවැනි තැනකින් බියර් බිබී ඉන්නවා නම් සල්ලි තියෙන්න ඕන නේ කියන එකයි කියන්න සාස්තර දැන ගන්න ඕන නැහැ නේ).
කෙල්ල කියනවා මේ ගෑනි කියන දේවල් එයාට ඉංග්‍රීසියෙන් කියන්නලු. දැන් ඉතින් වචනයෙන් වචනය මම සිංහලෙන් ඉංග්‍රීසියට පරිවර්තනය කරපන් කෝ. ටිකක් වෙලා යන කොට කෙල්ලට තරහ ගිහිල්ලා කිව්වා
‘ඔයා බොරු කරන්නේ, සේරම පරිවර්තනය කරන්නෙ නැහැ. ගෑනි ගොඩක් දේවල් කිව්වා, ඔයා එක වාක්‍යයයි කිව්වෙ’
මම ආයෙත් වාක්‍යයෙන් වාක්‍යයට පරිවර්තනය කරමින් ඉන්න විට, මට තේරුනා මේ ගෑනි හිතන් ඉන්නේ මේ මගෙ දුව නෙවෙයි, දෙවෙනි කසාදයේ නෝනා කියලා, තරුණ කෙල්ලෙක් බැඳලා පලවෙනි එක්කෙනාව අත හැරලා. අර ෆුඩ් කෝට් එකෙ වලියට ආපු උන් දෙන්න වගේ.
‘මහත්තයට ගැහැනු පරානයක් කොඩිවින කරලා. හම්බු කරන සේරම වියදම් වෙනවා, ඉතිරියක් නැහැ. ඉස්සරහට තව කරදර’
‘ඇත්තට? ඉතින් මොනවද කරන්න ඕන’
‘අපි කපමු කොඩිවිනේ’
‘කොහොම ද?’
ගෑනු කෙනා පොඩි පොතක් මා අතට දී කැමති පිටුවක් පෙරලන ලෙස කිව්වා ය. මම මැදින් පිටුවක් පෙරලූ විට, ඒ පිටුවේ තිබුනේ කතරගම දෙවියො මොනරෙක් පිට වාඩි වී, එක අතක ත්‍රිශූලයත් අනික් අතේ රුපියක් දාහෙ කොලයක් සමගින්.
‘මහත්තයා, ඔය දෙවියො කියන ගාන මට දෙන්න, මම කොඩිවිනෙ කපන්නම්’
දැන් මේ අවස්ථාව වෙන විට දුවගේ ඉවසීමේ සීමව පැන ගොස් තිබුනි. ඇය ටිකක් සැරෙන් කතා කරමින්,
‘ඩැඩී, මම කිව්වනේ මෙයාව යවන්න කියලා’
කිව්විට, ඒ ගැහැනු කෙනා මගෙ අතේ රේඛාවක් පෙන්වා
‘මහත්තයගෙ නෝනගෙ කට හරි සැරයි’
කියා දූ දිහා බැලූවා ය. මම හිනා වෙමින්
‘නෝනගෙ නම් කට සැර තමයි, ඒත් මේ ඉන්නේ මගෙ දුව නේ’
කියල කට ගන්න උනේ නැහැ, ගැහැනිය මල්ලත් අරගෙන වහාම එතනින් චුත උනේ හාස්කමකින් වගෙයි.
මම ඒ දෙබස පරිවර්තනය කලාම දූ තරහෙන් කියාපි
‘මම ආයෙ නම් මේ රටට ඔයා එක්ක තනියෙන් එන්නෙ නැහැ. දැන් කී පාරක් කී දෙනෙක් හිතුවද මම ඔයාගෙ වයිෆ් කියලා’.
ඒ වගේම එයා කිසිදිනක නිම්මි නැතුව ආවේම නැහැ මේ වෙනතුරු.
ගෙදර ඇවිල්ලා සේරම විස්තර මම නිම්මිට කියලා, අන්තිමට කිව්වම
‘අර ගෑනි සේරම බොරු කියලා. එක ඇත්තක් කිව්වානෙ’
එයා පුදුමයෙන් වගේ ඇහුව
‘ඒ මොකක් ද’
‘අර මගේ නෝනගෙ කට සැරයි කිව්ව එක’
එයාටත් හිනහයි.
‘ඔයා මගේ කටේ සැර තවම දැකලා නැහැ’
කියලා කිව්වම, ඒක දැක ගන්න අවශ්‍ය වූ නැති නිසා මුනිවත රැක ගතිමි.
උපුටා ගැනීම: Devapriya Siriwardena