2021 අලුත් අවුරුද්ද ආරම්භ වුණේ ආර්ජෙන්ටිනා කාන්තාවන්ට විශාල ජයග්‍රහනයක් අත්පත් කර දෙමින්. ඒ තමයි ගබ්සාව නීතිගත කිරීමේ පණත් කෙටුම්පතට ආර්ජෙන්ටිනා කොංග්‍රස් මණ්ඩලයේ අනුමැතිය හිමවීම.
ගැබ්දැරීමේ කාලය සති 14 ක් වන තෙක් ගර්භනී කාන්තාවන්ට තම කළලය ගබ්සා කිරීමට අවසරය ලැබන මෙම පණත් කෙටුම්පතට පක්ෂය ඡන්ද 38 ක් සහ විපක්ෂව ඡන්ද 29 ක් ලැබුණා.
මෙම නව පණත සම්මත වන තෙක්ම ආර්ජෙන්ටිනාව තුළ ගබ්සා කිරීමේ අවසර ලැබිලා තිබ්බේ දූෂණයට ලක්වීමක් හෝ මවගේ ශරීර සෞඛ්‍යයට අවධානමක් මතුව තියෙද්දි විතරයි.
ලතින් ඇමෙරිකාවේ අනෙක් රටවල් වගේම ආර්ජෙන්ටිනාව තුළත් වැඩිම බලයක් තියෙන්නේ කතෝලික පල්ලියට. ඒ නිසාම වාමාංශික නැඹුරුවක් සහිත නව ජනාධිපති ඇල්බර්ටෝ ෆර්නැන්ඩස් ඉදිරිපත් කරපු ගබ්සා නීතිගත කිරීමේ පණතට විරුද්ධව ඡන්දය පාවිච්චි කරන්න කියලා කතෝලික පල්ලිය සියලුම සෙනෙට් සභිකයන්ගෙන් ඉල්ලීමක් කරලා තිබ්බා. ඒත් මෙදා පාර නම් පණතට සහයෝගය දක්වමින් කොළ පැහැති ලේන්සුවලින් මුහුණ ආවරණය කරගෙන මහා මාර්ගයට ආපු ලක්ෂ සංඛ්‍යාත කාන්තාවන්ගේ හඬ යටපත් කරන්න නම් කතෝලික පල්ලියට පුලුවන් වුණේ නැහැ.
ආර්ජෙන්ටිනාව තබපු මේ යෝධ පියවර, චිලී සහ බ්‍රසීලය වැනි කලාපයේ අනෙක් රටවල වෙසෙන කාන්තා ක්‍රියාකාරීන්ටත් විශාල ධෛර්යයක් ලැබිලා තියෙනවා කියලා තමයි ජාත්‍යන්තර මාධ්‍ය වාර්තා කරන්නේ.
ලතින් ඇමෙරිකා කලාපයේ එල් සැල්වදෝරය, නිකරගුවාව සහ ඩොමීනිකන් ජනරජය වගේ රටවල ගබ්සාව සම්පූර්නයෙන්ම තහනම්. ඒ රටවලදී ගබ්සාවකට අවසර ලැබෙන්නේ දූෂණයට ලක්වීමේදී හෝ කාන්තාවගේ ජීවිතයට අනතුරක් එල්ල වීමේදී පමණයි.
ලතින් ඇමෙරිකාවේ ගබ්සාව නීතිගත කරලා තියෙන්නේ උරුගුවේ, කියුබාව, ගයනාව සහ මෙක්සිකෝවේ එක කොටසක පමණයි.
ඇත්තටම තමන්ගේ ශරීරය සම්බන්ධයෙන් තීරණයක් ගැනීමේ අයිතිය තියෙන්න ඕනේ ඒ ශරීරය අයිති කෙනාට. එහෙම නැතුව පල්ලියට හෝ පන්සලට නෙමෙයි. අනික තමන්ට අවශ්‍ය නැති වෙලාවට බඩට එන ළමයෙක් මේ ලෝකෙට ගේනවද? නැද්ද කියන එක සම්බන්ධයන් තීරණයක් ගැනීමේ නිදහස ඒ කාන්තාවට තිබිය යුතුයි.
ලංකාව වගේ රටක නම් මේ විදිහට හිතන එක සහ ගබ්සාවට පක්ෂව මේ විදිහට ලියන එකත් ඉතින් හෙන ගහන අපරාධයක්… ඒත් මම කැමැතියි හෙනයක් ගහලා මැරෙන්න… ඒකයි ලිවුවේ…