ආදරණීය දෙමාපියනි ඔබේ දරුවාත් විභාග භීතියෙන් පෙලෙන්නේද…? (වැල් වටාරම්)

පසුගිය වසරේ එනම් 2019 වසරේ අ.පො.ස. උසස් පෙල විභාගය ට පෙනීසිටීමට අපේක්ෂාවෙන් සිටින බාලිකා පාසලක දියණියක මා මුන ගැසීමට රැගෙන එන්නේ ඇගේ දෙමාපියන් විසිනි . අය තද බල මානසික පීඩනයට ලක්වී සිටියාය . ඇය රවිදි ලෙස හදුන්වමි .

මම රවිදි ට කාරුණිකව අමතා ඉදගැනීමට සැලැස්සුවා පමනි. ඇය දෑතින් මුහුණ වසාගෙන අඩන්නට වූවාය . ඇයට මදක් හඩන්නට ඉඩහැර මම හඩ අවදි කලෙමි.

” රවිදි ඉන්නේ ලොකු පීඩනයකින් නේද අපි ඒ ගැන කතා කරමුද “…..

රවිදි ගේ කතාව මෙසේය . ඇය අ.පො.ස.සාමාන්‍ය පෙල විභාගයෙන ඒ සාමර්ථ 9 යක් ලබා ප්‍රධාන පෙලේ බාලිකා පාසලකට ඇතුලත වන්නේ වෛද්‍යවරියක් වීමේ දැඩි අපේක්ෂාවෙනි. විභාගය ට ඇත්තේ තව මාස පහකි. ඇය රාත්‍රි කාලයේ නිදාගන්නේ නැත . අලුයම 4 සිට 6.30 දක්වා කාලය තුළ පැය දෙකහමාරක් පමනක් නිදාගනී. නිදා ගැනීමට ඇදට ගියද බොහෝ විට ඇයට නින්ද යන්නේ ද නැත . සමහර දිනවලදී පාන්දර එක දෙක පමන වෙද්දී හිස රත්වීමක් සිදුවෙයි එවිට ඇය කරන්නේ හිස තෙමා ගැනීමකි . ඇය සෑම දිනකම තමාගේ පාද වතුර බේසමක් තුල බහාගනි. රවිදි ආහාර ගන්නේ ද කිසියම් හෝ පාඩම් කටයුත්තක නියැලෙමිනි. මේ අයහපත් දිනචරියාව නිසා රවිදි ඉතාමත් තදබල ලෙස මානසික පීඩනයට පත් ව සිටියාය. මෙය අධි අපේක්ෂාව නිසා ඇතිවූ ක්ලමථ තත්වයකි.

—————————————————————-

රවිදි වැනි අධි අපේක්ෂිත තත්ත්වයේ පසුවන දරුවන් කොතෙකුත් ඇත . නිවැරදි ලෙස පාඩම් නොකලහොත් විභාග ජය ගැනීමට හැකියාවක් නොමැත . ස්වභාදහමේ චක්‍රයට අනුව සියල්ල සිදුවිය යුතුය . මොලයේ ක්‍රියාකාරිත්වයට නින්ද අනිවාර්යයෙන් ම අවශ්‍ය වන්නේ ය. රාත්‍රි 10 සිට අලුයම 4 දක්වා කාලය තුළ මිනිස් මොලය විවේක ලබා ගනී. එම කාලය තුළ කරනලද පාඩම් කටයුතු අසාර්ථක වෙයි.

රවිදි ට ඇත්තේ අසාමාන්‍ය තත්ත්වයකි. එමනිසා විභාගය සමත් වීමට නම් ඇගේ මෙම ක්‍රමය වෙනස් කල යුතුය . රවිදි මානසික ව පමනක් නොව ශාරීරිකවද ඇය පිරිහීමට පත්ව සිටියාය . මේ සියලුම දේ සිදුවූයේ ඇගේ විභාග භීතිය නිසාය .

විභාගය ජය ගැනීමට ඉලක්ක තිබිය යුතුය . එම ඉලක්කය නිශ්චිත ඉලක්කයක් විය යුතුය . අධි අපේක්ෂිත නොවිය යුතුය . එය තමාගේ වර්තමාන තත්ත්වයට හා සවුක්‍යට ගැලපිය යුතුය . එම ඉලක්ක සදහා ප්‍රායෝගිකව ලගාවීමට හැකියාව තිබිය යුතුය .

රවිදි ගේ තත්ත්වය සුවපත් කිරීමට නම් ඇය අඩුම වශයෙන් සියලුම පාඩම් කටයුතු නවතා සතියක් පමණ විවේක ලබා ගත යුතුය . මානසික තත්ත්වය යහපත් වීමට සුවදායි නින්ද අනිවාර්යය වේ .

එසේම පොත් මේසය ද නිශ්චිත අයුරින් සකසා වැඩි පොත්පත් මේසය තුලින් ඉවත්කර සුවද හමන මල් බදුනක් මේසය මත තබා රවිදි ගේ කාමරය තුල ඇති අනවශ්‍ය දේ ඉවත් කර නිදහස් ලෙස තැබීමට රවිදි ට උදව් කරන ලෙස දෙමාපියන් දැනුවත් කලෙමි. සතියක් ගත වීමෙන් පසුව මුලින්ම සoයම අභ්‍යාසවල නිරත වෙමින් කාලසටහනකට අනුව පාඩම් කිරිමට ත්, දිනකට ගීත වලට සවන්දීමටද වෙලාවක් වෙන්කර දුනි. රාත්‍රි 10 න් පසු පාඩම් කටයුතු නොකරන ලෙසත් පාන්දර 4 ට පෙර අවදි නොවිය යුතු බවටත් දැනුවත් කෙරිනි.

විභාගය සමත් වීමට නම් මතකය අනිවාර්යයෙන් ම තිබිය යුතුය . මතකය ප්‍රධාන වශයෙන් කොටස් තුනකි. ක්ෂණික මතකය, කෙටිකාලීන මතකය, හා දිගුකාලීන මතකයයි. විභාග අපේක්ෂිත සිසුන්ට කෙටිකාලීන මතකය ට වඩා වැදගත් වන්නේ දිගුකාලීන මතකයයි . දිගුකාලීන මතකය එක් දිනකින් ඇතිකර ගත නොහැකිය . දිගුකාලීන මතකයේ ධාරිතාවය සීමාවක් නැත . එනිසාම බොහෝ දේ දිගුකාලීන මතකයේ තබාගත හැකිය. ඉගෙන්ගත්තු දේ ඒ දිනයේම නැවත නැවතත් කියවීම , කෙටිසටහන් තබා ගෙන නැවත නැවත කියවීම. බොහෝවිට අපි නැවත නැවත කරන දේ දිගුකාලීන මතකයේ රැදේ.

අමතක වන බොහොම කරුනු තමා ප්‍රිය කරනවර්ණ වලින් ලියා පාඩම් කරන කාමරයේ එල්ලීම තුලින් ද ඒවා දිගුකාලීන මතකයට එකතු වෙයි.

විභාග ජය ගැනීමට නම් නිතරම සුභවාදී සිතුවිලි තුළ සිටිය යුතුය . එවිට අධ්‍යාත්මික සoවර්ධනය තුලින් ආත්ම සoයමය ඇතිවේ. චිත්තවේග පාලනය කිරීම බුද්ධියේ ක්‍රියාකාරිත්වයට විශාල පිටුවහලක් වෙයි. කේන්තිය , ඊර්ෂ්‍යාව , ක්‍රෝධය , පලිගැනීම් , කලකිරීම, සටන්කාමීත්වය හා දුක වැනි චිත්තවේග ඇතිවීම නිසා නොසන්සුන් මනසක් ඇතිවෙයි. එවිට අපේක්ෂිත අරමුණට ලගාවීමට නොහැකිය .

නූතනයේ තම පැවැත්ම උදෙසා එකිනෙකා පරයා කෙසේ හෝ ඉදිරියට යාම අධ්‍යාපනය ප්‍රධාන මාධ්‍ය බවට පත්වී ඇත . මෙයින් ජය ගන්නෝ මෙන්ම අසාර්ථක වන්නෝද අතිමහත්ය .

අසාර්ථක වීම වලක්වා ගැනීමට හා භීතියට පත් වූවන් ට මානසික සහනයක් සැලසීමට මනෝ විද්‍යාත්මක උපදේශනය හා මනෝ ප්‍රතිකාර ගැනීමෙන් ඔබට හැකියාව ලැබෙනු ඇත.

උපුටා ගැනීම:    ශාන්ති කුමාරි ජයනෙත්ති

                       ජේෂ්ඨ මනෝ උපදේශක හා මනෝ චිකිත්සක