ලංකාවේ අපි කාලි මෑනියෝ කියපු වට්ටෝරුවකට අනුව හදපු පැණියක් අල්ල ගෙන දෙපැත්තට බෙදිලා ගහ මරා ගන්න කොට ලෝකේ අනෙක් රටවල් මේ වෙද්දි සිය ජනතාවට කොවිඞ්-19 එන්නත ලබාදීම ආරම්භ කරලා තියෙනවා.
හරියටම කියනවා නම් පයිසර් එන්නත ලබාදීමට මේ රටවල් අතර තියෙන්නේ තරගයක්. කොහොම හරි මේ තරගයෙන් ලෝකයේ දියුණු රටවල් අභිභවා පෙරමුණට එන්න ඊශ්‍රායලයට හැකියාවක් ලැබිලා තියෙනවා.
ඊශ්‍රායලය සෞඛ්‍ය අංශ මේ වෙද්දි ඔවුන්ගේ ආරක්ෂක අංශවල සහයෝගය ඇතිව දවසේ පැය 24 පුරාම එන්නත් ලබාදීම සිදුකරන අතර, මෙම කාර්යක්ෂමතාවය ලබන මාර්තු මාසයේදී පැවැත්වීමට නියමිත මහ මැතිවරණයේදී වර්ථමාන අගමැති බෙන්ජමින් නෙතන්හායුගේ ජයග්‍රහණයට සෘජුවම බලපෑ හැකි බව තමයි පැවැසෙන්නේ.
සති තුනකටත් වඩා අඩු කාලයක් තුළ ඊශ්‍රායල ජාතිකයන් මිලියන 1.4 කට මේ වන විටත් ෆයිසර් එන්නත ලබාදී ඇති අතර, එය මිලියන 8.7 ක් වන සමස්ථ ජනගහණයෙන් හයෙන් එකක්.
පසුගිය සඳුදා දිනයේදී පමණක් පුද්ගලයන් 146,000 ක් එන්නත් කර ඇති අතර, එය ස්පාක්‍ද්ක්‍දය, ඉතාලිය සහ කැනඩාව යන බටහිර රටවල තුනම එක් දිනක් ලබාදුන් එන්නත් ප්‍රමාණයටත් වඩා වැඩියි. මෙම එන්නත් වැඩ සටහන ක්‍රියාත්මක කිරීම සඳහා වෛද්‍ය මධ්‍යස්ථාන පමණක් නොව හමුදා කඳවුරු සහ ක්‍රීඩාංගණද යොදාගෙන තියෙනවා.
ඊශ්‍රායල ජනගහණයෙන් සියයට 12 ක් මේ වන විටත් එන්නත් කොට ඇති අතර, ලෝක බලවතා වන ඇමෙරිකාව මේ වන විටත් එන්නත් ලබාදී ඇත්තේ ජනගහණයෙන් සියයට 1 කට පමණයි.
අවුරුදු 60 ට වැඩි ජනතාවට එන්නත් වැඩසටහනේ ප්‍රමුඛත්වය ලබාදී ඇතත් රාත්‍රී කාලයේදී මධ්‍යස්ථානවලට පැමිණෙන තරුණ ජනගහණයටද එන්නත් ලබාදීමට ඊශ්‍රායල සෞඛ්‍ය අංශ පියවර ගෙන තිබෙනවා.
එහි ප්‍රතිඵලයක් ලෙසින් වයස අවුරුදු 20-40 ත් අතර වයසේ පසුවන 100,000 කට එන්නත් ලබාදීමට හැකියෙලා තියෙනවා.
හොඳ වෙලාවට ඊශ්‍රායලයේ කාලි මෑනියෝ නැත්තේ. හොඳ වෙලාවට අගමැති බෙන්ජමින් නෙතන්යාහු ස’ කාලි මෑනියන්ගේ ෆෑන් කෙනෙක් නොවුණේ. හොඳ වෙලාවට ඊශ්‍රායලයේ දෙරණ වගේ ටී.වී. චැනල් නැත්තේ. ඔක්කොටමත් වඩා හොඳ වෙලාවට ඊශ්‍රායල ජාතිකයෝ මේසන් බාස්ලට වඩා දොස්තරවරු විශ්වාස කරන්නේ.
(ඡායාරූප සහ මූලාශ්‍ර “ඬේලිමේල් ” ඇසුරෙනි)
