ඇලජික් ලොජික්… (වැල් වටාරම්)

හරිගියේම නෑ ගහල ගහල කැව්වම පහුවදා දවසම ලැට් එකේ, කාල පැයෙන් කැරකිල්ල.. පස්සෙ තාත්ත අතෑරල දැම්ම ට්‍රයි එක. තාත්ත එක්ක මගුල්ගේක ගියත් අපි දෙන්න එකට කන්න ඉදගත්තම වෙරි මරගාතෙ හරි කමන්නෑ වටේම පිඟන්වලට බැල්මට් එක දාන සමාර ඕප ඩෑල්

“පුතා මස් බෙදන් කන්න” කිව්වම තාත්ත කියනවා

” ඕකට කෑවොත් රෙන්ඩබරයි කැරකිල්ල” කියලා අදටත් යාළුවො අතර නොදන්න කෙනෙක් ඇහුවොත් අපේ උන් දෙන උත්තරේ ඕක.

මස්මාළු නොකෑම කෙසේවෙතත් “කන්නෑ” කියන වචනෙ ඇහෙනවත් එක්කම අහන් ඉන්න බහුතරයක් ඔළුවෙ අදහසක් මවාගෙන ඉවරයි

“මූ උපාසක” කියලා. ඇලජික් එකක්ද මොනාහරි බෙහෙතක් බොනවද. ආදී වෙනත් කිසිම කාරණයක් දෝ නොහිතා සං සුං පිං පිං… පව් සිද්ධවෙන හින්දනෙ නොකන්නෙ අදහස අටුවම් බැහැලා ඉවර කොරගන්නවා. කෑලි නොකා හොදි කනවද කියා බොහෝ සැලකිමත් වෙනවා. එනිසා මස්මාලු නොකෑම කෙසේ වෙතත් උන්ට පහදලා දෙන්න ගියහම නම් ඇගේ මාළු නටන්න පටන් ගන්නවා..

මුල්කාලෙ මත්පැන් ටිකක් බොන තැනක හිටියම සමාර රටේ වෙදාල එකේක ජාතියෙ ආයුර්වේද, චීනකටු, හෝමියෝපති,ටෙලිපති, හමුදාපති, වගේ සෑම ක්ශේත්‍රයකම පරතෙරට ගියා වගේ ඉන්න අපේ වෘත්තීය බේබද්දො කියනව

” ආ ඕ…..ක හරියනව මල්ලි ශොට් එකක් දාගෙන බයිට් එකට කන්න පටන් ගන්න මාත් ඉස්සර කන්නෑ පස්සෙ බොන්න ගත්තමයි පුරුදු උනේ “

එහෙම බොද්දි මස්,මාලු කන්න පුරුදු වෙච්ච ඩෑල් මට ඉහේ කෙස් ගානට ⁣හම්බෙලා තියනව

හැබැයි බයිට් කනව වෙනුවට මං ආසකලේ පැණිරස කන්න (මස්කට් පැණිබූන්දි තියනව මගෙ කාමරේ..) ඉතිං බයිට් වලින් පුරුදු වෙන්නත් බැරි උනා

මාළු

.. හොදි හට්ටියක් ඇරල බැළුවත් බොක්ක දොට්ට එන සයිස්.. හැබැයි මාළු බාන්න පට්ටම ආසයි. මාළුවෙක් අහුඋනාම උස්සගෙන දුවනවා බිලී පිත්තත් අරන් ගලවන්න පුළුවන් එකෙක් ගාවට… තාත්ත බිලී කටුව කව්වන්ඩහදල තියනවා ”මූසලයා තෝ කනවනම් විතරක් අල්ලපිය” කියලා

පස්සෙ මගෙ යාළුවන්ගෙ ඉතාමත් දරුණු නිරීක්ෂණය අනුව මාවැනි කාලකන්නියෙක් ගිය දවසට මාළු කිලෝ එකක්වත් අල්ලන්න නොහැකි නිසා අපේ උන් මාව හලල යන්න ගත්තා

පෑලියගොඩ මාළුකඩේට හැතැක්ම 6ක් ඇති දවසක් දානෙගේකට මාළු ගේන්න ගියා මාළු කඩේ.. හප්පට බිම තියනව පියාමැස්සො, හාල්මැස්සො, නිලමැස්සො, නානා පාට, නානා විදි, නානා ශරීරප්‍රමාණ මාළු.. බොලේ මට දැනෙනව මිනිස්සු මරල දාල තියන කනත්තක් මැද වගේ. ටිකකින් ඔළුව කැරකෙන්න ගත්තා දඩ බඩ ගාල එලියට ඇවිත් අනිත් අය එනකම් හිටියා. ඊට පස්සෙ මම මාළුකඩේ ඇතුලට ගිහිල්ලත් නෑ කව්රුත් මාව අරන් යන්න හදලත් නෑ..

කරෝල ගඳට කෝමත් අවුල් කඩේ කරවල කිරද්දි මම අතට ශොපින් 1ක් දානව සමහරු කින්ඩියට “කන්ඩ හොදා අල්ලන්ඩ නරකයි” කිව්වම තාත්ත ඇතුලෙ ඉදන් කියනව “ඌ කන්නෙත් නෑ” කියලා සැමන් ඉව්වොත් එදාට කුස්සියට යන්නෑ. මුල්ම කාලෙන් පස්සෙ ගෙදර කව්රුවත් මට හොරෙන් කවන්ඩ උත්සාහ කරල නෑ

බිත්තර මේ වෙද්දි මම මිලියනය පහුකරල ඇති අත්සන් 21000ක් ගහපු රටේ බිත්තර මිලියනය මොකද්ද

බිත්තර බැදලානම් අදටත් 2ක් 3ක් ඕන මට තනියම, ඔම්ලට් නම් 4ක්

බිත්තර රොටි

බිත්තර ආප්ප

බිත්තර කොත්තු

බිත්තර රයිස්

කොහෙ ගියත් බිත්තරම තමා හැබැයි අදටත් ශරීරශක්තියෙන් කාටවත් දෙවැනි වෙලා නෑ. වැඩක් පටන් ගත්තම අනිත් එවුන් සේරම ඩල්උනත් මම අදිනව

“අඩෝ මේව එළවළු ඇගවල්” කිය කියා. සමහරු මගෙන් වෙජිටේරියන්ද ඇහුවම මමත් නෑ බිජුටේරියන් කියනව එතකොට පෙලක් එවුවො

”අඩේ උබට කුකුලගෙ කෑල්ල හොදනෑ පැටියා පිටින් ගිලින්න හොදයි නේද” අහනව එතකොට ” කන්න පුලුවන් උනානම් හරකෙක්වත් අතාරින්නෑ ඩෝ මම..” කියල ශේප් වෙනවා. හැබැයි පස්සෙ මම දැනගත්තා අපි කන බිත්තර ප්‍රාණය රහිත ඒවා බව.

දැන් තමා දරුණුම අවුල දරුවො දෙන්නට නොකවා ඉන්නද මට කන්න බෑ කියල..? මට මස්කඩේට යන්නත් බෑ මාළු කඩේට යන්නත් බෑ මොනා කරන්නද සල්ලි අතට දීල ප්‍රියබිරින්දෑ යවනෝ..

අපරාදෙ කියන්න බෑ ප්‍රියබිරිදෑ දන්නදා පටන් හොරෙන් කව්වන්ඩ උත්සාහ කරල නෑ මස්මාළු බෙදපු හැන්දෙන්වත් බෙදන්නෑ මට. එයා පුරුදු කරලා කරකරපු හාල්මැස්සොන්ගෙන් පටන් අරන් (දත් මදින්න ගන්න අඟුරු පදමට) දැන් වෙද්දි බැදපු සොසෙජස් එහෙම අව්ලක් නෑ අදටත් මාළු උයපු හට්ටියක්වත් බලන්න බෑ

මස්මාළු නොකෑම සමාර වෙලාවට හෙන පස්න. කඩේකට ගියාම විශේෂයෙන්ම රෑට කන්න දේවල් හරි අඩුයි. බිත්තරරොටි කන්න ලුණුමිරිස් ඉල්ලුවම වේටර්ල මූන දිහා බලන්⁣නෙ මං බින්තැන්නේ වැදි ගමකින් ආපු වන්නිලැත්තොගෙ ඥාතියෙක් වගේ. උගෙ මූනෙන් කිව්වෑකි ඌ හිතනව මූ හෙනම ගොඩයා කියලා. සැමන් දාල තියන රෝල්ස් එකක් “එපා” කිව්වම “හොදට ලොකු කෑලි දාල හදල තියෙන්නෙ කාල බලන්න මල්ලී..” කියනවා

දැන් ඔවැනි හේතූන් අටෝරාසියක් හන්දා ඒ පලිය මම එළවළු වලින් ගත්තා. මොකද මම මොකක්හරි එළවළුවක් කන්න බෑ කිව්වොත් තාත්තා ”තොට මසක් මාළුවක් කන්නත් බෑ තව තෝර තෝර කන්ඩ කාපිය මැරුම්නොකා මම පෙන්දො ජාතක කරල නෑ “‘ කියාන පිට පලන හින්දා මම ගහේවැලේ පොළව යට හැදෙන ඕනෙකක් කනෝ

අපේ තාත්ත හරිම ධාර්මිකයි කෙනෙක් කෑමකනකොට ගහන්න හොදනෑ කියන පුරාන සිරිත නූලටම අනුගමනය කරන කෙනෙක්

“හා කන්න බැරිනම් අතහෝද ගනින් ” කියලාඅත හේදුවට පස්සෙ නෙලනවා නෙලිල්ලා…ක්…. දවසක් දෙකක් කාල මම සීන් එක අල්ල ගත්ත එතකොට කරන්නෙ මැරුවත් කෑම එක බිමින් තියන්නෑ…

පස්සෙ තාත්ත කිව්ව “අකමැති දේ මුලින් කාල ඉවර කරපන්” මං ඒ ක්‍රමය අත්හදා බැලුවා.. ඒක පට්ට දැන් මං දරුවන්ටත් උගන්නන්නෙ

“අකමැති දේ මුලින්ම කාල ඉවර කරන්න”

තාත්ත ආශ්‍රිත කතාන්දර බොහෝමයි, කියන්න පුළුවන් දේවල් දවසක කියන්නම්..