අපේ ගම් පළාත ඉස්සර ජේවීපී කලබල හොදටම තිබුණු පළාතක්ලු .ගමේ ඉන්න පරණ මිනිස්සු තවමත් කියනවා .ඒ කාලේ හැමදාම වගේ ගමේ තැන් තැන්වල වෙඩි තියපු ,පුච්චපු ,කපල කොටල දාපු මළ මිනී දකින්න ලබෙනවලු .මන් දැන් ඔයාලට කියන්න යන කතාවත් මෙන්න මේ කාලෙට සම්බන්ධ කතාවක් .
මට මේ කතාව කිව්වේ අපේ ගමේ ජීවත් වෙන දුරින් අපේ නෑදෑයෙකුත් වෙන අවුරුදු 80 ක් විතර වයස සියදෝරිස් උන්නැහේ .අපේ ගෙවල් පහුකරලා මීටර් 600 ක් විතර යනකොට ගෙවල් දොරවල් නැති පට්ටම පාලු හරියක් හම්බවෙනව .ඒ හරියටම තියෙන්නෙ එකම එක පාලු බංගලාවක් විතරයි .පාරෙන් උඩපැත්තට වෙන්න ලොකු කළු ගල් කුට්ටි එකින් එක තියල හදපු අඩි 20 ක් විතර උස බැම්මකට උඩින් තමයි මේ බංගලාව ඉදිකරලා තියෙන්නෙ .සුද්දොන්ගේ කාලේ අපේ මේ මුලු ගමම එකම තේ වතු යායක්ලු .දැන්නම් පොඩි පොඩි තේ වතු දෙක තුනක් හැරුණම අනිත් ඉඩම් ගම්මිරිස් ,සාදික්කා ,කරාබු වගේ වගාවන් වලින් තමයි සමන්විත වෙලා තියෙන්නෙ .
සුද්දන්ගේ කාලෙ ඉදිකරපු මේ වෙනකොට ගරා වැටෙමින් තියෙන තේ ෆැක්ටරි දෙකකුත් තවමත් අපේ ගමේ දකින්න ලැබෙනව .මම අර කලින් කියපු පරණ බංගලාවත් ඔය සුද්දො ඉදිකරපු බංගලාවක් .බැලූ බැල්මට ජරාවාස වෙලා අමුම අමු මූසල පෙනුමක් තිබුණට ඒ කාලේ නම් විශාල තේ වතු යායක් මැද්දෙ පිහිටි මේ බංගලාව හරි ලස්සනට තියෙන්නට ඇති .
සුද්දන්ගෙන් නිදහස ලැබුණට පස්සෙ මේ ඉඩම් බෙදල වෙන් වෙලා එක් එක් මිනිස්සුන්ට අක්කර පහ ,දහය ,විස්ස වගේ කොටස් අයිති වෙලා ,මේක ගමක් උණා .මන් කලින් කියපු බංගලාවයි ඒ බංගලාව පිහිටි අක්කර විස්සක ඉඩමයි හේරත් කියලා යමක් කමක් තියන පෝසතෙක් මිල දී ගත්තලු .ඒ හේරතුයි එයාගෙ බිරිදයි එයාලගේ තරණ නිවුන් දියණියන් දෙන්නයි මේ බංගලාවෙ තමයි පදිංචි වෙලා ඉදල තියෙන්නෙ .මං අර කලින් කියපු කලබල තිබුණු කාලේ අපේ ගමේ මිනිස්සු හවස හයෙන් පස්සෙ ගෙවල් වලින් එලියටවත් බැස්සෙ නෑලු . ගෙවල් අස්සට වෙලා මර භයෙන් ගැහි ගැහි තමයි ජීවත් වෙලා තියෙන්නෙ .මේ කතාව මට කිව්ව සියදෝරිස් උන්නැහේට එතකොට වයස අවුරුදු 30 ක් විතර ඇතිලු .
එක දවසක් උදේ සියදෝරිස් උන්නැහේ කඩේට යනකොට ගමේ මිනිස්සු ලොකු කලබලේකින් පාර දිගේ දුවනවලු .සියදෝරිස් උන්නැහේත් ඒ මිනිස්සු ලගට ගිහින් කලබලේ මොකක්ද කියලා අහල .කලින් දවසේ රෑ ,අර බංගලාවෙ හිටිය හේරත් මහත්තෙයවයි එයාගෙ නෝනවයි කපල කොටල මරල දාලලු .ගමේ මිනිස්සු දුවන්නෙ ඒ බංගලාවටලු .ඉතින් සියදෝරිස් උන්නැහේත් ඒ මිනිස්සුත් එක්ක එකතු වෙලා බංගලාවට ගිහින් තියෙනව .
බංගලාවෙ මිදුලෙ හේරත් මහත්තෙය බෙල්ලට කෙටුව කඩු පහරකින් මැරිල වැටිල ඉදල තියෙනව .ඒ ලගම හේරත් මහත්තෙයට අයිති ලයිසන් තුවක්කුවත් වැටිල තිබුණලු .ඊට අමතරව ඒ ලගම අර තුවක්කුවෙන් වෙඩි තියපු පතුරම් කොපු වගේකුත් වැටිලා තිබිලා තියෙනව .ඊටත් අඩි ගාණක් එහායින් බිම ලේ පැල්ලම් වගේකුත් තිබුණලු .බංගලාව ඇතුලට ගියපු සියදෝරිස් උන්නැහේට හේරත් මහත්තෙයගෙ බිරිදගෙ සිරුර සාලෙ මැද වැටිල තියෙනව දකින්න ලැබුණලු .කැපුම් කෙටුම් පාරවල් ඇග හැමතැනම තිබුණලු .ඒත් හේරත් මහත්තෙයගෙ නිවුන් දියණීයන් දෙන්න ගැන කොයිතරම් හොයල බැලුවත් කාටවත් එයාලව හොයාගන්න ලැබිලා නෑ .
ඉතිම් හේරත් මහත්තෙයගෙ නෑදෑයන්ටත් දන්වලා ගමේ අය එකතු වෙලා අවසන් කටයුතු සිද්ද කරල තියෙනව .ඉතින් අපේ සියදෝරිස් උන්නැහේත් එදා ඔය මළ ගෙදර වැඩ වලට උදව් වෙන්න ගිහින් තියෙනවා .ඒ කාලේ අපේ ගමේ කරන්ට් එක තිබිලා නෑ .අර බංගලාවේ පිටිපස්සේ හයි කරලා තිබුණු ජෙනරේටර් එකකින් තමයි බංගලාවට කරන්ට් එක අරන් තියෙන්නෙ .ඉතින් මළ ගෙදර මිදුලෙ ගමේ මිනිස්සු එකතු වෙලා රෑ පහන් කරන්න ඕනෙ නිසා දාම් ,ඕමි වගේ සෙල්ලම් කරනවලු .ගැහැණු අය තේ හදලා මළ ගෙදර ඉන්න අයට පිළිගැන්වීම සහ කෑම ඉවීම වැනි කාර්යයන් වල නිරත වෙනවලු .ඔහොම ඉද්දි පාන්දර තුනට විතර එකපාරම ජෙනරේටර් එක ඕෆ් උණාලු .දැන් මුළු බංගලාවම කට්ට කළුවරයිලු .ඒ එක්කම එක පාරට බංගලාව ඇතුලෙන් ,“අනේ අම්මේ ,අනේ තාත්තේ ,අපිව බේරගන්න” කියල මහ හයියෙන් විලාප තියලා කෑගහන කාගෙදෝ ගෑණු කටහඩවල් දෙකක් ඇහිල තියෙනව .සියදෝරිස් උන්නැහේත් ඉණේ ගහගෙන හිටපු ටෝච් එකත් පත්තු කරගෙන තව පිරිමි දෙතුන් දෙනෙක් එක්ක බංගලාව ඇතුලට දුවල තියෙනව මේ කලබලේ මොකක්ද කියල බලන්න .
ඒත් බංගලාවේ ඇතුලේ කිසිම කලබලයක් සිද්ද උණ ලකුණක් වත් නෑලු .ඒ අතරෙ තවත් පිරිසක් එකතු වෙලා ඕෆ් උණ ජෙනරේටර් එක ආයෙත් පණ ගන්වලා .විදුලි ආලෝකය ලැබුනට පස්සෙලු සියදෝරිස් උන්නැහේලාට දකින්න ලැබිලා තියෙන්නෙ .මල මිණී දෙක තැන්පත් කරල තිබුණ තැන ඉදල බංගලාවෙ පිලිකන්න පැත්තට යනකන් තැන් තැන්වල ලේ පාරක් විහිදිලා තියෙනව .පිලිකන්නෙ මිදුලෙත් ඒ ලේ පාර තේ වත්තෙ කන්ද දිහාවට විහිදිලා තිබුණලු .සියදෝරිස් උන්නැහේට ඒ ලේ පැල්ලම මොකක්ද කියල බලන්න වත්ත උඩහට යන්න හිතිල .
එතන හිටිය අයට ඒ අදහස කීවත් එතන හිටිය හැමෝම අදිමදි කළාලු .ඒ කාලේ අපේ ගමේ සිදු උණ මිනී මැරුම් වගේ දේවල් නිසා ඒ අය එහෙම භය වෙන්න ඇති .ඒ වගේම ඒ අය සියදෝරිස් සීයටත් තනියම යන්න දීලා නෑ .එයාලා ආපහු බංගලාව දිහාට එන්න හැරෙනකොටම වගේ වත්ත උඩහින් ආයෙත් අර විළාප හඩ ඇහෙන්න ගත්තලු . “අනේ අපිව බේරගන්න කියල” .ඒ වෙලාවෙ මළ ගෙදර ආරක්ෂාවට ඇවිත් හිටිය පොලීසියෙ දෙන්නෙක්ටත් මේ සද්දේ ඇහිලා තියෙනව .ඒත් එයාලත් තනියම යන්න භය වෙලා .මොකද ඒ කාලෙ පොලිස් නිලධාරීන්වත් මරණවලුනෙ .
කොහොමහරි පාන්දර වෙනකම්ම සැරින් සැරේ අර විලාප හඩ ඇසුණත් කවුරුවත්ම බලන්ඩ ගිහින් නෑ .පාන්දර එළිය වැටුණට පස්සෙ සියදෝරිස් උන්නැහේයි ගමේ තව මිනිස්සු කට්ටියකුයි අර ලේ පාර දිගේ කන්දට නැගලා තියෙනව .කන්ද මුදුණෙ තිබුනු ගල් තලාවක් පාමුල තිබිල හේරත් මහත්තෙයගෙ එක දියණියකගෙ මළ සිරුර හම්බ වෙලා තියෙනව .ඒ සිරුර සම්පූර්ණෙන්ම නිර්වස්ත්‍රව තමයි තිබිලා තියෙන්නෙ .තවත් ටිකක් හොයල බලද්දි ඊට ටිකක් දුරකින් තිබුණ එරමිණියා ගාලක් යට තිබිලා හේරත් මහත්තෙයගෙ අනිත් දුවගෙ මළ සිරුරත් හම්බුණාලු .ඒ සිරුරත් සම්පූර්ණෙන්ම නිර්වස්ත්‍රව තමයි තිබිල තියෙන්නෙ .
මරණ පරීක්ෂනේදි හෙළිදරවු උනාලු ඒ සිරුරු දෙකම සමූහ දූෂනේකට ලක්වෙලා කියල .ඊට අමතරව මේ සිරුරු දෙකම ඒ වන විටත් මිය ගිහින් පැය 48 කට වැඩියි කියලත් මරණ පරීක්ෂණේදී අනාවරණය උණාලු .එයාලා මිය ගිහින් පැය 48 කටත් වැඩිනම් කලින් දවසේ ඇහුණු කටහඩවල් කාගේද කියල සියදෝරිස් උන්නැහේ දහ අතේ කල්පනා කරන්න උණාලු .කොහොමහරි සතුටින් දිවි ගෙවපු කාටවත් කරදරෙයක් නොකරපු හේරත් මහත්තෙයගෙ පුංචි කැදැල්ල මේ විදිහට එක දවසකින් විනාස උණ එක ගැනනම් එදා ගමේ හැමෝම දුක් උණාලු ,වැළපුනාලු .
මං මුලින් කිව්වනෙ හේරත් මහත්තෙයගෙ මළ සිරුර වැටිල තිබුණ තැන පතුරම් කොපු වගෙයක් වැටිල තිබ්බ කියල .එතෙන්ට ටිකක් දුරින් ලේ පාරකුත් වැටිල තියනව මිනිස්සුන්ට දකින්න ලැබිල තියෙනව .පොලීසිය ගමේ අය දැනුවත් කළාලු ,වෙඩි වැදුණු කවුරුහරි කෙනෙක් ගමේ ඉන්නවද කියල බලල පොලිසියට දැනුම්දෙන්න කියලා .ඒ කාලේ අපේ ගමේ හිටියලු ජුවන් කියල මැරයෙක් .ගමේ හැමෝම මළ ගෙදර ආවත් මේ ජුවන් ආවෙ නැති නිසා ඒ ගැන සැක හිතපු ගමේ පිරිසක් ජුවන්ගෙ ගෙදරට යනකොට උරහිසක් රෙදි කඩකින් වෙලාගෙන බූරු ඇදට වෙලා කෙදිරි ගාමින් ඉන්න ජුවන්ව දැකල තියෙනව .මේ ගැන පොලීසියට කිව්වට පස්සේ ජුවන් පොලිස් අත් අඩංගුවට පත් උණාලු .ඒත් ජුවන්ගෙ මැර පිරිසෙ අනිත් අය ගමෙන් පැනල ගිහින් තියෙනව .කොහොමහරි මේ මරන සිදු වුණ දවසෙ ඉදල හැන්දෑ කළුවර වැටුණට පස්සේ ගමේ කවුරුවත් අර බංගලාව පැත්තෙනම් ගියෙ නැල්ලු .ඒකට හේතුව තමයි ,ගමේ කීප දෙනෙක්ම නිර්වස්ත්‍රව අඩමින් ඉන්න ගෑණු දෙන්නෙක් බංගලාව ඉස්සරහා ඉන්නවා දැකලා භය වීම .මේ භය වෙන හැමෝටම මතුරල නූල් බැදල සුව කරලා තියෙන්නෙ අපේ සියදෝරිස් උන්නැහේගේ තාත්තලු .එයාගෙ තාත්තා ඒ කාලේ හිටිය සුපිරිම වැඩකාරයෙක් .සියදෝරිස් උන්නැහේටත් ඒ හැකියාව ඒ විදිහටම පිහිටලා තියනවා කියලයි අපේ ගමේ කවුරුත් කියන්නෙ .
ගමේ මිනිස්සුන්ට මේ බංගලාව ලගදි අත්විදින්නට වෙන කරදර හිරිහැර නිසාම සියදොරිස් උන්නැහේගේ තාත්තා මේ ගෑණු ආත්ම දෙක හිරකරගන්න හිතුවලු .ඒ කාලේ තාත්තගේ ගෝලෙයා විදියට සියදෝරිස් උන්නැහේටත් එයාගේ තාත්තා එක්ක ඒ ගමන යන්න සිදු උණාලු .සතියක් විතර වෙහෙස මහන්සි වෙලා වැඩේට අවශ්‍ය කළමණා එහෙම සූදානම් කරගත්තු මේ දෙන්නා එක දවසක රාත්‍රීයේ බංගලාවට යන්න පිටත් උණාලු .
බංගලාව කිට්ටුවට යනකොටම සියදෝරිස් උන්නැහේට ගෑණු කෙනෙක් ඉකිබිදින හඩක් ඇහිලා තියෙනව .බංගලාවෙ ගේට්ටුවට පයින් පාරක් ගහල ඒක ඇරගත්තු සියදෝරිස් උන්නැහේගේ තාත්තා , “කොහේවත් නොයා මගේ ලගින්ම හිටපන් ,වෛරයෙන් මැරුණු ආත්ම අපි හිතනවාට වඩා ගොඩක් බලගතුයි” කියලා සියදෝරිස් උන්නැහේට කිව්වලු .
තාත්තයි පුතයි ගේට්ටුවෙන් ඇතුල් වෙලා මිදුලට යද්දිම ගේ ඇතුලෙන් ,“පලෙයව්ව්ව් ,පලෙයව්ව්ව්ව්ව් ,පලෙයව්ව්ව්ව්ව්ව්ව්” කියල මහ හයියෙන් වෛරයෙන් ගොරෝසු අමිහිරි කටහඩකින් කෑගහන ගැහැණු කටහඩක් ඇහෙන්න ගත්තලු .ඒ එක්කම මිදුලෙ තිබුන අඹ ගහක අත්තක් හුළගකුත් නැතුවම එක පාරම සියදෝරිස් උන්නැහේලගෙ ඇගට කඩන් වැටුණලු .හොද වෙලාවට අත්තෙ කද කොටස වෙනුවට අතු අග්ගිස්ස තමයි මේගොල්ලන්ගෙ ඇගට වැටිල තියෙන්නෙ .ඒ වෙලාවෙම බිමට නැවිල වැලි අහුරක් අතට ගත්ත සියදෝරිස් උන්නැහේගෙ තාත්තා මහ හයියෙන් මතුරන්න පටන් ගත්තලු .
ඒ එක්කම ගේ ඇතුලෙන් යටිගිරියෙන් කෑ ගැසීම් ,ගෙතුලේ තිබූ බඩු භාහිරාදිය මහ සද්දෙන් පෙරලෙන සද්ද ඇහෙන්න පටන් ගත්තලු .මැතිරීම ඉවර වෙනවාත් එක්කම සියදෝරිස් උන්නැහේගේ තාත්තා ඒ වැලි ඉදිරියට ඉසිමින් ඒ බංගලාවෙ දොරෙන් බංගලාවට ඇතුල් උණාලු .එහෙම ඇතුල් වෙලා ගෙනාපු මල්ලකින් අළු වගයක් අරන් මතුරන ගමන් බිම අඩි 4*4 විතර කොටුවක් ඒ අළුවලින් ලකුනු කළාලු .ඊටත් පස්සෙ සියදෝරිස් උන්නැහේවත් ඒ කොටුව ඇතුලට කැදවලා කිසිම හේතුවකට ඒ කොටුවෙන් එලියට නම් යන්ඩ එපා කියල කොටුව ඇතුලෙ බිම ඉදගෙන තවත් මල්ලකින් බෝතල් කුප්පි දෙකක් එලියට අරන් ඒවායේ මුඩි ඇරලා බිමින් තිබ්බලු .
එහෙම ඉන්න ගමන් පහනකුත් පත්තු කරල එහෙම ආයෙත් මතුරන්න පටන් ගන්නකොටම ගෙදර ඇතුලෙ තිබුණ බඩු එහෙම ඉබේම පෙරලිලා සිදෝරිස් උන්නැහේලා හිටපු දිහාවට වේගයෙන් ඇදිල එන්න පටන් ගත්තලු .ඒත් අර අළුවලින් ඇදපු කොටුවෙන් ඇතුලට ඒ කිසිම දෙයක් ආවෙ නැතිලු .මේ විදිහට පැයකට වැඩි කාලයක් කෙරුනු මැතිර්‍රීමේදි අවලස්සන නිර්වස්ත්‍ර ගැහැණු රූප දෙකක් අර කොටුව ඇතුලට එන්න පොර කනවලු .යටි ගිරියෙන් කෑගහනවලු .කටින් ලේ පෙරමින් කොටුව ඇතුලට කඩා වදින්න දගලන ඒ ගෑණු ආත්ම දෙක දැකපු අපේ සියදෝරිස් උන්නැහේ උන් හිටි තැන් අමතක වෙන්න භය උණාලු .නමුත් පෙර පිනකට ඒ ක්ෂණයෙන් තාත්තා කියපු දේ ඔලුවට නැගුණු නිසා භය වුණු සියදෝරිස් උන්නැහේ ඒ පැත්තවත් නොබලා කෙලින්ම බිම බලාගෙන වෙව්ල වෙව්ලා හිටියලු .එතකොට උන්නැහේට ඇහෙන්න පටන් අරගෙන තියෙනවා “මෙහෙ වරෙන් ,මෙහෙට වරෙන්” කියලා ගැඹුරු පහත් ස්වරයෙන් කියවන ගැහැනු හඩක් .ඒ දිහාව බලපු උන්නැහේට ලස්සනම ලස්සන කෙල්ලෙක් උන්නැහේ දිහාට අත දික් කරගෙන උන්නැහේට අඩ ගහනවා දැක්කලු .ඒ කෙල්ලගේ වචනවලට වශී උණා වාගේ සියදෝරිස් උන්නැහේත් හිටපු තැනින් නැගිටලා ඒ දිහාට යන්න පටන් අරන් තියෙන්නේ උන්නැහේටවත් හිතාගන්න බැරි ආකාරයටලු .ඒත් ඒක දැකපු උන්නැහේගෙ තාත්තා ක්ෂණයකින් සියදෝරිස් උන්නැහේව පස්සට ඇදලා ඒ එක්කම අළු වලින් ඇදපු කොටුවේ එක් කොනක් කකුලෙන් මකා දමා ඒ පැත්තට මා කලින් කී බෝතල් කුප්පි දෙකේ කටවල් සිටින සේ අල්ලා ඇත .
තත්පර 20 ක් පමණ සිදු වූ මෙම සිදුවීමේදී සියදෝරිස් උන්නැහේ බලා සිටියදීම එම ගැහැණු ආත්ම දෙක බෝතල් කුප්පි දෙක තුලට ඇදී ආවාය .ඒත් සමගම එම බෝතල් කුප්පි දෙකෙහිම කටවල් මූඩි වලින් තදකර වැසූ සියදෝරිස් උන්නැහේගේ තාත්තා හයියෙන් සිනා සෙමින් දැන් ඉතින් යමන් කියා බංගලාවෙන් එලියට ආවේ සියදෝරිස් උන්නැහේගේ අතිනුත් ඇදගෙනමලු .
බංගලාවේ ප්‍රධාන දොරෙන් පිටවෙලා එලියට ඇවිත් අර බෝතල් දෙකත් මල්ලක දාගෙන පිට වෙලා යන්න ගියපු සියදෝරිස් උන්නැහේලට එක පාරම පිරිමි කටහඩක් ඇහිල තියෙනවා ,
“අනේ මගෙ අහිංසක දරුවො දෙන්නා උඹලට කරපු වරද මොකක්ද ?? ” ,කියලා .ඒ හඩ සියදෝරිස් උන්නැහේට වගේම උන්නැහේගෙ තාත්තටත් ඇහුණලු .ඒ හඩ ඇහුණ සියදෝරිස් උන්නැහේගෙ තාත්තා ටිකක් වෙලා කල්පනා කරලා මල්ලට අත දාලා අර බෝතල් කුප්පි දෙක අතට ගත්තලු .සියදෝරිස් උන්නැහේ බලා ඉද්දිම එම බෝතල් දෙකේ මූඩි ඇරපු උන්නැහේගේ තාත්තා සියදෝරිස්වත් ඇදගෙන ආපහු ගෙදර ආවලු .
ඒ එන අතර මගේදී සියදෝරිස් උන්නැහේගේ තාත්තා කිව්වලු , ”උන්ගෙ පළිය ගත්තම උන් යාවි .එතකන් මම නැති කාලෙකවත් උඹ උන්ට කරදර කරන්ඩ යන්ඩ එපා” කියලා .
ඒ සිද්දිය වෙලා හරියටම සතියකින් සියදෝරිස් උන්නැහේගේ තාත්තා මිය ගියාලු .අන්තිම හුස්ම හෙලන වෙලෙත් උන්නැහේගේ තාත්තා කියල තියෙන්නේ “ උන්ගේ පළිය ගත්තම උන් යාවි” කියලලු .
සියදෝරිස් උන්නැහේගේ තාත්තගේ මළගෙදර දවසට පහුවදා පාන්දර අර බංගලාවට පහළ පාරේ තිබිලා ජැකා කියන ජුවන් ගේ ගෝලයෙකුගේ මිනියක් හම්බුණාලු .ඔය විදියට මාස කීපයක් ඇතුලත ගමේ මරණ හතක් වෙලා තියෙනවා .ඒ මිය ගිය හැමෝම ජුවන්ගේ සහචරයින් කියලා තමයි සියදෝරිස් උන්නැහේ මාත් එක්ක කිව්වේ .
ඒත් ජුවන් අත් අඩංගුවේ සිටිය නිසාද කොහෙදෝ අර ආත්ම ජුවන් නිදහස ලබන දවස වෙනකම්ම අර බංගලාව ලගදි මිනිස්සුන්ට දකින්න ලැබිලා තියෙනවා .අවුරුදු ගානකට පස්සේ හිරෙන් නිදහස ලබපු ජුවන් ආපහු ගමට එන අතරෙදි අහඹු ලෙස වාහනයකට හැප්පිලා මිය ගියාලු .
එදා ඉදලා කවදාවත් අර බංගලාව ලගදී මිනිස්සුන්ට ඒ ආත්ම දෙක දකින්න ලැබිලා නෑ .
උපුටා ගැනීම: Lahiru Sandaruwan