මේ සඳහා සාර්ථක දේශීය ප්‍රතිකාර තිබෙන බව දන්නවා ද?
******************************************
යකෘතය හෙවත් අක්මාව යනු ශරීරයේ ජෛව ක්‍රියා අතිවිශාල සංඛ්‍යාවක් ඉටු කරන, ප්‍රතිශක්තිය හා පරිවෘත්තීය යහපත් ලෙස පවත්වා ගැනීමට දායක වන ඉතාම වැදගත් හා සංකීර්ණ ඉන්ද්‍රියකි. එය නිසි ලෙස රැකබලා ගැනීම යනු නිරෝගී ජීවිතයකට මෙන්ම දීර්ඝායුෂ ලැබීමට ද හේතුවක් වනු ඇත. වැරදි අහාර පුරුදු, අහිතකර කෘත්‍රිම ආහාර, කුසීත ජීවන රටාව, දීර්ඝ කාලීන බටහිර ඖෂධ භාවිතය, දියවැඩියාව නිසි ලෙස පාලනය නොකිරීම, රුධිරයේ අධික කොලෙස්ටෙරෝල් වැනි තත්වයන් නිසා අක්මාවේ ක්‍රියාව දුර්වල විය හැකිය. Fatty Liver හෙවත් අක්මාවේ මේදය තැන්පත් වීම ද අක්මා ක්‍රියා හානියේ එක්තරා අවස්ථාවක් වන අතර එය පවතින මට්ටම අනුව යථාතත්වයට ගෙන ඒමේ ප්‍රතිකාර සිදු කළ යුතුය.
අහිතකර ආහාර පුරුදු වෙනස් කරන්න.
=============================
* ගැඹුරු තෙලේ බදින ලද ක්ෂ්ණික ආහාර වර්ග, කෘත්‍රීම රසකාරක හෝ වෙනත් රසායනික ද්‍රව්‍ය යෙදූ ආහාර, අධික තෙල් සහිත ආහාර
* විශේෂයෙන් ම පොටැටෝ චිප්ස් හෝ ෆ්‍රෙන්ච් ෆ්‍රයිස් වැනි ආහාර
* හරක් මස්, බැටළු මස්, එළු මස්, ඌරු මස් වැනි මස් වර්ග ඉස්සන්, දැල්ලන්, කකුළුවන්, බෙල්ලන්, පොකිරිස්සන් වැනි මුහුදු ආහාර මෙන්ම චිකන් සම හා ලිවර් වැනි ආහාර
* ෆ්‍රයිඩ් රයිස්, කොත්තු වැනි ආහාර හා ඒ සමඟ ගනු ලබන චිලි පේස්ට් හා සෝස් වර්ග
* පාන්, පරාටා, ඉඳිආප්ප, ආප්ප වැනි තිරිඟු පිටි සහිත ආහාර
* කේක්, පුඩිං, වටලප්පන්, අයිස්ක්‍රීම්, මිල්ක් ෂේක්, ආදී අධික පෑණි රස ඇති සීනි සහිත ආහාර පාන
* කිරි පිටි, මුදවපු කිරි, බටර්, මාගරින්, චීස් වැනි ආහාර
පරිභෝජනය හැකි තරම් අවම කිරීම හෝ ඒවායින් හැකි තාක් දුරට වැළකීම අවශ්‍ය වේ.
* ආහාර පිසීම සඳහා ශාක තෙල් හො සත්ව තෙල් භාවිතය අවම කළ යුතුය.
හානිකර ජීවන රටාවෙන් මිදෙන්න
==========================
* .උදෑසන කලින් අවදි වීමත් රාත්‍රී කලින් නින්දට යාමත් ප්‍රමාණවත් නින්දක් ලැබීමත් අවශ්‍ය වේ. නිකරුණේ දිවා කාලය තුළ නිදා ගැනීම නොකළ යුතුය .
* කුසීත දෛනික චර්‍යාව වෙනස් කිරීමට අවම ලෙස මිනිත්තු 30- 40 ක් හොඳින් ඇවිදින්න. වෙනත් ක්‍රියාකාරකම් හරහා හොඳින් දහදිය පිට කරන්න. සුදුසු යෝග ව්‍යායාම වල යෙදිය හැකි නම් ඉතා හිතකර වේ.
* මානසික ආතතිය අඩු කර ගැනීම සඳහා සිත සැහැල්ලුවෙන් තබා ගන්නා අභ්‍යාස වල නියැලීම සුදුසුය.
* මද්‍යසාර වර්ග භාවිතයෙන් සම්පූර්ණයෙන්ම වැළකිය යුතුය.
*දුම්වැටි හා දුම්කොළ භාවිතයෙන් වැළකිය යුතුය.
*වෙනත් මත්ද්‍රව්‍ය භාවිතය නොකළ යුතුය.
සෞඛ්‍යමත් ආහාර වලට හුරුවන්න
============================
* හීනැටි, සුවදැල්, මඩතවාලු, පච්චපෙරුමාල් වැනි පාරම්පරික සහල් වර්ග ආහාරයට ගන්න.
* හීං බෝවිටියා, එළපිටවක්කා, මදටිය, මොණර කුඩුම්බිය, යකිනාරන් කොළ හීනැටි හාල් සමඟ කැඳ පිස පානය කරන්න.
* ගොටුකොළ, සාරණ, කිරිහැන්ද, කිරිඅඟුණ, තම්පලා, නිවිති, මුගුණුවැන්න වැනි පළා වර්ග ආහාරයට එක් කිරීම ඉතා සුදුසු ය.
* වැටකොළු, පතෝල, කැකිරි, පිපිඤ්ඤා, කරවිල, මුරුංගා, බණ්ඩක්කා, ගෝවා, නෝකෝල්, රාබු වැනි එළවළු නිතිපතා ආහාරයට ගන්න. මේවා තම්බා රාත්‍රී ආහරය සඳහා ගැනීම යෝග්‍ය වේ.
* මුංඇට පැළ කර ආහාරයට ගන්න. කොල්ලු හෝ මුංඇට තම්බා ආහාරයට ගැනීමත් එම වතුර පානයත් සුදුසුයි.
* රණවරා, බෙලිමල්, කොත්තමල්ලි වැනි ඔසු පැන් තේ කෝපි වෙනුවට භාවිතා කරන්න.
* උළුහාල්, සුදුළූණු තම්බා සතියකට දෙවරක් බොන්න.
වෛද්‍යමය උපදෙස් පිළිපදින්න
=======================
* රුධිරයේ ග්ලූකෝස් හෝ කොලෙස්ටෙරෝල් මට්ටම වැඩිවීමක් ඇතිනම් සුදුසු වෛද්‍ය උපදෙස් අනුව ආහාර පාලනයක් සහිතව ආයුර්වේද ඖෂධ භාවිතා කරන්න.
* රුධිරයේ ග්ලූකෝස් හෝ කොලෙස්ටරෝල් මට්ටම වැඩි වී ඇති විට, විශේෂ හේතුවක් නොමැතිව උදය අවදි වන විට පාදයේ වළලු කර ප්‍රදේශ ඉදිමී ඇති බව, මූත්‍ර වල වර්ණය අඳුරු පැහැ වීම, ඔබට වෙනදාට වඩා වෙහෙසකාරි බවක් දැනීම, අසාමාන්‍ය ලෙස බර අඩුවීම වැනි ලක්ෂණ තිබේ නම් Ultrasound Scan Report, Liver Profile පරීක්ෂා කර අක්මාවේ තත්වය සහ ක්‍රියාකාරිත්වය සහතික කර ගන්න..
* කිසියම් අසනීපයක් සඳහා දීර්ඝ කාලීනව බටහිර ඖෂධ භාවිතා කරයි නම් අනිවාර්යයෙන් අක්මාව පරීක්ෂා කිරීම ආරක්ෂාකාරී වේ.
* අතිස්ථූලතාවය සහිතව දියවැඩියාව, කොලෙස්ටෙරෝල් වැනි තත්වයන් ගෙන් පෙළෙයි නම් අනිවාර්යයෙන් අක්මාවේ තත්වය පරීකෂා කර ගත යුතුය.
* ෆැටි ලිවර් යනු අතපසු වීමෙන් හා නොසලකා හැරීමෙන් ක්‍රමයෙන් සිරෝසීස් දක්වා වර්ධනය විය හැකි තත්වයක් නීසා මේ ගැන අවධානය යොමු කළ යුතුය.
ෆැටි ලිවර් දේශීය ප්‍රතිකාර මගින් සුව කළ හැකිය.
====================================
විශේෂයෙන් ම පළමු අවස්ථාවේ පවතින ෆැටි ලිවර් තත්වය ආහාර පාන හා ජීවන රටාව වෙනස් කිරීමෙන් සුව කළ හැකිය.
දෙවන අවස්ථාව හෝ ඉන් පසු වෛද්‍ය උපදෙස් හා දේශීය ඖෂධ මගින් සුව කළ හැකිය.
දේශීය වෛද්‍ය ප්‍රතිකාර වලින් මෙම රෝගය සුව කර ගැනීමටත් අක්මාව යථා තත්වයට පත් කර ගැනීමටත් හැකි වේ.
උපුටා ගැනීම
වෛද්‍ය ඩැනිස්ටර් එල්. පෙරේරා