” පොඩි එකීගේ මූනත් තඩිස්සි වෙලා “
දවසක් මම යාළුවො එක්ක සෙල්ලම් කරලා ගෙට ගොඩවෙනවත් එක්කම අම්මා මගේ උඩ ඉදං යටට බලලා අක්කට කියනවා මං අහගන .
වටේ පිටේ මම වගේම , යාලුවෝ ටික දෙනෙක් මට ඉන්නවා . ඒ අයත් එක්ක එක එක සෙල්ලම් කරන එක දැන් අපේ පුරුද්දක් . අම්මා නම් ඒ වැඩේට කැමති නෑ .
” අව්වේ නටවලා වෙන්න ඇති “
අක්කා නම් මගේ දිහා නොබලාම , අම්මා කිව්ව දේ ගණනකටවත් නොගෙන අම්මට උත්තරයක් දුන්නා .
අක්කගේ ඒ පිළිතුරෙන් ටික වෙලාවක් නිශ්ශබ්දව හිටි අම්මා , නැවත වතාවක් අක්කට , මට නොතේරෙන මොකක්දෝ දෙයක් කුටු කුටු ගාලා කියනවත් මම අහගන හිටියා .
” නංගි කොයි වේලාවේද කියලා කියන්න බෑ ලොක්කී ……”
අම්මා ඒ මොනවද කියවන්නේ ? මම කොයි වෙලාවේ , මොනවා කරන්නද ? . මම මගෙන්ම ප්‍රශ්ණකර ගත්තා .
හැබැයි අම්මා කියවන කිසි දෙයකට අක්කා නම් උත්තර දෙන්න ගියේ නෑ . අඩුම තරමේ හූමිටි තියන්නවත් ගියේ නෑ . මමත් හොර පුසී වගේ අම්මා කියන්නේ මොනවද කියලා අහගන හිටියා .
” ඊයෙත් තාත්තා මට කිව්වේ නංගිව පරෙස්සමෙන් බලාගන්න කියලා . මේ කාලේ “
තාත්තා ජිවත්වුනේ සව්දියේ . අම්මයි , අක්කයි , මමයි ලංකාවේ . තාත්තා වැඩ කරේ සව්දියේ නිසා ලංකාවට ආවේ ගියේ අව්රුදු දෙකෙන් දෙකට වගේ . මං පුංචි කාලේ ඉදලා තාත්තාව දැකලා තියෙන්නේ කිහිප වතාවයි .
අපේ අක්කා කියන්නේ …. අම්මා ඉක්මනින් තරහා ගන්නා . ලෝකෙට පෙනෙන්න දේවල් කරන කෙනෙක් කියලා . පුංචි උනත් මටත් දැන්නම් ඒක තේරෙනවා .
” ඒ මොකටද ?”
අක්කා ඇහුවේ , අම්මාත් එක්ක කේන්තියෙන් වගේ .
” නංගි ලොකු ළමයෙක් වෙයි කියලා “
එතකොට මම හිටියේ අටේ පංතියේ . අම්මගෙයි , අක්කගෙයි ඒ කතාවෙන් සති දෙකකට පස්සේ අමුතු දෙයක් මගේ ශරීරයෙන් පිට උනා . මමනං ඒ දෙයට ගොඩක් බය උනා . මීට කලින් මම එහෙම දෙයක් දැනගන හිටියෙත් නෑ . හැබැයි ඉස්කෝලේ යාළුවෝ ගොඩක් දවසක් නිවාඩු අරගන ඉදලා , කැවිලි පාර්සලයක් අපිට දෙන්නේ මේ නිසා වෙන්න ඇති කියලා මට තේරුම් ගියා .
එත් අම්මා කිව්වේ ඒ ලෙඩක් නෙවේ …… මම දැන් ලොකු ළමයෙක් වෙලා කියලා .
එදා අම්මා මුලින්ම කරේ මාව කාමරේකට දාලා හිර කරපු එක . ඊට පස්සේ ආච්චිට කෝල් කරලා අඬ අඬා විස්තරය කියපු එක .
කොහොමින් කොහොම හරි අම්මා , නැන්දලා , පුංචිලා , ලොකු අම්මලා හැමෝටම මේ විස්තරේ කිව්වා . ආච්චචීට ඉක්මනින් අපේ ගෙදර එන්න කියලත් කිව්වා .මටනම් ඒ වේලාවේ ලැජ්ජාත් හිතුනා .
” ඔයා කිව්වා හරි සිරී ……..”
ඒ කතා කරන්නේ සව්දියේ ඉන්න තාත්තට . අම්මා මොනවා හරි දෙයක් උන ගමන් කතා කරන්නේ තාත්තාට . තාත්තා වැඩ ද , නිදිද , උදේද , රෑද කියන දේවල් අම්මට අදාල උනේම නෑ . අක්කානම් ඒ වේලාවට කියන්නේ තාත්තා පව් කියලා .
” ලොකුවට ගන්න වෙයි නේද ? අන්තිම කෙල්ලනේ ….”
” හරි මම නැකතක් බලන්නම් , සතියක් දෙකක් කල් ගියත් මොකෝ ….”
” හා …… ලොකු දුව ආපු හැටියේ මම රෙදි නැන්දා මුණ ගැහෙන්න යන්නම් “
මං හිතන්නේ අම්මලා හැමෝටම කියලා ලොකු උත්සවයක් ගන්නයි හදන්නේ . හරියට මීට මාසෙකට කලින් අපි ගියපු බදුල්ලේ නැන්දගේ දුවගේ උත්සවේ වගේ එකක් . ඒක අරගන තිබුනෙත් හෝටලයක.
එත් මටනම් ලැජ්ජාවේ බෑ . මට දැනෙන හැඟීම ගැන අම්මට ගණනක්වත් නෑ . මම බෑ කිව්වත් අම්මා තේරුම් ගනීද ?
ටික වෙලාවකට පස්සේ උදේ පංති ගියපු අක්කා ගෙදර ආවා . අක්කත් මගෙත් එක්ක කතා කරේ මහා අමුතු විදිහට . මට හිතුනේ අක්කටත් මොකක්දෝ කියාගන්න බැරි ලැජ්ජාවක් තියෙනවා කියලා .
අම්මා කිව්වේ අම්මාට වැඩ ගොඩක් තියෙනවා කියලා . එත් අක්කා ගෙදර ආවත් අම්මා , ආච්චී එනකම් ගෙදර නැවතුනා . ඒ අතර එහා ගෙදර සකුනීත් එයාගේ අම්මයි මාව බලන්න ආවා .
අපි කාමරේ ඇතුලේ ඉදං ආයෙත් සෙල්ලම් කරා . සකුනී මට පොරොන්දු උනා ආයේ එද්දි කතා පොත් කිහිපයක් අරගන එන්නම් කියලා . සකුනිටත් තේරුම් ගන්න බැරිව හිටියේ මේ මොකද වෙන්නේ කියලා .
යාන්තම් හවස හය පහු වෙද්දීම ආච්චී අපේ ගෙදරට ආවා . ආච්චී ගෙට ඇතුළු වනවාත් එක්කම මට කාමරයෙන් එලියට දුවගන ගිහිං වෙනදා වගේම ආච්චිව බදාගන්න ඕනි උනත් අද එහෙම බෑ .
එත් ආච්චී ඉක්මනින් මාව බලන්න කාමරයට ඇවා .
” මගේ පොඩි කෙල්ල දැන් ලොකු ළමයෙක් ” කියමින් වෙනදා වගේම ආදරයෙන් මාව බදාගන මගේ හිස සිප ගත්තා .
ආච්චී මාව බදාගන්නවත් සමඟ මට ඉකි ගැසුන හේතුව මටවත් හිතාගන්න බෑ . එත් ආච්චීගේ පපුවේ ඔළුව තියාගන මම ඇඩුව . සමහර විට මට ඇතිවුණු අපහසුතාවය නිසා .
එත් ආච්චී මට කිව්වේ …..
” නාඩා ඉන්න , දැන් මගේ කෙලල ලෝකු ලමයෙක් ” කියලා විතරමයි .
පසුවදා උදේම නැකත් බලන්න පිටවුනු අම්මාත් එහා ගෙදර නැන්දත් ගෙදර ආවේ දවල් දොළහත් පහුවෙලා .
” නැකතක් නම් තියෙනවා ….. එත් අනිද්දා “
අම්මා ආච්චචීට කිව්වේ මුණ නරක් කරගන .
” ඉතිං ….”
මටත් ආච්චීටත් අවශ්‍යවුනේ ඊළගට මොකද වෙන්නේ කියලා දැනගන්න .
” තව නැකතක් ලබන දහ අට වෙනිදා තියෙනවා ….”
අම්මා නැවතත් ආච්චීට එහෙම කියද්දී මම ඉක්මනින් බැලුවේ කැලැන්ඩරය දිහා .
දෙවියනේ ………. අද හත් වෙනිදා , දහ අට වෙන්න තව දවස් එකොළක් තියෙනවා . ඒ කියන්නේ මම මේ කාමරේ අස්සේ දවස් එකොලක් හිරවෙලා ඉන්න ඕනිද ?
” ඇයි කෙල්ල අනිද්දා නාවන්නේ නැතිව , දහ අට වෙනිදා වෙනකම් ඉන්නේ ?”
ආච්චී අම්මාගෙන් ප්‍රශ්ණ කලේ හරියට පොලිසියෙන් වගේ .
” අපේ අන්තිම කෙල්ල අම්මා මේ …… සිරී කොහොමත් කිව්වා නෑදෑයෝ , යාලුවෝ හැමෝටම කියලා උත්සවේ ලොකුවට ගන්න කියලා “
අම්මා නෑදෑයොන්ගේ , යාළුවොන්ගේ , අසල්වසියෝන්ගේ නම් ලිස්ට් එකත් කියවාගන ගියා . ඒ මැදින් මැදින් අක්කා අක්කගේ යාළුවොන්ගේ නමුත් කිව්වා . තාත්තා ලංකාවේ නැතත් තාත්තාගේ යාළුවොන්ටත් ආරාධනා කරන්නයි අම්මාගේ බලාපොරොත්තුව .
මටනම් ඒවා අහගන ඉද්දී හිතුනේ මේ මොන විකාරයක්ද කියලා .
හැබැයි අම්මගේ ඒ කතාව අහගන හිටපු ආච්චී හරිම සාවධානයෙන් අම්මට කිව්වේ එක දෙයයි .
” මට පුතාට කෝල් එකක් අරගන දෙන්න ?”
ආච්චීගේ කිසිම නොගැලපීමක් නැති කතාවට අම්මා පුදුම උනා . හැබැයි අම්මා ආච්චීට මොකුත් නොකිය සව්දියේ ඉන්න තාත්තට කෝල් එකක් අරගන දුන්නා .
ඉන් පසුව ආච්චී කාටවත් නොඇසෙන ලෙස තාත්තා එක්ක කතා කරන්න ගෙදර මිදුලට ගියා .
” කෝ ….. කෝ ….. ඔය වටිනා රත්තරං කරාඹු දෙක ගලවන්න “
ඒ අතර තුර අම්මා මට කිව්වේ හරිම කලබලයෙන් .
” ඒ මොකටද අම්මා ….”
ඇදෙ වාඩි වෙලා හිටපු මම අම්මගෙන් ඇහුවේ පුදුමයෙන් .
” ඒ වෙලාවේ ඇඳගන හිටපු හැමදේම රෙදි නැන්දට දෙන්න ඕනි , රත්තරං දෙන්න බෑනේ . ඒක අපිට පාඩුයි . මේ පෙනුම තියන ඉමිටේෂන් කරාඹු දෙක දාගන්න . අපිට පාඩුවකුත් වෙන්නේ නෑ “
අපේ අම්මා නම් පුදුම කපටි . මට එහෙම හිතුනේ චාරිත්‍ර වාරිත්‍ර වලටත් අම්මා බොරු කරන්න හදන නිසා .
එත් අම්මා මගේ අතට ඉමිටේෂන් කරාඹු දෙක දීලා කුස්සියට ගියේ තේ හදන්න.
ටික වෙලාවකින් කාමරේ හිරවෙලා හිටපු මටත් තේ එකක් හදාගන ආපු අම්මාට ආච්චී කිව්වේ …
” පුතාත් කැමති අනිද්දා නැකතට පොඩි කෙල්ල නාවන්න “
ආච්චී එහෙම කියද්දී අම්මගේ මුණ රතු උනා . ආච්චිත් එක්ක තරහෙන් පුපුරන්න පටන්ගත්තා . එත් අම්මා ආච්චීට කිසිවක් කියන්න ගියේ නෑ . තාත්තා ලඟ නැති නිසා ආච්චී අපේ ගෙදර තීරණ ගනිද්දී මුල් තැනක හිටියා .
” රටටම අඬ බෙර ගහලා මේ කෙල්ලව විහිළුවක් කරන්න දෙන්න බෑ . ඒ නිසා අනිද්දා නැකතට චාරිත්‍ර ටික කරමු . “
ආච්චීගේ තීරණේ දැඩි බවක් තිබුණා . ඒ නිසා අම්මා කිසිවක් කියන්න ගියේ නෑ .
මටනම් හැබැයි හරිම සතුටක් දැනුනා , මහා පිරිසක් ඉස්සරහා මට ලැජ්ජා නොවී ඉන්න පුළුවන් නිසා . මම ආච්චිව නැවත වරක් තද කරලා බදා ගත්තා .
ආච්චී විශ්‍රාම ගත් හෙදියක් . ඒ නිසා ආච්චී සමහර දේවල් දැක්කේ ජීව විද්‍යාත්මක ක්‍රියාවලියක් විදිහට . ටික වෙලාවකින් ඒ ජීව විද්‍යාත්මක ක්‍රියාවලිය මට නිවැරදිව පැහැදිලි කරලා දුන්නා . අපේ ශරීරය ටිකෙන් ටික වෙනස් වෙන විදිහ ආච්චී සරලව මට පැහැදිලි කරා .
ආච්චිට පුතුන් තිදෙනෙක් විතරක් ඉන්නා නිසා ආච්චි ගැහැණු දරුවන්ට වඩාත් සෙනෙහසක් ලබා දුන්නා . වෙලාවකට හිතෙනවා මම ආච්චීගේ දුවෙක් වූවානම් කියලා . ආච්චී එතරම් මගේ හැගීම් තේරුම් ගත්තා .
ආච්චිත් එක්ක සමහර දේවල් කතා කරමින් ඉද්දී , මීලගට මාව බලන්න ආවේ රෙදි නැන්දා .
හරිම සුන්දර සිනහවක් මුණේ පුරෝගන ආපු රෙදි නැන්දට ආච්චී සුහද විදිහට සැලකුවා . ඉන් පස්සේ රෙදි නැන්ද මගේ කනේ තිබු කරාඹු දෙක , ඒ මොහොතේ ඇද සිටි ගව්ම වගේ දේවල් ඉල්ලා ගත්තා . රෙදි නැන්ද ඒවා ගෙදර අරගන යනවලු . හේතුවනම් මම දන්නේ නැහැ හැබැයි .
ඉන් පසුව ඇඳ යට බෙහෙත් ද්‍රව්‍ය පිරවූ කලයක් තැන්පත් කෙරු ඇය , අනිද්දා නැකතට සිදුකරන චාරිත්‍ර වලට අයත් බඩු මුට්ටු ලැයිස්තුවක් අච්චීට ලබා දුන්නා .
අනිද්දා උදේ නැකතට නෙවරදීම එන බව දැනුම් දුන් ඇය , අවසානයේදී තේ කෝප්පයක් පිරිනමුවාට අම්මට ස්තුතී කරා .
” මෙච්චර දවසක් මට ලැබුනේ ඉමිටේෂන් කරාඹු නෝනේ …… නෝනලා විතරයි මේ රත්තරං දෙකක් දුන්නේ . මිනිස්සු කපටි කමට ඒ මොහොතේ කනේ තියන රත්තරං ගලවලා ඉමිටේෂන් දානවා “
රෙදි නැන්දා එහෙම කියදී හිස් තේ කෝප්පයක් අතේ තියාගන හිටපු අම්මාගේ අතින් කෝප්පය අතහැරෙන්නත් ගියා . අම්මගේ ඇස්‌ ලොකු උනා . කම්මුල් , කන් පෙති රතු උනා .
එත් ඒ සියළු දේවල් අම්මා , අම්මගේ සිනහවෙන් වසා ගත්තා . කිසිවක් නොකියූ අම්මා රෙදි නැන්දට හිස නමා කට පුරා සිනාවුණා .
” චාරිත්‍ර වලට මොකට බොරු කරනවද ? ලොකුවට පාර්ටි ගන්නවාට වඩා චාරිත්‍ර ටික හරියට අපි කරමු “
එතෙක් නිශ්ශබ්දව සිටි ආච්චී , රෙදි නැන්දට කිව්වේ …. ආච්චිත් මමත් සිදුකරපු හොර වැඩේ අම්මට තේරෙන ලෙසටයි . එනිසා එතැනින් පසු අම්මා ආච්චිටවත් , මටවත් , සව්දියේ සිටින තාත්තටවත් කිසිවක් නොකීවාය .
අම්මා සිදුකල එකම දේ අනිද්දා චාරිත්‍ර පමණක් සිදු කිරීමට ලහි ලහියේ සුදානම් වීම පමණයි .
උපුටා ගැනීම: – හසිකා විජේතුංග –