මම මැරුණේ මගේ ගෑනිගේ හොර මිනිහා අතින්..මැරෙන්න කළින් මගේ ළඟ ගොඩාක් සල්ලි තිබුණා..ඒ සල්ලිවලින් කාටත් අත නොපා සතුටින් ජීවත් වෙන්න මට හැකි උනත් සල්ලි හොයන්න වෙච්ච මහන්සිය එක්ක මට මගේ බිරිදව මග හැරුණා..මේක ඒ ගෑනිගෙ ම විතරක් වරදක් නෙමෙයි..මා අතිනුත් ඒ ගෑනිට නොසෑහෙන්න වැරදි වෙන්න ඇති..මගේ හිතේ දැන් තීන්නේ තරහකට වඩා පසු තැවිල්ලක් මොකඳ ජීවත්වෙලා ඉන්නකල් සල්ලි පස්සේ ගියා මිසක් පිනක් දහමක් කර ගන්න මට බැරි උනා..දැන් ඉතිං පසු තැවිල වැඩක් නෑ උන දේ උනා..ජීවිතයක් ලැබෙනකල් ගන්ධබ්බ ආත්මය ගත කරනවා…මට විශ්වාසයි ඉක්මනින් මටත් ජීවිතයක් ලැබෙ’යි..
මේ සිදුවීම උනේ මීට මාස තුනකට පමණ පෙර..ආත්මයක් සොයමින් එදින ද ඇවිදිමින් සිටිය මම ඔහො ම ඇවිඳිනකොට දැක්කා අවුරුදු 16 ක විතර ළමයෙක්..මම හිතන විදිහට නම් ඒ දැරිවිගේ අම්මා ජීවතුන් අතර නෑ පෙනුමෙන් නම් මිත්තණිය ළඟ තමයි මේ කෙල්ල හැදී වැඩෙන්නේ..ගෙදර නිතරම එන අල්ලපු ගෙදර තරුණයා අතින් මේ කෙල්ල අතවරයට ලක් වෙලා හැබැයි කෙල්ල තාම දන්නේ නෑ කළලයක් කුසේ වැඩෙනා බව..
කොහොම හරි මම ඒ ගෙදර නතර වෙන්න තීරණය කළා…මොකඳ අවස්ථාවක් ලැබුණ ගමන් මගේ බලාපොරොත්තුවත් ඉෂ්ට කර ගන්න හැකි නිසා..
දින සති ගෙවිලා ගියා..දවසක් කෙල්ල උදේ නැගිටලා වමනෙ කරන්න පටන් ගත්තා වමනේ ගියේ සුදු පාටට වගෙයි මතක..
” බඩ කොර වෙනවා වගේ “
ඇය සිය මිත්තණිය සමඟ පවසනවා මම අහගෙන පස්සේ දෙන්නා ම ලෑස්ති වෙලා හන්දියේ ඩිස්පැන්සරියට ගියා..මමත් පස්සෙන් ගියා දොස්තර කෙල්ල පරීක්ෂා කරලා කෙල්ල ගැබ්බර වෙලා කියලා කිව්වා..කෙල්ලට එවෙලේ උන් හිටි තැන් අමතක උනා…මිත්තණිය ඇගේ කන හරහා පහරවල් තුන හතරක් ම ගැහුවේ ඇයට දැනුණු වේදනාව පිට කර ගැනීමට වෙන ක්‍රමයක් නොතිබූ නිසා විය හැකි ය…
‘ තෝ අපේ පරම්පරාවෙම දැළි ගෑවා..ඇත්ත කියපන් කවුද.? උඹට මේ අපරාදේ කළේ ? ‘
” අනේ ආත්තම්මේ මට සමාවෙන්න “
කෙල්ලට කියා ගත හැකි වූවේ එපමණකි..ඇයට ඉහිලුම් නොහැකි තරම් ඇඬුම් පිට විය…මින් පසු පාසලට මුහුණ දෙන්නේ කෙසේ ද.? යහළුවන්ට මුහුණ දෙන්නේ කෙසේ ද.? ගමට මුහුණ දෙන්නේ කෙසේ ද.? යන ප්‍රශ්නවලට පිළිතුරු නොමැතිව සරණ වූ තරුණිය නොඅඬා ඉන්නේ කෙසේ ද.?
” දැන් ඉතිං උන දේ උනා කොහොම හරි මේ බඩේ ඉන්න දරුවා හදා ගන්න “
දොස්තර මහතා සැනසිලි වදන් එක් කරන්නට විය..ඒ කෙසේ උවත් ප්‍රශ්නය තමන්ගේ වන තුරු පිළිතුර දාර්ශනිකයිලුනේ…මෙයින් පසු ලෝකයට මුහුණ දීමට සිදුවන්නේ තරුණියට තනිව ම ය…
පසුව දෙදෙනා ම ගෙදර ගොස් ගමේ කා හටත් වෙනසක් නොපෙන්වා අර තරුණයාගේ නිවසට පිවිස මේ පිළිබඳ කියා සිටියා ය..
” පිස්සු ද.? මම කොහොම ද දැන් ම ගෑනියෙක් බාර ගන්නේ මටත් හරි හමන් රස්සාවක් නෑ..අනික මේ හම්බ වෙන්න ඉන්න දරුවා මගේ ම කියලා කොහොමද කියන්නේ..? “
‘ ඇයි සුරංජිත් අයියේ එහෙම කතා කරන්නේ.? ඔයයි මායි අතර උන දේවල් ඔයා දන්නවානේ හොඳටම…මම අකමැති උනා ඔයාට මතක ද.? කෝ ඔයා ඒ වෙලේ මට කියපු ආදාර වචන මම ඔයාගේ ජීවිතේ කිව්ව නේ ද.? දැන් ඇයි ඔයාගේ ලෙයින් මගේ කුසට ආපු දරුවා ඔයාගේ නෙමෙයි කියන්නේ.? ‘
” හරි උපදින්න ඉන්න දරුවා මගේ ම කියමුකෝ මම කොහොමද ? දැන් ම කසාදයක් බඳින්නේ මට රස්සාවක්වත් නෑ “
‘ අනේ රස්සාවක් අපි හිමීට හොයා ගමු අයියේ මාව අසරණ නොකර බාර ගන්න වඳින්නම්.! ‘
” මට බෑ “
තරුණියගේ කාරුණික ඉල්ලීම් කිසිවක් තරුණයා නොපිළිගත්තේ ය…ඔහු හිතක් පපුවම් නොමැති අයෙකු යැයි මට සිතිණි..හදවතේ කිසිදු තෙතමනයක් නොමැති මේ වගේ පිරිමි සමස්ථ පුරුෂ පක්ෂයට ම ලැජ්ජාවකි…කොහොම උනත් තමන් අතින් සිදුවූ වරද නිවැරදි කර ගන්නට ඔහු ඉදිරිපත් නොවූනේ ය..එතැනින් පසු අර තරුණිය තවත් අසරණ විය..දිනෙන් දින කළලය විශාල වෙන්නට පටන් ගත්තේ ය…
ඔවුන්ට කෙසේ වෙතත් මට නම් යහපතක් සිදු වේ යැයි සිතුනි…ඉක්මනින් ආත්මයක් ලැබෙනවාට මම ගොඩාක් කැමති ය…එනමුත් දිනෙන් දින තරුණියට ආ ප්‍රශ්න හමුවේ ඇය තව තවත් අසරණ වන්න විය…එතැන දී ඈ කෙරේ අනුකම්පාවක් ජනිත විය..
කළලය දැන් විශාල ය..උදරය ඉදිරියට නෙරා එන්නට විය…දැන් දැන් ගමේ කොයි කවුරුත් මේ පිළිබඳ දැනගන්නට පටන් ගත්තෝ ය..
” අසිලින් හාමිනේගේ මිණිබිරී ගැබ්බර වෙලාලු ..අම්මපා ඇසිලියට මේකිව හදා ගන්න බැරි උනා නෙව..
‘ අවරට මඟුල් විසේ ඔළුවට ගැහුවාම ඔහොම වෙනවා…අනේ මංදා අප්පා කවුද කියලාවත් දන්නේ නැතිලු..’
” සමහරු නම් කියනවා ගුණපාලගේ කොල්ලත් කියලා..හන්දියේ දී නම් කසු කුසුව මේකී හෝටලේක වැඩට ගියාලු එහෙදී උන සංගධියක්ලු මේ “
තරුණිය ගැබ් ගැනීම සම්බන්ධ ව ගමේ මෙසේ විවිධ කට කතා ඇති වන්නට විය..එදා මෙන් ම අදත් ඕපාදූප ප්‍රභල සන්නිවේදන මාධ්‍යක් විය..
ලංකාවේ මිනිස්සු හරි අමුතුයි…කාට හෝ වරදිනකල් බලා සිට ඊට ඇනුම්පදයක් කියා හිනා වෙන්නට ඇත්තං ඔවුන්ට ඊට වඩා දෙයක් නැත….
ගමේ අයගේ මෙම ප්‍රකාශ තරුණියගේ කණ නොවැටී සිටින්නේ කෙසෙ ද ? ඇතැමුන් ඇය දෙස බැලුවේ වෙසඟනක් දෙස බලනා අයුරින් ය…ඒ වෙලාවට ඇය අසරණ බවේ හිරිපෙත්තට ම යන්නී ය…සමාජයෙන් එන විවිධ අපවාද ඉවසා සිටින්න ඈ තුළ තිබූ ශක්තිය එන්න එන්න ම හීන වන ළකුණු පෙනෙමින් තිබුණි…
නිවසින් ද ඇයට කිසි සැලකීමක් නොලැබුනේ තම පවුලට ඇය කළ නීච ක්‍රියාව නිසා ය…
ඒ අතර තුර කීප වරක් ම අර තරුණයා හමු වෙන්නට ගිය තරුණියට ඒ ගිය හැම වරයක ම අසන්නට හැකි වූවේ පෙර පිළිතුරම ය..ඇය තරුණයා හමු වන්නට ගිය අන්තිම දවසේ ඔහු නිවසේ නොසිටියේ ය..නිවැසියන් ප්‍රකාශ කර සිටියේ ඔහු රැකියාවකට කොළඹ ගොස් ඇති බවයි…නමුත් තරුණයා ඩුබායි රට බලා පැන ගොස් ඇති බව ඔහුගේ ම මිතුරෙකුගෙන් ඇයට දැනගන්නට ලැබුනේ ය…
මුලු ලොව ම තමන්ගේ අතින් ගිලිහෙන්නට පටන් ගෙන ඇති බව ඇයට සිතෙන්නට විය..සමාජය ද නිතරම ඇයට අපවාද නගන්නට විය…අසරණ කම සහ තනි කම නිතරම ඇය සමඟම සිටියේ ය..කාලය ගතවත් ම කුසට මාස දෙකක් ගත විය…
කුස නෙරා එන්නාසේ ම සමාජයෙන් ආ අපවාදයන් ද වර්ධනය විය…
මේ සියල්ල ම මා හට විනිවිද පෙනේ..ඇය කුඩා කල තම මව අහිමි විය…කලක් යත් ම පියා වෙන ගැහැනියක් සමඟ පැන ගියේ ය..මිත්තණිය සමඟ හැදී වැඩුණ ද ඇය පිළිබඳ දැඩි ආලයක් මිත්තණිය තුළ ද නොවී ය…මේ සියල්ල ම හේතුවෙන් තමන් වෙත බොරු ආලයක් පෙන්වා මිනිස් වෙසින් ආ රකුසකුට ඇය ක්ෂණයෙන් හසු විය..
දිනක් උදෑසන ඇය බැලීමට මම ගිය මොහොතේ තරමක් කලබයකින් යුතු ව ඇය කුමක් හෝ ලියන සැටි දුටුවෙමි…ඒ ලියන්නේ ලියමනක් බව මට පෙනී ගියේ ය…ඒ අසලම කුප්පියක් විය..එහි “අන්ත්‍රාවයි.! වස” යනුවෙන් සටහන් කර තිබූ බව දුටිමි…මැය ජීවිතය නැති කරගන්නට යන හැඩයි..මට ඉවෙන් මෙන් තේරුම් ගියේ ය….
එනමුත් ගන්ධබ්බයෙක් වූ මා කුමක් නම් කරන්න ද ? ඇය ලියමන ලියා එය මේසය මත තබා වහ බෝතලය අතට ගත්තා ය..අරගෙන මදක් ඒ දෙස බලා…
” අම්මා අප්පා නැති අපට මේ ලෝකේ ඉන්න වරම් නැ…එක බල්ලෙක් මගේ ජීවිතේ විනාශ කළා…ඉතිරි උන මගේ ආත්මය මේ සමාජේ ඉන්න පව්කාර මිනිස්සු විනාශ කළා…මට මේ ලෝකේ මගේ කියලා ඉන්නේ මේ කුසේ ඉන්න දරුවා විතරයි…මට බයියි මේ දරුවටත් මට මේ අත් උන ඉරණම ම කවදා හරි අත් වෙයි කියලා.”
කියමින් ඇය ඉකිබිදින්නට විය…කුස අතගාමින් දරුවාට ආදර බස් මුමුණන්නට විය..ඇගේ දෑසේ වැටෙන්නට තවත් කඳුළු නැත..දෙනෙත වේලී රතු වී ඇත..අතේ ඇති වස මිශ්‍ර කුප්පිය එක හුස්මට ඈ බීගෙන බීගෙන ගියා ය..විනාඩි කිහිපයකින් ඇගේ ප්‍රාණය නිරුද්ද විය…
කලක් බලා සිටි අමිල බලාපොරොත්තුව මා කෙරෙන් දුරු වූවාසේ මට දැණුනි…නැවතත් මම තනි විය..කවදා හෝ මට ම කියා ජීවිතයක් හිමිවන තුරු අන්තර් භවය දුක මිශ්‍ර බලාපොරොත්තුවකින් ගත කරමි…
ස්තුතියි
උපුටා ගැනීම: ප්‍රසන්න මද්දුමසූරිය