මේ සිද්ධිය සිද්දවුණේ මං නමය වසරේ ඉඳිද්දී. අටේ ඉඳන් නමයට පාස් උනාට පස්සේ ඒ කාලෙ කෙල්ලක් අපේ පංතියෙ හිටියා ලස්සන සුදු ගෑණු ලමයෙක්. අපි එයාට සඳුනි කියමු. කොහොම හරි මෙයා ඉතින් පංතියෙ හෙන බ්රයිට් කේස් එකක්. ඉතින් පංතියෙ ගොඩක් කොල්ලොන්ගේ ඉඟිබිඟි වලට නිතර නිතර ලක් වුණ කෙල්ලෙක් තමයි සඳුනි කියන්නේ.
ඉතින් අලුත් පංතියෙ ලමයි ටික කාලයක් යද්දි හොඳට අඳුරගත්තා. සඳුනි කියන්නෙ කාත් එක්කති හොඳින් කතා බහ එහෙම කරලා සතුටින් හිටපු චරිතයක්. ඉතින් මාත් ඒ වගේ කටපියන් ඉන්න බැරි චරිතයක් වුන නිසාම වෙන්නැති සඳුනි ටික කාලෙකින් මගෙත් හොඳම යෙහෙලියක් වුණා.
සඳුනි මං එක්ක කොච්චර පිට් උනාද කිව්වොත්, ටී.වී. එකේ කලින් දවසෙ යන චිත්රපටියේ ප්‍රධාන නලුවා මං වගේ කියලා මට නිතරම කියනවා.මං ඇඳන් එන ඇඳුම් කොණ්ඩෙ කපන හැටි සෑහෙන්න ඒ කාලෙදි වර්ණනා කරා. අපේ අම්මවත් මං එච්චර ලස්සනයි කියලා කියන්නැතුව ඇති. කෙසේවෙතත් මොකක්හරි මගේ අහේනියකට මට ඒකිගෙ ආලවන්තකම් පාපුවා ඒකාලෙදි තේරුනේ නෑ.ගිය නුවණ ඇතුන්ලවාවත් අද්දවන්න බෑ කියනවනේ. තාමත් මං තනිකඩයි ඒ නිසා.
මං සඳුනි මගේ හොඳම යාලුවා කියලා තමයි හිතන් හිටියේ. ඒ කාලෙදි මගේ එහාපැත්තෙ හිටිය කොල්ලා අපි හඳුන්වමු තරිඳු කියලා. තරිඳු කියන්නේ සුදු ලස්සන උස කොල්ලෙක්. ඒ යකා සඳුනිට කැමතියි කියලා මාත් එක්ක කිව්වා. ඒ මදිවට පොර මට එක එක කෑමජාති අරන්දෙනවා. දවසක් මට කොම්පීටරේකුත් අරන් දෙන්නම් කිව්වා.
කොම්පීටරේ නැතත් යාලුවා නිසා මං සඳුනිව සෙට් කරලා දෙන්නම් කියලා මේ මෝඩ තරිඳුව ලව්වා සඳුනිට කැමතියි කියෙව්වා. මෙන්න බොලේ මේකි ගත්කටටම අරූට බෑ කිව්වා. වැඩේ ලත් තැනම ලොප් වුණා. පස්සේ සඳුනි ගාවට ගිහින් මාත් ගොනා වගේ ඇහුවා තරිඳුට කැමති නැද්ද කියලා.ඒ පාර නම් සඳුනි මන් දිහා රවලා බැලුව පාර මං කටපියාගෙන හැරිලා ගියා.
දැන් ඉතින් මේ පෙම් පලහිලව්ව මුලු පංතියම දන්නවා. කොල්ලො ටික ඉතින් මුගෙ ලව් එක ගොඩ දාන්න ප්ලෑන් කරන ගමන් හිටියේ ඒ අතරේ එකපාරටම මගේ ඉස්සරහ හිටිය එකා මට පිටිපස්ස හැරෙන්නෙපා කියලා කිව්වා. පොඩිකාලෙදි අපි එපා කියනදේමනේ කරන්නේ. ඒ නිසා මාත් සුපුරුදු පරිදි හැරුනා.
මෙන්න බොලේ සඳුනි මට බැනගෙන බැනගෙන යනවා… මට හිතාගන්න බෑ මගෙ බොක්ක වගේ හිටපු එකී මෙච්චර බනින්නේ ඇයි කියලා. ඒ බැනපු වේගෙට මට ඇහුනේ ‘තමුසේ’ කියන වචනේ විතරයි. කොටින්ම කිව්වොත් මං පුටුවෙ ඉන්දවුනා බැනපු බැනිල්ලට.
මං හිතන්නේ එදායින් පස්සේ සඳුනි ටී.වී. බලන එකත් නවත්තන්න ඇති නැත්තන් චිත්රපටි වල ප්රදාන නලුවා මට වඩා කැත වෙන්නැති.
ප.ලි.- මේ ලඟදි මගෙ දඬුමොනරේ ගෙදර දාලා බස් එකේ යන්නවුණ වෙලාවක මට සඳුනියි තරිඳුයි බස් එකේදි හම්බුනා. දෙන්නා අත් පටලන් පෙම්මුල්ලේ මුකුලු කර කර ගියා මාව අඳුරන්නෑ වගේ. මාත් මොකටද සෙකන්ඩ් වෙන්නේ.ඒකි හොරෙන් බලද්දි මාත් මගෙ පෝන් එකේ වෝල් පේපරේ බල බල කට කොනින් හිනා වෙවී බස් එකේ ගියා…
උපුටා ගැනීම: කලාබර රුවිතසේන