අලුත උපන් දරුවෝ කියලා නේද හිතුවේ…? (වැල් වටාරම්)

 නෑ මේ ඉන්නේ බෝනික්කෝ.

මේ බෝනික්කෝ හැඳින්වෙන්නේ Reborn Babies එහෙමත් නැතිනම් යළි ඉපැදුණු ළදරුවෝ කියලා. Reborn Babies සංකල්පය මුලින්ම ලෝකෙට ආවේ 1990 දශකයේ. මේ හැම බෝනික්කෙක්ම එකිනෙකට වෙනස් විදිහට බොහෝම පරිස්සමෙන් නිර්මාණය කරලා තියෙනවා. Reborn Babies බෝනික්කෝ නිර්මාණය කරන නිර්මාණකරුවන්ව හැඳින්වෙන්නේ Reborners කියලා.

මේ අධියථාර්ථවාදී බෝනික්කෝ හැම එකකටම ඒ අයටම ආවේණික වුණු උපන් ළප, නහර වැල්, හිස කෙස්, චර්ම සිදුරු, කඳුළු සහ කෙළ තියෙනවා. ඒ විතරක් නෙමෙයි ගොඩාක් දියුණු බෝනික්කන්ට නම් හෘද ස්පන්ධනය, හුස්ම ගැනීම සහ සැබෑ ළදරුවෙක් කිරි උරා බීම සිදුකරන ආකාරය උත්පාදනය කරන ඉලෙක්ට්‍රොනික ක්‍රමවේදයක්ද තියෙනවා. මේ බෝනික්කෝ සාමාන්‍යයෙන් නිර්මාණය කරන්නේ Vinyl කියන ප්ලාස්ටික් විශේෂය යොදා ගනිමින්. ඒත් ළදරුවන්ට වඩාත් සමීප බෝනික්කෝ නිර්මාණය කරන්නේ සිලිකන්වලින් (Silicone). Reborn Babies බෝනික්කන්ගේ ඇහි බැමි නිර්මාණය කිරීමට මිනිස් හිස කෙස් යොදා ගන්නා අතර, සැබෑ ළදරුවන්ගෙන් වහනය වෙන “කිරි සුවඳ” මේ බෝනික්කන්ගෙනුත් නිකුත් කිරීමට සුවඳ විළවුන් වර්ගයක් යොදා ගන්නවා.

මේ බෝනික්කෙක් ආවාට ගියාට මිලට ගන්න බැහැ. ඒ සඳහා ඇත්ත දරුවෙක් දරුකමට හදා ගන්නකොට සිදුවිය යුතු ක්‍රමවේදයම අනුගමනය කරන්න වෙනවා. බෝනික්කා මිලට ගන්න කෙනාට “දරුවන් හදාගැනීමේ සහතිකයක්” (Adoption Certificate) වගේම බෝනික්කගේ උප්පැන්න සහිතකයකුත් හිමි වෙනවා.

මාතෘ රෝහල්වල සහ ළදරු සායනවල හෙදියන්ට ළමා ආරක්ෂණ කුසලතා ප්‍රායෝගික පුහුණුව දෙන්ඩ වගේම ඩිමෙන්ෂියාව වැනි රෝගවලින් පෙළෙන අයගේ බාධාකාරී හැසීරීම අවම කිරීම සඳහාද මේ Reborn Babies බෝනික්කෝ යොදා ගන්නවා. Reborn Babies බෝනික්කන්ගෙන් හිමිකරුවෝ බහුතරයක් දෙනා විනෝදාංශයක් වශයෙන් බෝනික්කෝ එකතු කරන අය වුණත්, ගබ්සාවීම්, නවජ මරණ (උපත ලබන විටදීම දරුවා මියගොස් තිබීම) හෝ දරුවෙක් දරුකමට හදා ගැනීමට අකමැති, එහෙත් දරුවන්ට කැමැති කාන්තාවන් මෙන්ම, Empty-nest syndrome (දරුවන් විවාහ වී වෙනම පදිංචියට යාම, දරුවන් නේවාසිකව ඉගෙනීමට යාම වැනි තත්ත්වයන් නිසා දුකට සහ කාන්සියට පත්ව සිටින මවුපියන් තුළ හට ගන්නා මානසික තත්ත්වයක්) නම් මානසික තත්ත්වයට මුහුණ දී ඇති මවුපියන්ද Reborn Babies බෝනික්කන් මිලට ගන්නවා.

(මේ ඡායාරූප හැම එකක්ම පෝලන්ත ජාතික Karolina Jonderko කියන ඡායාරූප ශිල්පිනිය විසින් ගත්තු ඒවා)

– අනිල් කරුණාරත්න –